Pagpamidbid
An Libro ni Mormon sarong libro nin manga banal na kasuratan na siring sa Biblia. Ini sarong kasuratan kan manga pakipag-ulay kan Dios sa manga nag-eerok sa America kan panahon asin ta nakapalaman an kabilogan kan daing-kasagkuran na ebanghelio.
An libro isinurat kan manga propeta kan panahon sa paagi kan espiritu nin pagpropesia asin kapahayagan. An saindang manga tataramon, isinurat sa bulawan na manga plake, isinabi giraray asin pinahalipot kan sarong propeta na mananaysay na an pangaran Mormon. An kasuratan nagtatao nin kasaysayan sa duwang bantog na sibilisasion. An saro hali sa Jerusalem kan 600 B.C., asin pagkatapos nabanga sa duwang nasion, na namidbid na manga Nephite asin manga Lamanite. An saro uminabot enot pang gayo kan rilibongon kan Kagurangnan an manga tataramon sa Tore ni Babel. Ining grupong ini namidbid na manga Jaredite. Pakalipas nin manga rinibong taon, gabos nagkarurumpag natada an manga Lamanite, asin ta sinda an poon na ginikanan kan manga Americanong Indian.
An pinakaorog na pangyayari na nakasurat sa Libro ni Mormon iyo an sadiring paglingkod nanggad kan Kagurangnan na Jesu-Cristo sa manga Nephite tulos kan saiyang pagkabuhay-liwat. Ipinahayag digdi an manga doktrina kan ebanghelio, ipinahiling an plano nin kaligtasan, asin nagsasabi sa manga tawo kun ano an kaipuhan nindang gibohon tanganing makamtan an katuninongan sa buhay ngonian asin daing-kasagkuran na kaligtasan sa buhay na maabot.
Pagkatapos ni Mormon kan saiyang manga sinurat, itinao niya an manga kasaysayan sa aki niyang si Moroni, na nagdagdag ki diit na sadiri niyang manga tataramon asin ta itinago niya an manga plake sa bulod kan Cumorah. Kan Septiembre 21, 1823, an Moroni na ini, na kaidto mamurawayon, na nabuhay liwat, nagpahiling sa Propeta na si Joseph Smith asin tinugon siya manunungod kan suanoy na kasuratan asin an nakatakdang pagsalin sa tataramon na Ingles.
Sa pag-abot kan tamang panahon an manga plake itinao ki Joseph Smith, na nagsalin kan manga idto sa paagi kan balaog asin kapangyarihan kan Dios. An manga kasuratan sa ngonian ipinaluwas na sa dakol na manga tataramon bilang bago asin dagdag na pagpapatotoo na si Jesu-Cristo Aki kan buhay na Dios asin ta an gabos na magdulok saiya asin magsunod kan pagboot asin manga rito kan saiyang ebanghelio makakaligtas.
Manunungod sa kasuratan na ini an Propeta na si Joseph Smith nagsabi: “Ako nagsabi sa manga katugangan na an Libro ni Mormon an pinakatamang libro digdi sa kinaban, asin ta ini an pasikadan na gapo kan satuyang relihiyon, asin an tawo mapaparani sa Dios sa paagi kan pagsunod kan manga pinagtutukdo kaini, ki sa arin pa man na ibang libro.”
Bako sana si Joseph Smith, kundi, an Kagurangnan tinugotan an sampulo may saro pang iba na makahiling nanggad kan bulawan na manga plake asin maging orog na manga tagapagpatotoo kan katotoohan asin kabanalan kan Libro ni Mormon. An saindang manga nakasurat na manga patotoo na kasabay digdi iyo “An Patotoo kan Tulong Tagapagpatotoo” asin “An Patotoo kan Walong Tagapagpatotoo”.
Samuyang iagda an manga tawo sain man na basahon an Libro ni Mormon, na paghorop-horopon sa saindang manga puso an marahay na bareta na napapalaman digdi, asin maghapot sa Dios, an Daing-Kasagkuran na Ama, sa pangaran ni Cristo kun an libro totoo. Idtong manga makagibo kaini asin maghagad sa pagtubod makakakamit nin patotoo sa katotoohan kaini asin kabanalan sa paagi kan kapangyarihan kan Espiritu Santo. (Hilingon sa Moroni 10:3–5.)
Idtong manga nagkamit kaining banal na patotoo sa Banal na Espiritu makakaaram man sa paagi kan siring na kapangyarihan na si Jesu-Cristo iyo an Paraligtas kan mundo, na si Joseph Smith iyo an saiyang tagapagpahayag asin propeta sa manga huring aldaw na ini, asin ta An Simbahan ni Jesu-Cristo kan manga Santo sa Huring manga Aldaw iyo an kahadean kan Kagurangnan na sa giraray pinatindog sa kinaban, sa paghanda sa ika-duwang pag-abot kan Mesias.