Buchʼuw i Tamilang nga Morngaʼagen fare Babyor ku Mormon

Fare ke Babyor ku Mormon e ba chep nib thothup ko gidiiʼ ni kakrom nu Mariken ma kan ker nga dakean yu yangi wasey. Morngaʼagen e ra chep ney nikan puthuy nga taʼabang e baʼaray:

Fapi Plates ku Nephi, ni lʼagruw mit: fare plates nib achig nge fare plates nib gaaʼ. Bin sommʼon e bagaʼ nga dakean e tin nib tʼuf ko yaʼel nge muruwel nge pi michib ko fapi profet, ma bin migid e bagaʼ ni tin baʼariy banʼen ni chipin e pi gidiiʼ ni bay morngaʼagen ko (1 Nephi 9:2–4). Aram ko ngiyalʼ u napʼan Mosiah, e ku aram rogon, fapi plates nib gaaʼ e kub un ngay e tin baʼaray banʼen nib thothup mab gaʼfan.
Fapi Plates ku Mormon, ni yib ko tin baʼaray banʼen ni ngochngoch nag Mormon i yoloey ni fek ko fapi plates nib gaaʼ ku Nephi, ma ki uneg boech banʼen ngay. Pi plates ney e ku bay riy e muʼulʼul ko fapi chep ni tay Mormon nge ku boech ni tay ba pagael ni fak ni Moroni.
Fapi Plates ku Ether, niʼir chipin fapi Jaredites. Biney e chep e Moroni e ngochngoch nag i yoloey, ni ire ki puthuy boech e tirokʼ ngay me puthuy ko bin kenggin e chep u tanggin e re fithngan ni “Babyor ku Ether.”
Fapi Plates ni Brass ni fek fapi gidiiʼ ku Lehi u Jerusalem u lan e 600 M.K. Ireray e gin ni bay “fare lal ke babyor ku Moses riy, … nge ku chipin fapi Jews ni aram ko tobolngin iyib, … nge madaʼ ko ngiyalʼ ni suwoy Zedekiah, ni ire pilung nu Judah; nge ku fapi prophecies ko fapi profet nib thothup” (1 Nephi 5:11–13). Bayoʼor bogi thin ko pi plates ney, ni kube yoeg e thin ni i yoeg Isaiah nge ku boech e profet ni bay morngaʼagen u lan e bible nge boech ni dariy, pinnʼey e yigoʼ bay u lan fare ke Babyor ku Mormon.

Fare ke Babyor ku Mormon e bay riy ragag nge lal i babyor ni thʼabi gaʼfan ara yu ulung ni kan kiʼeg, ni yimnang, ni taʼareb e banʼen ni de un ngay, u rogon e pi babyor, ni bagaʼ ni ra baken ma be magagyel u fithngan e piʼin ni yarmiy. Gin sommʼon (fa nelʼ ni sommʼon ken e babyor, ni yani mus rokʼ Omni) e thin ni pilyeg ko fapi plates ni achig rokʼ Nephi. Thilin e babyor ku Omni nge Mosiah e bay baken e babyor nninʼ ni kanoeg ni fapi Thin ku Mormon. Kanney ni ka ninʼ nga thilin e be puthuy fapi chep ni kan ker nga dakean fapi plates ni achig ko tin ni ke ngochngocheg Mormon ni yoloey ni fek ko fapi plates nib gaaʼ.

Fapi yu guruy nib nʼunʼuw, ko karokʼ Mosiah nge madaʼ ko karokʼ Mormon nib une, guruy ni 7 ngay, e ni pilyeg ko thin ko karokʼ Mormon ni ngochngocheg i yoloey ni fek ko fapi plates nib gaaʼ rokʼ Nephi. Fapi yu guruy ni tomur, ko karokʼ Mormon, guruy ni 8 nge madaʼ nga tungun fare ke Babyor ku Mormon, e yoloey beeʼ nib pagael ni fak Mormon ni Moroni fithngan, ni ire muʼ nag i yoloey chipin e yafos ko chitamngin, me ngochngoch nag i yoloey e chep rokʼ fapi Jaredite (ni fare babyor ku Ether) me taʼboech riy me puthuy yu yang ngay ni fare babyor ku Moroni.

U langgin ara napʼan fare duw ni T.Y. 421, me Moroni, ni ire bin tomur ko fapi Nephite ni profet-ma tayol chep, ni ire uchmiy fapi chep me chaʼariy nga paʼ Somoel, ni nga fin dag u lan e tin tomur e rran, ni aram rogon ni yoeg Got u dakean e pi profet Rokʼ ni kakrom. U langgin T.Y. 1823, kuf chaʼ i Moroni, ni ke fos ko yamʼ ni kemang ba angel, e yibi mʼug ngakʼ fare Profet i Joseph Smith me taʼboech riy me piiʼ fapi yu yangi plates ni kan ker ngakʼ.

Morngaʼagen e biney: Fabin monʼ e morngaag, nge bin migid ko page ni morngaʼagen, e kan fek ko fapi plate ma bang ko pi yol nib thothup. Morngaʼagen ni dani italic yaʼan, ni boed ni bay u lane 1 Nephi nge bin migid ngay ni bin mereb e guruy u lane Mosiah, e ku bang e yol nib thothup ni morngaʼagen nib italic yaʼan, ni boed ni bay ko guruy, e gathi taʼaborogon ko fare yol machane nʼen ni ngan fil ni ra ayuweg ney nikan uneg ni fan i biʼeg.

Boech e oloboch u lan fare yol e kan chaʼariy u lane tin baʼaram e Babyor ku Mormon nikan pilyeg e thin riy ko Ngalis. Biney e bay e tin nikan falʼeg rogon nib mangil rogon ni ngan fek nibay e tin nikan falʼeg riy nge tin nike falʼeg Profet Joseph Smith.