1 Me yibi buch nu lan e bin aningeg i ragag nge lʼagruw e duw ko fare lung ko fapi tapuf-oloboch, u tomuren ni Moronihah e ke yarmiy e gapas u thilin fapi Nephites nge Lamanites, ma musap gaed dariy bee ni ke paer ko fare gilʼ e tapuf-oloboch; ere yibi tabab e maleʼeg thin bayay nga fithikʼ fapi gidiiʼ ni morngaʼagen e chaʼ ni nge paer ko fare gilʼ e tapuf-oloboch.

2 Me yibi buch ni Helaman, niʼir fare pagael ni fak Helaman, e ni dugliy ni nge paer ko fare gilʼ e tapuf-oloboch, u lungun e gidiiʼ ni yoʼor.

3 Machane musap gaed, Kishkumen, niʼir e thang e fan rokʼ Pahoran, e yaeni miith ning ki liiʼ Helaman; ni ulung rokʼ e yaed bay ni yaed be ayuweg, ma kar uned nga lan ba mʼag ni dariy beeʼ ni nge nang e kireb rokʼ.

4 Ya bay beeʼ niba Gadianton, niʼir e rib mʼay nga fithikʼ e sabethin, nge salap rokʼ, ni nge ululiy e muruwel ko mathang pogofan nge moroʼroʼ nib miith morngaʼagen; ere ire mang gaaʼ ko ulung rokʼ Kishkumen.

5 Ere sabaenbaen nagraed, nge ku aram rogon ngakʼ Kishkumen, ni faʼan yaedra tay nga gilʼ fare puf-oloboch ma ra piiʼ ngakʼ e piʼin ni yaed baʼun ko ulung rokʼ ni nge yib gelingraed nge matʼawraed u fithikʼ fapi gidiiʼ; ere Kishkumen e gay rogon ni nge liiʼ Helaman.

6 Me yibi buch u napʼan nibe yaen iyaen ko fare gilʼ e tapuf-oloboch ni nge liiʼ Helaman, ma musap gaed bay reb fapi tapigpig ku Helaman, ni bay u wean nib nepʼ nib ing doew ni ke thil yaʼan, me naʼab ko pi liyeb ni baʼaram ni ke tay e re ulung ney ni ngan liiʼ Helaman—

7 Ere yibi buch ni madaʼ nag Kishkumen, me piiʼ ba pow ni fanathin ngakʼ; ere Kishkumen e tamilngeg ngakʼ rogon e tanam rokʼ, nibe tanam nag niʼir e nge powiʼiy iyaen ko fare gilʼ e tapuf-oloboch ni nge yog ni thang e fan rokʼ Helaman.

8 Ma napʼan ni nang fare tapigpig ku Helaman gubin e tafnaey rokʼ Kishkumen, me dag nibe nomeg ni nge thang e fan, ma ku aram rogon nibe nomeg gubin e piʼin nib mang ko ulung rokʼ ni ngar thanged e fan, ma ngar moroʼroʼ gaed, ni nge yib gelingraed, (ere aray rogon e makath roraed, nge pi thaʼ roraed) fare tapigpig ku Helaman e gaʼar ngakʼ Kishkumen: Mman nga darow ko fare gilʼ e tapuf-oloboch.

9 Ere biney e ri falaenʼ i Kishkumen ngay nib gel, ya ke lemnag ni arame rayog ni nge muguʼuliy e tin ni ke nomeg; machane musap gaed, fare tapigpig ku Helaman, e napʼan ni yow be yaen iyaen ko fare gilʼ e tapuf-oloboch, me rugoey e yaer ngakʼ Kishkumen nge kuruf gumʼirchaʼen, ni arame thig nge aw nga butʼ nib yamʼ ni de gelʼgelʼ. Me miil nge yaeni yoeg ku Helaman gubin e pinʼen ni ke guy, make rungʼag, make rinʼ.

10 Me yibi buch ni Helaman e malʼog ni ngan koel e re ulung ney ko moroʼroʼ nge tamathang pogofan nib miith morngaʼagen, ni nge yog ni ngan liiʼraed u rogon e motochiyel.

11 Machane musap gaed, napʼan ni nang Gadianton ni Kishkumen e daki sul me rus nag ni yira liiʼ; ere me yoeg ko fare ulung rokʼ ni ngar leaked. Ere mar miil gaed nga wuruʼ fare binaw, u ba paʼ i kanawoʼ nib miith, nib sor nga lan wuruʼ e binaw; ere napan ni malʼog Helaman ni ngan yaen ni koelraed ma dan pirʼeg raed u bang.

12 Ma ku baʼaray boech ni morngaʼagen Gadianton ni nggu weliy u tomuren e tiney. Ma aray rogon ni mus e bin aningeg i ragag nge lʼagruw e duw ko fare lung ko fapi tapuf-oloboch ko gidiiʼ ku Nephi.

13 Ere musap gaed, aram ko tungun e reke babyor ney ma bay mu guyed riy ni Gadianton e pulpuluy paʼ, arragon, mari chugur ni nge gatheay gubin e gidiiʼ ku Nephi.

14 Musap gaed dagur yipʼ fan tungun fare ke babyor ku Helaman, ya gube yipʼ fan tungun fare ke babyor ku Nephi, niʼir e gufek gubin fapi chep riy niʼir e kug yoloey.