1 Ere chiney e yibi buch ni Samuel, ni fare Lamanite, e prophesy nag boʼor bogi banʼen ni dabiyog i yoloey.

2 Ere musap gaed, i gaʼar ngoraed: Musap gaed, nggu piiʼ ba pow ngomed; ni kubay lal e duw ni bay yib, ma musap gaed, arame bay fini yib fachaʼ ni Fak Got ni nge bayuliy gubin e piʼin nra michaenʼraed nga fithingan.

3 Ere musap gaed, biney e nggu piiʼ ngomed ni pow ko wub rokʼ; ya musap gaed, bay yib bogi tamilang nga lan e tharmiy, me yaeni aw ni fare nepʼ u mʼon ni nge yib riy e bayi paer ni dariy e lumor, ni arame bayi mʼug ko gidiiʼ ni gowa ba rran.

4 Ere, bay yibi aw ni taʼareb e rran nge rebo nepʼ nge rebo rran, ni gowa taʼareb e rran ma dariy e nepʼ; ere biney e ba pow ngomed; ya gimed ranang e ngiyalʼ ni nge mʼug e yalʼ nge ngiyalʼ ni nge aw; ere yaedra nang nib mudugil ni lʼagruw e rran nge rebo nepʼ; machane fare nepʼ e dabi awe lumor; ni ireram e re nepʼ u mʼon ni ngan gargeleg.

5 Ma musap gaed, bay reb e tʼuf nib beʼech ni bayi mʼug, ni dariy bingyalʼ ni kam guyed; ma biney e ku rebe pow ngomed.

6 Ma musap gaed dawori mus aray, boʼor boech e pow nge maʼangʼang ni bay yib nga lan e tharmiy.

7 Ma bay yibi buch ni bayi balyangaenʼmed, me ginaenʼmed, ni arame bay mu thiggaed ngam awgaed nga butʼ.

8 Ma bay yibi buch ni enra michaenʼ ngakʼ fachaʼ ni Fak Got, e ireram e chaʼ ni rayog ngakʼ e yafos ni dabimus biʼid.

9 Ere musap gaed, ireray e nʼen ni ke chiyliy fare Somoel ngog, u dakean e angel rokʼ, ni nggub gu weliy e rennʼey ngomed; arragon, ke chiyliy ni nggu prophesy nag e pinnʼey ngomed; arragon, ke gaʼar ngog: Moeg ko pi gidiiʼ ney, ni ngar kalgaed ngaenʼraed mar falʼeged kanawoʼen fare Somoel.

10 Ere chiney, ni bachan e gag e gub Lamanite, ma kug weliy ngomed fapi thin ni ke chiyliy fare Somoel ngog, ma bachan e kaygi moʼomawʼ ngomed, ere kam damomuw gaed ngog ma kam gayed rogon ni ngam gatheayed gag, ma kam chuweged gag u fithikʼmed.

11 Ere bay mu rungʼaged e pi thin rog, ya, ya ireray fan ni kugub nga dakean e yoror ko re binaw ney, ni nge yog ni ngam rungʼaged magmed nang morngaʼagen e pi gechig rokʼ Got nibe soen nagmed ni bachan e pi denen romed, ma ngki yog ni ngam nanged rogon e pi dodow ko kalngaenʼ;

12 Ma ngki yog ni ngam nanged morngaʼagen fare wub rokʼ Yesus Kristus, ni fachaʼ ni Fak Got, niʼir e Chitamangin e tharmiy nge fayleng, niʼir e fare Tasunmiy ko urngin banʼen ni aram ko tabolngin; ma gomanga yog ni ngam nanged e pi pow ko wub rokʼ, ni fan e gomanga yog ni michaenʼmed nga fithingan.

13 Ma faʼanra michaenʼmed nga fithingan, ma gimed ra kalngaenʼ ko gubin e pi denen romed, ni gomanga yog riy ngomed e manʼaegfan u dakean e murnguy rokʼ.

14 Ere musap gaed, bayay, kureb e pow ni nggu piiʼ ngomed, arragon, ba pow ni yamʼ nra tay.

15 Ya musap gaed, rib dugil ni thingari yimʼ ni nge yog ni yib woʼen e thap; arragon, rib mʼag ma rib tʼuf ni yimʼ, ni nge yog ni yib nag e foskoyamʼ ko pi yamʼ, ni nge yog riy ni ngan fek e gidiiʼ iyaen nga pʼoewchen Somoel.

16 Arragon, musap gaed, re yamʼ ney nra tay e ra yib nag e foskoyamʼ, me bayuliy gubin e gidiiʼ ko bin sommʼon e yamʼ—ni fare yamʼ ko yaʼel; ya gubin e gidiiʼ, nni chuwegraed u pʼoewchen Somoel u dakean fare mul ni tay Adam, e boed ni gowa kar mʼaed, kar malog gaed ko tin nib lʼeag rogon ko dagur nge tin nib lʼeag rogon ko yaʼel.

17 Machane musap gaed, fare foskoyamʼ nra tay Kristus e ra bayuliy e gidiiʼ, arragon, ni gubin e gidiiʼ, me sulwegraed bayay nga pʼoewchen Somoel.

18 Arragon, ma bay yib nag rogon e dodow ko kalngaenʼ, ni enra kalngaenʼ e ireram e chaʼ ni dab ni thʼaeb nga butʼ nga ninʼ nga mite nifiy; machane enra dabi kalngaenʼ e yira thʼaeb nga butʼ nga ninʼ nga mite nifiy; ma aram me yib nga dakeanraed bayay e yamʼ ko yaʼel, arragon, bin lʼagruw e yamʼ, ya kan chuwegraed bayay ko tin nib lʼeag rogon ko tin nib matʼaw.

19 Ere mu kalgaed ngaenʼmed, mu kalgaed ngaenʼmed, ya ra ngam nanged e pinnʼey ma dab mu rinʼed ma arame gimed e kam paged gimed ni ngan gechig nagmed, ma arame kan miliymed iyaen ko bin lʼagruw e yamʼ.

20 Machane musap gaed, boed ni kugog ngomed faram morngaʼagen yugreb e pow, ba pow ko yamʼ nra tay, musap gaed, u lan e re rran nem ni ra gafgow nge yimʼ e ra lumor fare yalʼ ma dabki mat raʼen nga dakeanmed; nge ku arragon ko pul nge pi tʼuf; me yaeni aw ni dariy e tamilang u dakean e re nam ney, ni aram ko ngiyalʼ ni ra gafgow nge yimʼ, u lan dalip e rran, nge yaeni madaʼ ko ngiyalʼ ni ke fos ko yamʼ.

21 Arragon, ngiyalʼ i nʼen nra awe fan rokʼ ma bayi choebchoeb e dirraʼ ma be matmat e uluch ni bukun e awa nʼumngin i napʼan, ma fare fayleng e bayi daʼadaʼ me rurrur, nge pi yungi war ni bay u dakean e re fayleng ney, ni tin bay u lang nge tin bay u fithikʼ e butʼ, niʼir e gimed manang e ngiyalʼ ney nib ʼelʼel, ara gin gaaʼ riy e rib ʼelʼel, e ra pil nge wer;

22 Arragon, ra pil nge ruw yang, ma bay un pirʼeg nib pil ma bay e thaʼal riy, ma bay un pirʼeg ni ke pilʼ ke nochiyang u dakean e fayleng ni poloʼ, arragon, nu dakean e fayleng ngu fithikʼ e butʼ.

23 Ere musap gaed, ra yib e yokoʼ, ma bayoʼor e burey nra puth nge sobutʼ, nge yaeni boed ba loway, ma bay yaeni aw nib yoʼor yang ni bay e chiney ni kanoeg ni bogi loway ni bayi sum e burey riy, ni rib tolang.

24 Ma bayoʼor yupaʼ i kanawoʼ nib gagangʼ ni ra puth, ma bayoʼor e pi binaw ni bay ni pag.

25 Ma bayoʼor e pi malang ko yamʼ nra mab, nge yib e pi yamʼ riy nga wean; ma bayoʼor e pi saints ni bay ra mʼug gaed ko gidiiʼ ni yoʼor.

26 Ere musap gaed, ireray e pinʼen ni ke weliy fare angel ngog; ya ke yoeg ngog nra choebchoeb e dirraʼ me matmat e uluch ni bukun e awa nʼumngin i napʼan.

27 Ma ke yoeg ngog ni ngiyalʼ ni bay e dirraʼ nge uluch, nge yokoʼ, ni pinnʼey ni bayi buch, ma bayi ing e lumor dakean e fayleng ni poloʼ u langgin dalip e rran.

28 Ma fare angel e yoeg ngog ni bayoʼor e gidiiʼ ni yaedra guy boech banʼen nib almarin ko tiney, ni nge yog ni gomanga michaenʼraed ni pi pow ney nge pi maʼangʼang ney e ra yibi buch u dakean gaʼangin yang e re nam ney, ni nge yog ni nge yaeni aw ni dariy tapgin ni ngan palog ko mich u fithikʼ e gidiiʼ—

29 Ma fan e biney e nge yog ni piʼin ra michaenʼraed e yaedra thap, nge piʼin dabi michaenʼraed, e nge yog ni aw ba pufthin nib matʼaw nga dakeanraed; nge ku faʼanra bbuch e roraed ma ngar miliyed nga dakeanraed e gechig roraed.

30 Ere chiney e mu tayed u wunʼmed, mu tayed u wunʼmed, gimed pi walageg, ni enra yimʼ, e ke yimʼ niʼir rokʼ; ma enra denen, e ke denen niʼir rokʼ; ya musap gaed, ba puf matʼawmed; bay matʼawmed ni ngam rinʼed ni rogon ni gimed baʼadag; ya musap gaed, Got e ke piiʼ ngomed ba nangaenʼ ma ke sunmiymed nib puf rogmed.

31 Ke piiʼ ngomed e nangaenʼ ni nge yog ni ngam nanged e felʼ ko kireb, ma ke taymed nib puf rogmed ni gomanga mu melʼeged e yafos ko yamʼ; ma rayog ni ngam rinʼed e felʼ min sulwegmed ko tin nib felʼ, ara tin nib felʼ e ngan sulweg ngom; ara rayog ni ngam rinʼ e kireb, me yaeni aw ni tin nib kireb e ngan sulweg ngom.