1 ’E i muri a’era, ’ua haere atu ra te taea’e o Iareda (i teienei tē vai ra e va’u pahī i fa’aineinehia) i ni’a i te mou’a ’o tā rātou i topa i te i’oa ’o Selema, nō tōna ra teitei rahi, ’e ’ua fa’atahe ihora ’oia i te mau ’ōfa’i ri’i e hō’ē ’ahuru ’e ma ono nō roto mai i te mato ; e mea ’uo’uo ’e te ateate, ’oia ho’i e mea ateate mai te hi’o ra ; ’e ’ua hōpoi atu ’oia i te reira i roto i tōna rima i ni’a i te tupua’i mou’a ra, ’e ’ua ti’aoro fa’ahou atu ra i te Fatu, nā ’ō atu ra :

2 E te Fatu, ’ua parau a’enei ’oe ē, e ha’a’atihia mātou i te pape pu’e ra. I teienei, inaha, e te Fatu, ’eiaha ’oe e riri i tō tāvini nei nō tōna paruparu i mua ia ’oe na ; ’e ’ua ’ite pāpū ho’i mātou ē, e mea mo’a ’oe ’e tē pārahi nei ’oe i roto i te mau ra’i, ’e e mea ti’amā ’ore mātou i mua ia ’oe na ; nō te hi’ara’a ’ua vai ’ino noa ā tō mātou mau huru, ’āre’a rā e te Fatu, ’ua hōro’a mai ’oe i te hō’ē fa’auera’a ia mātou nei ’ia ti’aoro atu ia ’oe e ti’a ai, ’e nā roto ia ’oe e fāri’i ai mātou mai te au i tō mātou mau hina’aro.

3 Inaha, e te Fatu, ’ua tā’iri mai ’oe ia mātou nō tā mātou mau ’ohipa ’ī’ino, ’e ’ua tīahi haere noa ’oe ia mātou, ’e ’ua pārahi noa mātou i teie mau matahiti e rave rahi i roto i te mēdēbara ; ’āre’a rā ’ua aroha mai ’oe ia mātou. E te Fatu, ’a hi’o mai na ’oe iā’u nei ma te aroha, ’e ’a fa’afāriu ’ē atu i tō ’oe riri i tō ’oe nei mau ta’ata, ’e ’eiaha ’oe e vaiiho noa ia rātou ’ia haere atu i terā pae mai i teie nei moana ri’ari’a i roto i te pōiri ; ’a hi’o mai rā ’oe i teie nei mau mea ’o tā’u i fa’atahe nō roto mai i te mato.

4 ’E ’ua ’ite au, e te Fatu, tei ia ’oe na te mana pā’āto’a, ’e e ti’a ia ’oe ’ia rave i te mau mea ato’a ’o tā ’oe e hina’aro nō te maita’i o te ta’ata nei ; nō reira, ’a tāpe’a mai na ’oe i teie nei mau ’ōfa’i, e te Fatu, i tō ’oe manimani rima, ’e ’a fa’ariro i te reira ’ei mea ’ana’ana i roto i te pōiri ; ’ia ’ana’ana mai te reira i ni’a ia mātou i roto i te mau pahī ’o tā mātou i hāmani, ’ia roa’a ia mātou te māramarama ’a haere ai mātou nā ni’a i te moana.

5 Inaha, e te Fatu, e ti’a ia ’oe ’ia rave i te reira. ’Ua ’ite mātou e ti’a ia ’oe ’ia fa’a’ite mai i te mana rahi, ’āre’a rā e au ra ē e mea faufa’a ’ore te reira i te mana’o o te ta’ata nei.

6 ’E i muri a’era, ’ia oti a’era tā te taea’e o Iareda paraura’a i teie mau parau, inaha, ’ua fa’atoro mai ra te Fatu i tōna rima, ’e ’ua tāpe’a tāta’ihō’ē ihora i te mau ’ōfa’i i tōna manimani rima. ’E ’ua rave-’ē-hia atu ra te pāruru i te mata o te taea’e o Iareda, ’e ’ua ’ite atu ra ’oia i te manimani rima o te Fatu ; ’e ’ua au te reira i te manimani rima o te hō’ē ta’ata, te hō’ē ta’ata tino ’i’o ’e te toto ; ’e ’ua ma’iri ihora te taea’e o Iareda i raro i mua i te Fatu, nō te mea ’ua ro’ohia ho’i ’oia i te mata’u.

7 ’E ’ua ’ite a’era te Fatu ē ’ua ma’iri te taea’e o Iareda i raro, i ni’a i te repo, ’e ’ua nā ’ō mai ra te Fatu iāna : ’A ti’a mai i ni’a, nō te aha ho’i ’oe i ma’iri ai i raro ?

8 ’E ’ua nā ’ō atu ra ’oia i te Fatu : ’Ua ’ite au i te manimani rima o te Fatu, ’e ’ua mata’u ihora vau ’o te tā’iri mai ’oia iā’u ; ’e ’aita ho’i au i ’ite ē e tino ’i’o ’e te toto tō te Fatu.

9 ’E ’ua nā ’ō mai ra te Fatu iāna : Nō tō ’oe fa’aro’o i ’ite ai ’oe ē, e rave mai au i te tino ’i’o ’e te toto nō’u iho ; ’e ’aore roa e ta’ata i haere mai i mua iā’u ma te fa’aro’o rahi e au i tō ’oe na ; ’e ’āhiri ’aita te reira, ’aita ato’a ’oe e ’ite i tō’u manimani rima. ’Ua rahi atu ānei tō ’oe ’ite i teie ?

10 ’E ’ua pāhono atu ra ’oia : ’Aita roa ; e te Fatu, ’a fa’a’ite mai na ia ’oe iho iā’u nei.

11 ’E ’ua nā ’ō mai ra te Fatu iāna : E ti’aturi ānei ’oe i te mau parau ’o tā’u e parau atu ?

12 ’E ’ua pāhono atu ra ’oia : ’Ē, e te Fatu, ’ua ’ite ho’i au ē, tē parau nei ’oe i te parau mau, nō te mea e Atua ’oe nō te parau mau, ’e ’aita e ti’a ia ’oe ’ia ha’avare.

13 ’E ’ia fa’aoti a’era ’oia i te parau atu i teie mau parau, inaha, ’ua fa’a’ite mai ra te Fatu iāna iho iāna ra, ’e ’ua nā ’ō mai ra : Nō te mea ’ua ’ite ’oe i teie nei mau mea, ’ua fa’aorahia ïa ’oe i te hi’ara’a ; nō reira ’ua fa’aho’i-fa’ahou-hia mai ’oe i mua i tō’u aro ; nō reira tē fa’a’ite atu nei au iā’u iho ia ’oe na.

14 Inaha, ’o vau nei teie ’o tei fa’aineinehia mai te ha’amatara’a mai ā o te ao nei nō te fa’aora i tō’u ra mau ta’ata. Inaha, ’o vau ’o Iesu Mesia. ’O vau te Metua ’e te Tamaiti. Nā roto iā’u nei e fāri’i ai te mau ta’ata ato’a, ’oia ho’i, te feiā ato’a ’o tē ti’aturi i tō’u nei i’oa, i te ora, ’o tē vai noa ē a muri noa atu, ’e e riro ho’i rātou ’ei mau tamari’i tamāroa ’e ’ei mau tamari’i tamāhine nā’u.

15 ’E ’aita ā vau i fa’a’ite atu ra iā’u iho i te ta’ata ’o tā’u i hāmani, nō te mea ’aita roa ā e ta’ata i ti’aturi iā’u nei mai tā ’oe i nā reira. Tē ’ite ra ānei ’oe ē, ’ua hāmanihia ’oe mai te au i tō’u iho hōho’a ? ’Oia ïa, ’ua hāmanihia te mau ta’ata ato’a i te mātāmua roa ’ia au i tō’u iho hōho’a.

16 Inaha, teie nei tino tā ’oe e hi’o nei, ’o te tino ïa o tō’u vārua ; ’e ’ua hāmani au i te ta’ata ’ia au i te huru o te tino o tō’u ra vārua ; ’e mai te au i te huru ’o tā’u e fā mai nei i mua ia ’oe i te tino vārua, e fā ato’a atu vau i tō’u ra feiā mai te reira te huru i te tino ’i’o.

17 ’E i teienei, mai tā’u ’o Moroni i parau atu, ’aita roa e ti’a iā’u ’ia pāpa’i i te tā’āto’ara’a o te ’ā’amu nō teie mau mea i pāpa’ihia, nō reira, ’ua nava’i noa iā’u ’ia parau atu ē, ’ua fa’a’ite mai Iesu iāna iho i teie nei ta’ata i roto i te vārua, mai te au i te huru ’e te hōho’a o taua iho tino ra, mai tāna i fa’a’ite mai iāna iho i te mau ’āti Nephi.

18 ’E ’ua tauturu mai ’oia iāna mai tāna i tauturu mai i te mau ’āti Nephi ; ’e ’ua nā reira ’oia ’ia ’ite teie nei ta’ata ē, ’o te Atua ïa ’oia, nō te mau ’ohipa ta’a ’ē e rave rahi tā te Fatu i fa’a’ite mai iāna ra.

19 ’E nō tō teie nei ta’ata ’ite, ’aita roa ïa ’oia e ti’a ’ia tāpe’ahia ’ia ’ore ’ia ’ite atu i te tahi pae mai o te pāruru ; ’e ’ua ’ite ’oia i te manimani rima o Iesu, ’e i tōna ’itera’a atu, ’ua ma’iri ihora ’oia i raro ma te mata’u ; nō te mea ’ua ’ite ’oia ē, ’o te manimani rima teie o te Fatu ; ’e ’ua ’ore a’era tōna fa’aro’o, nō te mea ’ua ’ite mau ’oia, ma te fē’a’a ’ore.

20 Nō reira, nā roto i te fāri’ira’a i teie ’ite pāpū roa nō ni’a i te Atua, ’aita roa ïa ’oia e ti’a ’ia tāpe’ahia i te tahi pae mai o te pāruru ; nō reira ’ua hi’o ’oia ia Iesu, ’e ’ua tauturu mai ’oia iāna.

21 ’E i muri a’era, ’ua parau mai ra te Fatu i te taea’e o Iareda : Inaha, ’eiaha ’oe e fa’ati’a i teie mau mea tā ’oe i hi’o ’e i fa’aro’o ’ia tae atu i tō te ao nei, ē tae noa atu i te taime e fa’ahanahana ai au i tō’u i’oa i te tino ra ; nō reira, e tāpe’a māite ’oe i teie nei mau mea tā ’oe i hi’o ’e i fa’aro’o ra, ’e ’eiaha roa e fa’a’ite atu i te hō’ē noa atu ta’ata.

22 ’E inaha, ’ia haere mai ’oe i mua iā’u, e pāpa’i ’oe i te reira ’e e tāpiri ho’i i te reira, ’ia ’ore e ti’a i te hō’ē noa atu ta’ata ’ia ’īriti i te reira ; ’e e pāpa’i ho’i ’oe i te reira i te hō’ē reo ’o tē ’ore e ti’a ’ia tai’ohia.

23 ’E inaha, e hōro’a atu vau i teie nā ’ōfa’i e piti ia ’oe na, ’e e tāpiri ato’a ’oe i te reira ’e te mau mea tā ’oe e pāpa’i.

24 Inaha ho’i, te reo tā ’oe e pāpa’i, ’ua fa’ahuru-’ē-hia ïa e au ; nō reira, i tō’u iho tau mau, e fa’ariro vau i teie nei nā ’ōfa’i e piti ’ei ha’amāramarama i te mata o te ta’ata i teie mau mea tā ’oe e pāpa’i.

25 ’E ’ia oti a’era tā te Fatu paraura’a atu i teie nei mau parau, ’ua fa’a’ite mai ra ’oia i te taea’e o Iareda i te mau ta’ata pā’āto’a o te ao nei, ’o tei vai na, ’e ’o tē vai ato’a a muri atu ; ’e ’aita roa ’oia i tāpe’a i te reira ’ia ’ore tōna mata ’ia ’ite, ē tae noa atu i tō te mau hope’a o te ao nei.

26 I parau na ho’i ’oia iāna i te mau taime nā mua atu, ’e mai te mea e ti’aturi ’oia iāna, ’e e ti’a iāna ’ia fa’a’ite mai i te mau mea ato’a iāna—e fa’a’itehia ïa iāna ; nō reira, e’ita roa te Fatu e tāpe’a i te hō’ē mea ’ia ’ore ’oia ’ia ’ite atu, ’e ’ua ’ite ho’i ’oia ē, e ti’a i te Fatu ’ia fa’a’ite mai i te mau mea ato’a iāna ra.

27 ’E ’ua nā ’ō mai ra te Fatu iāna : ’A pāpa’i i teie nei mau mea ’e ’a tāpiri māite i te reira ; ’e e fa’a’ite atu vau i te reira i tō’u iho tau mau i te mau tamari’i a te ta’ata nei.

28 ’E i muri a’era, ’ua fa’aue mai ra te Fatu iāna ’ia tāpiri ’oia i nā ’ōfa’i e piti o tāna i fāri’i, ’e ’eiaha roa e fa’a’ite noa atu, ē tae noa atu i te tau e fa’a’ite mai ai te Fatu i te reira i te mau tamari’i a te ta’ata nei.