1 Musap gaed, chiney e yibi buch u napʼan ni yoeg Nephi e pi thin ney, ma bay boech e pumoʼon u fithikʼraed nra miil gaed iyaen ko fare gilʼ e tapuf-oloboch; arragon, ni arame lal i yaed e ranoed, ma yaed be yoeg, u napʼan ni yaed be gaʼar:

2 Musap gaed, chiney e ngad nanged ko riyulʼ ni re moʼon ney e ba profet ma ke chiyliy Got ngakʼ ni nge prophesy nag e tiney e maʼangʼang ngodaed fa dangay. Musap gaed, dar mich u wunʼdaed ni ke rinʼ; arragon, dar mich u wunʼdaed niʼir ba profet; machane, faʼanra riyulʼ e rennʼey ni ke yoeg ni morngaʼagen fare pilung ko tapuf-oloboch, ni ke yimʼ, ma arame ra mich u wunʼdaed ni tin baʼaram e thin ni ke weliy e ba riyulʼ.

3 Me yibi buch nra miil gaed u poloʼ i gelingraed, marbaed nga naʼun nga tagilʼ ea tapuf-oloboch; mar guyed, fare pilung ko tapuf-oloboch e ke thig ke aw nga butʼ, nib mol nga fithikʼ i rachaʼen.

4 Ere chiney e musap gaed, napʼan ni kar guyed e biney me balyangaenʼraed nib gel, ni arame ra thigthiggaed nga butʼ; ya de michaenʼraed ko thin rokʼ Nephi ni weliy ni morngaʼagen fare pilung ko tapuf-oloboch.

5 Machane chiney, e napʼan ni kar guyed me mich u wunʼraed, me yib e murus ngoraed ko gubin fapi gechig ni weliy Nephi morngaʼagen nra yib ngakʼ fapi gidiiʼ; ere rrur ni marus gaed mar thiggaed nga butʼ.

6 Chiney, e chingiyalʼ innʼem u napʼan ni kan thang e fan rokʼ fare tapuf-oloboch—ni rugoey walagen e yaer ngakʼ ni ke mithaeg ir, me miil nge yaen, ma fapi tapigpig e ra miil gaed nga roeged ko fapi gidiiʼ, ni yaed be tolul ni ke awe ba mathang pogofan u fithikʼraed.

7 Ere musap gaed fapi gidiiʼ e ra kunuyed yaed nga taʼabang ko gin bay fare gilʼ e tapuf-oloboch riy—ma musap gaed, me balyangaenʼraed ni kar guyed fare lal i moʼon ni kar thiggaed nga butʼ.

8 Ere chiney e musap gaed, fapi gidiiʼ e dariy banʼen ni yaed manang u morngaʼagen fare ulung ni kar mukun gaed nga taʼabang ko farengi mileayʼ ku Nephi; ere ragaʼar gaed roraed: Pi moʼon ney e ireray e pichaʼ ni kar thanged e fan rokʼ fare tapuf-oloboch, ere Got e magawon nagraed ni arame dakiyog ni ngar miil gaed rodaed.

9 Me yibi buch nra koeled raed, ngar mʼaged raed ma ninʼ raed nga kalbus. Ma bay bbugi thin nni wereg iyaen ni fare tapuf-oloboch e kan liiʼ keyimʼ ma fapi ta mathang pogofan e kan fekraed ka ninʼ raed nga kalbus.

10 Me yibi buch ni yaen ni rebo rran riy ma fapi gidiiʼ e ra mukun gaed nga taʼabang ni ngar daloloeyʼ gaed ma ngar baley niged e abich roraed, u gilʼ e gumʼeyag ko fare pilung ko tapuf-oloboch ni kan liiʼ kemʼ.

11 Nge ku aram rogon ngakʼ fapi tapuf-oloboch ni yaed bay ko mileayʼ ku Nephi, ni ra motoyil gaed ko thin rokʼ, e kur mukun gaed nga taʼabang ko fare gilʼ e gumʼeyag.

12 Me yibi buch ni ur fithed u fithikʼ fapi gidiiʼ, nibe lungraed: Biyuʼuw fa piʼin ni yead lal nni lʼoegraed ni ngar duwriyed morngaʼagen fare pilung ko tapuf-oloboch ko keyimʼ fa dawor? Mar fulweged ni kar gaʼar gaed: Morngaʼagen fare lal i moʼon ni gimed be yoeg ni kam lʼoeged, e dag nanged; machane bay lal e piʼin nib tamathang pogofan, niʼir e ku gunʼed raed nga kalbus.

13 Me yibi buch ni fapi tapuf-oloboch e yaed baʼadag ni ngan fekraed iyib ngoraed, ma arame ni fekraed iyib ngoraed, mar guyed ni yaed falal i gidiiʼ ni kan lʼoegraed; ere musap gaed fapi tapuf-oloboch e ra fithed raed ni ngar nanged morngaʼagen e nʼen ni ke buch, ma roeged ngoraed gubin ni kar rinʼed, ni yaed be gaʼar:

14 Gu miil gaed nggu baed ko fagin gilʼ e tapuf-oloboch, ma napʼan ni gguyed gubin banʼen ni woed ni ke micheg Nephi, me balyangaenʼ maed ni arame gu thiggaed nga butʼ; ma napʼan ni sul nge felʼ rogmaed ko balyangaenʼ ni kug tayed, ma musap gaed mar yinʼed gamaed nga kalbus.

15 Chiney e, morngaʼagen e mathang pogofan ni kan tay ko re moʼon ney, e dag nanged ko miniiʼ e ke rinʼ; kemus ni baʼaray chi oren e nʼen ni gamaed manang, gu miil gaed nggu baed ni boed rogon ni gamaed baʼadag, ma gamaed guy nib yamʼ, ni boed rogon e thin ni yoeg Nephi.

16 Me yibi buch ni fapi tapuf-oloboch e ra weliyed e nʼen ni ke buch nge tamilang u waenʼ fapi gidiiʼ, mar tolul gaed nib togopluw ngakʼ Nephi, ni yaed be gaʼar: Musap gaed, gamaed manang ni chaʼaney i Nephi e ke taʼareb lungrow beeʼ ni nge liiʼ fare tapuf-oloboch, nge muʼ me weliy ngomaed, ni gomanga yog ni lʼagaenʼ maed ko mich rokʼ, ni nge yog ni langlangeg ir ngalang nge mang beeʼ nib tolang, ni ke melʼeg Got, ma beeʼ nib profet.

17 Ere chiney e musap gaed, bay gu tamilngeg morngaʼagen e re moʼon ney ngomed, ma bayi pogofay nag e kireb rokʼ me yoeg ngodaed ngad nanged e chaʼ nib riyulʼ ni thang e fan rokʼ e re tapuf-oloboch ney.

18 Me yibi buch ni falal i gidiiʼ e ni pagraed ko fare rran nni gumʼeyag. Machane, ra gathibthib niged fapi tapuf-oloboch ko fapi thin ni kar weliyed nib togopluw ngakʼ Nephi, mar togopluw gaed ngoraed ni tataʼabagyaed, ni arame ra tʼired e thin nga dakeanraed.

19 Machane, mar guyed rogon ni Nephi e ngan koel ngan mʼag min fek iyaen nga pʼoewchen fare ulung, mar tabab gaed i duwriy nib thilthil rogon ni gomanga yog ni chel nge non niʼir e ba togopluw ngakʼ, ni gomanga yog ni ngan dugliy nib buch e rokʼ min liiʼ ngemʼ—

20 Ni yaed be gaʼar ngakʼ: Gur e bay e puruyʼ romew beeʼ; miniiʼ e re moʼon nem ni ke thang e fan? Moeg ngomaed e chiney, mag yoeg nib buch e roem; ma yaed be gaʼar, Musap baʼaray e salpiy; ma ka gamaed ra piiʼ ngom e yafos rom ni faʼan gara yoeg ngomaed, mag yoeg ni bay e michmich ni kam tayew beeʼ.

21 Machane Nephi e gaʼar ngoraed: O gimed e piʼin ni gimed be baen niged gimed, gimed e piʼin nib ʼelʼel gumʼirchaʼen, gimed e piʼin nib maʼew, nge gimed gidiiʼ nib ʼelʼel laniyaenʼ, gimed manang ko uw nʼumngin i napʼan nra pagmed Somoel ni Got romed ngam ʼulʼul gaed ko paer romed u fithikʼ e denen?

22 O thingar mu gelʼgelʼ gaed magmed yoer, ni bachan e fare gafgow ni gaaʼ nibe soen ni nge aw ngomed ko ngiyalʼ ney, ni faʼanra dab mu kalgaed ngaenʼmed.

23 Musap gaed kamoeged ni kug puruyʼ gow beeʼ ni nge thang e fan rokʼ Seezoram, ni fare pilung ko tapuf-oloboch rodaed. Machane musap gaed, gube yoeg ngomed, ni fan e biney e bachan e kugog ngomed ni nge yog ni ngam nanged morngaʼagen e rennʼey; arragon, ni arame nge aw nib michriy ngomed, ni gumnang e pi ngongol nib kireb nge pi fananikan ni bay u fithikʼmed.

24 Ma bachan e kug rinʼ e biney, ere kamoeged ni kug puruyʼ gow beeʼ ni nge rinʼ e biney nʼen; arragon, bachan e kug dag ngomed e biney e pow ere kam damomuw gaed ngog, magmed gay rogon ni ngam thanged e yafos rog.

25 Ere chiney e musap gaed, kug dag ngomed rebe pow, mug guy ko gimed ra gay rogon ni ngam thanged gag ko biney fa dangay.

26 Musap gaed gube gaʼar ngomed: Mmaroed ko fare naʼun ku Seantum, niʼir e walag rokʼ Seezoram, magmed gaʼar ngakʼ—

27 Faʼanem i Nephi, ni bedake profet nag ir, niʼir e ke prophesy nag boʼor banʼen nib kireb ni morngaʼagen e pi gidiiʼ ney, kam puruyʼ gow, niʼir e kam thang e fan rokʼ Seezoram riy, ni walagem?

28 Ma musap gaed, ra yoeg ngomed, Ni dawori rinʼ.

29 Magmed gaʼar ngakʼ: Kam thang e fan rokʼ walagem?

30 Ma bayi sakʼiy ngalang ni ke rus, ma dabki nang ko mang e nge yoeg. Magmed guy, ni bay yoeg ni dariy banʼen ni aram rogon; ma mithmith rokʼ e bay mu guyed riy ni gowa kegin ngay; machane, bay yoeg ngomed niʼir e dariy banʼen ni manang.

31 Machane musap gaed, bay mu falʼeged i yaliy, magmed pirʼeg e rachaʼ u dakean i matharngen e mad rokʼ.

32 Ma napʼan ni bay mu guyed, magmed gaʼar: Uw e ke yib e tiney e rachaʼ riy? Gamnang ni rachaʼen walagem?

33 Ma arame bayi daʼadaʼ, me mʼay rachaʼen i oewchen, ni gowa ke yimʼ.

34 Ma arame bay mu gaʼar gaed: Bachan e biney e murus ni kam tay nge oewchem ni ke mʼay rachaʼen, ere musap, kug nanged ni gur e bbuch e roem.

35 Ma arame bayi gel e murus rokʼ; ma arame bayi pogofay nag ngomed, ma dabki siyeg ni gathi ir e ke thang e pogofan.

36 Ma arame bay yoeg ngomed, ni gag, Nephi, e dariy banʼen riy ni gumnang morngaʼagen ma kemus ni kan piiʼ ngog u dakean fare gelingin Got. Ma arame bay mu nanged ni gag beeʼ ni gub yulʼyulʼ, ma kan lʼugeg kugub ngomed rokʼ Got.

37 Me yibi buch ni ranoed ngar rinʼed, ni woed rogon ni ke yoeg Nephi ngoraed. Ere musap gaed, fapi thin ni yoeg e goʼ riyulʼ; ya ri aram rogon, ni yoeg ni dariy banʼen ni aram rogon; ma ku aram rogon ni pogofay e nʼen ni ke rinʼ.

38 Ere ni fek iyaen ni arame ngan micheg ni riyulʼ niʼir e beeʼ nib tamathang pogofan, ma arame ni pag falal i gidiiʼ u kalbus, ma ku aram rogon ngakʼ Nephi.

39 Ma bay boech fapi Nephites ni michaenʼraed ko fapi thin rokʼ Nephi; ma kubay boech ni michaenʼraed ni bachan e mich rokʼ falal i gidiiʼ, ya ri michaenʼraed u napʼan ni ur moyed u kalbus.

40 Ma chiney e bay boech u fithikʼ fapi gidiiʼ, ni yoeg ni Nephi e ba profet.

41 Ma kubay boech ni gaʼar: Musap gaed, ire ba got, ya faʼanra gathi ba got ma dabiyog ni nge nang gubin banʼen. Ya musap gaed, ke yoeg ngodaed laniyaenʼ daed, ma kiyoeg ngodaed bogi banʼen, ni arame kedag ngodaed e chaʼ nib riyulʼ ni thang e fan rokʼ fare pilung ni tapuf-oloboch rodaed.