1 Me yibi buch u lan e bin medilip i ragag nge lʼagruw e duw ko fare ulung ko fapi tapuf-oloboch ni almarin fapi togopluw, ma arame yib e mael nga dakean gaʼangin yang e nam nga fithikʼ fapi gidiiʼ ku Nephi.

2 Ma fare ulung ko moroʼroʼ nib miith e ululiy e biney e muruwel ko gafgow nge ngongol nib kireb. Ma re mael ney e paer nib ʼulʼul ni poloʼ e re duw nem; ma lan e bin medilip iragag nge dalip e duw e ki paer nib ʼulʼul e mael.

3 Me yibi buch nu lan e biney e duw e yoer Nephi ngakʼ fare Somoel, nibe gaʼar:

4 O Somoel, wenig ngom dab mpag e pi gidiiʼ ney ngar mʼaed ko sayden; machane O Somoel, ngam pag e uyngol nge yib nga lan e nam, ni nge pug uran ngoraed fare Somoel ni Got roraed, ma sana yaedra kalngaenʼ mar chelgaed ngom.

5 Ere min rinʼ ni aram rogon, ni boed e thin ni yoeg Nephi. Ma arame yibi aw ba uyngol nib almarin nga dakean fare nam, nga fithikʼ fapi gidiiʼ ku Nephi. Ere aray rogon ni ʼulʼul fare uyngol u lan e bin medilip i ragag nge aningeg e duw, ma fare gafgow ni ma gagyeg u tan e sayden e tal, machane ri almarin u tan e uyngol.

6 Ma re gagyeg ko gafgow ney e ki ʼulʼul iyaen u lan e bin medilip i ragag nge lal e duw. Ma arame fare fayleng e ri malikʼ, ma daki piiʼ e waʼamngin e grain u napʼan e grain; ma fare fayleng ni poloʼ e ri gafgow, ni woed rogon u fithikʼ fapi Lamanites e aram rogon u fithikʼ fapi Nephites, ere ra gafgow gaed ngar mʼaed ni yu biyuʼ u dakean e yungin baʼaram e binaw nib gaaʼ nib kireb e gidiiʼ riy.

7 Me yibi buch ni fapi gidiiʼ e ruguyed ni arame ke chugur ni ngar mʼaed ko uyngol, mar tabab gaed i lemnag fare Somoel ni Got roraed; mar tabab gaed i lemnag fapi thin rokʼ Nephi.

8 Ere fapi gidiiʼ e ra tabab gaed ko wenig ngakʼ fapi tapuf-oloboch roraed nge pi tiyugangʼ roraed, ni ngar gaʼar gaed ngakʼ Nephi: Musap, kug nanged ni gur beeʼ nib moʼon rokʼ Got, ere meybil ngakʼ fare Somoel ni Got rodaed ni nge chefeg nga orel e re uyngol ney, ni nge siyi muguʼul gubin fapi thin ni kam weliy ni morngaʼagen e mogothgoth nra aw ngomaed.

9 Me yibi buch ni arame fapi tapuf-oloboch e roeged ngakʼ Nephi, ni boed rogon ni yi baʼadag. Me yibi buch u napʼan ni guy Nephi fapi gidiiʼ ni kar kalgaed ngaenʼraed ma kar sobutʼ niged yaed u dakean madan e kalngaenʼ ni kar chuw gaed ngay, me meybil bayay ngakʼ fare Somoel, nibe gaʼar:

10 O Somoel, musap ngam guy e pi gidiiʼ ney ni kar kalgaed ngaenʼraed; ma kar chuweged fare ulung ko Gadianton ni moroʼroʼ u fithikʼraed ni arame kar mʼay gaed, mar mithaeged fapi makath roraed u fayleng.

11 Ere chiney, O Somoel, ni kar sobutʼ niged yaed, wenig ngom mu chefeg e damomuw rom nga orel, mu pag e damomuw rom nga dabki gatheay fa piʼin kireb ni kam gechig nagraed.

12 O Somoel, wenig ngom mu chefeg e damomuw rom nga orel, arragon, damomuw rom nib gel, mag tileg e re uyngol ney nge chuw u lan e biney e nam.

13 O Somoel, wenig ngom mmotoyil ngog, mag guy rogon ni nge buch ni boed rogon e pi thin rog, mag piiʼ e nʼuw nge aw nga dakean e fayleng, ni nge yog ni piiʼ e waʼamngin, nge grain rokʼ u napʼan e grain.

14 O Somoel, gur e mmotoyil ko thin rog u napʼan nug gaʼar: Nge yib ba uyngol, ni nge yog ni tal e yamʼ ni yibe tay ko sayden; ma gumnang ni kag rarinʼ, ko ngiyalʼ ney, ni ngam mmotoyil ko thin rog, ya gur e kamoeg: Ni faʼanra kalngaenʼ e pi gidiiʼ ney ma gara tay raed ni dabra mʼaed.

15 Arragon, O Somoel, me gur e kam guy ni kar kalgaed ngaenʼraed, ni bachan fare uyngol nge yamʼ nge gafgow ni ke yibi aw ngoraed.

16 Ere chiney, O Somoel, dab mu chefeg e damomuw rom nga orel, mag sikeng nagraed ko yaedra pigpig ngom fa dangay? Ma faʼan yaedra rinʼ, O Somoel, mag tawaʼath nagraed ni boed rogon e thin rom ni kamoeg.

17 Me yibi buch u lan e bin medilip i ragag nge nelʼ e duw ma fare Somoel e chefeg e damomuw rokʼ ko fapi gidiiʼ nga orel, me guy rogon nge awe nʼuw nga dakean e fayleng, ma arame piiʼ e waʼamngin u ngalʼan ni ma piiʼ e waʼamngin. Me yibi buch ni piiʼ e grain u ngalʼan ni ma piiʼ e grain.

18 Ere musap gaed, fapi gidiiʼ e ra falfalaenʼ gaed mar oged e magaer ngakʼ Got, ma fare nam ni poloʼ e sug dakean ko falfalaenʼ; mar tileged i gay rogon ni ngar gatheayed Nephi, mar tayed fan niʼir ba profet, nge beeʼ nib moʼon rokʼ Got, ni bay e gelingin nge matʼawon rokʼ ni yib rokʼ Got.

19 Ma musap gaed, Lehi, ni walagen, e de palog rokʼ nga orel ko pinʼen nib lʼeag rogon ko tin nib matʼaw.

20 Ere aray rogon ni yibi buch ni fapi gidiiʼ ku Nephi e kur monʼog gaed bayay u lan fare nam, mar tabab gaed i falʼeg e pi yungi nʼen ni taferaed ni ke kireb, mar yoʼor gaed ngar garar gaed, nge yaeni madaʼ ko ngiyalʼ ni kar suguyed dakean gaʼangin yang fare nam, ni ruw yang, ko leluʼoch nge yimuch, ko day u ngael nge madaʼ ko day u ngek.

21 Me yibi buch ni bin medilip i ragag nge nelʼ e duw e mʼay u fithikʼ e gapas. Ma bin medilip i ragag nge medilip e duw e tabab u fithikʼ e gapas; me gaaʼ fare galasia nge garar u dakean gaʼangin gubin yang e binaw; ma tin yoʼor ko fapi gidiiʼ, ni fapi Nephites nge fapi Lamanites, e ruʼuned ko fare galasia; me yog e gapas ngoraed nib nʼuw napʼan u lan fare nam; ere aray rogon ni mʼay e bin medilip i ragag nge medilip e duw.

22 Nge ku aram rogon ni yog e gapas ngoraed u lan e bin medilip i ragag nge meruk e duw, ma kemus ni buchʼuw e togopluw ni morngaʼagen e pi gaʼfan ko machib niʼir e ke tay fapi profet nga butʼ.

23 Ma lan e bin medilip i ragag nge mereb e duw me tabab e wagagaey. Machane me yibi buch ni Nephi nge Lehi, nge boechi walagrow nib yoʼor ni yaed manang morngaʼagen e pinʼen nib gaʼfan mab riyulʼ ko machib, mab yoʼor e yiʼiy nibe yib ngoraed ni gubin e rran, ere ra machib niged fapi gidiiʼ, ni arame ra tileged e wagagaey roraed ni kare re duw nem.

24 Me yibi buch ni u lan e bin ni meruk i ragag e duw ko fare lung ko fapi tapuf-oloboch ko gidiiʼ ku Nephi, ma immoy ba ulung i gidiiʼ nra chuw gaed ko fapi gidiiʼ ku Nephi, ni immoy ini duw aram nga mʼon ni ranoed ngakʼ fapi Lamanites ngar feked nga dakeanraed fithngan fapi Lamanites, nge kub ulung e tin riyulʼ i gidiiʼen fapi Lamanites, nra kʼaringed e damomuw ngoraed ara fa piʼin nra chuw gaed, e ra tabolngin niged e mael iyaen ngakʼ pi walagraed.

25 Mar thanged e fan ma yaed be matgael; mar miil gaed ngar suloed nga fithikʼ e burey, ngo lan wuruʼ e binaw nge yungi nʼen nib miith, ni yaed be miith ni nga dabni pirʼeg raed, ma yaed be yoʼor ni gubin e rran, ni arame bay e gidiiʼ nra chuw gaed nga ranoed ngoraed.

26 Ma aray rogon napʼan, arragon, ni de yoʼor e duw napʼan, ma kar manged ba ulung ko moroʼroʼ nib yoʼor; mar gayed gubin fapi makath ku Gadianton; ere aray rogon nra manged moroʼroʼ ku Gadianton.

27 Ere chiney e musap gaed, pi moroʼroʼ ney e ra kʼaringed e wagaey, arragon, nib mogothgoth nga fithikʼ fapi gidiiʼ ku Nephi, nge ku aram rogon nga fithikʼ fapi gidiiʼ ko Lamanites.

28 Me yibi buch ni ke tʼuf ni thingar ni tileg e guruy ney e muruwel ko mogothgoth; ere ra piiʼed ba ulung i salthaw ni yargael nga ranoed nga lan wuruʼ e binaw ngo dakean e burey ni ngar gayed e re ulung ko moroʼroʼ ney, ni ngar liiʼed yaed.

29 Machane musap gaed, i yibi buch ni kulan e re duw nem min tuluf raed ngar suloed nga lan e pi binaw roraed. Ere aray rogon ni mʼay e bin meruk i ragag e duw ko fare lung ko fapi tapuf-oloboch ko gidiiʼ ku Nephi.

30 Me yibi buch u napʼan ni tabab e bin meruk i ragag nge taʼareb e duw ma ranoed bayay ngakʼ fare ulung ko moroʼroʼ, mar liiʼed boʼor i yaed; ma ku aram rogon ngoraed nib yoʼor i yaed e kun nliiʼraed.

31 Ma kun tuluf raed bayay ngar chuw gaed u wuruʼ e binaw ngo dakean e pi burey ngar suloed ko pi binaw roraed, ni bachan e rib yoʼor fapi moroʼroʼ ni kar suguyed dakean fapi burey nge wuruʼ e binaw.

32 Me yibi buch ni aray rogon ni mʼay e biney e duw. Ma fapi moroʼroʼ e kur yoʼor gaed boech ma yaed be gel iyaen, ni arame ra gelgaed nga urngin fapi salthaw ko fapi Nephites, nge Lamanites; mar kʼaringed e murus nib gel ko e gidiiʼ u dakean gaʼangin yang fare nam.

33 Arragon, ya rabaed ko binaw nib yoʼor yang ko fare nam, mab gel e mogothgoth nra tayed ngay; arragon, mar liiʼed boʼor e gidiiʼ, mar feked boech i yaed ni kalbus iyaen nga lan wuruʼ e binaw, arragon, nib gaaʼ ni ppin roraed nge bitir roraed.

34 Ere chiney e biney ngongol ko moʼoniyanʼ, ni ke yibi aw ngakʼ fapi gidiiʼ ni bachan e denen roraed, e pug uran ngoraed bayay fare Somoel ni Got roraed.

35 Ere aray rogon ni mʼay e bin meruk i ragag nge taʼareb e duw ko fare lung ko fapi tapuf-oloboch.

36 Ma lan e bin meruk i ragag nge lʼagruw e duw mar paged talin bayay fare Somoel ni Got roraed. Ma lan e bin meruk i ragag nge dalip e duw mar almarin gaed ko denen. Ma lan e bin meruk i ragag nge aningeg e duw e dar thilyeged e pi pangiraed.

37 Me yibi buch nu lan e bin meruk i ragag nge lal e duw mar almarin nra almarin gaed ko ufʼuf roraed, nge pi ngongol roraed nib kireb; ere aray rogon ni kar loel gaed bayay ni ngan gatheayraed.

38 Ere aray rogon ni mʼay e bin meruk i ragag nge lal e duw.