Sarong Halipot Na Paliwanag Manunungod Sa
An Libro ni Mormon

An Libro ni Mormon sarong banal na kasaysayan kan manga tawo sa suanoy na America, asin inukit sa manga tinabas na metal. Apat na klase na plakeng metal an nasambit sa librong ini:

1. An Manga Plake ni Nephi, na kun arin igwang duwang klase: an Saradit na Manga Plake asin an Darakulang Manga Plake. An enot manunungod sa espiritual na manga bagay asin paglingkod asin manga pagtukdo kan manga propeta, alagad sa nahuri an kadakolan manga kasaysayan kan manga tawo na sinabi na (1 Nephi 9:2–4). Alagad magpoon sa panahon ni Mosiah, an manga naoorog na pangyayari na espiritual kaiba sa darakulang manga plake.

2. An Manga Plake ni Mormon, na naglalaman kan manga pinahalipot na kasaysayan ni Mormon na hali sa Darakulang Manga Plake ni Nephi, na igwang kadakol na manga paliwanag. An manga plakeng ini naglalaman man kan kadugtong kan manga kasaysayan na isinaysay ni Mormon asin manga idinagdag kan saiyang aki na si Moroni.

3. An Manga Plake ni Ether, na nagpapaliwanag kan manga kasaysayan kan manga Jaredite. Ining kasuratan na ini pinahalipot ni Moroni, na nagsingit kan saiyang manga paliwanag asin isinabay an kasaysayan na ini sa kasaysayan kan gabos sa irarom kan pangaran na “Libro ni Ether.”

4. An Manga Plakeng Tanso dinara kan manga tawo ni Lehi hali sa Jerusalem kan 600 B.C. An manga ini naglalaman kan “limang libro ni Moises,…asin man an kasuratan kan manga Judio magpoon sa kapinonan,…dagos sa pagpoon kan paghadi ni Sedecias, hadi kan Juda; Asin man an manga propesia kan manga banal na propeta” (1 Nephi 5:11–13). Dakol na manga tataramon na nasa plakeng ini an minasambit ki Isaias asin iba pang manga propeta sa biblia asin manga propeta na dai sa biblia an nakukua sa Libro ni Mormon.

An Libro ni Mormon na nabibilog sa sampulo may lima na manga kabtang o pagkabaranga, na namimidbid na manga libro, na an lambang saro pinangaranan sa nagsurat kaidto, apuera sa saro. An enot na kabtang (an enot na anom na libro, na nagtatapos sa Omni) isinalin hali sa Saradit na Manga Plake ni Nephi. Sa pagultanan kan manga libro ni Omni asin ni Mosiah igwang isiningit na inaapod na An Manga Tataramon ni Mormon. An isiningit na ini iyo an nagkakabit kan kasuratan na nakaukit sa Saradit na Manga Plake sa pinahalipot na kasaysayan ni Mormon kan Darakulang Manga Plake.

An pinakahalawig na kabtang magpoon sa Mosiah sagkod sa Mormon, kapitulo 7, gabos na nasa laog kaini, iyo an isinalin na pinahalipot na kasuratan ni Mormon na hali sa Darakulang Manga Plake ni Nephi. An katapusan na kabtang, hali sa Mormon kapitulo 8, sagkod sa katapusan kan libro, inukit kan aki ni Mormon na lalaki na si Moroni, na pakatapos niyang isurat an manunungod kan agi-agi kan buhay kan saiyang ama, ginibo niya an pinahalipot na kasuratan kan manga Jaredite (na iyo an Libro ni Ether) asin sa huri idinagdag an manga kabtang na namimidbid na Libro ni Moroni.

Sa laog o sa manga taon 421 A.D. si Moroni an huri kan manga mananaysay na propetang Nephite, isinera an banal na kasuratan asin itinago idto sa Kagurangnan tanganing ipaluwas sa huring aldaw, sunod sa hinula kan tingog kan Dios sa paagi kan saiyang manga suanoy na manga propeta. Sa laog kan taon na 1823, A.D. an Moroni na ini, na kaidto nabuhay liwat na pagkatawo, dinalaw si Propetang Joseph Smith asin pakatapos itinao an inukitan na manga plake saiya.