1 Ere aray e rayog ni ngad guyed rogon fini baen, nge fini dar miyuluy gumʼirchaʼen e gidiiʼ; arragon, rayog ni ngad guyed nu fithikʼ i falʼngin fare Somoel ni dariy nʼumngin i napʼan e ma tawaʼath nag me monʼog nag e piʼin ni yaed ma tay e pagaenʼ roraed ngakʼ.

2 Arragon, ma rayog ni ngad guyed e re ngiyalʼ i nʼen nibe monʼog nag e gidiiʼ rokʼ, arragon, nibe yoʼor nag e gabin u lan e yungi raed roraed, ni arame gamanman roraed, nge garbaw roraed, nge gol, nge silber, nge gubin mit e pinʼen thʼabi felʼ nge urngin mite art; ma be piiʼ e yafos roraed ngoraed, ma be chuwegraed u paʼ e pi toʼogor roraed; ma be munguy nag gumʼirchaʼen e pi toʼogor roraed ni nga dabra baed nag mael ngoraed; arragon, ma ra ngan ngochngoch nag i yoeg, ma be rinʼ gubin banʼen ni fan ko paer nge falfalaenʼ ko gidiiʼ rokʼ; arragon, ma ri ireram e re ngiyalʼ i nʼen ni yaed be ʼelʼel nag gumʼirchaʼraed, mar pagedtilin fare Somoel ni Got roraed, mar yitʼed nga butʼ nga tan rifrifanʼay raed Fachaʼ nib Thothup—Arragon, ni fan e biney e bachan e falaʼab roraed, nge ireray e gin ni yaed ba moem riy.

3 Ere aray e kadguyed ni fare Somoel e faʼanra dabi yalʼuweg e gidiiʼ u dakean e gafgow nib yoʼor, arragon faʼanra dabi gechig nagraed ko yamʼ nge murus, nge uyngol nge gubin mit e mʼar, ma dabi yib ngaenʼraed.

4 O rib gel e meechiyang, nge balyang, nge kireb, nge pangin moʼoniyanʼ, ko gidiiʼ, ma yaed ba gur i rinʼ e denen, ma yaed ba sasagaʼal i rinʼ e felʼ, arragon, ri yaed ba gur ni ngar motoyil gaed ko thin rokʼ fachaʼ nib kireb, mar tayed gumʼirchaʼraed nga dakean e pinʼen nib mʼay fan nu fayleng!

5 Arragon, riyaed ba gur i nʼufed yaed ngalang nga fithikʼ e ʼufʼuf; arragon, riyaed ba gur ko ʼuf, nge rinʼ gubin mit e tin nib denen banʼen; ma rib sasagaʼal iyib ngaenʼraed fare Somoel ni Got roraed, nge motoyil ko pi fonow rokʼ, arragon, riyaed ba sasagaʼal ko yaen ko pi kanawoʼen e gonop!

6 Musap gaed, darur athapeged ni fare Somoel ni Got roraed, niʼir e sunmiy raed, e nge mang gaaʼ roraed me gagyeg nagraed; ni yug aram rogon fini gel falʼngin nge murnguy rokʼ ngoraed, mar nʼaeged fan e pi fonow rokʼ, ma dubraed ni ire nge mang powoʼ roraed.

7 O ri dariy gamʼingin e gidiiʼ; arragon, ri ku yaed ba sobutʼ ko fiyath nu fayleng.

8 Ya musap gaed, fiyath nu fayleng e be mithmith iyib aray me yaen aram, nibe kiiʼ nge wer, ni rogon ni ke chiyliy fare Got rodaed nib gaaʼ ma dabimus biʼid.

9 Arragon, musap gaed, pi falang nge burey e ma murur me durruʼ nga laman.

10 Ma dakean mirin fare thin rokʼ me puth e falang nge burey, nge pochpoch, arragon, ma kube aw ni boed ba loway.

11 Arragon, u dakean mirin fare thin rokʼ me murur e fayleng ni poloʼ;

12 Arragon, u dakean mirin fare thin rokʼ, me murur e dayif ko fayleng, iyaen nge madaʼ nga lulukungun.

13 Arragon, ma faʼanra gaʼar ko fayleng—Muchuw riy—me mithmith.

14 Arragon, faʼanra gaʼar ko fayleng—Gur e ngam sul nga tomur, ni nge nʼuw napʼan e rran nib yoʼor e awa—ma ra buch ni aram rogon;

15 Ere aray rogon, ni boed rogon ni yoeg me sul e fayleng nga tomur, me guy e gidiiʼ ni gowa ke dugil e yalʼ; arragon ere musap gaed, aray rogon ni buch; ya riyulʼ ni fayleng e ma mithmith ma gathi yalʼ.

16 Ere musap gaed, ku arragon, faʼanra yoeg ko yungi raen nib toʼaer—Gur e ngam malikʼ—me buch ni aram rogon.

17 Musap gaed, faʼanra gaʼar ko re burey ney—Mpuw ngalang, nga mub mu aw nga dakean e re binaw ni baʼaram, ni nge mathrow—musap gaed, me buch.

18 Ere musap gaed, faʼanra bay beeʼ nra mithaeg e falaʼab rokʼ u fayleng, me gaʼar fare Somoel—Mpag nge kireb, ni bachan e denen rokʼ e chaʼ ni mithaeg—musap gaed ra kireb.

19 Ma faʼanra gaʼar fare Somoel—Ngam kireb, ni nge yaeni aw ni dariy beeʼ ni nge pirʼegem ko ngiyalʼ ney iyaen e ngaram nge gubinfen—musap gaed, dariy beeʼ nra yog ngakʼ e ngiyalʼ nem iyaen e ngaram nge gubinfen.

20 Ere musap gaed, faʼanra gaʼar fare Somoel ngakʼ bee—Bachane pi denen rom, ere gur e nge buch waʼatham ni gubinfen—ma ra buch.

21 Ma faʼanra gaʼar fare Somoel—Bachane pi denen rom ere gur e ngan chuwegem ko gin nug bay riy—ma ra guy rogon nge buch.

22 Ma ra buch waʼathan e chaʼ nra yoeg e biney ngakʼ, ya aram rogon nra buch rokʼ e enra rinʼ e denen, ma dabiyog ni thap; ere, ya arayfan, ni kanoeg ni ngan kalngaenʼ, ya nge yog ni gomanga thap e gidiiʼ.

23 Ere, ba tawaʼath e piʼin ni yaedra kalngaenʼ mar motoyil gaed ko thin rokʼ Somoel ni Got roraed; ya ireray e piʼin ni yaedra thap.

24 Ma manga yigi pag Got, u fithikʼ e thothup rokʼ, ni gomanga yog ni ngan fek e gidiiʼ iyaen ko kalngaenʼ nge pi muruwel nib mangil, ni gomanga yog ni sulwegraed ko falaʼab ni fan ko falaʼab, u rogon e pi muruwel roraed.

25 Ma rug baʼadag ni gomanga yog ni thap gubin e gidiiʼ. Machane kad poeyed nu lan fabin tomur e rran e bay boech e gidiiʼ ni yira chuwegraed, arragon, ni yaed e yira chuwegraed u pʼoewchen fare Somoel;

26 Arragon, ni yaed e yira dugliy raed ko dodow ni kirbaenʼ ni dariy nʼumngin i napʼan, ya nge muguʼul fapi thin ni gaʼar: Piʼin ni kar rinʼed e tin nib mangil e rayog ngoraed e yafos ni dabimus biʼid; ma piʼin ni kar rinʼed e pi ngongol ni kireb e rayog ngoraed e gafgow ni dabimus biʼid. Ma aray rogon. Amen.