Ima Cajta Villachi
Mormónpaj Quilcashca can achil quilcashcapaj shuj volumen Biblia laya. Cai can shuj tandachishpa quilcashca Diospaj comunicación Américapi punda causajcunahuan, charinbash tucui mana tucurina quishpiringapa villaicunata.
Tauca punda achil villachijcuna quilcashca can, achil villachinapaj espírituhuan, achil ricuchicunahuanbash. Paicunapaj shimicuna, curi jirru fangacunapi quilcashca, tigrai quilcashca can, ashallayachishcapash shuj achil villachij-historiadormanda Mormón shutichishca. Quilcashca charin shuj tandachishpa quilcashcata ishcai jatun civilizacióncunamanda. Shuj shamurca Jerusalénmanda 600 C.Ñ., chai jipa chaupirirca ishcai jatun llactacunapi, rijsishca can Nefitacuna, Lamanitacuna. Chaishucuna ashtahuan punda shamushca carca imaura Apunchij Babelpaj Torrepi shimicunata pandachirca. Cai tandanajushca rijsishca can Jareditacuna. Huaranga huaranga huatacuna jipa, tucuilla tucuchishca carca Lamanitacunatalla na, paicuna can Indio Americanocunapapi punda aillucuna.
Ima ashtahuanbacha cashcata quilcashca Mormónpaj Quilcashcapi can Apunchij Jesucristo paipacha achil yachachishcata Nefitacunata cutin causarishca jipalla. Cai yachachin quishpiringapa villaicunata, aliguta villan quishpirinapaj ruranata, runacunaman villan imata sumaj causaita charingapa cai causaipi, mana tucurina quishpirinatapash shamui causaipi.
Mormón paipaj quilcashcacunata tucuchishca jipa, paipaj churi Moroniman quilcashcacunata curca, pimi mirachirca huaquin paipaj propio shimicunata, pacarcapash jirru fangacunata Cumorah urcupi. Septiembre 21, 1823pi, chai Moronillata, chai horas shuj punchallayachishca, cutin causarishca, Achil Villachij José Smithman ricurirca, yachachircapash punda tandachishca quilcashcacunamanda, cai Inglés shimirimaiman tigrachina cajtapash.
Imaura canacajpi jirru fangacuna cushca carca José Smithman, pimi caicunata tigrachirca Inglés shimi rimaiman donhuan, Diospaj ushaihuanbash. Tandachishpa quilcashcacuna cunan publicashca can tauca shimirimaicunapi shuj mushuj, cutishuj testigo layapash Jesucristo cajta causajuj Diospaj Churi, tucui maijan paipaman shamungapa munajcunapash cazushpa catichunbacha saquishcacunata, ordenanzacunatapash paipaj quishpiringapa villaicunamanda quishpiri ushanga.
Cai quilcashcamanda AchilVillachij José Smith nirca: “Ñuca villarcani huauquicunaman cai Mormónpaj Quilcashca carca nima pandai illa tucui quilcashca cai alpapi shina laya na tianllu, minishtirishcapacha rumi ñucanchi religiónpa, shuj runa Diospaman ashtahuan quimiri ushajtapash caipi yachachishcacunahuan, shuj quilcashcacunamanda yali”.
José Smithman mirachishpa, Apunchij curca cutishuj chunga shujcunata paicunallata ricuchun curi jirru fangacunata, especial testigocuna cachun ciertopachamanda, Mormón Quilcashca divinidadmandapash. Paicunapaj quilcashca testimoniocuna caipi churashcacuna can “Quimsa Testigocunapaj Testimonio”, “Pusaj Testigocunapaj Testimonio”.
Ñucanchi cumbidanchi tucui runacunata maipi cajpipash liichun Mormónpaj Quilcashcata, aligutapacha yarichun paicunapaj shungucunapi cai charishca villachicunata, jipaman Diosta tapuchun, Mana Tucurina Taitata, Cristopaj shutipi cai quilcashca ciertopacha canllu nishpa. Maijanguna shina rurashpa, fehuan mañashpa chasquinga shuj testimoniota caipaj ciertopachamanda, divinidadmandapash Espíritu Santopaj ushaihuan. (Ricui Moroni 10:3–5.)
Maijanguna cai divino testimoniota chasquijcuna Espíritu Santomanda, yachaj chayangapashmi cai ushaihuanllata Jesucristo cajta cai pachapaj Jatun Quishpichij, José Smith cajtapash paipaj achil ricuchij, achil villachijpash cai tucuri punllacunapi, Jesucristopaj Iglesia Santocunapaj Tucurimui Punllacunapi cajta Apunchijpaj reino cutinbash shayachishca cai alpapi, prepararishpa Mesíaspaj cati shamuipa.
Quimsa Testigocunapaj Testimonio
Yachashca cachun tucui jatun llactacuna, reinocuna, shimicuna, llactapuracunapash, maijangunaman cai rurana chayanga: Ñucanchi, Dios Taitapaj ninan juyaimanda, ñucanchi Apunchij Jesucristomandapash, ricushcanchita jirru fangacunata imami charin cai tandachishpa quilcashcata, imami can Nefipaj llactapuracunapaj shuj tandachishpa quilcashca, Lamanita, paicunapaj huauquicunamandapash, Jaredpaj llactapuracunamandapash, picuna shamurca torremanda imamanda parlashca can. Ñucanchi yachanchipash caicuna tigrachishca can donhuan, Diospaj ushaihuanbash, imashpa paipaj shimi ñucanchiman villarca; chaimanda ñucanchi yachanchi ciertopachahuan cai rurashca cierto cajta. Ñucanchipash testificanchi ricushcata aspishcacunata cai jirru fangacunapi; caicuna ricuchishca can ñucanchiman Diospaj ushaihuan, na shuj runamanda. Ñucanchi villanchi na manllai shimicunahuan, Diospaj ángel jahua pachamanda uriajumurca, pai apamurca, ñucanchi ñavicunapaj ñaupapi churarcapash, ñucanchi ali ricurcanchi, ricurcanchi jirru fangacunata, caipi quilcashcacunatapash; ñucanchi yachanchi cai cajta Dios Taitapaj shungumanda llaquihuan, ñucanchi Apunchij Jesucristomandapash, ñucanchi ricurcanchi testificanchipash cai cuzascuna ciertopacha can. Cai can ñucanchi ñavicunapi juyaillagu. Shina cajpipash, Apunchijpaj shimi mandarca ñucanchita caimanda testificachun; chaimanda, cazuj cangapa Diospaj mandashcacunata, cai cuzascunamanda testificanchi. Ñucanchi yachanchi Cristopi fielcuna cashpa, ñucanchi churajunacuna mapa illa canga tucui runacunapaj yahuarmanda, tuparishca cashun mapa illa Cristopaj jatun shayarina ñaupapi, paihuan causashun mana tucurinacaman jahua pachacunapi. Taitapa honra cachun, Churipapash, Espíritu Santopapash, picuna shujlla Dios can. Shinacapashcachun.
Oliver Cowdery
David Whitmer
Martin Harris
Pusaj Testigocunapaj Testimonio
Yachashca cachun tucui jatun llactacuna, reinocuna, shimicuna, llactapuracunapash, maijangunaman cai rurana chayanga: José Smith, churi, cai ruranata tigrachij, ñucanchiman ricuchirca jirru fangacunata imamanda parlashca can, imami charirca curi cai layata; tauca fangacunata imashna nishca Smith tigrachishcata ñucanchi tacarircanchi ñucanchi maquicunahuan; ñucanchi ricurcanchipash quilcashcacunata charijta, tucui caicuna punda rurana laya carca, juyailla rurashcapash. Caita testificanchi na manllai shimicunahuan, cai nishca Smith ñucanchita ricuchishcata, imashpa ricurcanchi japircanchipash, yachanchipash ciertopacha cai nishca Smith charijta paipaj maquipi jirru fangacunata imamanda ñucanchi parlashcanchi. Ñucanchi cunchi ñucanchi shuticunata cai pachaman, testimoniotashna cai pachaman imata ñucanchi ricushcata. Ñucanchi na llullanchi, Dios testifican caimanda.
Christian Whitmer
Jacob Whitmer
Peter Whitmer, Churi
John Whitmer
Hiram Page
Joseph Smith, Taita
Hyrum Smith
Samuel H. Smith
Achil Villachij José Smithpaj Testimonio
Achil villachij José Smithpaj propio shimicuna Mormónpaj Quilcashca imashna llujshishcamanda caicuna can:
“Tutapi … Septiembre ishcai chunga shuj punllapi (1823) … Ñucamandallata ninanda achil mañai callarircani Tucui Ushaita Charij Diosta. …
“Shina ñuca Diosta achil mañajujpi, ñuca ricurcani shuj michata ñuca cuartopi ricurijujta, imami mirashpa catirca imaura cuarto punchapamba carca chaupipunllata yali, ñapash shuj personaje ricurimurca ñuca cama ladopi, airepi carca, imashpa paipaj chaquicuna alpata na tacarirca.
“Pai churajushca carca shuj cacharishcalla túnicata juyailla yura yura. Cai carca shuj yura yura ñuca nimaura na ricushcashna nima cuzasta cai alpapi; nacashpa ñuca yuyani nima alpapi cuzas cai pachapi tiangachu shina ninan yura yura, punchapambapash. Paipaj maquicuna lluchulla carca, paipaj rigrapash, maqui mucucuna ashaguta jahualla; shinallata, paipaj chaquicunapash lluchulla carca, paipaj changacunapash, tobillocuna ashaguta jahualla. Paipaj uma, cungapash na taparishca carca. Ñuca yacharcani pai na cutishuj churajunata apajurca ashtahuangari cai túnicatalla, pascashca caimanda, shina ñuca ricui usharcani paipaj pechota.
“Paipaj túnicalla na ninan yura yura carca, ashtahuangari pai tucui persona punchapamba carca imashna nita na ushai, pai ñavi ciertopacha punchapamba shitaj laya. Cuarto ninan punchapamba carca, ashtahuangari na shina ninan punchapamba paipaj muyundi caihuan. Imaura paita callari ricushpa, manllarircani; ashtahuangari manllai ñapash saquihuarca.
“Pai ñucata cayahuarca shutipi, nihuarca pai shuj villachij Diospaj ñaupamanda cachamushca cashcata, paipaj shuti Moroni cashcatapash; Dios shuj ruraita charishcatapash ñuca rurachun; ñuca shuti alipa na alipa japishca canga tucui jatun llactacunapi, reinocunapi, shimicunapi, nacashpa alita na alita parlashca canga tucui llactapuracunapi.
“Pai nirca shuj quilcashca tian churashpa saquishca, curi fangacunapi quilcashca, cai continentepi punda causashcacunamanda shuj tandachishpa quilcashca, maimanda paicuna shamujtapash. Pai nihuarcapash tucui mana tucurina Quishpiringapa Villaicuna caipi tiajta, imashna Jatun Quishpichij villachishca carca punda causajcunaman;
“Tiarcapash ishcai rumicuna culqui arcopi—cai rumicuna, huatashca shuj pectoralman, rurarin ima shutuchishca can Urim, Tumin—churashpa saquishca jirru fangacunahuan; japishpa charina cai rumicunata carca ima rurarin Videntecunata pundapi nacashpa ñaupa punllacunapi; Dios preparashca carca caicunata quilcashcata shuj shimirimaiman tigrachingapa.
· · · · · · ·
“Cutin, pai nihuarca, imaura chai jirru fangacunata imamanda pai parlashcata japishpa—imashpa nara punlla chayashca carca caicunata chasquingapa—caicunata pimanbash na ñuca ricuchina carcani; pectoraltapash Urim, Tuminhuanbash; maijanman ñuca ricuchichun mandashcamanlla; rurajpica ñuca tucuchi tucushca casha. Imaura pai ñucaman parlajujpi jirru fangacunamanda, achil ricui pascarishca carca chaimanda ñuca yuyaipi ñuca ricui usharcani pushtuta maipi jirru fangacuna churashpa saquishcata, shina punchalla carca rijsinalla chaimanda ñuca cutin rijsircani pushtuta imaura ñuca ricungapa rishpa.
“Cai parlarishca jipa, ñuca ricurcani cuartopi micha cutin ñapash tandanajurca paita muyushpa pimi ñucahuan parlajurca, shina catirca, imaura cuarto cutin yana saquirirca, paita muyundilla na, imaura ñapash ricurcani, shuj ñan laya pascarijta jahua pachaman derecho, pai vitsiarca imaura tucuilla ñana ricurirca, chai jipa cuarto saquirirca imashna punda cashcashna nara cai jahua pacha micha ricurijpi.
“Ricushcata tigrashpa yarijurcani, jatunda cushijushpa imata cai extraordinario villachin nihuashcata; imaura, ñuca cutin yarijui chaupipi, ñapash ricurcani ñuca cuarto cutin punchallayai callarijta, ñapash chai jahua pacha villachijllata cutin ñuca ladopi carca.
“Pai callarirca, cutin parlashpa chai cuzascunata imata parlarca paipaj callari ricuj shamuipi, nimatapash na cambiarca; imata nishca jipa, pai villahuarca jatun ricushpa chasquichicunamanda imacuna alpaman shamunata, jatunda imapash illacunahuan, ninan yarjaimanda, espada, unguicunamandapash; cai manllanayai ricushpa chasquichinacuna cai alpaman shamugrijta cai cati aillucunapi. Cai cuzascunata villashca jipa, pai cutin vitsiarca punda rurashca laya.
“Cai viaje, shina ninan jatun carca ricuicuna ñuca yuyaipi, puñuipash ñuca ñavicunamanda anchurirca, manllarishca carcani imata ricushcamanda, uyashcamandapash. Ashtahuangari ñuca manllaripa cutin ricurcani chai villachijtallata ñuca ladopi, uyarcani nijta, cutinbash nijta chai cuzascunatallata pundashna; mirachirca shuj advertenciata, nishpa Satanás munanga tentangapa (ñuca taitapaj aillucunapaj huajcha causaimanda), charingapa jirru fangacunata charijyangapa munaihuan. Caita ñucata amapacha nihuarca, cai jirru fangacunata chasquishpa shuj munaitalla charichun Diosta glorificanatalla, cutishuj munai ama charichun Paipaj reinota shayachinatalla; na shina cajpi caicunata na chasqui ushasha.
“Cai quimsa ricuj shamui jipa, cutin jahua pachaman vitsiarca pundashnallata, ñuca cutin tigrai yarijurcani cai na yachashca ricuita charishcata; imaura ña chaira villachij jahua pachaman ñucapamanda quimsa viaje vitsiashca jipa, gallo cantarca, ñuca yacharcani ña punllayajujta, shina ñucanchi parlaricuna tucui tuta cashca carca.
“Ashatacashpalla ñuca camamanda jatarircani, rurashpa causashcata, punllapa minishtirishca ruraicunata rurangapa rircani; ashtahuangari pundashna rurangapa munashpa, yacharcani ñuca shinlli cai shina shaijushca carcani napacha usharcani. Ñuca taita, pimi ñuca ladopi trabajajurca, ricuhuarca imachari na ñucapi ali cajta, huasiman ri nihuarca. Ñuca callarircani munashpa huasiman ringapa; pamba jarcashcata yalingapa munajujpi maipi cashcamanda, ñuca shinlli cai tucurirca, huañushcashna urmarcani alpaman, asha ratota nimata na yacharcani.
“Callari cuzasta ñuca yari usharcani shuj shimi parlajujta ñucahuan, shutipi cayahuajushcata. Ricujpica, chai villachijtallata ricurcani ñuca umapi shayajujta, michahuan muyushca pundashna. Shina pai cutin parlahuarca tucuita punda tuta parlashcata, mandahuarca richun ñuca taitapaman paiman villachun achil ricuimanda, rurachunbacha saquishcacunamandapash imata ñuca chasquishca carcani.
“Ñuca cazurcani; tigrarcani pambaman ñuca taitapaman, paiman tucuita parlarcani. Pai nihuarca cai Diospaj cashcata, nihuarca ri, rurai imashna villachij mandashcata. Pambata saquircani, rircanipash pushtuman maipi villachij villahuarca jirru fangacuna churashpa saquishca carca; punchapamba achil ricuimanda imami charircani, caimanda ñuca rijsircani pushtuta chaiman chayashpa.
“Uchilla llacta ladopi, Manchester, Ontario, Nueva Yorkpi, shayarin uchillalla urcu, chai ladollamandacunapaj ashtahuan yali jatun. Cai urcupa indi huashajuj ladopi, urcu jahuamanda na carupi, jatunlla rumi ucupi, jirru fangacuna carca, shuj rumi cajapi churashpa saquishca. Cai rumi carca raculla, muyushca chaupi jahua ladopi, jamzi ladocunaman, shina chaupipi cai ricunalla carca alpajahualla, ashtahuangari manñacuna tucuilla muyundi alpahuan quilpashca carca.
“Alpata anchuchishca cashpa, ñuca vichai chijtanata japircani, caihuan rumi manñaman yaicuchircani, ashalla fuerzahuan caita jatarichircani. Ucupi ricurcani, ricurcanipacha jirru fangacunata, Urim, Tumin, pectoral, imashna villachij nishca. Caja imapi carca, rumicunahuan rurashca carca, ishcandi cemento layapi carca. Caja ucupi ishcai rumicuna tiarca cajata cruzashca, cai rumicuna jahuapi jirru fangacuna tiajurca, cutishuj cuzascunapash.
“Caicuna llujchingapa munajujpi, ashtahuangari villachijhuan napacha saqui tucurcani, cutinbash nihuarca caicunata llujchina punlla nara chayan, na chayanga, chuscu huatacunacaman chai punllamanda; ashtahuangari nihuarca tigrachun chai pushtumanllata huatan huatan cai punllamanda, pai ñucahuan tuparingapa, shina rurashpa catina carcani imaura jirru fangacunata chasquina punlla chayangacaman.
“Imashna mandashca, huata tucurinapi rircani huatan huatan, chai punlla chai villachijllata chaipi tuparcani, yachachicunata chasquircani, inteligenciatapash tucui ñucanchi parlaricunapi, Apunchij imata ruragrijujcunamanda, imashna, ima layapi Paipaj reino apashca cana tucurimui punllacunapi.
· · · · · · ·
“Shinapash punlla chayarca chasquingapa jirru fangacunata, Urim, Tumim, pectoraltapash. Ishcai chunga ishcai punlla Septiembre quillapi, huaranga pusaj patsaj ishcai chunga canchis huatapi, cutishuj huata tucuripi rishca cashpa chai maipi churashpa saquishca pushtuman, chai jahua pacha villachijllata caicunata cuhuarca cai advertenciahuan: Ñuca caicunamanda responsable casha; ñuca na ricuriaimanda chingachun saquishpaca, nacashpa ñucapaj cungashca caimanda, anchuchi tucushca casha; ashtahuangari ñuca tucui usharishcahuan caicunata huacaichishpaca, imaura pai, villachij caicunamanda shamungacaman, caicuna alichishca canga.
“Ñuca ñapash yacharcani imamanda cai shinapacha mandashcacunata chasquishca carcani aligutapacha huacaichinamanda, imashpa nihuashca carca villachij imaura ñuca rurashca cajpi imata ñucapamanda minishtishcata, pai caicunata apangapa shamunga. Ñapash caicunata ñuca charijta yachashpa, ninan ushashcata rurarca quichungapa. Tucui na ali ruraicunata mascarca caita rurangapa. Napacha ricunayachi pundata yali shinlliman tigrarca, taucapachacuna shuyanajurca punllan punllan ushashpallaca quichungapa. Ashtahuangari Diospaj jatun yachaihuan, caicuna aliguta alichishca carca ñuca maquicunapi, imaura pactachingacaman ñucaman rurachun mañashcata. Imaura, parlarishcashna, villachij caicunata apangapa shamurca, paiman curcani; paipaj maquipi charin cunan punllacaman, cashpa Mayopaj ishcai punlla, huaranga pusaj patsaj quimsa chunga pusaj.
Tucui tandachishpa quilcashcamanda, ricui José Smith—Historia, Perla de Gran Preciopi, History of The Church of Jesus Christ of Latter-day Saintspipash, volumen 1; 1–6 capítulocaman.
Punda tandachishpa quilcashca shina llujshirca alpaman shuj llactapura alpamanda parlajuj laya, tigrachishca moderno parlaiman Diospaj don, ushaihuanbash imashna testifican Achil shinami nin, cai pachapa Ingléspi callari publicashca carca 1830 huatapi The Book of Mormon shutihuan.