An Patotoo Kan Tulong Tagapagpatotoo

Ipinapaisi sa gabos na manga nasion, manga rasa, manga tataramon, asin manga tawo, kun kiisay makakaabot an gibong ini: Na kami, sa paagi kan ugay kan Dios Ama, asin kan satuyang Kagurangnan na Jesu-Cristo, nakahiling kan manga plake na igwa kan kasuratan na ini, na sarong kasuratan kan manga tawo ni Nephi, asin man kan manga Lamanite, na saindang manga tugang, asin man kan manga tawo ni Jared, na naghali sa tore na nasabi na. Asin aram man niamo na an manga ini isinalin sa paagi kan balaog asin kapangyarihan kan Dios, ta sa saiyang tingog pinaaram sa samuya; kaya aram niamong gayo na an gibong ini totoo. Asin nagpapatotoo man kami na nahiling niamo an manga nakaukit na nasa manga plake; asin an manga ini ipinahiling sa samuya sa kapangyarihan kan Dios, asin bako nin tawo. Asin ipinapaaram niamo sa manga matatanos na manga tataramon, na an sarong anghel kan Dios nagbaba hali sa langit, asin dinara niya asin ipinahiling sa samuya, kaya nahiling asin namasdan niamo an manga plake, asin an manga nakaukit duman; asin aram niamo ini sa paagi kan ugay kan Dios Ama, asin an satuyang Kagurangnan na Jesu-Cristo, na kami nakahiling asin nagpapatotoo na an manga bagay na ini totoo. Asin ini makangangalas sa samuyang paghiling. Siring pa man, an tingog kan Kagurangnan pinagbotan kami na magpatotoo kaini; kaya tanganing maging masinunod sa manga tugon kan Dios, kami nagpapatotoo kan manga bagay na ini. Asin aram niamo na kun kami dayupot ki Cristo, samuyang malilinigan an samuyang manga gubing kan dugo kan gabos na manga tawo asin mahihiling na daing digta sa atubangan kan hukoman ni Cristo, asin kami makakapag-erok na kaibahan siya na daing-kasagkuran sa kalangitan. Asin an pag-omaw nasa Ama, asin sa Aki, asin sa Espiritu Santo, na sarong Dios. Amen.