Ikɔ Ntiense Prophet Joseph Smith
Mme ikɔ Joseph Smith ke idem esie kabaŋa ediwɔrɔ ndi Ŋwed Mormon edi:
“Ke mbubreyo … ke usen edip-ye-kiet ke September [1823] … ami mmansin idem mi ke akam ye mkpe-ubɔk nnɔ Akwa Abasi. …
“Ke ini nkosuk ndude ke edinam ndikot Abasi, ami mma nkut nte ikaŋ ɔwɔrɔde ke ubet mi, emi ekekade iso ɔkɔri tutu ubet oro ama ayama akan uwemeyo, ke ndondo oro owo ɔwɔrɔ ke mben bed mi, ada ke ofum, koro ukot esie ikitukke isɔŋ.
“Enye ekesine ewura emi ekesanade ata eti eti. Ekedi afia emi ekekande afia emi ami akananam nkekutde ke ererimbot; ndien ami nnimke ke ekeme ndinam ŋkpɔ ndomo kiet ke isɔŋ asana onyuŋ ayama ntre. Mme ubɔk esie ekedi iferi, ye mme afara esie nko, esik esisit ɔkpɔŋ itɔŋ-ubɔk; ke ntre, nko, ke ikpat esie ekedi iferi, ye mme ukot esie, esik esisit edɔk ekpɔŋ itɔŋ-ukot. Ibuot ye itɔŋ esie nko ekedi iferi. Ami mma nkut nte ke enye ikisineke ɔfɔŋ efen ikan ewura emi, koro ekedide inwaŋ, ndien ami nkan nkut esit esie.
“Ewura esie ikidighe ata afia afia ikpɔŋ, edi ofuri idem esie ama eye akan se ekpetiŋde, ndien ɔkpɔ-iso esie ke akpanikɔ nte ekep-ekep. Ubet oro ama ayama ata eti eti, edi ikiyamake nte nkan-nkuk idem esie. Ke ini nkesede enye ke akpa ini, ndik ama omum mi; edi ndik oro ama ɔsɔp ɔkpɔŋ mi.
“Enye okot mi enyiŋ, onyuŋ ɔdɔhɔ mi ete ke imɔ idi isuŋ-utom emi edɔŋde eto iso Abasi enɔ mi, ndien ete ke enyiŋ esie edi Moroni; ete ke Abasi enyene utom ɔnɔ mi ndinam; ndien ete ke ana nte ekop enyiŋ mi ke eti ye idiɔk ke ofuri idut, iman, ye mme usem, midighe ete ke ana etiŋ eti ye idiɔk mbiba ebaŋa enye ke ufɔt ofuri owo.
“Enye ama ɔdɔhɔ ete ke ama odu ŋwed emi ekenimde, emi ewetde ke mme usan gold, emi ɔnɔde mbuk abaŋa mbon emi ekeduŋde ke obio emi, ye ebiet emi mmɔ eketode edi. Enye nko ama ɔdɔhɔ ete ke ɔyɔhɔ nsinsi Gospel esine ke enye, nte Andinyaŋa akayakde ɔnɔ mbon emi ekeduŋde ke eset;
“Nko, ete ke mme itiat iba edu ke mme utigha silver—ndien mme itiat emi, ebɔp edian ke usan ikpana-esit, enam se ekotde Urim ye Thummim—emi enimde ye mme usan oro; ndien ndinyene nda mme itiat oro nnam utom edi se ekotde “mme andiyarare” ke eset mme ke ini ke edem; ndien ete ke Abasi ama ebeŋe mmɔ idem ɔnɔ ndikabare ŋwed oro. …
“Nko, enye ama ɔdɔhɔ mi, ete ke mma nyene mme usan oro emi imɔ ikitiŋde ibaŋa—koro ini emi anade nte ebɔ mmɔ isimke kaŋa—inaha nte ami nwut owo ndomo kiet; nkuwut usan ikpana-esit ye Urim ye Thummim; edi nwut mbon emi edinɔde mi uyo ete nwut mmɔ; edieke nnamde eyesobo mi. Ke ini enye ekenemede nneme ye ami abaŋa mme usan oro, nkukut oro ama ayarare ɔnɔ esit mi ete ke ami mma nkut ebiet emi ekenimde mme usan oro, ndien ekedi inwaŋ-inwaŋ ye nnen nnen ete ke ami mma mfiak mfiɔk ebiet oro ke ini nkekade do.
“Ke nneme emi ama ekekure, ami mma nkut nte unwana ke ubet oro ɔtɔŋɔde ndiyama nkanare owo emi eketiŋde ikɔ ye ami, ndien aka iso anam ntre tutu ubet oro ama afiak ekim, ibɔhɔke ke nkanare esie; ke ini, ke ndondo oro ami mma nkut, eketie nte, odudu eberede oduk ke heaven, ndien enye ɔdɔk tutu enye osop ofuri ofuri, ndien ubet oro ama etie nte eketiede ke akpa mbemiso unwana heaven emi ɔwɔrɔ edi.
“Ami mma nna nkere mbaŋa saŋa saŋa ndise oro, nyuŋ ndu ke ata mkpaidem mbaŋa se saŋa saŋa isuŋ-utom emi eketiŋde ɔnɔ mi; ndien, ke ufɔt ekikere mi, mfiak nkut nte ke ubet mi ama afiak ɔtɔŋɔ ndiyama, ndien ke usɔp, nte eketiede, kpa ukem isuŋ-utom heaven oro ama afiak ada ke nkaŋ bed mi.
“Enye ama ɔtɔŋɔ, ndien afiak etiŋ mme ukem ŋkpɔ emi enye eketiŋde ke akpa edidi esie, ikpuhɔke ŋkpɔ ndomo kiet; emi ke ini ekekurede, enye ama ɔdɔhɔ mi abaŋa akwa ubiere ikpe emi edidide itiene ererimbot, ye akwa nsobo otoke ke akaŋ, ofut, ye idiɔk udɔŋɔ; ndien ke ɔkpɔsɔŋ ubiere ikpe emi eyesim ererimbot ke emana emi. Ke ama eketiŋ mme ŋkpɔ emi, enye afiak ɔdɔk nte enye akanamde ke akpa.
“Ke ini emi, mme ŋkpɔ emi ema etuk mi ke ntɔtuŋɔ esit, ndien idap efehe ɔkpɔŋ enyin mi, ndien ami nna nyɔhɔ ye mkpaidem kabaŋa se nkekutde nyuŋ nkopde mbiba. Edi se ikidide mkpaidem mi ke ini nkefiakde nkut isuŋ-utom oro ke mben bed mi, nyuŋ nkop nte enye etiŋde mme afiakde etiŋ ɔnɔ mi mme ukem ŋkpɔ nte ke akpa; onyuŋ adian item ɔnɔ mi, ɔdɔhɔ mi ete ke Satan eyedomo mi (ke ntak idaha unana ufɔk emana ete mi), ndibɔ mme usan emi man enyene inyene. Emi enye akpan mi, ɔdɔhɔ ete ke inaha nyene ntak efen ke ndinyene mme usan oro akan ndikpono Abasi, ndien ke inaha udɔŋ efen ada mi usuŋ akan ndibɔp obio ubɔŋ esie; midighe ntre ami ndinyeneke mmɔ.
“Ke ɔyɔhɔ edidi ita emi ama ekebe, enye afiak ɔdɔk aka heaven nte ke akpa ini, ndien ema efiak eyak mi nkere mbaŋa utibe ŋkpɔ emi nkekutde; ke ini ke ata ini emi isuŋ-utom heaven ama ɔkɔdɔk ɔkpɔŋ mi ɔyɔhɔ ikata, ɔkikɔ unen ɔkpɔk, ndien ami nkut nte ke eyo ama ɔtɔŋɔ ndisiere, ke ntre nneme nnyin ama ada ofuri okoneyo.
“Ikibighike ami mma ndaha nda ke bed mi, ndien nte esidide, nkanam mme utom usen mi; edi, ke ndidomo ndinam utom nte ke mme ini efen, ami mma nkut nte ke idem ama emem mi tutu nkanke. Ete mi, emi akanamde utom ye ami, ama okut ete ke ŋkpɔ afina mi, ndien ɔdɔhɔ yak ami nyɔŋ ufɔk. Ami mma ndaha ye udɔŋ ndiyɔŋ ufɔk; edi, ke nkoyomde ndidɔk ɔkɔ nwɔrɔ ke inwaŋ emi nnyin ikidude, odudu mi ama ɔkpɔŋ mi, ndien ami nduɔ ke isɔŋ, ndien nkɔfiɔke ŋkpɔ ndomo kiet.
“Akpa ŋkpɔ emi ami nkande nti edi uyo emi etiŋde ikɔ ɔnɔ mi, okot mi enyiŋ. Ami mmenere enyin ke enyɔŋ, ndien nkut kpa isuŋ-utom oro nte adade mi ke ibuot, ndien unwana akanare enye okuk nte akpa. Enye ndien afiak ɔdɔhɔ mi kpukpru se enye ɔkɔdɔhɔde mi ke okoneyo emi ekebede, onyuŋ ɔnɔ mi uyo ete nka mbine ete mi nyuŋ ndɔhɔ enye mbaŋa nkukut ye ibet emi ami nkɔcde.
“Ami mma nkop item oro; mfiak nka mbine ete mi ke inwaŋ, nyuŋ ntiŋ ofuri ŋkpɔ nnɔ enye. Enye ɔbɔrɔ mi ete ke edi Abasi, onyuŋ ɔdɔhɔ ete yak nkanam nte isuŋ-utom etemede. Ami mma mkpɔŋ inwaŋ, nyuŋ nka ebiet emi isuŋ-utom ɔkɔdɔde mi ke ema enim mme usan oro; ndien etiene nte nkukut ekedide nnen nnen emi ami nkenyenede mbaŋa enye, ami mma mfiɔk ebiet oro ke ini nkesimde oro.
“Ke obio Manchester, Ontario county, New York, obot emi mikponke ikaha odu, ndien enye okoŋ akan ke mbɔhɔ oro. Ke edem usop-utin obot emi, iyomke usuŋ ikpɔŋ enyɔŋ obot, ke idak itiat emi mikponke ikaha, mme usan oro ena, esin ke ekebe itiat. Itiat emi ama okpon onyuŋ edi ekara ekara ke ufɔt ye ke enyɔŋ esie, onyuŋ ekpri ke mben, ndien ekan ekut ufɔt esie ke enyɔŋ isɔŋ, edi ntan ama ofuk mben akanare okuk.
“Ke mma nkesio ntan, mma mmen umenere ŋkpɔ, emi ami nkesinde ke idak mben itiat oro, ndien ye ekpri odudu mmenere enye. Ami mma nse esit, ndien do ke akpanikɔ ami mma nkut mme usan oro, Urim ye Thummim, ye usan ikpana-esit, nte isuŋ-utom ɔkɔdɔhɔde. Ekenam ekebe emi mmɔ ekedude ke esit ke ndibono mme itiat kiet ke ŋkpɔ nte cement. Ke idak ekebe oro ema enim mme itiat iba kiet ke enyɔŋ kiet ke ekebe, ndien ke enyɔŋ mme itiat emi mme usan emi ena ye mme ŋkpɔ efen ye mmɔ.
“Ami mma ndomo ndisio mmɔ, edi isuŋ-utom ama akpan, ndien ema efiak edɔhɔ mi ete ke ini ndisio mmɔ ndi isimke kanŋa, idinyuŋ isimke, tutu isua inaŋ tɔŋɔ ke ini oro; edi enye ɔdɔhɔ mi ete ndi ebiet oro ke nnen nnen isua kiet tɔŋɔ ke ini oro, ndien do ke enye eyesobo ye ami, ndien ete yak ami nkaiso nnam ntre tutu ini esim ndibɔ mme usan oro.
“Nte ekedide, nte ekenɔde mi uyo, ami mma nka ke utit isua kiet kiet, ndien ke ofuri ini ami mma nkut isuŋ-utom oro do, ndien mbɔ item ye ifiɔk nto enye ke mme nneme nnyin, kabaŋa se Abasi edinamde, ye usuŋ ye edu emi edikamade obio ubɔŋ esie ke mme akpatre usen. …
“Ke akpatre ini ama ekem ndibɔ mme usan oro, Urim ye Thummim, ye usan ikpana-esit. Ke usen edip-ye-iba ke September, ke isua tɔsin kiet ikie itiaita ye edip ye itiaba, ke mma nkeka nte esidide ke ebiet emi ekenimde mmɔ, ke utit isua efen, ukem isuŋ-utom heaven oro ama ayak mmɔ ɔnɔ mi ye item emi: ete yak ami nse ŋkpɔ mbaŋa mmɔ; ete ke edieke ami nyakde mmɔ esop ke ntaha ntaha usuŋ, mme oto ke unana ntiŋ-enyin mi, eyesibe mi sio; edi ete ke edieke ndidade kpukpru odudu mi ke nditim mmɔ nnim, tutu enye, isuŋ-utom, oyom mmɔ, eyekpeme mmɔ.
“Ami mma ndikut ntak emi ekenɔde mi mme ɔkpɔsɔŋ ibet nditim mmɔ nnim, ye ntak emi isuŋ-utom ɔkɔdɔhɔde ete ke mma nnam se eyomde eto mi, enye eyeyom mmɔ. Koro ke ini ekefiɔkde ke ami mma nyene mmɔ, ema eda ata ɔkpɔsɔŋ ukpek ndibɔ mi mmɔ. Ema eda kpukpru nkari emi ekekande enyene ke ntak oro. Ukɔbɔ ama okpon onyuŋ ɔsɔŋ akan akpa, ndien mme otu owo ekedaha eda kpukpru ini ndibɔ mi mmɔ edieke ekande. Edi ke ifiɔk Abasi, mmɔ ema edu ke ubɔk mi, tutu ami mma nkure se ekeyomde eto mi. Ke ini, nte ekeyimede, isuŋ-utom ama oyom mmɔ, ami mma nyak mmɔ nnɔ enye; ndien enye enyene mmɔ ke ukara esie tutu mfin, emi edide ɔyɔhɔ usen iba ke May, ke isua tɔsin kiet ikie itiaita ye edip ye efureta.”
Ke eyomde ofuri mbuk, se Joseph Smith—History ke Pearl of Great Price.
Ke ntem eda mbuk eset ewɔrɔ ke isɔŋ nte uyo mme owo etiŋ ikɔ eto ntan, ndien ekabare esin ke usem eyo mfin oto ke enɔ ye odudu Abasi nte Edisana edisɔŋɔ edide ntiense, ekewet ke akpa ini enɔ ererimbot ke ikɔ Mbakara ke isua 1830 nte The Book of Mormon.