Achil quilcashcacuna
Ashayachishpa Villachi Mormónpaj Quilcashcamanda

Ashayachishpa Villachi
Mormónpaj Quilcashcamanda

Mormónpaj Quilcashca can shuj achil tandachishpa quilcashca punda Américapi llactapuracunamanda, quilcashca carca jirru fangacunapi. Cai quilcashcapi parlashca can chuscu jirru fangacunamanda:

  1. Nefipaj Jirru Fangacuna, caicuna carca ishcai layacuna: Uchilla Jirru Fangacuna, Jatun Jirru Fangacuna. Callaricuna carca ashtahuanbacha espiritual ruraicunamanda, achil yachachi, achil villachijcunapaj yachachicunapash, jipacuna carca ashtahuanbacha ricuna cai llactapuracunapaj causaicunapaj historiamanda (1 Nefi 9:2–4). Ashtahuangari, Mosíahpaj punllamanda, jatun jirru fangacunapipash minishtirishca espiritual cuzascunata charin.

  2. Mormónpaj Jirru Fangacuna, imami Mormónpaj shuj ashallayachishca Nefipaj Jatun Jirru Fangacunamanda, tauca comentariocunahuan. Cai jirru fangacuna charinbash Mormónpaj quilcashca historia, paipaj churi Moroni mirachishcacunapash.

  3. Éterpaj Jirru Fangacuna, imami ricuchin Jareditacunapaj shuj historiata. Cai tandachishpa quilcashca Moroni ashallayachirca, pimi paipaj propio villaicunata churarca, mirachircapash quilcashca historia generalhuan Éterpaj Quilcashca shutichishpa.

  4. Bronce Jirru Fangacuna apamushca Lehipaj llactapuracuna Jerusalénmanda 600 C.Ñ. Cai charin picha Moiséspaj quilcashcacunata, … Judíocunapaj callarimanda shuj tandachishpa quilcashcapash, … Sedequías, jatun mandaj Judápaj reinado callaringacaman; achil villachijcunapaj villachijcunapash (1 Nefi 5:11–13). Tauca pasajecuna cai jirru fangacunamanda, Isaíasta villan, cutishuj bíblico, na bíblico achil villachijcunatapash, ricurin Mormónpaj Quilcashcapi.

Mormónpaj Quilcashca chunga picha minishtirishca pushtucunata nacashpa chaupishcacunata charin, rijsishca, shujlla excepciónhuan, quilcashcacuna, tucuilla charin principal autorpaj shutita. Callarishpa (sujta quilcashcacuna, Omnihuan tucurin) can shuj shimirimaiman tigrachi Nefipaj Uchilla Jirru Fangacunamanda. Omnipaj quilcashcamanda Mosíahcaman can shuj quimichishca Mormónpaj Shimicuna nishpa shutichishca. Cai quimichishca tandachin quilcashcata Uchilla Jirru Fangacunapi charijta Jatun Jirru Fangacunapaj Mormón ashallayachishcahuan.

Llashaj pushtu, Mosíahmanda Mormóncaman, 7 Capítulopash, can shuj shimirimaiman trigrachi Mormón ashallayachishca Nefipaj Jatun Jirru Fangacunamanda. Tucurishpa, Mormón 8 capítulomanda, cai volumen tucurinacaman, Moroni, Mormónpaj churi quilcashca carca, pimi, paipaj taitapaj causashcata quilcashpa tucuchishca jipa, Jareditacunapaj quilcashcata ashallayachirca (Éterpaj Quilcashca shutihuan) jipaman mirachirca pushtucunata rijsishca Moronipaj Quilcashca shutihuan.

Nara C.H. 421, Moroni, Nefitacunapaj tucuri achil villachij-historiador, sellarca achil quilcashcata, pacarcapash caita Apunchijpa, tucurimui punllacunapi ricurimuchun, imashna Diospaj shimi nishca shina paipaj punda achil villachijcunahuan. C.H. 1823pi, chai Moronillata, chai horas shuj cutin causarishca personaje, Achil Villachij José Smithta ricuj shamurca, jipallaman jirru fangacunapi quilcashcata paiman curca.