Fare Mich Rokʼ Fare Profet I Joseph Smith

Thin rokʼ fare Profet i Joseph Smith ni morngaʼagen fare wub ko fare ke Babyor ku Mormon e:

“Napʼan ni ke ganowrug ko rofen … ni riliwʼ nge taʼareb ko September [1823] … mug tab ko meybil mug ning e tin nib tʼuf rog ngakʼ Got ni Gubin Marayog Rokʼ. …

“Napʼan ni arame gube pining Got, mug pirʼeg ni bay bangi tamilang ni ke yibi mʼug u langgin e singgil rog, ni munmun ma be gaaʼ raʼen nge gaelʼ langgin fare singgil nge tamilang ni boed rogon ni misiwʼ, ku chingiyalʼ nem mug guy yaʼan beeʼ ni ke yibi mʼug u barbaʼ i charene bet rog, nib sakʼiy nga fithikʼ e nifeng, ya dar math rifrifan ay ko faraf.

“Ke chuw ngab mad nib reb u lang nga butʼ ni rib felʼ raʼen e wechwech riy. Rib wechwech ni dariy banʼen u fayleng ni kug guy ni aram rogon; ara be mich u wunʼug ni rayog ni ngan guy banʼen u fayleng nge mʼug nrib wechwech mab gaelgael raʼen. Ruw rabaʼ i rifrifan paaʼ ni dariy e mad riy, nge ku aram rogon nga tunguni paaʼ, nga buchʼuw ngalang ko richib u paaʼ; nge ku aram rogon nge rifrifani ay ni dariy e mad riy, ni ku boed rogon tunguni ay, nga buchʼuw ngalang ko richib u ay. Loelgen nge kʼangan e ku aram rogon ni dariy e mad riy. Gube nang ni kemus e mad u dakean aram, ya basay e mad u ngorngoren ni gube guy dakean i ngorngoren.

“Gathi kemus ni mad rokʼ nib reb u lang nga butʼ e rib wechwech, ya mus nga doew ni poloʼ ma be gael raʼen ni dab gunang rogon i yoeg, nge awchen ni boed rogon raʼen e uluch. Fare singgil e kari tamilang langgin, machane de boed rogon fini tamilang u charen fachaʼ nem. Napʼan ni sommʼon nug sap ngakʼ, mug tamdag; machane de nʼuw napʼan me mʼay e tamdag rog.

“Me pining fithngag, me yoeg ngog niʼir ba tamalʼog ni kan lʼoeg ke yib rokʼ Got ngog, ni Moroni fithngan; ni bay ba muruwel ni ke piiʼ Got ni nggu rinʼ; ma fithngag e bay noeg nga felʼ nge kireb u fithikʼ gubin e pi nam, pi mfen, pithin, ara bay noeg nga felʼ nge kireb u fithikʼ gubine pi gidiiʼ.

“Me yoeg ni bay bake babyor ni kan chaʼariy, ni kan yoloey nga dakean e plate ni gol, ni be piiʼ ba chep ni morngaʼagen e gidiiʼ ni ur moyed ni kakrom ko re nam ney u Mariken, nge uw e rabaed riy. Ma ki yoeg ni fare Gospel ni manimus e ku bay riy nib poloʼ, ni piiʼ faʼen Tathapeg ngakʼ fapi gidiiʼ ni kakrom ni ur pired u roy.

“Ma kubay lʼagruw rabaʼ i malang ni kan mʼag nga ruw lay i silber nib bug—ma gal rabaʼ i malang ney e kan mʼag nga barbaʼ i breastplate, ni ke sum riy banʼen ni kanoeg ni fare Urim nge Thummim ngay—ni kan uneg i chaʼariy ko fapi plate; nge rogon ni fanay nge muruwel ko gal rabaʼ i malang ney e arame ke dugliy nga dakaen bugniiʼ ni ‘tathogthog’ ni kakrom ara pi yungiyalʼ i nʼen ni ke thimur; ni Got e ke tʼarmidlan ni fan ko pilyeg thin ko fare ke babyor. …

“Bayay, ma ki yoeg ngog, u napʼan ni bay gufek fapi plates ni ire faram e ke weliy morngaʼagen—ya fare ngiyalʼ i nʼen ni thingar gufek e dawori tawngay—Gag e thingar dab gudag e pinnʼem ngakʼ beeʼ ni demitrug; ara fare rabaʼ i breastplate nib dachug ko fare Urim nge Thummim; kemus ni piʼin ni thingar ni motochiyel nag ngog ni nggu dag ngoraed; faʼan gura rinʼ ma thingar ni gathaeyeg. Ngiyalʼ ni be non ngog ni morngaʼagen fapi plates, ma fare changar rog e ni pilyeg nge tamilang e tafnay rog me yog nug guy e gin ni chaʼariy fapi plates riy, ma ireram nib tamilang mab magagiyel ni gu nang e ranginnʼem bayay u napʼan ni guwaen ngay.

“Tomren e biney e morngaʼag, mug guy farengi tamilang u lan fare singgil ni ku chingyalʼ nem me kunkunuy ir nga taʼabang nge chalongbiy fachaʼ nem niʼir faram e ki; i non ngog, me ʼulʼul ngay i yaen ni aram rogon nge madaʼ ko ngiyalʼ ni fare singgil e ke lumor bayay, ma kemus ni taʼaben faʼanem; maʼaram, e ku chingiyalʼ nem mug guy, ni guwa banʼen ni bay faron nib mab nga tharmiy, me yaen riy ngalang nge madaʼ ko ngiyalʼ ni ke mʼay nga bang, nge fare singgil e ki sul nga rogon ni immoy u mʼon ni nge yibi mʼug riy e rangi tamilang ney nu tharmiy.

“Mug thig nga butʼ ngar gu falʼeg i lemnag e nʼen ni ke buch rog nge nʼen ni dar likʼay a nug ngay ni ke yibi yoeg e re tamalʼog ney ngog; maaram, napʼan ni kug be lem; ma ku chingiyalʼ nem mug pirʼeg ni fare singgil rog e ki sul e tamilang nga langgin bayay, mar de nʼuw napʼan, ma ku bayay fare tamalʼog nu tharmiy e ki sakʼiy u barbaʼ i charen e bet rog.

“Me tabab weliy ngog, ma ku fapi nʼen ni weliy ni ku rogon ni rinʼ ko yaen sommʼon e wub ni tay, ni dariy banʼen nib achichig ni ke thil riy; ma napʼan ni muʼ i rinʼ ni aray rogon, me yoeg ngog morngaʼagen bogi gechig nib gaaʼ ni bay yibi aw nga fayleng, nib almarin e gafgow riy ni uyngol, nge mael, nge mʼar ni ubchiyaʼ; nge pi gechig ney ni ubchiyaʼ e bay yibi aw nga fayleng u lan e biney e mfen. Napʼan ni muʼ i weliy e pinnʼey, ma ki sul bayay ngalang ni boed rogon ni rinʼ ko sommʼon.

“Ma ngiyalʼ ney, e rib toʼaer ni ke ying nga laninʼug, ni ki mʼay nag e chuchuw u lani awcheg, mug thig nga butʼ ni kari balyang anʼug ko nʼen ni kug guy ma kug rungʼag. Machane mang e kari mat awcheg ngay e napʼan ni kug guy bayay fare tamalʼog u barbaʼ i charen e bet rog, mug rungaʼag ni ke non ara ki sul bayay u dakean fapi nʼen ni boed ko sommʼon; me chiyliy ngog ni nggu kal ayuw ya be yoeg ni Moʼoniyanʼ e bayi guy rogon ni nge yib nag e lumel ngog (ni bachane gafgow ni be tay e tabnaew rokʼ e chitmag) ni nggu fek fapi plates ni nge yog ni ngug falaʼab gaed riy. Ireray e nʼen ni tay chilen ngog, ni be yoeg ni dakuriy rebi fan ni nggu fek fapi plates ma kemus ni fan ko liyoer ngakʼ Got, ma thingar i aw ni dariy banʼen ni ngan lemnag ngay ma kemus ni ngan falʼeg gilʼilungun ngay; ara faʼanra dangay ma dabiyog ni gura fek.

“Tomren e bin dalip yay ngay ni mʼug, ma ki sul bayay nga tharmiy ni boed ni kaʼarinʼ ko sommʼon, min digeyeg bayay ni nggu lemnag rarogon e biney e nʼen ni fin aray e ke buch rog; ma arame rib chugur ni ku chingiyalʼ nem nga tomren fare tamalʼog nu tharmiy e ke sul ngalang nge chuw rog ko yay ni dalip yay ngay, me choroʼol e nimen, mug nang ni arame be kadbul i yaen, ere madaʼ ni kug tayew e ri kamunngelʼ nge yaen i kakadbul.

“De nʼuw napʼan nga tomren mug od nggu chuw u bet rog, ma, kuboed ni guma rinʼ, mug waen gu rinʼ e pi muruwel nib tʼuf ni guma rinʼ u rebo rran; machane, guwan ni nggu muruwel ni kuboed rogon ni gubin e ngiyalʼ, mug pirʼeg ni dabiyog ya ribe mʼamʼay gelngig. Chitmag, ni ire un ngog nga ug muruwel gow, e pirʼeg ni bay banʼen ni ke buch rog, me yoeg ngog ni nggu waen nga tabnaew. Mug waen ni gube finey e sul nga tabnaew; machane, napʼan ni kug nomeg ni nggu likʼaf e yoror u milaeyʼ nga barbaʼ ko gin ni gamow bay riy, me mʼay gelngig, mug thig ni deyog nug tilegeg nggu aw nga butʼ, mab snʼunʼuw napʼan nug paer u butʼ ni dariy banʼen nib tamilang e tafney rog riy.

“Re nʼen ni thʼabi sommʼon ni tamilang u wunʼug e ba lam ni be non ngog, ni be pining fithngag. Mug sap ngalang, mug guy fare tamalʼog nib sakʼiy u puluwon loelgeg, nib liyeg e tamilang ni boed ko sommʼon. Me weliy ngog bayay gubin e pinʼen ni weliy ngog ko fare nepʼ u mʼon, me chiyliy ngog ni nggu waen ko chitmag nggog ngakʼ morngaʼagen e nʼen ni kug guy nge pi motochiyel ni kan piiʼ ngog.

“Mug fol riy; mug sul ngakʼ e chitmag nga milaeyʼ, mug weliy urngin banʼen ni ke buch ngakʼ. Me fulweg ngog ni ba gagyeg rokʼ Got, me yoeg ni nggu waen gurinʼ ni boed rogon e pinʼen ni ke motochiyel nag fare tamalʼog ngog. Mug chuw u milaeyʼ, nggu waen ko farengi nʼen ni midil nag fare tamalʼog ngog ni kan chaariy fapi plates riy; ma bachane kari matabgol u wunʼug e ranginnʼem, ere gu nang e re ginnʼem ko chingiyalʼ i nʼen ni kug taw ngay.

“Charen e binaw nu Manchester, ko falak nu Ontario, u New York, e bay bburey riy nib gaaʼ ma ire thʼabi tolang ko re gginnʼem. Nga baʼan ni ngael ko re burey ney, ni de palog u peʼebgul, u tanggin ba malang nib felʼ gaʼngin, e bay fapi plates riy, ni kan chaʼariy nga lan ba kahol. Re malang ney e ba dubʼag mab lulbuy nga lukngun nge baʼan dakean, mab gilgith nga mirichlen, ere nga lulukngun e be mʼug nga dakean e buutʼ ngalang, machane mirichlen ni gaʼangin yang e ba kʼeyag nga fithikʼ e butʼ.

“Tomren ni kug chuweg e butʼ u taʼaben e re malang nem, mug fek baler i gakʼiy, nggu ayliy nga tanggin mirichlen fare malang, mug chum nag ngalang. Mug sap nga langgin, mug guy fapi plates, nge fare Urim nge Thummim, nge fare breastplate, ni boed ni yoeg fare tamalʼog. Fare kahol ni kan moleg e pinnʼey nga langgin e ni ngongoliy ko malang nni ufung nga taʼabang nib simit e smen. Tʼay e re kahol nem e kan moleg lʼagruw i malang ngay nib yaen u barbaʼ nga barbaʼ, ngo dakean e gal malang ney e kan tay fapi plates ngay nge ku boech banʼen ni dachug ngay.

“Mug waen ni nggu fek e pinnʼem nga butʼ, machane mathngelwol nag fare tamalʼog ngog ni nga dab gurinʼ, me yoeg ngog bayay ni dawori taw nga napʼan ni ngan fek e pinnʼem nga butʼ, ma dabi buch, nge yani gaman aningeg e duw nga mʼon ko rofen nem; machane me yoeg ngog ni thingar gub ko ranginnʼem u rebe duw nga mʼon ko rofen nem, ma bay yib ni nggu madaʼ gow, ma thingar gu rinʼ ni aram rogon nge yani taw nga napʼan ni ngan fek e fapi plates.

“Ere, gurinʼ ni boed ni kan motochiyel nag ngog, ni guwaen ko ginnʼem u tungun gubin e duw, ma gubin e ngiyalʼ nug madaʼ gow fare tamalʼog u rom, mug nang rokʼ ko mang e nggu rinʼ nge boech e gonop ni gubin yay ni gamow be madaʼ, nib lʼeag rogon ko mang e bayi rinʼ fare Somoel, nge rogon nge uw rogon suwon ni ngan gagyeg nag u lan e tin tomur e rran. …

“Munmun me yani taw nga napʼan ni nggu fek fapi plates, nge fare Urim nge Thummim, nge fare breastplate. Ko fare rran ni riliwʼ nge lʼagruw ko Pul ni Mereb, ko duw ni rebe biyuʼ nge miruk mirʼay nge riliwʼ nge medlip, nga tomren ni kug waen ni boed ni kug marinʼ u tungun ko rebo duw ko farengi nʼen ni kan chaʼariy e pinnʼem riy, fare tamalʼog nu tharmiy e fek nge piiʼ ngog me yigey ba motochiyel ngay ni gaʼar: ni gag e thingar gu koel ayuwngin e pinnʼem; ni faʼan gura pag nge buch banʼen riy, ara dab ug chaʼariy, ma ri yira chuwegeg; machane ri yoeg ngog ni ngar gguy rogon i ayuweg, mug chaʼariy, nge madaʼ ko ngiyalʼ niʼir, fare tamalʼog, e ke yoeg ni nggu sulweg e pinnʼem ngakʼ.

“De nʼuw napʼan riy mug pirʼeg fan ni kan chiyliy ngog ni nggu ayuweg ma gube chaariy e pinnʼem, nge ku fan ni yoeg fare tamalʼog nra taw nge napʼan ni kug muguʼuliy e tin ni thingar gu rinʼ ngay, ma bay yoeg ni nggu sulweg ngakʼ. Ya denʼuw napʼan ma kan nang ni bay e pinnʼem rog, ma riybe tʼaer liben ni ngan fek rog. Urngin mit e liyab ni yimnang ma un muruwel ngay ni aram fan. Ere fare gafgow ntay riy ngog e ri gel me almarin ko sommʼon, nge yu ulung i gidiiʼ e kayug ra falʼeged rograed kar pired ni yaed be guy rogon ni ngar feked e pinnʼem rog ko ngiyalʼ nra yog. Machane u dakean e gonop rokʼ Got, me yog ni paer e pinnʼem nib felʼ rogon u paʼag, nge yani madaʼ ko ngiyalʼ ni kug muguʼuliy e tin ni thingar gu rinʼ ngay. Me taw nga napʼan, u rogon nni tafnay nag, ma fare tamalʼog e pong ni nggu sulweg ngakʼ, ere gu fek nggu piiʼ ngakʼ; ma arame kubay rokʼ nge madaʼ ko biney e rran, ni bin lʼagruw e rran ko Pul ni Lal, ko duw ni rebe biyuʼ nge meruk mirʼay nge guyey nge meruk.”

Ma fare chep riy ni poloʼ, e ngam guy Chipin—Joseph Smith u lan fare Churwoʼ nib gaaʼ Puluwon.

Re chep ney ni kakrom e ni pug u fithikʼ e butʼ ni laman ba ulung i gidiiʼ ni yaed be non u fithikʼ e ab, min pilyeg e thin riy nge yib ni thin ni chiney u dakean fare tawaʼath nge gelngin Got ni be micheg ni riyulʼ ni pinnʼey e yib rokʼ, e ni yoloey ngan piiʼ nga fayleng ni thin nu Ngilis u lan fare duw ni 1830 ni The Book of Mormon.