Tabolngin I Morngaʼagen

Fare ke Babyor ku Mormon e bake babyor nib chep nib thothup ni yibe taʼareb nag ko fare Bibilia. Nib chep ni morngaʼagen e muruwel rokʼ Got ngakʼ e piʼin kakrom ni ur pired u Mariken ma bay riy fare gospel ni poloʼ ni dariy nʼumngin i napʼan.

Fare ke babyor e yoloey e pi profet nib yoʼor kakrom u dakean fare nangaenʼ ko prophecy nge yiʼiy. Thin roraed e ni yoloey nga dakean e plate ni gol, niki yoeg me ngochngocheg i yoloey ba profet-ni kuma yoloey chipin e pi kakrom, ni fithngan e Mormon. Fare chep e piiʼ bake babyor ni morngaʼagen lʼagruw ulung i gidiiʼ nrib gaaʼ ni urngin mab yung ngoraed. Reb e yib u Jerusalem ni 600 e duw M.K. me tomur riy me kiiʼ nge lʼagruw ulung i gidiiʼ, ni kanoeg ni fapi Nephites nge fapi Lamanites. Ma kureb ni yib boech nga baʼanem riy u napʼan ni fare Somoel e thithilyeg e thin ko ngiyalʼ ni yibe toey fare Wulyang nu Babel. Biney e ulung e kanoeg ni yaed e Jaredites. Tomren yu buyuʼ i duw, ma gubin i yaed e kan liiʼraed ma kemus ni yigoʼ fapi Lamanites e magaey, ma yaed e kenggin e likʼegal rokʼ fapi American Indians ni kakrom.

Re taʼaliyaw ko nʼen ni buch ni kan yoloey nga lan fare ke Babyor ku Mormon e fare machib rokʼ Somoel i Yesus Kristus u fithikʼ fapi Nephites ni dawori nʼuw napʼan nga tomren e foskoyamʼ ni Ke tay. Ribe weliy fan e pi machib ko fare gospel, ma be tamilngeg rogon min thap, ma be weliy ko gidiiʼ e pinʼen ni thingar rinnʼed me yog e gapas ngoraed u lan e biney e yafos, me yog nra thap gaed ko bin bay yib e yafos ni gubinfen.

Tomren ni ke muʼ Mormon i yoloey e tirokʼ e yol, me piiʼ fare ke babyor ngakʼ ba pagael ni fak ni Moroni, ni ki puthuy boech e thin rokʼ ngay me mitheag fa yungi plates u dakean bangi Falang ni Cumorah. Ko rofen ni September 21, 1823, ku fachaʼ i Moroni, ni ke machalbog, ni beeʼ ni ke foskoyamʼ, e mʼug ko fare Profet i Joseph Smith nge chiyliy ngakʼ morngaʼagen fapi chep ni kakrom ma kan mu i dugliy ni ngan pilyeg e thin riy nge yib ni thin nu Ngilis.

Me yani taw ngalʼan nni dugliy, min piiʼ fapi yungi plates ngakʼ Joseph Smith, ni ire pilyeg e thin riy u dakean fare tawaʼath nge gelngin Got. Reke babyor ney e chiney e ke yoʼor e thin ni kan piliyeg nga dakean, ma kub babyor nib biʼech ni kube micheg ni Yesus Kristus e ir Fak fare Got nib fos, ma gubin e piʼin ni yaed ra yib Ngakʼ mi yaed fol ko pi motochiyel nge gamʼing ko gospel Rokʼ e rayog ni ngar thap gaed.

Morngaʼagen e re chep ney e fare Profet i Joseph Smith e gaʼar: “Ku gog ko fapi pumoʼon ko galasia ni fare ke Babyor ku Mormon e ire thʼabi matʼaw e thin riy u fithikʼ e pi babyor nu fayleng, ma ire taʼan e mich rodaed, ma rayog ni nge chugur beeʼ riy ngakʼ Got u dakean yalen e paer riy, ni dabiyog ni rinʼ yuken e babyor”.

Ni kub cheg ngakʼ Joseph Smith, fare Somoel e ki yog nag ragag nge taʼareb i gidiiʼ ni ngar guyed fapi yungi plate ni gol nga awochraed mar manged boech e mich ko fare ke Babyor ku Mormon nib riyulʼ ma ki yib rokʼ Got. Mich roraed ni kan yoloey e buʼun ko biney ni “Fare Mich ko fa Dalip i Gidiiʼ ni Michriy” nge “Fare Mich ko fa Meruk i Gidiiʼ ni Michriy.”

Gamaed be pining gubin e gidiiʼ u gubin yang ni ngar biʼeged fare ke Babyor ku Mormon, mar lemniged u lan gumirchaʼraed e pi milwol ni bay riy, nge mu mar fithed ngakʼ Got, niʼir fachaʼ ni Chitamngiy ni Gubinfen, u fithngan Kristus ni faʼanra riyulʼ fare ke babyor. Piʼin ni yaed rarinʼ ni aray rogon mar fithed u fithikʼ e lʼagaenʼ e rayog e mich riy ngoraed nib riyulʼ ma ki yib rokʼ Got u dakean gelngin fare Kan ni Thothup. (Musap nag ko Moroni 10:3–5.)

Piʼin ke yog ngoraed e biney e mich ni yib ko fare Kan ni Thothup e kura nang riy ko re gelngin nem ni Yesus Kristus e ir fare Tathapeg ko fayleng, ni Joseph Smith e ire tayiʼiy nge profet Rokʼ u lan e tiney e rran, ni Fare Galasia ku Yesus Kristus ni fan ko Gidiiʼen Got ko Tin Tomur e Rran e ir gilʼilungun Somoel ni kan sulweg bayay nga fayleng, nib dumʼmidil ko yan Lʼagruw Yay e Wub rokʼ fare Messiah.