1 Kag natabo ini nga ginpatuman ni Orihas ang paghukom sa pagkamatarong sa kadutaan sa bug-os niya nga mga adlaw, nga ang amo nga mga adlaw tuman kadamo.

2 Kag nangin amay sia sang mga anak nga lalaki kag mga anak nga babayi; huo, nangin amay sia sing treinta’y uno, nga sa sini amo ang beynte tres ka anak nga lalaki.

3 Kag natabo ini nga nangin amay man sia ni Kib sa iya katigulangon. Kag natabo ini nga si Kib ang naggahum bulos sa iya; kag si Kib nangin amay ni Corihor.

4 Kag sang si Corihor treinta’y dos ka tuig nagrebelde sia batok sa iya amay, kag nagkadto kag nagpuyo sa duta sang Nehor; kag nangin amay sia sang mga anak nga lalaki kag mga anak nga babayi, kag nangin tuman sila kaanyag; gani napasunod ni Corihor ang madamo nga katawhan sa iya.

5 Kag sang nakatipon sia sang kasoldadohan nagtaklad sia sa duta sang Moron kon diin ang hari nagapuyo, kag gindala sia nga bihag nga nagpahanabo sang ginhambal sang utod ni Jared nga dal-on sila sa pagkabihag.

6 Karon ang duta sang Moron, kon diin ang hari nagapuyo, malapit sa duta nga ginatawag nga Kamingaw sang mga Nefinhon.

7 Kag natabo ini nga si Kib nagpuyo sa pagkabihag, kag ang iya katawhan sa idalom ni Corihor nga iya anak, tubtob nga nangin tuman na sia katigulang; apang si Kib nangin amay ni Shul sa iya katigulangon samtang yara pa sia sa pagkabihag.

8 Kag natabo ini nga si Shul naakig sa iya utod; kag si Shul nagbakod, kag nangin gamhanan suno sa kusog sang tawo; kag gamhanan man sia sa paghukom.

9 Gani, nagkadto sia sa bungyod sang Efraim, kag nagpangtunaw sia halin sa bungyod, kag naghimo sang mga espada halin sa salsalon para sa mga napasunod niya sa iya; kag pagkatapos nga naarmasan niya sila sing mga espada nagbalik sia sa siyudad nga Nehor, kag nakig-away sa iya utod nga si Corihor, nga sa amo nga paagi naangkon niya ang ginharian kag ginpanumbalik ini sa iya amay nga si Kib.

10 Kag karon tungod sang butang nga ginhimo ni Shul, ginhatag sa iya sang iya amay ang ginharian; gani nagsugod sia sa paggahum bulos sa iya amay.

11 Kag natabo ini nga ginpatuman niya ang paghukom sa pagkamatarong; kag ginpasangkad niya ang iya ginharian sa bug-os nga ibabaw sang kadutaan kay ang katawhan nangin tuman kadamo.

12 Kag natabo ini nga si Shul nangin amay man sang madamo nga anak nga lalaki kag mga anak nga babayi.

13 Kag si Corihor naghinulsol sang madamo nga kalainan nga iya ginhimo; gani ginhatagan sia ni Shul sing gahum sa iya ginharian.

14 Kag natabo ini nga si Corihor may madamo nga anak nga lalaki kag anak nga babayi. Kag sa mga anak nga lalaki ni Corihor may isa nga ang ngalan amo si Noe.

15 Kag natabo ini nga si Noe nagrebelde batok kay Shul, ang hari, kag amo man sa iya amay nga si Corihor, kag napasunod si Cohor nga iya utod, kag amo man ang tanan niya nga kauturan kag madamo sa katawhan.

16 Kag nakig-away sia kay Shul, ang hari, nga sa diin naangkon niya ang duta sang ila una nga ginpanubli; kag nangin hari sia sa sina nga bahin sang kadutaan.

17 Kag natabo ini nga nakig-away sia liwat kay Shul, ang hari; kag gindakop niya si Shul, ang hari, kag gindala sia nga bihag padulong sa Moron.

18 Kag natabo ini, sang nagahana na nga ipapatay niya sia, ang mga anak nga lalaki ni Shul patago nga nagsulod sa balay ni Noe sa gab-i kag ginpatay sia, kag ginbungkal ang puwertahan sang bilanggoan kag gindala pagwa ang ila amay, kag ginpapungko sia sa iya trono sa iya kaugalingon nga ginharian.

19 Gani, ginpauswag sang anak ni Noe ang iya ginharian bulos sa iya; apang wala na sila naggahum pa kay Shul nga hari, kag ang katawhan nga yara sa idalom sang pagginahum ni Shul nga hari nag-uswag sing tuman kag nangin gamhanan.

20 Kag ang pungsod natunga; kag may duha ka ginharian, ang ginharian ni Shul, kag ang ginharian ni Cohor, ang anak ni Noe.

21 Kag si Cohor, ang anak ni Noe, nagpahanabo nga ang iya katawhan magpakig-away kay Shul nga sa diin ginpierde sila ni Shul kag ginpatay si Cohor.

22 Kag karon si Cohor may isa ka anak nga lalaki nga ginahingalanan kay Nimrod; kag gintugyan ni Nimrod ang ginharian ni Cohor kay Shul, kag naangkon niya ang kahamuot sa mga mata ni Shul; gani ginhatagan sia ni Shul sang madamo nga pagpasulabi, kag ginhimo niya sa ginharian ni Shul ang suno sa iya mga naluyagan.

23 Kag sa pagginahum man ni Shul may nag-abot nga mga propeta sa katawhan, nga ginpadala halin sa Ginuo, nga nagapropesiya nga ang kalainan kag pagsimba sa mga dios-dios sang katawhan nagadala sang sumpa sa kadutaan, kag pagalaglagon sila kon indi sila maghinulsol.

24 Kag natabo ini nga ang katawhan nagpasipala batok sa mga propeta, kag nagyaguta sa ila. Kag natabo ini nga si haring Shul nagpatuman sang paghukom batok sa tanan sinang mga nagpasipala batok sa mga propeta.

25 Kag nagpatuman sia sang layi sa bug-os nga kadutaan nga naghatag sing gahum sa mga propeta nga makakadto sila bisan diin nga ila luyag; kag sa sini nga kabangdanan ang katawhan nadala padulong sa paghinulsol.

26 Kag tungod ang katawhan naghinulsol sang ila mga kalainan kag mga pagsimba sa mga dios-dios ginkaluoyan sila sang Ginuo, kag nagsugod sila sa pag-uswag liwat sa kadutaan. Kag natabo ini nga si Shul nangin amay sang mga anak nga lalaki kag mga anak nga babayi sa iya katigulangon.

27 Kag wala na sing mga giyera pa sa mga adlaw ni Shul; kag gindumdum niya ang dalagko nga mga butang nga ginhimo sang Ginuo para sa iya mga amay sa pagdala sa ila patabok sa dako nga kadadalman padulong sa duta nga ginpanaad; gani ginpatuman niya ang paghukom sa pagkamatarong sa tanan niya nga mga adlaw.