1 ’E ’ua fa’aue mai ra te Fatu i te taea’e o Iareda ’ia pou atu i raro i te mou’a mai mua atu i te aro o te Fatu, ’e ’ia pāpa’i i te mau mea tāna i hi’o na ; ’e ’ua ’ōpanihia te reira ’ia fa’ataehia atu i te mau tamari’i a te ta’ata nei, e tae roa atu i muri iho i te tau e fa’ateiteihia ai ’oia i ni’a i te sātauro ; ’e ’o te reira ho’i te tumu i tāpe’a noa ai te ari’i ra o Mosia i te reira, ’ia ’ore te reira ’ia tae i tō te ao ē tae noa atu i te tau e fa’a’ite mai ai te Mesia iāna iho i tōna ra mau ta’ata.

2 ’E i muri iho i tō te Mesia fa’a’itera’a mai iāna iho i tōna ra mau ta’ata, ’ua fa’aue mai ’oia ’ia fa’a’itehia atu te reira.

3 ’E i teienei, i muri a’e i te reira, ’ua paruparu tō rātou ato’a fa’aro’o ; ’e ’aore roa e ta’ata toe, maori rā te mau ’āti Lamana, ’e ’ua pāto’i rātou i te ’evanelia a te Mesia ; nō reira ’ua fa’auehia vau ’ia huna fa’ahou i te reira i raro i te fenua.

4 Inaha, ’ua pāpa’i au i ni’a i teie mau ’api i taua iho mau mea tā te taea’e o Iareda i hi’o ra ; ’e mai te mātāmua mai ā ’aita atu e mau mea i fa’a’itehia mai ’o tei hau atu i te rahi i te reira ’o tei fa’a’itehia mai i te taea’e o Iareda.

5 Nō reira ’ua fa’aue mai te Fatu iā’u ’ia pāpa’i i te reira ; ’e ’ua pāpa’i au i te reira. ’E ’ua fa’aue mai ’oia iā’u ’ia tāpiri i te reira ; ’e ’ua fa’aue ato’a mai ’oia iā’u ’ia tāpiri i te ’īritira’a nō te reira ; nō reira ’ua tāpiri vau i te mau ’īriti parau ; mai te au i te fa’auera’a a te Fatu.

6 ’Ua parau mai ho’i te Fatu iā’u : E ’ore roa te reira e tae i te mau ’Ētene ē tae noa atu i te mahana e tātarahapa ai rātou i tā rātou mau ’ohipa ’ī’ino, ’e e riro ai ’ei feiā mā i mua i te Fatu.

7 ’E tē nā ’ō mai ra te Fatu, ’ei taua mahana ra ’a ti’aturi mai ai rātou iā’u nei, mai te taea’e o Iareda i ti’aturi mai iā’u ra, ’ia riro rātou ’ei feiā ha’amo’ahia i roto iā’u nei, ’ei reira vau e fa’a’ite atu ai ia rātou i te mau mea tā te taea’e o Iareda i ’ite, ē tae noa atu i te tātarara’a atu i tā’u mau heheura’a ato’a ia rātou, tē nā reira mai ra ho’i Iesu Mesia, te Tamaiti a te Atua, te Metua o te mau ra’i ’e te fenua nei, ’e te mau mea ato’a i roto ra.

8 ’E ’o ’oia ’o tē mārō atu i te parau a te Fatu ra, ’ia ’anatemahia ’oia ; ’e ’o ’oia ’o tē huna i teie nei mau mea ra, ’ia ’anatemahia ’oia ; ’e e ore ho’i au e fa’a’ite atu i te mau mea rahi a’e ia rātou, tē nā reira mai ra Iesu Mesia ; ’e ’o vau ho’i ïa teie e parau nei.

9 ’E nā roto i tā’u nei parau, ’ua vētea a’era te mau ra’i ’e ’ua tāmauhia ; ’e nā roto i tā’u nei parau e ’āueue te fenua ; ’e nā roto i tā’u nei parau e ha’amouhia te mau ta’ata o te fenua nei, mai te mea ra ē, nā roto i te auahi.

10 ’E ’o ’oia ’o tei ’ore i ti’aturi i tā’u nei mau parau, ’aita ato’a ïa ’oia i ti’aturi i tā’u mau pipi ; ’e mai te mea ’o vau iho ānei teie e parau nei, nā ’outou iho ïa e hi’o ; ’e e ’ite ho’i ’outou ē, ’o vau iho teie i parau atu, ’ia tae i te mahana hope’a ra.

11 ’E ’o ’oia ’o tē ti’aturi i te mau mea tā’u i parau ra, e tauturu ïa vau iāna nā roto i te mau fa’a’itera’a a tō’u ra Vārua, ’e e ’ite ’oia ’e e fa’a’ite atu ho’i ’oia. Nō tō’u ho’i Vārua ’oia e ’ite ai ē, e parau mau teie nei mau mea ; ’e nā te reira e fa’aitoito i te ta’ata ’ia rave i te ’ohipa maita’i.

12 ’E te mau mea ’o tē arata’i i te ta’ata ’ia rave i te ’ohipa maita’i, nō roto atu ïa iā’u nei ; ’aore ho’i te maita’i e tae mai nā roto i te hō’ē noa atu ta’ata, maori rā nā roto atu iā’u nei. ’O vau nei ho’i ’o tē arata’i nei i te mau ta’ata i te mau mea maita’i ato’a ; ’o ’oia ’o tē ’ore e ti’aturi i tā’u nei mau parau, e ’ore ato’a ïa ’oia e ti’aturi iā’u nei—’oia ho’i, tē vai mau nei au ; ’e ’o ’oia ’o tē ’ore e ti’aturi iā’u nei, e ’ore ato’a ïa ’oia e ti’aturi i te Metua ’o tei tono mai iā’u nei. Inaha ho’i, ’o vau te Metua, ’o vau te māramarama, ’e te ora, ’e te parau mau o te ao nei.

13 ’A haere mai iā’u nei, e te mau ’Ētene ē, ’e e fa’a’ite atu vau ia ’outou i te tahi mau mea rahi a’e, te ’ite ’o tei hunahia nō te ti’aturi ’ore.

14 ’A haere mai iā’u nei, ’e te ’utuāfare o ’Īserā’ela ē, ’e e fa’a’itehia atu ia ’outou te mau mea rarahi tā te Metua i fa’aineine mai te ha’amatara’a mai ā o te ao nei nō ’outou ; ’e ’aita te reira i tae mai ia ’outou nō te ti’aturi ’ore.

15 Inaha, ’ia pāhae atu ’outou i te pāruru nō te ti’aturi ’ore ’o tei tāpe’a noa ia ’outou i roto i tō ’outou ti’ara’a ri’ari’a nō te ’ohipa ’ī’ino, ’e te ’ā’au ’eta’eta, ’e te mana’o pōiri, ’ei reira ’outou e ’ite ai i te mau mea rarahi ’e te māere i hunahia ia ’outou mai te ha’amatara’a mai ā o te ao nei—’oia ïa, ’ia ti’aoro atu ’outou i te Metua i tō’u ra i’oa ma te ’ā’au ’oto e te vārua tātarahapa, ’ei reira ’outou e ’ite ai ē ’ua ha’amana’o te Metua i te fafaura’a tāna i fafau i tō ’outou ra mau metua, e te ’utuāfare o ’Īserā’ela ē.

16 ’E i reira tā’u mau heheura’a, ’o tā’u i fa’aue atu i tō’u tāvini ra ia Ioane ’ia pāpa’i, e hōhorahia atu ai i mua i te mata o te mau ta’ata ato’a. ’A ha’amana’o, ’ia ’ite ana’e ’outou i teie nei mau mea, ’ei reira ’outou e ’ite ai ē, ’ua fātata te tau e fa’a’ite-mau-hia ai te reira.

17 Nō reira, ’ia fāri’i ’outou i teie nei pāpa’a parau ’ei reira ’outou e ’ite ai ē, ’ua ha’amata te ’ohipa a te Metua i ni’a i te fenua nei.

18 Nō reira, ’a tātarahapa, e tō te mau hope’a ato’a o te fenua nei, ’e ’a haere mai iā’u nei, ’e ’a ti’aturi i tā’u nei ’evanelia, ’e ’ia bāpetizohia i tō’u ra i’oa ; ’e ’o ’oia ’o tē ti’aturi ’e ’ua bāpetizohia e fa’aorahia ïa ; ’āre’a rā ’o ’oia ’o tē ’ore e ti’aturi e fa’ahapahia ïa ; ’e e pe’e atu te mau tāpa’o nā muri ia rātou ’o tē ti’aturi i tō’u ra i’oa.

19 ’E e ao tōna ’o tei ’itea tōna ha’apa’o maita’i i te mahana hope’a ra, e fa’ateiteihia ho’i ’oia ’ia pārahi i roto i te bāsileia i fa’aineinehia nōna mai te ha’amatara’a mai ā o te ao nei. ’E inaha, ’o vau ho’i tei parau na i te reira. ’Āmene.