1 ’E i muri a’era, ’ua fānau a’era tāna ’o Omera, ’e ’ua fa’atere a’era ’o Omera ’ei mono nōna. ’E ’ua fānau ihora tā Omera ’o Iareda ; ’e ’ua fānau a’era Iareda i te mau tamari’i tamāroa ’e te mau tamari’i tamāhine.

2 ’E ’ua ’ōrurehau mai ra Iareda i tōna metua tāne, ’e ’ua haere atu ra ’oia i te fenua ra nō Heta e pārahi ai. ’E i muri a’era, ’ua ha’avarevare atu ra ’oia i te mau ta’ata e rave rahi, nā roto i tāna mau parau tāvaimanino, ē tae noa atu ’ua roa’a iāna te ’āfara’a o te bāsileia.

3 ’E te roa’ara’a iāna te ’āfara’a o te bāsileia, ’ua ’aro atu ra ’oia i tōna metua tāne, ’e ’ua hōpoi atu ’oia i tōna metua tāne i roto i te fa’atītīra’a, ’e ’ua fa’a’ohipa ’oia iāna i roto i te fa’atītīra’a.

4 ’E i teienei, i te mau mahana nō te fa’aterera’a a Omera, ’ua vai noa ’oia i roto i te fa’atītīra’a i te ’āfara’a o tōna ra mau mahana. ’E i muri a’era, ’ua fānau ihora ’oia i te mau tamari’i tamāroa ’e te mau tamari’i tamāhine, ’e i rotopū i taua mau tamari’i ra tē vai ra o Eseroma ’e Korianetumera.

5 ’E ’ua riri roa a’era rāua nō te mau mea tā tō rāua taea’e o Iareda i rave, ’e nō reira ho’i ’ua ha’aputuputu a’era rāua i te hō’ē nu’u fa’ehau, ’e ’ua ’aro atu ra ia Iareda. ’E i muri a’era, ’ua ’aro atu rāua iāna i te pō.

6 ’E i muri a’era, ’ua pau te nu’u fa’ehau o Iareda ia rāua, ’e ’ua fātata ato’a rāua i te taparahi iāna ; ’e ’ua tāparu atu ’oia ia rāua ’eiaha e taparahi iāna, ’e e hōro’a atu ’oia i te bāsileia i tōna ra metua tāne. ’E i muri a’era, ’ua fa’ati’a rāua iāna ’ia ora noa.

7 ’E i teienei ’ua ’oto roa Iareda i te mea ’ua riro te bāsileia, nō te mea i tītau na tōna ’ā’au i te bāsileia ’e i te hanahana nō teie nei ao.

8 I teienei, nō te ’aravihi o te tamāhine a Iareda, ’e nō tōna ’itera’a i te ’oto o tōna ra metua tāne, ’ua ’ōpua ihora ’oia ’ia fa’anahonaho i te hō’ē ’ōpuara’a ’ia ti’a iāna ’ia fa’aho’i mai i te bāsileia i tōna ra metua tāne.

9 I teienei, e mea nehenehe roa te tamāhine a Iareda. ’E i muri a’era, ’ua parau mai ra ’oia i tōna metua tāne, ’e ’ua nā ’ō mai ra iāna : Nō te aha ho’i ’oe e tō’u metua tāne i ’oto ai ? ’Aita ānei ’oe i tai’o i te pāpa’a parau tā tō tātou mau metua i hōpoi mai nā ni’a i te moana hōhonu rahi ra ? Inaha, ’aita ānei e ’ā’amu i roto i te reira nō ni’a i te mau ta’ata i te ’anotau tahito ra, ’o tei fāri’i i te mau bāsileia ’e te hanahana rahi nā roto i tā rātou mau ’ōpuara’a huna ?

10 ’E i teienei, nō reira, ’ia ti’i tō’u metua tāne ia Akisa, te tamaiti a Kimenora ; ’e inaha, e mea nehenehe au, ’e e ori atu vau i mua iāna, ’e e fa’a’oao’a vau iāna, ’e e riro ’oia i te hina’aro mai iā’u ’ei vahine nāna ; nō reira ’ia ani mai ’oia ia ’oe ’ia hōro’a atu iā’u ’ei vahine nāna, ’ei reira e parau atu ’oe iāna ē : E hōro’a atu vau iāna, mai te mea e hōpoi mai ’oe iā’u i te upo’o o tō’u ra metua tāne, te ari’i.

11 ’E i teienei, e hoa ho’i Omera nō Akisa ; nō reira, i tō Iareda tītaura’a atu ia Akisa ’ia haere mai, ’ua ’ori atu ra te tamāhine a Iareda i mua iāna, ’e ’ua fa’a’oa’oa maita’i atu ’oia iāna, ’e nō reira ho’i ’ua hina’aro atu ra ’oia iāna ’ei vahine nāna. ’E i muri a’era, ’ua nā ’ō mai ra ’oia ia Iareda : ’A hōro’a mai iāna ’ei vahine nā’u.

12 ’E ’ua parau atu ra Iareda iāna : E hōro’a atu vau iāna nā ’oe, mai te mea e hōpoi mai ’oe iā’u i te upo’o o tō’u ra metua tāne, te ari’i.

13 ’E i muri a’era, ’ua ha’aputuputu mai ra Akisa i tōna mau fēti’i ato’a i roto i te fare o Iareda, ’e ’ua parau atu ra ’oia ia rātou : E tapu mai ānei ’outou iā’u ē, e ha’apa’o maita’i ’outou i te mea tā’u e hina’aro ia ’outou na ?

14 ’E i muri a’era, ’ua tapu ihora rātou ato’a iāna, i te Atua nō te ra’i, ’e i te mau ra’i ato’a, ’e i te fenua ato’a ho’i, ’e i tō rātou upo’o ē, ’o ’oia ’o tē hape i te tauturu mai ia Akisa i te mea tāna i hina’aro ra, e tāpūhia ïa tōna upo’o ; ’e ’o ’oia ’o tē fa’a’ite noa atu i te hō’ē mea tā Akisa e fa’a’ite mai ia rātou ra, e ha’apohe-ato’a-hia ïa ’oia.

15 ’E i muri a’era, ’ua nā reira rātou i te fa’aau atu i te parau ia Akisa. ’E ’ua hōro’a mai ra Akisa i te mau tapura’a tei hōro’ahia mai e rātou o tō tahito ra ’o tei tītau ato’a i te mana, ’e ’ua hōro’ahia mai teie mau tapura’a mai te ’anotau mai o Kaina, ’o tei riro na ’ei ta’ata taparahi ta’ata mai te mātāmua roa mai.

16 ’E ’ua vai noa te reira mau tapura’a nā roto i te mana o te diabolo nō te fa’atere noa i teie mau tapura’a i te mau ta’ata, nō te tāpe’a noa ia rātou i roto i te pōiri, nō te turu i tei tītau i te mana ’ia fāri’i i te mana, ’e nō te taparahi i te ta’ata, ’e nō te rave i te ’ohipa ’eiā haru, ’e nō te ha’avare, ’e nō te rave i te mau huru ’ohipa ’ī’ino ato’a ra ’e te tai’ata.

17 ’E nā te tamāhine a Iareda i tu’u atu i te reira i roto i tōna ’ā’au ’ia rave i teie mau mea nō te tau tahito ra ; ’e ’ua tu’u atu Iareda i te reira i roto i te ’ā’au o Akisa ; nō reira, ’ua hōro’a atu Akisa i te reira i tōna ra mau fēti’i ’e mau hoa, ma te arata’i ’ē atu ia rātou nā roto i te mau parau fa’aau ’e te fa’anavenave, ’ia rave i te mau mea mai tāna i hina’aro.

18 ’E i muri a’era, ’ua fa’atupu a’era rātou i te hō’ē pupu ’ohipa huna, mai tō tahito ra ; ’e ’ua riro taua pupu ra ’ei pupu ’ohipa vi’ivi’i roa ’e te parauti’a ’ore roa i te mau mea ato’a i mua i te hi’ora’a o te Atua.

19 ’Aita roa ho’i te Fatu e rave nei i te ’ohipa nā roto i te mau pupu ’ohipa huna, ’e ’aita ato’a ’oia i hina’aro ’ia ha’amani’i te ta’ata i te toto, ’e ’ua ’ōpani ’oia i te reira mai te ha’amatara’a mai o te ta’ata nei.

20 ’E i teienei, ’aita vau, ’o Moroni, e pāpa’i i te huru o tā rātou mau tapura’a ’e tā rātou mau pupu ’ohipa huna, ’e ’aita ho’i te reira i fa’a’itehia mai iā’u ’e ’ua tupu te reira mau mea i rotopū i te mau ta’ata ato’a, ’e ’ua ’itehia rā te reira i rotopū i te mau ’āti Lamana.

21 ’E ’ua fa’atupu te reira i te ha’amoura’a o teie nei feiā tā’u e parau nei i teienei, ’e i te ha’amoura’a ato’a ho’i o te feiā o Nephi.

22 ’E te nūna’a ’o tē turu i teie mau pupu ’ohipa huna mai te reira te huru, nō te tītau i te mana ’e te tao’a, ē tae noa atu ’ua purara rātou nā roto i te nūna’a, inaha, e ha’amouhia rātou ; e’ita roa ho’i te Fatu e fa’ati’a ’ia pi’i noa mai te toto o te feiā mo’a ’o tē ha’amani’ihia e rātou mai te repo mai ē a muri noa atu, ’ia fa’ataehia te tāho’ora’a i ni’a ia rātou, ’e ’aita ā ho’i ’oia i tāho’o ia rātou.

23 Nō reira, ’e te mau ’Ētene ē, tei roto i te Atua te pa’ari ’ia fa’a’itehia teie mau mea ia ’outou, ’ia ti’a ia ’outou ’ia tātarahapa i tā ’outou mau hara, ’e ’ia ’ore ’ia fa’ati’a i teie mau pupu taparahi ta’ata, ’o tei fa’ati’ahia nō te haru i te mana ’e te tao’a, ’ia tae mai i ni’a ia ’outou—’e te ’ohipa, ’oia ïa, te ’ohipa nō te ha’amoura’a ’ia tae ato’a mai i ni’a ia ’outou, ’oia ïa, ’e te ’o’e nō te parauti’a a te Atua mure ’ore ’ia ma’iri mai i ni’a iho ia ’outou, nō te ha’apau ’e nō te ha’amou ia ’outou mai te mea e fa’ati’a ’outou i te reira ’ia tupu.

24 Nō reira, tē fa’aue atu nei te Fatu ia ’outou ē, ’ia ’ite noa atu ’outou i teie mau mea i te taera’a mai i rotopū ia ’outou na, ’ia ara māite ’outou ’ia ’ite i tō ’outou ti’ara’a fifi rahi, nō teie pupu ’ohipa huna ’o tē tae mai i rotopū ia ’outou na ; ’e ’aore rā ’auē ho’i te reira, nō te toto o te feiā i taparahihia ra ; tē pi’i mai ra ho’i rātou mai te repo mai ra ’ia tae mai te tāho’ora’a i ni’a i te reira, ’e i ni’a ato’a i te feiā ’o tei fa’atupu i taua mau pupu ’ohipa huna ra.

25 I te mea ē i muri a’era, ’o ’oia ’o tei fa’atupu i te reira, tē ’imi ra ïa ’oia ’ia fa’a’ore i te ti’amāra’a o te mau fenua ato’a, o te mau nūna’a ato’a, ’e o te mau vāhi ato’a ; ’e e fa’atae mai te reira i te ha’amoura’a i ni’a i te mau ta’ata ato’a, nō te mea ’ua patuhia te reira i ni’a i te diabolo, te metua o te mau ha’avare ato’a ; ’oia mau, taua ta’ata ha’avare ra ’o tei ha’avare i tō tātou nā metua mātāmua ; ’oia ïa, taua ta’ata ha’avare ra ’o tei fa’atupu i te hina’aro i roto i te ta’ata ’ia taparahi i te ta’ata mai te mātāmua mai ā ; ’o tei fa’a’eta’eta i te ’ā’au o te ta’ata, i taparahi ai rātou i te mau peropheta, ’e i pēhi atu ai ia rātou i te ’ōfa’i, ’e i fa’aru’e ’ē atu ai ia rātou mai te mātāmua mai ā.

26 Nō reira, ’ua fa’auehia vau, ’o Moroni, ’ia pāpa’i i teie nei mau mea ’ia fa’a’orehia te ’ino, ’e ’ia tae mai te tau e ’ere roa ai Sātane i te mana i ni’a i te ’ā’au o te mau tamari’i a te ta’ata nei, ’āre’a rā ’ia a’ohia rātou ’ia rave tāmau noa i te maita’i, e tae atu ai rātou i te vai piha’a nō te mau parauti’a ato’a ’e ’ia fa’aorahia.