Ntɔŋɔ

Ŋwed Mormon edi edisan ŋwed Abasi emi edide ukem ukem ye Bible. Edi ŋwed edinam Abasi ye mbon emi ekeduŋde ke America ke eset onyuŋ esine ɔyɔhɔ nsinsi gospel.

Edi ediwak prophet ke eset ekewet ŋwed emi eto ke spirit prophecy ye eriyarare. Mme ikɔ mmɔ, emi ekewetde ke mme usan gold, Mormon, emi ekedide prophet emi ekewetde mbuk eset ama okot mmɔ nte ekedide onyuŋ anam mmɔ edi ibibio. Ŋwed emi ɔnɔ mbuk abaŋa akwa ntat-enyin idut iba. Kiet okoto Jerusalem ke 600 M.C. ndien ke ini ama ekebe ebahare edi idut iba, emi efiɔkde nte mme Nephite ye mme Lamanite. Enye eken ama abak edi ke ini Jehovah eketimere mme usem ke Tower Babel. Efiɔk mbon emi nte mme Jaredite. Ke mme tɔsin isua ema ekebe, ema esobo kpukpru mmɔ ibɔhɔke mme Lamanite, ndien mmɔ esine ke mbon eketɔŋcde ubon eke America.

Ŋkpɔ-ntibe emi okponde akan emi ewetde ke Ŋwed Mormon edi utom emi Ɔbɔŋ Jesus Christ akanamde ke idem esie ke ufɔt mme Nephite ke ini Enye ekesetde ke mkpa. Enye ɔnɔ mme ukpep-ŋkpɔ gospel, emen uduak erinyaŋa owut, onyuŋ ɔdɔhɔ mme owo se anade nte mmɔ enam man enyene emem ke uwem emi ye nsinsi erinyaŋa ke uwem emi edidide.

Ke ini Mormon ama ekewet ŋwed esie ama, enye ama ayak enye ɔnɔ eyen esie Moroni, emi akadiande mme ikɔ esie ifaŋ ndien edip mme usan oro ke Obot Cumorah. Ke September 21, 1823, kpa Moroni oro, ke ini oro ekedi enyene ubɔŋ, owo emi ekesetde, ama aka ebine Joseph Smith onyuŋ ɔnɔ enye item kabaŋa ŋwed eset oro ye uduak ndikabare enye nsin ke Ikɔ mbakara.

Ke ekem ini ema eyak mme usan oro enɔ Joseph Smith, emi akakabare mmɔ oto ke enɔ ye odudu Abasi. Idahaemi esio ŋwed oro ke ediwak usem nte obufa ye ntiense efen ete ke Jesus Christ edi Eyen odu uwem Abasi ndien ete ke kpukpru owo emi edidide itiene Enye inyuŋ inim ibet ye mme edinam gospel Esie eyebɔhɔ.

Kabaŋa ŋwed emi Prophet Joseph Smith ama ɔdɔhɔ ete: “Ami mmadɔhɔ nditɔ ete nte ke Ŋwed Mormon edi ŋwed emi enende akan kpukpru ŋwed efen ke ererimbot, onyuŋ edi itiat idak isɔŋ ke edu ukpono nnyin, ndien ke owo eyesaŋa ekpere Abasi ke ndinam mme ukpep-ŋkpɔ esie, akan ŋwed efen.”

Ke ndidian ye Joseph Smith, Jehovah ama anam owo duopekiet efen ekut mme usan gold emi enɔ idem mmɔ man enyuŋ edi saŋa saŋa ntiense ebaŋa akpanikɔ ye edu Abasi eke Ŋwed Mormon. Edɔŋ mme ikɔ ntiense emi mmɔ ekewetde mi nte “Mme Ikɔ Ntiense mme Ntiense Ita” ye “Mme Ikɔ Ntiense mme Ntiense Itiaita.”

Nnyin imikot ofuri owo ke ofuri ebiet ete ekot Ŋwed Mormon, ekere ebaŋa etop esie ke esit mmɔ, ndien ebup Abasi, Nsinsi Ete, ke enyiŋ Christ me ŋwed emi edi akpanikɔ. Mbon emi enamde ŋkpɔ emi enyuŋ ebupde ke mbuɔtidem eyenyene ikɔ ntiense ebaŋa akpanikɔ ye edu Abasi eto ke odudu Edisan Spirit. (Se Moroni 10:3–5.)

Mbon emi enyenende edisana ntiense emi eto Edisana Spirit eyedifiɔk nko eto kpa odudu oro ete ke Jesus Christ edi Andinyaŋa ererimbot, ete ke Joseph Smith edi andiyarare ye prophet ke mme akpatre usen emi, ndien ke Ufɔk Abasi Jesus Christ mme Ndisana Owo ke Ukperedem Usen edi obio ubɔŋ Jehovah emi efiakde emen edi ke ererimbot, ke mbeŋe idem ebaŋa Udiana edidi Messiah.