Kapitulo 4
Si Moroni ginsugo sa pagselyo sang mga sinulatan sang utod ni Jared—Indi pag-ipahayag ang mga ini tubtob nga ang mga tawo makaangkon sing pagtuo bisan pareho sa utod ni Jared—Si Cristo nagasugo sa mga tawo nga magpati sa Iya mga pulong kag sinang halin sa Iya mga disipulo—Ang mga tawo ginasugo nga maghinulsol, magpati sa ebanghelyo, kag maluwas.
1 Kag ginsugo sang Ginuo ang utod ni Jared nga magdulhog sa bukid halin sa presensya sang Ginuo, kag isulat ang mga butang nga iya nakita; kag gindumilian ang mga ini nga mapahayag sa mga anak sang katawhan tubtob pagkatapos nga mabayaw sia sa krus; kag sa sini nga kabangdanan gintago ni haring Mosias ang mga ini, agud nga indi mapahayag ang mga ini sa kalibutan tubtob pagkatapos nga ipakita ni Cristo ang iya kaugalingon sa iya katawhan.
2 Kag pagkatapos nga si Cristo matuod gid nga nagpakita sang iya kaugalingon sa iya katawhan nagsugo sia nga ipahayag ang mga ini.
3 Kag karon, pagkatapos sina, nag-usmod sila tanan sa pagkawala’y pagtuo; kag wala na sing nabilin luwas lang sa mga Lamanhon, kag ginsikway nila ang ebanghelyo ni Cristo; gani ginsugo ako nga taguon liwat ang mga ini sa duta.
4 Tan-awa, ginsulat ko sa sining mga lamina ang mga butang gid mismo nga nakita sang utod ni Jared; kag wala na sing mas dalagko pa nga mga butang nga ginpakita sangsa sadtong mga ginpakita sa utod ni Jared.
5 Gani ginsugo ako sang Ginuo nga isulat ang mga ini; kag ginsulat ko ang mga ini. Kag ginsugo niya ako nga selyohan ko ang mga ini; kag nagsugo man sia nga selyohan ko ang pagpatpat sini; gani ginselyohan ko ang mga instrumento sa paglubad, suno sa kasugoan sang Ginuo.
6 Kay ang Ginuo nagsiling sa akon: Indi pag-ipahayag ang mga ini sa mga Gentil tubtob sa adlaw nga maghinulsol sila sang ila kalainan, kag mangin matinlo sa atubang sang Ginuo.
7 Kag sa sina nga adlaw nga magpakita sila sing pagtuo sa akon, siling sang Ginuo, bisan pareho sang ginhimo sang utod ni Jared, agud nga mapakabalaan sila sa akon, dayon ipahayag ko sa ila ang mga butang nga nakita sang utod ni Jared, bisan sa paghumlad sa ila sang tanan ko nga rebelasyon, siling ni Jesucristo, ang Anak sang Dios, ang Amay sang mga langit kag sang duta, kag sang tanan nga butang nga yara sa mga ini.
8 Kag sia nga magapakigbato batok sa pulong sang Ginuo, pagasumpaon sia; kag sia nga magapanghiwala sining mga butang, pagasumpaon sia; kay sa ila indi ko pag-ipakita ang dalagko nga mga butang, siling ni Jesucristo; kay ako amo sia nga nagahambal.
9 Kag sa akon sugo ang mga kalangitan mabuksan kag matakpan; kag sa akon pulong ang duta magauyog; kag sa akon sugo ang mga pumuluyo sini magataliwan, bisan pa paagi sa kalayo.
10 Kag sia nga wala nagapati sa akon mga pulong wala nagapati sa akon mga disipulo; kag kon matuod nga wala ako maghambal, kamo ang maghukom; kay mahibal-an ninyo nga ako amo sia nga nagahambal sa katapusan nga adlaw.
11 Apang sia nga nagapati sa sining mga butang nga akon ginhambal, sia akon pagabisitahan paagi sa mga pagpahayag sang akon Espiritu, kag makahibalo sia kag magapamatuod. Kay tungod sang akon Espiritu mahibal-an niya nga ining mga butang matuod; kay nagakumbinsi ini sa mga tawo sa paghimo sang maayo.
12 Kag ang bisan ano nga butang nga nagakumbinsi sa mga tawo sa paghimo sang maayo halin sa akon; kay ang maayo wala nagahalin sa kon kay sin-o luwas lang sa akon. Ako ang amo man nga nagatuytuy sa mga tawo sa tanan nga maayo; sia nga indi magpati sa akon mga pulong indi magpati sa akon—nga ako amo sia; kag sia nga indi magpati sa akon indi magpati sa Amay nga nagpadala sa akon. Kay tan-awa, ako ang Amay, ako ang kasanag, kag ang kabuhi, kag ang kamatuoran sang kalibutan.
13 Magpalapit sa akon, O kamo nga mga Gentil, kag ipakita ko sa inyo ang mas dalagko nga mga butang, ang ihibalo nga natago tungod sang pagkawala’y pagtuo.
14 Magpalapit sa akon, O kamo nga panimalay ni Israel, kag ipahayag sa inyo kon ano kadako nga mga butang ang ginpahamtang sang Amay para sa inyo halin pa sa pagtuga sang kalibutan; kag wala ini ginpahayag sa inyo tungod sang pagkawala’y pagtuo.
15 Tan-awa, kon gision ninyo inang belo sang pagkawala’y pagtuo nga amo ang gintunaan sang pagpabilin ninyo sa inyo makahaladlok nga kahimtangan sang kalainan, kag katig-a sang tagipusuon, kag kabulag sang kaisipan, dayon ang dalagko kag dalayawon nga mga butang nga natago halin pa sa pagtuga sang kalibutan halin sa inyo—huo, kon magpanawag kamo sa Amay sa akon ngalan, nga may masinulub-on nga tagipusuon kag mahinulsulon nga espiritu, dayon mahibal-an ninyo nga nadumduman sang Amay ang kasugtanan nga iya ginhimo sa inyo mga amay, O panimalay ni Israel.
16 Kag dayon ang akon mga rebelasyon nga ginpasulat ko sa akon alagad nga si Juan ihumlad sa mga mata sang tanan nga katawhan. Dumduma, kon makita ninyo ining mga butang, mahibal-an ninyo nga ang tion malapit na nga ipahayag ang mga ini sa pagkamatuod.
17 Gani, kon mabaton ninyo ining kasulatan mahibal-an ninyo nga ang buluhaton sang Amay nagsugod na sa bug-os nga ibabaw sang kadutaan.
18 Gani, maghinulsol tanan kamo nga yara sa mga punta sang kalibutan, kag magpalapit sa akon, kag magpati sa akon ebanghelyo, kag magpabunyag sa akon ngalan; kay sia nga nagapati kag nabunyagan maluwas; apang sia nga wala nagapati pagasilotan; kag ang mga tanda magasunod sa ila nga nagapati sa akon ngalan.
19 Kag bulahan sia nga makit-an nga tampad sa akon ngalan sa katapusan nga adlaw, kay pagabayawon sia agud magpuyo sa ginharian nga ginhanda para sa iya halin pa sa pagtuga sang kalibutan. Kag tan-awa ako amo sia nga naghambal sini. Amen.