1. Bix banttzan que Samuel aj lamanita o xiʼ tmaʼn jun tyempca nimke txkantl cosas que milay chi cub tzʼibat.

2. Bix nxiʼ tmaʼn cye: Lutzan luʼ, cxel nkʼoʼna jun techaklil tiʼj aj tulel, tuʼnj oc chicyʼel 5 abkʼitl, bix lutzan luʼ, tons tzulltzan tCʼwaʼl Dios colal cyiʼj ajke cyakilkaj cocax cyocslaʼn tiʼj tbi.

3. Bix lutzan luʼ, atzan jluʼ cxel nkʼoʼna te techaklil tiʼj tyemp oc tul: tuʼnj lutzan luʼ, oc chi jawal canet matij spicyʼan tuj cyaʼj, que aj tuʼmal miʼn ten konicyʼan tuj aj konicyʼan naʼxtak tul, bix atzan cye xjal kʼijl quelal tuj cywitz.

4. Cyjaʼtzan jluʼ, ctel jun kʼij, jun akʼbil bix juntl kʼij, lonxa icytzanj junx kʼij bix ntiʼ konicyʼan; bix atzan techakliljo cyeya; tuʼnj oc ccyilabala oc tjaʼwal bix oc tex kʼij; bix cyjaʼtzan quelal cynicyʼa tiʼj que at caba kʼij bix jun akʼbil; sinbargo, miʼn ten klolj tuj konicyʼan; bix atzan konicyʼanjo aj naʼxtak t-itzʼj.

5. Bix lutzan luʼ, oc cjawal let jun acʼaj cheʼw, que mi jtoja cyila; bix atzanjo te techaklil cyeya.

6. Bix lutzan luʼ, miya oʼcxjo cyakil, tuʼnj oc chi cycyilaʼya nim techaklil bix tiʼx tkaʼ twitz cyaʼj.

7. Bix cbanteltzan que oc chi nojala tucʼ nim secyʼpajlenan, que aj tuʼmal oc chi bel tzʼaka twitz txʼotxʼ.

8. Bix cbanteltzan que alcyej cocax tocslaʼn tiʼj tCʼwaʼl Dios, oc ccambil tiʼj ankʼbil te junmajx.

9. Bix lutzan luʼ, maʼ chin tzaj samaʼna tuʼn Kajaw, tuʼn te t-angel, tuʼn ntzaja kʼamal cyej cosas ajo cyeya; icytzanjo, maʼ chin tzaj samaʼna tuʼn, tuʼn t-xiʼ nmaʼna jun tyempca kej cosas ajo; icytzanjo, maʼ tzaj tmaʼn wecyʼ: Kʼamaʼnxa tej tnam ajo: Tzʼajtz tiʼj cyanmiya tiʼj tnachal, bix bant ten tbe Kajaw cyuʼna.

10. Bix tuʼntzanj lamanita kina, bix tuʼntzanj maʼ tzul nkʼamaʼya aj tyol Kman que tuʼn ẍin tzaj tsamaʼn, bix tuʼntzanj cyiwjo te cyeya, maʼ chi jaw kʼojla wucʼala, bix cyajbila tuʼn tel cyiʼn nwiʼya bixmo wankʼbila bix maʼ chin netz cyxoʼna cyijxa.

11. Mas cxel cybiʼnx nyola, que tuʼntzan tlajjo maʼ chin jatza twiʼ ja tuj tnam luʼ, tuʼntzan t-xiʼ cybiʼna bix tuʼn tel cynicyʼa tiʼj tjwisya Dios que nchi ayona tiʼj nok tuʼn tlaj cynachala, bix tuʼntzan tel cynicyʼa tiʼj aj tuʼmal tuʼn tajtz tiʼj cyanmiya tiʼj tnachal;

12. Bix ax tuʼn tel cynicyʼa tiʼj tuʼn tul Jesucristo, aj tCʼwaʼl Dios, aj Mambaj tuj cyaʼj bix twitz txʼotxʼ, aj binchal cye cosas cyakil atxax aj ttzajlen keʼ; bix tuʼntzan tel cynicyʼa cyiʼj techaklil oc tul, tuʼntzan tocx cyocslaʼna tiʼj tbi.

13. Bix ka ma tzʼocx cyocslaʼna tiʼj tbi, octzan cajatz tiʼj cyanmiya tiʼj cyakil twitz cyila, que tuʼntzanj tuʼmal ajo tuʼn cychjet tuʼnkʼa.

14. Bix lutzan luʼ, cxel nkʼoʼna cyeya juntl techaklil, icytzanju, jun techaklil tcamacy.

15. Pwes lutzan luʼ, ax toc cymelkʼa tuʼntzan tul colbil; icytzanjo, baʼn bix il tiʼj tuʼn tcyim tuʼntzan tul aj itzʼjbil cye cyimna, que tuʼntzanj tuʼmal ajo tuʼn cyaʼjal maktzʼaj xjal ttxlaj Kajaw.

16. Icytzanjo, lutzan luʼ, aj camacy ajo tzul tiʼn aj itzʼjbil te juntl maj bix najsbil tiʼj twitz il cye cyakil xjal tuj tnejal camacy, que atzan camacy te xewbajjo; tuʼnj, aj lekʼch teʼ ttxlaj Kajaw atxax aj tcub tzʼak Adán, lonxa icytzan cyimnaka xjal cyakil tuj twitz Dios, tzanxax tiʼj xumlalbaj bix ax icyx xewbajjo.

17. Per lutzan luʼ, aj oc tjaw itzʼj juntl maj Cristo chi jawil itzʼjl tzaʼnx cytenca xjal tuʼnjo, icytzanjo, tzaʼnx cytenca xjal, bix chajal kʼiʼn juntl el ttxlaj Kajaw.

18. Icytzanjo, bix nneltzan twitz aj tuʼn tzʼajtz tiʼj tanma alcyej ma tzʼajtz tiʼn tiʼj tanma, miʼn jaw txʼemat bix miʼn txiʼ xoʼt tuj kʼakʼ; pero alcyej mi ma tzʼajtz tiʼj tanma octzan cjawal txʼemat bix cxel kʼot tuj kʼakʼ; tons tzultzan cyibaj juntl el aj camacy te xewbaj cyjaʼtzanjo, juntl tcaban camacy tuʼnj nchel lakʼban juntl el cyiʼj cosas te xtis.

19. Cyjaʼtzan jluʼ tzʼajtz tiʼj cyanmiya, tzʼajtz tiʼj cyanmiya tiʼj tnachal, nyaʼca yaj tuʼnj que loʼn cyuʼna ajke cosas ajo bix miʼn chela twitz, ncheʼxcatzana tuj sentens, bix ncheʼxtzan jacʼuʼna tuj tcaban camacy.

20. Lonxaj icytzan ẍin yolana tiʼj juntl techaklil, aj techaklil tcamacy, lutzan luʼ, aj kʼij tuʼn tcyim, oc cocal kloljax kʼij, bix cbel teʼwan tspicyʼamal cyeya; ax icyx cye xjaw bixke cheʼw; bix ntiʼtzan spicyʼan twitz jtxʼotxʼ luʼ tuj ox kʼij, bix aj oc tcyim, asta oc tjaw itzʼj cyxol cyimna.

21. Icytzanjo, tuj rat oc t-xiʼ tkʼoʼn t-xew, oc ctel kʼancyok xlekʼlaj cyaʼj tuj nim or bix aj txʼotxʼ oc cbajal yucch bix oc cnikʼnajel; bix ajke xak ajteʼ tuj txʼotxʼ, tzanxkej teʼ tibaj bix tzanxkej teʼ tjakʼ txʼotxʼ, bix loʼn cyuʼna que cyiwka wena, bixmo chʼixmi cyakilka pura piʼn oc chi bajal buchl;

22. Icytzanjo, oc cbel cymij, bix te junmajx oc chi tel tucʼ cyechal bix cypaʼxabil, bix cocʼa piẍ, twitz cyakil twitz txʼotxʼ, icytzanjo, tzanx twitz bix tjakʼxa txʼotxʼ.

23. Bix lutzan luʼ, oc chi tzajal nim kʼakab; bix nimke witz chkʼalaj chocal, lonxa icytzan jocajke, bix nimke ligar, jocaj cybi jaʼla, chocal te witz matijka wena.

24. Bix chi bajal piẍj be, bix nimke tnam chi bajal kʼuchj wena.

25. Bix chʼjaketal nim pantyón, bix ctzajal cykʼoʼn nim cyimna bix nimke sant cbel cyyecʼan cyib cywitz.

26. Bix lutzan luʼ, atzanjo aj oʼ tzaj tmaʼn ángel wecyʼ; tuʼnj tzaj tmaʼn wecyʼ que ctel kʼancyok bix xlekʼlaj cyaʼj tuj nim or.

27. Bix tzaj tmaʼn wecyʼ que myentras tuʼn ten kʼancyok bix xlekʼlaj cyaʼj bix kʼakab, oc chi bantelj cosas ajo; bix aj klolj oc cbel twitz cyakil txʼotxʼ tuj ox kʼij.

28. Bix tzaj tmaʼn angel wecyʼ que nimke oc ccyilabal ke cosas mas matijtl cywitz jluʼ, tuʼntzan tocx cyocslaʼn que oc chicyʼelj techaklil ajo twitzj txʼotx te país ajo, tuʼntzan mi ten más aj ntiʼ nnocx ocslaʼn cyxol cycʼwaʼl xjal.

29. Tuʼntzan alcyekaj cocax cyocslaʼn octzan chi coletal, bix alcyekaj miʼn tzʼocx cyocslaʼn tuʼntzan ttzaj jun sentens ax toc cyibaj; bix ka ajke chi bel sentesat, pwes kʼiʼn sentens cyibaj cyuʼnx.

30. Cyjaʼtzanjo, cycʼujlanxa cycʼujlanxa, akiya wermaniya, que alcyej cymel, cymel tuʼnx tib te; bix alcyej ma bant tnachal tuʼn, nbant tuʼn tiʼjx tib; lutzan luʼ, libre teʼya; tzakpiʼnkaya tuʼn tbant cybinchbena cyuʼnx cyiba, tuʼnj oʼ tzaj kʼoʼn cyximbila tuʼn Dios bix oʼ chi cyaj kʼoʼna libre.

31. Oʼ tzaj tkʼoʼnkʼa tuʼn tel cynicyʼa tiʼj tbanal bix tiʼj tnachal, bix tuʼn tjaw cysicʼoʼna aj ankʼbil bixmo camacy; bix baʼn tuʼn tbant tbanal cyuʼna tuʼntzan cybaj saksana tuj aj tbanal bixmo aj tuʼn tel xcʼayan aj tbanal cyeya; bixmo tuʼn tbant tnachal bix tuʼntzan tajtz maktzʼuʼn ax tnachal cyeya.