1 ’E i teienei, e pāpa’i au, ’o Moroni, i te pāpa’a parau o Iareda ’e tōna ra taea’e.

2 I te mea ē, i muri a’era, ’ia oti a’era te Fatu i te fa’aineine i te mau ’ōfa’i tā te taea’e o Iareda i hōpoi i ni’a i te mou’a ra, ’ua pou mai ra te taea’e o Iareda i raro mai te mou’a mai ra, ’e ’ua tu’u atu ra ’oia i te mau ’ōfa’i i roto i te mau pahī i hāmanihia, hō’ē ’ōfa’i i nā pae hope’a o te reira ; ’e inaha, ’ua ha’amāramarama mai ra te reira i te mau pahī.

3 ’E ’ua nā reira te Fatu i te rave i te mau ’ōfa’i ’ia ’ana’ana i roto i te pōiri, ’ia roa’a te māramarama i te mau tāne, ’e te mau vahine, ’e te mau tamari’i, ’e ’ia ’ore rātou ’ia haere i te tahi pae mai i te mau pape rahi nā roto i te pōiri.

4 ’E i muri a’era, i muri iho i tō rātou fa’aineinera’a i te mau huru mā’a ato’a, ’ia ti’a ia rātou ’ia ora noa i ni’a i te miti, ’e te mā’a ato’a nā tā rātou mau nana māmoe ’e mau nana pua’atoro, ’e te mau pua’a, ’e te mau ’ānimara, ’e te mau manu pererau tā rātou e hōpoi nā muri ia rātou—’e i muri a’era, ’ia oti a’era teie mau mea ato’a i te ravehia, ’ua haere atu ra rātou i roto i tō rātou mau pahī, ’e ’ua fano atu ra nā ni’a i te moana, ’e ’ua tu’u a’era rātou ia rātou iho i te Fatu tō rātou Atua.

5 ’E i muri a’era, ’ua ha’afarara mai ra te Fatu te Atua i te hō’ē mata’i rahi roa i ni’a iho i te miti, ma te haere ti’a atu i te fenua i fafauhia ra ; ’e ’ua nā reira rātou i te tere tāhurihuri noa i ni’a i te mau ’are miti i mua i te mata’i.

6 ’E i muri a’era, e rave rahi taime ’ua hutihia rātou i raro i te mau vāhi hōhonu o te moana, nō te mau ’are miti teitei mai te mou’a tei fati mai i ni’a iho ia rātou ra, ’e nō te mau vero rahi ’e te ri’ari’a ho’i tei fa’atupuhia e te mata’i pūai rahi.

7 ’E i muri a’era, i tō rātou hutira’ahia i roto i te hōhonu o te moana, ’aita te miti i ha’ape’ape’a ia rātou, nō te mea ’ua piri maita’i tō rātou mau pahī mai te ’āu’a ra, ’e ’oia ato’a ’ua piri maita’i ho’i te reira mai te pahī o Noa ra ; nō reira ’ia ha’a’atihia rātou e te moana rahi, ’ua ti’aoro atu rātou i te Fatu, ’e ’ua fa’aho’i mai ’oia ia rātou i ni’a roa a’e i te mau pape.

8 ’E i muri a’era, ’aita roa te mata’i i fa’aea i te puhipuhi noa e tae atu i te fenua i fafauhia ra, ’a vai noa ai rātou i ni’a i te moana ; ’e ’ua nā reira rātou i te tūra’ihia i mua i te mata’i.

9 ’E ’ua hīmene noa rātou i te mau hīmene ’ārue i te Fatu ; ’oia ïa, ’ua hīmene te taea’e o Iareda i te hīmene ’ārue i te Fatu, ’e ’ua ha’amāuruuru atu ra ’oia i te Fatu i te tā’āto’ara’a nō te mahana, ’e ’ia tae mai te pō ra, ’aita rātou i fa’aea i te ’ārue atu i te Fatu.

10 ’E ’ua nā reira rātou i te tūra’i-noa-hia ; ’e ’aita roa e ti’a i te mau mea taehae o te moana ’ia ha’apararī ia rātou, ’e ’aita ato’a e ti’a i te tohorā ia ha’ape’ape’a ia rātou ; ’e ’ua māramarama noa rātou, nā ni’a ānei rātou i te moana ’e ’aore rā nā raro i te moana.

11 ’E ’ua nā reira rātou i te tūra’i-noa-hia e toru hānere ’e maha ’ahuru ’e ma maha mahana i ni’a i te moana.

12 ’E ’ua tāpae atu ra rātou i tahatai i te fenua i fafauhia ra. ’E ’ia ta’ahi a’era tō rātou ’āvae i tahatai i ni’a i te fenua i fafauhia ra, ’ua pi’o ihora rātou i raro i ni’a i te fenua, ’e ’ua fa’aha’eha’a atu ra ia rātou iho i mua i te Fatu, ’e ’ua tahe ihora tō rātou roimata nō te ’oa’oa i mua i te Fatu, nō te rahi o tōna ra aroha ia rātou.

13 ’E i muri a’era, ’ua haere atu ra rātou i ni’a i te fenua, ’e ’ua ha’amata a’era i te fa’a’apu i te fenua.

14 E to’omaha tamari’i tamāroa tā Iareda, ’e ’ua ma’irihia tō rātou i’oa ’o Iakoma, Giliga, Maha, ’e Oriha.

15 ’E ’ua fānau ato’a te taea’e o Iareda i te mau tamari’i tamāroa ’e te mau tamari’i tamāhine.

16 E piti ’ahuru ’e ma piti hoa tō Iareda ’e tō tōna taea’e ; ’e ’ua fānau ato’a rātou i te mau tamari’i tamāroa ’e te mau tamari’i tamāhine, hou rātou i tae mai ai i te fenua i fafauhia ra ; ’e nō reira ’ua rahi roa a’era rātou.

17 ’E ’ua ha’api’ihia rātou ’ia haere ma te ha’eha’a i mua i te Fatu ; ’e ’ua ha’api’i-ato’a-hia rātou mai ni’a mai.

18 ’E i muri a’era, ’ua purara a’era rātou i ni’a i te fenua ē ’ati noa a’e, ’e ’ua fānau rahi rātou i te tamari’i, ’e ’ua fa’a’apu rātou i te fenua ; ’e ’ua riro rātou ’ei feiā pūai i ni’a i te fenua.

19 ’E ’ua ha’amata ihora te taea’e o Iareda i te ruhiruhiā, ’e ’ua ’ite a’era ’oia ē ’ua fātata roa ’oia i te pohe ; nō reira ’ua parau atu ra ’oia ia Iareda : ’Ia ha’aputuputu ’āmui mai tāua i tō tāua mau ta’ata ’ia ti’a ia tāua ’ia tai’o ia rātou, ’e ’ia ’ite tāua i tā rātou i hina’aro ia tāua nā mua tāua e pohe atu ai.

20 ’E ’ia au i te reira ’ua ha’aputuputu-’āmui-hia mai te mau ta’ata. I teienei te rahi o te mau tamari’i tamāroa ’e te mau tamari’i tamāhine a te taea’e o Iareda e piti ’ahuru ’e ma piti ïa ta’ata ; ’e te rahi o te mau tamari’i tamāroa ’e te mau tamari’i tamāhine a Iareda hō’ē ’ahuru ’e ma piti ïa, ’e e maha ho’i tāna tamari’i tamāroa.

21 ’E i muri a’era, ’ua tai’o rāua i tō rāua mau ta’ata ; ’e i muri iho i tō rāua tai’ora’a ia rātou, ’ua ui atu ra rāua ia rātou i te mau mea tā rātou i hina’aro ia rāua ’ia rave nō rātou hou rāua e pohe atu ai.

22 ’E i muri a’era, ’ua ani mai ra taua feiā ra ia rāua ’ia fa’atāhinuhia te hō’ē o tā rāua mau tamari’i tamāroa ’ei ari’i nō rātou.

23 ’E i teienei inaha, e mea ’oto roa te reira ia rāua. ’E ’ua parau atu ra te taea’e o Iareda ia rātou : ’Oia mau, nā teie mea e arata’i ia ’outou i roto i te fa’atītīra’a.

24 ’Āre’a rā ’ua parau mai ra Iareda i tōna taea’e : ’A vaiiho noa ia rātou ’ia mā’iti i te hō’ē ari’i. ’E nō reira ’ua parau atu ra ’oia ia rātou : ’A mā’iti ’outou i te hō’ē ari’i nō rotopū atu i tā māua nei mau tamari’i tamāroa, mai te au i tō ’outou na hina’aro.

25 ’E i muri a’era, ’ua mā’iti ihora rātou i te matahiapo a te taea’e o Iareda ; ’e tōna i’oa ’o Pagaga. ’E i muri a’era, ’ua pāto’i ’oia ’e ’aita ’oia i hina’aro ’ia riro ’ei ari’i nō rātou. ’E ’ua tītau mai ra te mau ta’ata i tōna metua tāne ’ia fa’ahepo iāna ’ia riro ’ei ari’i nō rātou ; ’aita rā tōna metua tāne i hina’aro ’ia nā reira ; ’e ’ua fa’aue atu ra ’oia ia rātou ’eiaha roa rātou e fa’ahepo i te hō’ē ta’ata ’ia riro ’ei ari’i nō rātou.

26 ’E i muri a’era, ’ua mā’iti a’era rātou i te mau taea’e ato’a o Pagaga, ’e ’aita roa rātou i hina’aro.

27 ’E i muri a’era, ’aita ato’a te mau tamari’i tamāroa a Iareda i hina’aro, maori rā te hō’ē ana’e ; ’e ’ua fa’atāhinuhia a’era Oriha ’ei ari’i nō te mau ta’ata.

28 ’E ’ua ha’amata ihora ’oia i te fa’atere, ’e ’ua manuia rahi ihora te mau ta’ata ; ’e ’ua riro rātou ’ei feiā tao’a rahi roa.

29 ’E i muri a’era, ’ua pohe ihora Iareda, ’e tōna taea’e ato’a ho’i.

30 ’E i muri a’era, ’ua haere Oriha ma te ha’eha’a i mua i te Fatu, ’e ’ua ha’amana’o māite ihora ’oia i te mau mea rahi tā te Fatu i rave nō tōna ra metua tāne, ’e ’ua ha’api’i ato’a ho’i ’oia i tōna mau ta’ata i te mau mea rahi tā te Fatu i rave nō tō rātou mau metua.