1 Me yibi buch ni yibi sum ba kiiʼ nga fithikʼ fapi gidiiʼ, ni arame ra kiiʼ gaed nge yib boech aray me yaen boech aram ma ra beeʼ me yaen ko gin baʼadag, mar paged Nephi ni yigoʼ ir, ni immoy nib sakʼiy u fithikʼraed.

2 Me yibi buch ni Nephi e yaen ko gin baʼadag iyaen nga tafen, nibe lemnag e pinʼen ni ke dag fare Somoel ngakʼ.

3 Me yibi buch u napʼan nibe lem—ni ke moʼowaer laniyaenʼ ni bachan e pi ngongol ni kireb ko fapi gidiiʼ ko Nephites, ni pi muruwel roraed u milmor nib miith morngaʼagen, nge pi mathang pogofan roraed, nge pi matgael roraed, nge gubin mite denen—me yibi buch u napʼan ni aray rogon nibe lem u lan gumʼirchaʼen, ma musap gaed, bay ba lam ni yib ngakʼ ni be gaʼar:

4 Nge felʼ waʼatham, gur Nephi, ni fan e pinʼen ni kam rinʼ; ya kug guy ni damur chachalban i weliy fare thin niʼir e kug piiʼ ngom, ngakʼ e pi gidiiʼ ney. Ma gur e dawor murus ngoraed, ma dawor mu gay rogon ni ngam chaʼariy e yafos rom, ya kam gay rogon ni ngam ayliy laninʼug, ma ngam fol ko pi motochiyel rog.

5 Ere chiney, ri bachan e kamrinʼ e biney ni dar moʼowaer laninʼum ngay, ere musap, nggu falʼeg waʼatham ni gubinfen; ma bay gu tayem ni gab madangdang ko thin nge ngongol, u fithikʼ e mich nge muruwel; arragon, ni arame gubin banʼen ma bay gu gagyeg nag u rogon e thin rom, ya gur e dab mu duwriy banʼen ni nge togopluw nga laninʼug.

6 Musap, gur Nephi, i gag Got. Musap, gube yoeg ngom u pʼoewchen e pi angel rog, ni nge gaʼlungum rokʼ e pi gidiiʼ ney, ma bay gu gechig nag e fayleng ko uyngol, nge mʼar ni ubchiyaʼ, nge gafgow, u rogon e pi denen ko pi gidiiʼ ney.

7 Musap, kug piiʼ gelingim, ni re nʼen ni gara mʼag u fayleng e bay ni mʼag u tharmiy; ma nʼen ni gara pithig u fayleng e bay ni pithig u tharmiy; ere aray rogon ni bay yib gelingim u fithikʼ e pi gidiiʼ ney.

8 Ere aray rogon, ni faʼan gara yoeg ko re temple ney ni nge pil, ma ra buch.

9 Ma faʼan gara gaʼar ko re burey ney, Mmuchbuʼ nga butʼ ngam pochpoch, ma ra buch.

10 Ma musap, faʼan gara yoeg ni Got e nge liiʼ e pi gidiiʼ ney, ma ra yibi buch.

11 Ere chiney e musap, gube chiyliy ngom, ni ngam man ngam weliy ngakʼ e pi gidiiʼ ney, ni ke gaʼar fare Somoel ni Got, ni Gubin ma Rayog Rokʼ: Faʼanra dab mu kalgaed ngaenʼmed ma bay ni liiʼmed, nge yaeni madaʼ ko ngiyalʼ ni kan gatheaymed.

12 Ere musap gaed, chiney e yibi buch u napʼan ni yoeg fare Somoel e pi thin ney ngakʼ Nephi, me tal ma daki yaen ko naʼun rokʼ, me sul ngakʼ fapi yu ulung i gidiiʼ ni kar garar gaed u dakean farengi nam, me tabab i weliy ngoraed fare thin rokʼ Somoel ni kan weliy ngakʼ, ni morngaʼagen e mogothgoth nra aw ngoraed ni faʼanra dabra kalgaed ngaenʼraed.

13 Ere chiney e musap gaed, yug aram rogon e binem e maʼangʼang ni ke rinʼ ni weliy Nephi ngoraed morngaʼagen fare yamʼ ni tay fare tapuf-oloboch, mar ʼelʼel niged gumʼirchaʼraed ma dar motoyil gaed ko fapi thin rokʼ Somoel.

14 Ere Nephi e weliy ngoraed fare thin rokʼ Somoel, ni gaʼar: Faʼanra dab mu kalgaed ngaenʼmed, ni be yoeg fare Somoel, ma bay ni liiʼmed nge madaʼ ko ngiyalʼ ni kan gatheaymed.

15 Me yibi buch u napʼan ni yoeg Nephi fare thin ngoraed, ma musap gaed, kur ʼelʼel niged gumʼirchaʼraed ma dabra motoyil gaed ko thin rokʼ; ere ra togopluw gaed ngakʼ, mar gayed rogon ni ngar koeled ni nge yog ni ngar yinʼed nga kalbus.

16 Machane musap gaed, fare gelingin Got e immoy rokʼ, ma deyog ni ngar feked ngar yinʼed nga kalbus, ya fare Kan ni Thothup e fek nge chuweg u fithikʼraed.

17 Me yibi buch ni aram rogon ni iyaen u gelingin fare Kan ni Thothup, u rebo ulung ngo rebo ulung, nibe yoeg fare thin rokʼ Got, ni aram rogon iyaen nge madaʼ ko ngiyalʼ ni ke yoeg ngoraed ni yaed gubin, ara piiʼ nge yaen nga fithikʼ gubin fapi gidiiʼ.

18 Me yibi buch ni dar motoyil gaed ko thin rokʼ; ma arame tabab e togopluw ni yoʼor, ni arame ra kiiʼ gaed, mar togopluw gaed ngoraed mar tabab gaed i liiʼed yaed ko sayden.

19 Ma aray rogon ni mus e bin medilip i ragag nge taʼareb e duw ko fare lung ko fapi tapuf-oloboch ko gidiiʼ ku Nephi.