Kawehweh Oaralap Duwen Pwuhk en Mormon

Pwuhk en Mormon iei ehu poadoapoad sarawi en aramas akan nan Amerika keilahn aio oh ntingdier pohn pileit mete kei. Pileit kan me poadoapoad pwukat kohsang iei me mih pah:

1. Pileit kan en Nihpai, me wia soahng riau: pileit tikitik kan oh pileit laud kan. Me tepo audaudki soahng kan me doke palingehn oh kalohk oh padahngkan en soukohp kan, ah me keriau audaudki pali laud soang poadoapoad en momour en aramas akan (1 Nihpai 9:2–4). Ahpw, sang ni mwehi en Mosaia, pileit laud ko pil audaudiki soahng kan me kesempwalohng palingehn.

2. Pileit en Mormon, me audaudiki oaralap ehu sang rehn Mormon me kohsang nein Nihpai pileit laud ko, iangahki peineh madamadau tohto kan. Pileit pwukat pil audaudiki peuspen poadoapoad sang rehn Mormon oh kapatahieng sang rehn nah pwutak Moronai.

3. Pileit en Ihder, me kasaledahr duwen poadoapoad en Mehn Sared kan. Moronai oaralapiadahr poadoapoad wet, oh kapatahieng pein eh madamadau kan oh kapatahieng ntingko nan poadoapoad pwon nan pwuhk me adaniki “Pwuhk en Ihder.”

4. Prahs Pileit kan me nein Lihai aramas akan wahdo sang Serusalem nan pahr 600 Mwohn Krais. Mepwukat audaudiki “Pwuhk en Moses limauo, … oh pil poadoapoad en mehn Suhs akan sangete ni tapio, … kohdi lel ni tepidahn mwehi en Sedekaia, nanmwarki en Suhda; oh pil kokohp akan en soukohp sarawi ko” (1 Nihpai 5:11–13). Tohto iren mahsen kan me kohsang nan pileit pwukat, kosoia mahsen en Aiseia oh ekei soukohp kan me ntingdi nan Paipel oh pil sohte ntingdi loale, me pwaradahr nan Pwuhk en Mormon.

Pwuhk en Mormon wiawikihdahr pali eisek-limau me sansal, ihte ehu me soh, ehu ehu pwuhk kan kohieng ede sang eden aramaso me ntingihda. Pali keieu (pwuhk weneu me tepin irekdi lel Omnai) iei kawehwehda sang nan nein Nihpai pileit tikitik ko. Nan pwungen pwuhk kan en Omnai oh Mosaia iei Mahsen en Mormon me e kapatahieng. Kapatapat wet kadokepene poadoapoad me ntingdi pohn pileit tikitik ko iangahki oaralap en pileit laud ko me Mormon wiahda.

Pali me keieu reirei, sang Mosaia lel Mormon iralaud 7, iei kawehwehdahn ehn Mormon oaralapih pileit en Nihpai laud ko. Pali me kaimsekalao, sang Mormon iralaud 8 lel ni imwin pwuhko pwon, ntingda sang Moronai nein Mormon pwutak, me, mwurin eh kanekehla nting en poadoapoad en eh pahpao, e ahpw wiahda oaralap en poadoapoad en Mehn Sared (me adaniki pwuhk en Ihder) oh mwuhr ahpw kapatahiong pali me kahdaniki pwuhk en Moronai.

Mwein ele nan pahr 421 mwurin ipwidi en Krais, Moronai, me wia lahs en Mehn Nihpai soukohp-sounpoad, katengepene poadoapoado oh ekihla rehn Kauno, pwe en kohdo ni imwin rahn akan, nin duwen kepitien Koht eh ketin mahsanih sang rehn Sapwellime soukohp en kawa ko. Nan pahr 1823 mwurin iwpidi en Krais, ihte Moronaio, me wialahr aramas iasada, pwarohng Soukohp Sosep Smith oh mwuhr ahpw kihong ih pileit me ntingda ko.

Duwen pwuhk me. Tepin teh oaralapo, me kohdo mwurin tehn audepen kan, kohsang nan pileit ko oh e wia kisehn nting sarawio. Mehn kapehse kan me sohte mih ni nting italic, me duwehte 1 Nihpai oh mwurinte Mosaia iralaud 9, pil iang wia kisehn nting sarawio. Mehn kapehse kan me mih ni nting en italic, me duwehte nan oaralap en iralaud kan, e sohte wia kisehn tepin ntingko ahpw e wia mehn sawas ong onop pwe en sewese ni ahnsou en wadawad.

Mie ekei kisin sapwungala kan me mih nan Pwuhk en Mormon me wiawidahr mwowe kan me ntingdahr ni lokaian wai. Wiawihda wet audaudiki kopwungupwungla kan me konehng pwe en kak kapahrekihong ntingko me wiawihda mwohn e kohieng nan pwuhk oh pil kapahrekihong me Soukohp Sosep Smith kapwungala mwowe kan.