1 Me yibi buch u napʼan ni mus e bin nelʼ i ragag nge lʼagruw e duw ko fare lung ko fapi tapuf-oloboch, ma gubin e pinnʼey make buch ma fapi Lamanites e kar bangeyed, ni tin yoʼor i yaed, e kar manged ba ulung i gidiiʼ nib matʼaw, ni arame ke gel faraed matʼaw ngakʼ fapi Nephites, ni bachan e miyuluy nge lʼagaenʼ roraed nga fithikʼ e mich.

2 Ya musap gaed, boʼor i yaed fapi Nephites ni ke gelaenʼ ma dabi kalngaenʼ ma kar poloʼ i kireb gaed, ni arame ra feked yathin fare thin rokʼ Got nge gubin fapi machib nge prophecy ni yib nga fithikʼraed

3 Machane, fapi gidiiʼ ko galasia e ra falfalaenʼ gaed ni bachan e michaenʼ ni tay fapi Lamanites, arragon, ni bachan fare galasia rokʼ Got, ni kan yarmiy nga fithikʼraed. Mar ur nanged salapraed, mar falfalaenʼ gaed ngoraed, mar falfalaenʼ gaed ni rib gel.

4 Me yibi buch nib yoʼor ko fapi Lamanites e rabaed nga lan fare binaw nu Zarahemla, marbaed ra weliyed ngakʼ fapi gidiiʼ ko Nephites rogon ni michaenʼraed, mar ninged chilen ngoraed ni nge michaenʼraed mar kalgaed ngaenʼraed.

5 Arragon, ma rib yoʼor e piʼin ni machib ko gelingin nge matʼawon, mar feked boʼor i yaed nga butʼ nga fithikʼ e sobutʼaenʼ, ni ngar manged gachalpen Got nge fare Saaf.

6 Me yibi buch ni boʼor ko fapi Lamanites e ranoed nga lan fare binaw ni bay nga leluʼoch; nge ku aram rogon ngakʼ Nephi nge Lehi ni kuranow nga lan fare binaw ni bay nga leluʼoch, ni ngar machib gow ngakʼ fapi gidiiʼ. Ere aray rogon ni mus e bin nelʼ i ragag nge dalip duw.

7 Ere musap gaed, yibi awe gapas nga lan gubin yang e binaw, ni arame bung rogon ngakʼ fapi Nephites ni nga ranoed ko yungin ni yaed baʼadag ko fare nam, ni demutrug ko nga fithikʼ e Nephites fa Lamanites.

8 Me yibi buch ni fapi Lamanites e ku ranoed ko yungin ni yaed baʼadag, ni demutrug ko nga fithikʼ e Lamanites ara nga fithikʼ e Nephites; ere aray rogon ni puf e thaʼ u thilraed ngoraed, ni ngar folchuwayʼ gaed, ni nge felʼ rograed, ni boed rogon ni yaed baʼadag.

9 Me yibi buch ni arame rigel e falaʼab roraed, ni yow lʼagruw ni fapi Lamanites nge fapi Nephites; me yoʼor e gol roraed, nge silber, nge gubin mite wasey ni thʼabi felʼ, u lan fare binaw ko yimuch ngo lan fare binaw ko leluʼoch.

10 Arame chiney e fare binaw ko yimuch e kanoeg ni Lehi, ma fare binaw ko leluʼoch e kanoeg ni Mulek, ni boed fithingan fare pagael ni fak Zedekiah; ya fare Somoel e fek Mulek iyib nga lan fare binaw ko leluʼoch, nge Lehi iyaen nga lan fare binaw ko yimuch.

11 Ere musap gaed, immoy gubin mite gol u lan e galyang i binaw ney, nge silber, nge ore ni thʼabi felʼ ni gubin mit; nge gidiiʼ ni rib felʼ paʼ ko muruwel, ni ra falʼeged gubin mite ore mar pacheged doew; ere aram rogon ni ra falaʼab gaed.

12 Mar yunged e grain nib yoʼor, ko leluʼoch nge yimuch; mar monʼog gaed nib felʼ rogon, nu lan e leluʼoch ngu lan e yimuch. Mar yoʼor gaed mar gel gaed u lan e nam. Mar chuguliyed e gamanman nge garbaw nib yoʼor, arragon, nib yoʼor nib sugsug.

13 Musap gaed pi ppin roraed e ra muruwel gaed nib gel ma yaed be falʼeg e tiret, mar falʼeged gubin mite mad, ni kan falʼeg ko mad nib dubʼag nge gubin mite mad, ni ngan chuweg e piʼin dariy madan ngay. Ere aray rogon ni mʼay e bin nelʼ i ragag nge aningeg e duw u fithikʼ e gapas.

14 Ma lan e bin nelʼ i ragag nge lal e duw e kur pirʼeged e falfalaenʼ nge gapas riy, arragon, boʼor e machib mab yoʼor e prophecy ni morngaʼagen e pinʼen ni bay yib. Ere aray rogon ni yaen e bin nelʼ i ragag nge lal e duw.

15 Me yibi buch u napʼan lan e bin nelʼ i ragag nge nelʼ e duw ko fare lung ko fapi tapuf-oloboch, ma musap gaed, Cezoram e ni thang e fan rokʼ ni dannang ko miniiʼ u napʼan ni ke paer ko fare gilʼ e ta puf-oloboch. Me yibi buch ni ku lan e re duw nem, ni fare pagael ni fak, niʼir e ke dugliy e gidiiʼ ni nge yinʼ luwan, e kun thang e fan rokʼ. Ere aray rogon ni mus e bin nelʼ i ragag nge nelʼ e duw.

16 Ma napʼan ni tabab e bin nelʼ i ragag nge medilip e duw ma fapi gidiiʼ e ra tabab gaed i ngongoliy e kireb nib almarin bayay.

17 Ya musap gaed, fare Somoel e ke tawaʼath nagraed ni ke nʼuw napʼan ko falaʼab nu fayleng ni arame dawor ki yibe damomuw ngoraed, ni ngar mael gaed, ara ngar puʼoeged e rachaʼ; ere mar tabab gaed i tay gumʼirchaʼraed nga dakean e pi falaʼab roraed; arragon, mar tabab gaed i gay rogon ni nge felʼ rograed ni ngar tolang gaed ngakʼ boechi yaed; ere ra tabab gaed ko mathang pogofan nib miith morngaʼagen, nge moroʼroʼ nge matgael, ni nge yog ni felʼ rograed.

18 Ere chiney e musap gaed, pi tamathang pogofan nge tamatgael nem e ba ulung ni sunmiy raed i Kishkumen nge Gadianton. Ere chiney e yibi buch nib yoʼor e piʼin ni immoy, u fithikʼ fapi Nephites, ni rabaed ko fare ulung rokʼ Gadianton. Machane musap gaed, bagaʼ ni yaed boʼor u fithikʼ e tin ni thʼabi gel e kireb rokʼ ko fapi Lamanites. Ma kanoeg ni yaed bogi moroʼroʼ nge tamathang pogofan.

19 Ere yaed e piʼin ni ra thanged e fan rokʼ fare pilung ko tapuf-oloboch i Cezoram, nge fare pagael ni fak, u napʼan ni yow bay ko fare gilʼ e tapuf-oloboch; ma, dan pirʼeg raed.

20 Ere chiney e yibi buch u napʼan ni ke pirʼeg fapi Lamanites ni bay e moroʼroʼ u fithikʼraed mari kirbaenʼ raed nib gel; mar muruwel gaed ko gubin banʼen ni rayog u gelingraed ni ngar thanged oewchraed u dakean e fayleng.

21 Machane musap gaed, Moʼoniyanʼ e kʼaring e damomuw nga lan gumʼirchaʼen e tin yoʼor ko fapi Nephites, ni arame ra dachuguyed yaed ko fapi yu ulung i moroʼroʼ, mar uned ko pi mʼag roraed nge pi michmich roraed, ni yaedra matangiy mar ayuweged yaed ni demutrug ko mang magawon ni yaedra aw nga fithikʼ, ni nga dabra feked gechigan e pi mathang pogofan, nge pi matgael, nge pi moroʼroʼ ni yaed be tay.

22 Me yibi buch nra sayin gaed nga butʼ, arragon, bogi sayin roraed nib miith morngaʼagen, nge thin roraed nib miith morngaʼagen; ni fan e biney e nge yog ni magagyel e chaʼ ni ke mang rebi chon e fare mʼag roraed, ni nge demutrug ko mang kireb ni ke rinʼ rebi walagen ma dabi madʼad rebi walagen ngakʼ, ara bagyaed e piʼin ni ke mang ko ulung rokʼ, ni ke falʼeg ba mʼag u thilrow.

23 Ma aray rogon ni gomanga rayog ni ngar thanged e fan, ma yaed be matgael, nge moroʼroʼ, mar rinʼed e tin galong nge gubin mite ngongol ni kireb, nib togopluw ko pi motochiyel ko nam roraed nge pi motochiyel rokʼ e Got roraed.

24 Ma chaʼ nib un ko fare ulung roraed nra dag ko gidiiʼ morngaʼagen e pi kireb roraed nge pi fananikan roraed, e yira pufthin nagraed, ni gathi yalen e pi motochiyel ko nam roraed, ya rogon e pi motochiyel ko ngongol roraed rib kireb, ni ke piiʼ Gadianton nge Kishkumen.

25 Ere chiney e musap gaed, ireray e pi michmich nge mʼag nib miith morngaʼagen ni chiyliy Alma ngakʼ fak ni thingar dabi garar nga fayleng, ara dangay ma yaedra miliy e gidiiʼ nga butʼ iyaen ko gafgow.

26 Chiney e musap gaed, pi michmich nge pi mʼag nem nib miith morngaʼagen e de yib ngakʼ Gadianton ko fapi chep nni piiʼ ngakʼ Helaman; ya musap gaed, rabaed nga lan gumʼirchaʼen Gadianton ni rabaed rokʼ fachaʼ niʼir e yaen u liyiben nge mʼagaenʼ fagal nib mʼon e gallabthir roraed ngay ni ngar kayew fare waʼamngin nib mathngeluwol—

27 Arragon, ku ir fachaʼ nra liyeb gow Cain, ni faʼanra thang e fan rokʼ walagen i Abel ma dabi nang e gidiiʼ u fayleng. Ere ur liyeb gow Cain nge pi gachalpen aram ko ngiyalʼ nem iyib.

28 Ma kuʼir fachaʼ ni tay nga lan gumʼirchaʼen fapi gidiiʼ ni ngar toeyed ba wulyang nib tolang ni nga ranoed riy nga tharmiy. Ma kuʼir fachaʼ ni i baen nag fapi gidiiʼ ni rabaed ko fare wulyang iyib nga lan e re nam ney; niʼir e garareg fapi muruwel nu milmor nge pi ngongolen e fananikan u dakean gaʼangin yang e nam, nge yaeni madaʼ ko ngiyalʼ ni ke miliy e gidiiʼ nga butʼ nga fithikʼ ba gafgow ni poloʼ, nge ba infierno ni tafen e gafgow ni dabimus biʼid.

29 Arragon, ireram fachaʼ ni tay nga lan gumʼirchaʼen Gadianton ni ngki ululiy fare muruwel nu milmor, nge mathang pogofan nib miith morngaʼagen; ma ire yib nag iyib aram ko sommʼon ni sum e gidiiʼ nge yibi madaʼ ko ngiyalʼ ney.

30 Ere musap gaed, irechaʼ niʼir e chitamangin gubin e denen. Ma musap gaed, ma i ululiy e muruwel rokʼ nu milmor nge mathang pogofan nib miith morngaʼagen, ma mathapeg iyaen nga butʼ e pi liyeb roraed, nge pi michmich roraed, nge pi mʼag roraed, nge pi gagyeg roraed ko ngongol ni thʼabi kireb, u rebo mfen ngo reb ni be yaen u rogon ni rayog rokʼ ni nge longbiy paʼ nga gumʼirchaʼen e gidiiʼ.

31 Ere chiney e musap gaed, kari langbiy paʼ nga gumʼirchaʼen fapi Nephites; arragon, ni arame kari gel e kireb ko ngongol roraed; arragon, ni tin yoʼor i yaed e kar keruʼuyed e tin nib matʼaw banʼen, ma kar yitʼed nga butʼ fapi motochiyel rokʼ Got, ma kar sap gaed ko yungin ni yaed baʼadag, mar ngongoliyed e liyos ko gol nge silber nge mang got roraed.

32 Me yibi buch ni gubin e pi denen ney e yib ngoraed u bingyalʼ i banʼen ni de yoʼor e duw napʼan, ni arame tin yoʼor riy e yib ngoraed u lan e bin nelʼ i ragag nge medilip e duw ko fare lung ko fapi tapuf-oloboch ko fapi gidiiʼ ku Nephi.

33 Ma kur monʼog gaed nga fithikʼ e pi denen roraed u lan e bin nelʼ i ragag nge meruk e duw, ni yib nag e kirbaenʼ nge mayoer ngakʼ e piʼin nib matʼaw.

34 Ere kadguyed ni fapi Nephites e ra tabab gaed ko mul ko mich, mar monʼog gaed nga fithikʼ e kireb nge pi ngongolen e fananikan, u napʼan nibe monʼog fapi Lamanites nga fithikʼ fare llowaenʼ ni morngaʼagen e Got roraed; arragon, mar tabab gaed i koel falan e pi gamʼing nge pi motochiyel rokʼ, ma ranoed u fithikʼ e tin riyulʼ nge tin nib matʼaw.

35 Ere kadguyed ni fare Kan ni Thothup rokʼ fare Somoel e ke tabab ko chuw rokʼ fapi Nephites, ni bachan e ngongol ni kireb nge ʼelʼel ko pi gumʼirchaʼ roraed.

36 Ere kadguyed ni fare Somoel e tabab i puʼoeg e Kan ni Thothup rokʼ nga dakean fapi Lamanites, ni bachan e ba moem ngoraed mab mʼagaenʼraed ngay ni nge michaenʼraed ko pi thin rokʼ.

37 Me yibi buch ni fapi Lamanites e ragayed fare ulung ko moroʼroʼ rokʼ Gadianton; mar machib niged fare thin ku Got u fithikʼ e piʼin thʼabi gel e kireb rokʼ, ni arame re ulung ney ko moroʼroʼ e ni math oewchraed u fithikʼ fapi Lamanites.

38 Me yibi buch ni aram rogon, ma fapi Nephites e ra piiʼed e athamgil ngoraed ma yaed be ayuweged yaed, nra tabab gaed ko piʼin thʼaebi gel e kireb rokʼ, nge yaeni madaʼ ko ngiyalʼ ni kar garar gaed u dakean gaʼangin yang fare nam ko Nephites, ma kar pingeged laniyaenʼ e tin yoʼor rokʼ e piʼin nib matʼaw nge madaʼ ko ngiyalʼ ni ke michaenʼraed ko pi muruwel roraed mar uned ko pi ngongol roraed, mar uned ngoraed ko pi mathang pogofan nge pi liyeb roraed nib miith morngaʼagen.

39 Ere aray rogon ni yog ngoraed fare am ni ma gagyeg niʼir rokʼ, ma arame ri yitʼed nga butʼ ma yaed be liiʼ, ma yaed be gafgow nag, ma yaed be piiʼ keruʼ raed ngakʼ e piʼin gafgow nge piʼin moding, nge pi gachalpen Got nib sobutʼaenʼ.

40 Ere kadguyed ni kar aw gaed nga ba dodow nib ubchiyaʼ, ere kar loel gaed ko kireb ni ba gafgow ni dabimus biʼid.

41 Me yibi buch ni ireray rogon ni mus e bin nelʼ i ragag nge meruk e duw ko fare lung ko fapi tapuf-oloboch nga dakean e gidiiʼ ku Nephi.