1 ’E i teienei, e pāpa’i ā vau, ’o Moroni, i tā’u nei pāpa’a parau. Nō reira, inaha, i muri a’era, nō te mau pupu ’ohipa huna a Akisa ’e tōna ra mau hoa, inaha, ’ua haru rātou i te bāsileia o Omera.

2 Noa atu i te reira, ’ua aroha mai te Fatu ia Omera, ’e i tāna ato’a mau tamari’i tamāroa ’e mau tamari’i tamāhine ’o tei ’ore i tītau i tāna ha’amoura’a.

3 ’E ’ua fa’aara mai ra te Fatu ia Omera i roto i te hō’ē moemoeā ’ia haere atu ’oia i rāpae i taua fenua ra ; nō reira ’ua haere atu ra Omera ’e tōna ’utuāfare i rāpae i taua fenua ra, ’e ’ua haere rātou e rave rahi mahana, ’e ’ua ma’iri mai ra te ’āivi ra o Sima ia rātou, ’e ’ua tae atu ra rātou i te vāhi i pau ai te mau ’āti Nephi, ’e mai reira ’ua haere atu ra rātou i te pae i te hiti’a o te rā ’e tae atu ra i te vāhi i ma’irihia te i’oa ’o Abaloma, i te pae tahatai, ’e ’ua fa’ati’a ihora ’oia i tōna ti’ahapa i reira, ’e tāna ato’a mau tamari’i tamāroa ’e mau tamari’i tamāhine, ’e tōna ’utuāfare pā’āto’a, maori rā ’o Iareda ’e tōna ra ’utuāfare.

4 ’E i muri a’era, ’ua fa’atāhinuhia ihora Iareda ’ei ari’i nō te mau ta’ata e te rima o te feiā parauti’a ’ore ; ’e ’ua hōro’a atu ’oia i tāna ra tamāhine ’ei vahine nā Akisa.

5 ’E i muri a’era, ’ua tītau ihora Akisa ’ia taparahi i tōna metua ho’ovai tāne ; ’e ’ua tītau atu ra ’oia ia rātou ’o tei tapu i te tapura’a a tō tahito ra, ’e ’ua roa’a mai ra ia rātou te upo’o o tōna ra metua ho’ovai tāne, ’a pārahi ai ’oia i ni’a i tōna ra terōno ’e ’a fa’atere ai ’oia i tōna ra mau ta’ata.

6 ’Ua rahi roa ho’i te tupura’a o teie nei pupu parauti’a ’ore ’e te ’ohipa huna ’e ’ua ha’avi’ivi’i te reira i te ’ā’au o te mau ta’ata pā’āto’a ; nō reira ’ua taparahihia Iareda i ni’a i tōna ra terōno, ’e ’ua fa’atere mai ra ’o Akisa ’ei mono nōna.

7 ’E i muri a’era, ’ua ha’amata ihora Akisa i te fe’i’i i tāna tamaiti, nō reira ’ua tāpe’a ihora ’oia iāna i roto i te fare tāpe’ara’a, ’e ’ua iti roa te mā’a i hōro’ahia nāna ’e i te tahi mau taime ’aita roa e mā’a ē tae noa atu ’ua pohe roa ’oia.

8 ’E i teienei, ’ua riri ihora te taea’e o taua ta’ata i ha’apohehia i tōna metua tāne (’e ’o Nimera tōna i’oa), i te mea tā tōna metua tāne i rave i tōna ra taea’e.

9 ’E i muri a’era, ’ua ha’aputuputu a’era Nimera i te tahi mau ta’ata ri’i, ’e ’ua horo ’ē atu ra rātou i rāpae i te fenua, ’e tae atu ra ia Omera ra, pārahi ihora i reira.

10 ’E i muri a’era, ’ua fānau a’era Akisa i te tahi mau tamari’i tamāroa, ’e ’ua roa’a ia rātou te ’ā’au o te mau ta’ata, noa atu ’ua tapu rātou iāna ’ia rave i te mau huru ’ohipa ’ī’ino ato’a mai tāna i hina’aro.

11 I teienei, ’ua nounou te mau ta’ata o Akisa i te tao’a mai ia Akisa i nounou i te mana ; nō reira ’ua hōro’a te mau tamari’i tamāroa a Akisa i te moni ia rātou, ’e nā roto i taua rāve’a ra ’ua ’ume mai rātou i te tahi pae rahi o te mau ta’ata nā muri ia rātou.

12 ’E ’ua tupu ihora te ’arora’a i rotopū i te mau tamari’i tamāroa a Akisa ia Akisa, ’e ’ua tupu noa te reira e rave rahi matahiti te maoro ; ’oia ïa, ē tae noa atu ’ua fātata roa te tā’āto’ara’a o te mau ta’ata nō te bāsileia i te pau, maori rā te mau ta’ata e toru ’ahuru ana’e, ’e ’o rātou ’o tei horo ’ē atu i te ’utuāfare o Omera.

13 Nō reira, ’ua fa’aho’i-fa’ahou-hia Omera i tōna fenua ’āi’a.

14 ’E i muri a’era, ’ua ruhiruhiā a’era Omera ; ’e noa atu i te reira, ’ua fānau ihora tāna ’o Emera i tōna ruhiruhiāra’a ; ’e ’ua fa’atāhinu ihora ’oia ia Emera ’ei ari’i nō te fa’atere ’ei mono nōna.

15 ’E i muri a’e i tōna fa’atāhinura’a ia Emera ’ei ari’i, ’ua ’ite ’oia i te hau i ni’a i te fenua nō te ārea e piti matahiti te maoro, ’e ’ua pohe ihora ’oia, ma te ’ite i te mau mahana e rave rahi ’o tei ’ī i te ’oto. ’E i muri a’era, ’ua fa’atere Emera ’ei mono nōna, ’e ’ua haere noa a’era ’oia i te haere’a o tōna ra metua tāne.

16 ’E ’ua ha’amata fa’ahou ihora te Fatu i te rave ’ē atu i te ’anatemara’a mai ni’a atu i te fenua, ’e ’ua manuia rahi fa’ahou ihora te ’utuāfare o Emera i raro a’e i te fa’aterera’a a Emera ; ’e i roto i te ārea e ono ’ahuru ’e ma piti matahiti, ’ua riro rātou ’ei feiā pūai, ’e nō reira ho’i ’ua rahi roa tā rātou tao’a—

17 ’Ua rau te huru o te mā’a hotu, ’e o te huero sītona, ’e o te mau tirita, ’e o te ’ahu paruai maita’i, ’e o te ’auro, ’e o te ’ārio, ’e o te mau tao’a maitata’i.

18 ’E ’ua rau ato’a te huru o te pua’atoro, ’e o te pua’atoro oni, ’e o te pua’atoro ufa, ’e o te māmoe, ’e ’o te pua’a mā’ohi, ’e o te pua’aniho, ’e o te tahi atu mau huru ’ānimara ’ei mā’a maita’i nā te ta’ata.

19 ’E tē vai ato’a ra tā rātou mau pua’ahorofenua, ’e te mau ’āsini, ’e te mau elephani ’e te mau kureloma ’e te mau kumoma ; ’e e mea faufa’a pā’āto’a te reira i te ta’ata nei, ’e ’ua hau rā te faufa’a o te mau elephani ’e te mau kureloma ’e te mau kumoma.

20 ’E ’ua nā reira te Fatu i te nīni’i mai i tāna mau ha’amaita’ira’a i ni’a i teie nei fenua, ’o te fenua ïa i hau i te maita’i i te mau fenua ato’a ; ’e ’ua parau mai ho’i ’oia ē, e mea ti’a roa i te mau ta’ata ’o tē pārahi i ni’a i teie nei fenua, ’ia ha’apa’o i te reira nō te Fatu, ’e mai te mea ē ’aita ra e ha’amouhia ïa rātou ’ia tae i te tau e ’ī roa ai rātou i te mau ’ohipa ’ī’ino ; tē nā ’ō mai ra ho’i te Fatu : E nīni’i atu vau i te ’īra’a nō tō’u ra riri ’ū’ana i ni’a i te reira huru ta’ata.

21 ’E ’ua fa’atere Emera i te ’ohipa ha’avāra’a ma te parauti’a i tōna ra mau mahana ato’a, ’e ’ua fānau ihora ’oia e rave rahi mau tamari’i tamāroa ’e mau tamari’i tamāhine ; ’e ’ua fānau mai ’oia ia Korianetuma, ’e ’ua fa’atāhinu ihora ’oia ia Korianetuma nō te fa’atere ’ei mono nōna.

22 ’E i muri a’e i tōna fa’atāhinura’a ia Korianetuma nō te fa’atere ’ei mono nōna, ’ua ora ’oia e maha matahiti te maoro, ’e ’ua ’ite ’oia i te hau i ni’a i te fenua ; ’oia ïa, ’e ’ua ’ite ’oia i te Tamaiti nō te parauti’a, ’e ’ua ’oa’oa ’e ’ua fa’ahanahana i tōna ra mahana ; ’e ’ua pohe ihora ’oia ma te hau.

23 ’E i muri a’era, ’ua pe’e Korianetuma i te haere’a o tōna metua tāne, ’e ’ua fa’ati’a a’era ’oia i te mau ’oire rarahi e rave rahi, ’e ’ua rave i te mau mea maita’i nō tōna ra mau ta’ata ē hope roa a’e tōna ra mau mahana. ’E i muri a’era, ’aita tāna e tamari’i ē tae noa atu ’ua ruhiruhiā roa ’oia.

24 ’E i muri a’era, ’ua pohe ihora tāna vahine, i te hō’ē hānere ’e ma piti o tōna ra matahiti. ’E i muri a’era, ’ua fa’aipoipo a’era Korianetuma i te hō’ē vahine ’āpī i tōna ra ruhiruhiāra’a, ’e ’ua fānau ihora ’oia i te mau tamari’i tamāroa ’e te mau tamari’i tamāhine ; nō reira ’ua ora noa ’oia ē tae noa atu i te hō’ē hānere e maha ’ahuru ’e ma piti matahiti.

25 ’E i muri a’era, ’ua fānau ihora tāna ’o Koma, ’e ’ua fa’atere ihora ’o Koma ’ei mono nōna ; ’e ’ua fa’atere noa ’oia e maha ’ahuru ’e ma iva matahiti, ’e ’ua fānau ihora tāna ’o Heta ; ’e ’ua fānau ato’a ’oia i te mau tamari’i tamāroa ’e te mau tamari’i tamāhine.

26 ’E ’ua purara ’ē atu ra te mau ta’ata i ni’a i te fenua tā’āto’a ; ’e ’ua tupu fa’ahou ihora te mau ’ohipa ’ī’ino rahi i ni’a i te fenua, ’e ’ua ha’amata ihora Heta i te rave fa’ahou i te mau ’ohipa huna a tō tahito ra, nō te ha’apohe i tōna ra metua tāne.

27 ’E i muri a’era, ’ua haru ’oia i te terōno o tōna metua tāne, ’e ’ua taparahi ’oia iāna i tāna iho ’o’e ; ’e ’ua fa’atere ihora ’oia ’ei mono nōna.

28 ’E ’ua tae fa’ahou mai ra te mau peropheta i te fenua, ma te poro haere i te parau nō te tātarahapara’a ia rātou—’e e mea ti’a ia rātou ’ia fa’aineine i te ’ē’a o te Fatu, ’e mai te mea ē ’aita, e tae mai ïa te ’anatemara’a i ni’a iho i te fenua ; ’oia ïa, e tupu ato’a te hō’ē o’e rahi, ’e e ha’amouhia rātou ’ia ’ore rātou ’ia tātarahapa.

29 ’Aita rā te mau ta’ata i ti’aturi i te mau parau a te mau peropheta, ’ua ti’avaru rā ia rātou i rāpae ; ’e ’ua tu’u i te tahi pae o rātou i roto i te mau ’āpo’o, ’e ’ua vaiiho ia rātou ’ia pohe i reira. ’E i muri a’era, ’ua rave rātou i teie mau mea mai te au i te mau fa’auera’a a te ari’i ra ’o Heta.

30 ’E i muri a’era, ’ua tupu a’era te o’e rahi i ni’a i te fenua, ’e ’ua ha’amata te mau ta’ata i te pohe ’oi’oi rahi nō te o’e, ’e ’aita roa ho’i e ūa i ni’a i te fenua nei.

31 ’E ’ua tae mai ra ho’i te mau ’ōphī ta’ero i ni’a i te fenua, ’e ’ua fa’ata’ero a’era i te mau ta’ata e rave rahi. ’E i muri a’era, ’e ’ua ha’amata ihora te mau nana i te horo ’ē atu mai mua atu i te mau ’ōphī ta’ero i te fenua i te pae apato’a, ’o tei ma’irihia te i’oa e te mau ’āti Nephi ’o Zarahemela.

32 ’E i muri a’era, e rave rahi tō rātou i pohe nā te pae ’ē’a ; noa atu i te reira tē vai ra te tahi pae ’o tei horo atu i te fenua i te pae apato’a.

33 ’E i muri a’era, ’ua tāpe’a ihora te Fatu i te mau ’ōphī ’ia ’ore ’ia a’ua’u atu ia rātou, ’ia pāruru rā rātou i te ’ē’a ’ia ’ore te mau ta’ata ’ia nā reira atu i te haere, ’e te ta’ata ’o tē tāmata i te haere nā reira, e pohe roa ato’a rātou i te ’ōphī ta’ero.

34 ’E i muri a’era, ’ua pe’e atu ra te mau ta’ata i te horora’a o te mau ’ānimara, ’e ’ua ’amu a’era rātou i te mau tino ’ānimara pohe ’o tei ma’iri nā te pae ’ē’a ra, ē pau roa noa atu te reira. I teienei, ’ia ’ite a’era te mau ta’ata ē, ’ua fātata roa rātou i te pohe roa, ’ua ha’amata ihora rātou i te tātarahapa i tā rātou mau ’ohipa ’ī’ino ’e ’ua ti’aoro atu ra i te Fatu.

35 ’E i muri a’era, ’ia oti a’era rātou i te fa’aha’eha’a maita’i ia rātou i mua i te Fatu, ’ua ha’ama’iri mai ra ’oia i te ua i ni’a i te fenua nei ; ’e ’ua ha’amata ihora te mau ta’ata i te oraora fa’ahou mai, ’e ’ua ha’amata ihora te mau mā’a hotu i te tupu i te fenua i te pae apato’erau, ’e i te mau fenua ē ’ati noa a’e. ’E ’ua fa’a’ite mai ra te Fatu i tōna ra mana ia rātou nā roto i te fa’aorara’a ia rātou i taua o’e ra.