Ibio se enamde anwaŋa kabaŋa Ŋwed Mormon

Ŋwed Mormon edi edisana ŋwed abaŋade mme owo ke America eset ndien ekemiŋ enye ke mme usan ukuak. Mme ebiet emi ekedade mme ifiɔk ewet ŋwed emi edi:

1. Mme usan Nephi, emi ekedide utɔ iba: mme mkpri usan ye mme ikpɔ usan. Enye oko eketim abaŋa mme ŋkpɔ spirit ye utom ye mme ukpep-ŋkpɔ mme prophet, ke ini enye emi ɔkɔyɔde ye mme mbuk ererimbot emi abaŋa mme owo oro (1 Nephi 9:2–4). Tɔŋɔ ke ini Mosiah, edi, mme ikpɔ usan nko ama ɔdɔŋɔ mme ŋkpɔ emi ekenyenede ufɔn ke spirit.

2. Mme usan Mormon, emi esinede Mormon ndinam ikpɔ usan Nephi edi Ibibio, ye ediwak ikɔ emi etiŋde edian. Mme usan emi nko edɔŋɔ mbuk eset emi Mormon akakade iso ewet ye se eyen esie ekediande.

3. Mme usan Ether, emi ɔnɔde mbuk eset mme Jaredite. Edi Moroni akanam edi Ibibio, emi ekesinde mme ikɔ esie onyuŋ esin ke ŋwed oro mbuk eset ke ibuot ŋwed “Ŋwed Ether.”

4. Mme Usan Brass emi ikɔt Lehi ekedade eto Jerusalem edi ke 600 M.C. Emi edɔŋɔ “mme ŋwed Moses ition, … nko ye mbuk mme Jew tɔŋɔ ke eritɔŋɔ, … ɔsuhɔre esim tɔŋɔ ukara Zedekiah, edidem Judah; nko ye mme prophecy edisana mme prophet” (1 Nephi 5:11–13). Ediwak ikɔ ke mme usan emi, otode Isaiah ye mme prophet efen emi mitoho bible, edu ke Ŋwed Mormon.

Ŋwed Mormon ɔdɔŋɔ akpan ubak mme ikpehe efid, emi efiɔkde, ke esiode kiet efep, nte mme ŋwed, emi ekotde edian mme akpan andiwet mmɔ. Akpa ubak (akpa ŋwed itiokiet, emi etrede ke Omni) edi edikabare emi otode mme ekpri usan Nephi. Ke ufɔt mme ŋwed Omni ye Mosiah esin se ekotde Mme Ikɔ Mormon. Se esinde emi adian mbuk emi emiŋde ke mme mkpri usan ye ikpɔ usan emi Mormon akanamde edi Ibibio.

Ubak emi ɔniɔŋde akan, tɔŋɔ ke Mosiah sim Mormon ibuot 7, edi edikabare emi otode ibibio emi Mormon akanamde oto ikpɔ usan Nephi. Akpatre ubak, tɔŋɔ ke Mormon ibuot 8 tutu esim utit ŋwed oro, edi eyen Mormon, Moroni ekemiŋ, emi, ke ama ekekure ŋwed uwem ete esie, ama anam ŋwed Jaredite edi ibibio (nte ŋwed Ether) ndien ekem edidian mme ubak emi efiɔkde nte ŋwed Moroni.

Ke mme ŋkpɔ nte isua A.D. 421, Moroni, akpatre prophet ewet mbuk mme Nephite, ama adian mme edisana ŋwed emi onyuŋ edip enye ɔnɔ Jehovah, man esio edi ke mme akpatre usen, nte uyo Abasi eketiŋde oto mme prophet Esie ke eset. Ke A.D. 1823, kpa Moroni emi, ke ini oro ekedi owo emi ekesetde, ama ekese Prophet Joseph Smith ndien ama ayak mme usan emi ekemiŋde ɔnɔ enye.

Kabaŋa ŋwed enye mi: Akpa ikpa enyiŋ, emi etienede ikpa ŋwed emi enyenede se idɔŋɔde ke esit, eda eto mme usan ndien edi ubak edisana ŋwed. Ntɔŋɔ ke se ewetde saŋa saŋa, nte ke 1 Nephi ye emi etienede Mosiah ibuot 9, edi ubak edisana ŋwed nko. Ntɔŋɔ ke se ewetde saŋa saŋa, nte ke mme ibuot ŋwed, idighe se ekedade etɔŋɔ ŋwed emi edi mmɔ edi unwam emi esinde man ekan ekot.

Eka iso enyene mkpri ndudue ke ŋwed emi ke nkani Ŋwed Mormon emi esiode ke ikɔ Mbakara. Ŋwed enye emi ɔdɔŋɔ se inende emi ekerede ete ke ɔfɔn ndinam ŋwed emi etie nte ekedide ye mme akpa ekesiode emi edide ke Prophet Joseph Smith okokot.