1. Bix jaʼlatzan, akiya wermaniya nim wajbila cyiʼja, cxel ntxʼolbaʼna cyeya que ka miʼn ma tzʼajtz tiʼj cyanmiya, aj cyjaya oc chi cyjalten desyert.

2. Icytzanjo, como miʼn tzʼajtz tiʼj cyanmiya, aj cyxuʼjalal oc chi apal taʼw tuj kʼij oc tul cyaʼlan jun cyal; tuʼnj oc cocal cynicʼana tuʼn cytzokpaja, bix ntiʼ ligar jatuma tuʼn tocx cycʼuʼn cyiba; icytzanjo, ¡Becyʼbil cywitz ajke yab xuʼj, tuʼnj nok tuʼn talal milay chi ok; cyjaʼtzan jluʼ oc chi bel biyet bix chi cyjel coʼlan tuʼntzan cynaj!

3. Icytzanjo, ¡Becyʼbil twitzjʼ tnam luʼ aj tnam te Nefi, oʼcxtzala ka ma tzʼajtz tiʼj cyanma tiʼj tnachal aj oc toc cyqueʼyin cyakilkaj techaklil ajo bix tiʼx tkal aj ctzajal yecʼat cye! Lutzan luʼ, aka jun tnam sicʼoʼn te Kajaw; icytzanjo, oʼ tzʼoc tcʼujlaʼnkʼa aj tnam te Nefi, bix ax maʼ cub tsentensantl; icytzanjo, oʼ chi cub tcastiwayiʼn tuj kʼij aj xbant tnachal cyuʼn, tuʼn tajbilkʼa cyiʼj.

4. Mas lutzan luʼ, akiya wermaniya, oʼ choc tkʼojleʼn ajke lamanitas tuʼnj cuxiʼnbant tnachal cyuʼn, nok tuʼn tlaj tnachal cycostumbre cyman. Per lutzan luʼ, maʼ tzul colbil cyiʼj tuʼn aj cypacbabil nefitas; bix tuʼntzan tlaj ajo maʼ tzaj kʼoʼn txkantl cykʼij te cyankʼbil.

5. Wajbila tuʼn tcub cykʼoʼn cycwenta tiʼj que aj cynimalke lamanitas cucx cybet tuj tbanal twitz Dios que nnoc cykʼoʼn il tiʼj tuʼn t-xiʼ cycʼuʼn ajke mandamyent bixke tcyʼiwbil, según aj ley te Moisés.

6. Icytzanjo, cxel nmaʼna que aj cynimal nbant cybinchben tuj tuʼmal ajo, bix tucʼ tbanal nnoc cykʼoʼn il tiʼj tuʼn ttzaj cyiʼn ajke ttxaban hermanos tuʼn tel cynicyʼ tiʼj ax toc; cyjaʼtzan jluʼ, nimke nnoc cykʼon cyib te tajlal juʼnjun kʼij.

7. Bix lutzan luʼ, loʼn cyuʼna cyiʼja cyilx cyiba, tuʼn ma cyila, que jnicyʼ punka nchi tzaj tuʼn tel cynicyʼ tiʼj ax toc, bix nnel cynicyʼ tiʼj tzʼill bix tnachal costumbres te cyman, bix nchi canan tuʼn cyocx ocslet Tuʼjal sant, icytzanjo, aj jun tyemp i kʼunj cyuʼn profetas sant ncheʼx kʼiʼn tiʼj ocslabil te Kajaw bix tuʼn tajtz tiʼj cyanmi, bixj ocslabil bix tuʼn tajtz tiʼj cyanmiya ntakʼ jun meltzʼubil tuj cyanmiya;

8. Cyjaʼtzan jluʼ, jteʼxaka chi canan tiʼj ajo, loʼn cyuʼna cyiʼjx cyiba que cywaban cyiba bixmo mitiʼ tuʼn cymeltzʼaj tiʼj ocslabil bix tiʼj aj oʼ choc libre tuʼn.

9. Bix ax loʼn cyuʼna que oʼ cuʼx cymakuʼn cycʼuxbil te kʼojlebil, bix ntiʼ ncywaba cyib tuʼn tcub cybiyoʼn tuʼntzanj tchi te tuʼn tbant twitz il; icytzanjo, nnoc cyqueʼyina que at tchi cyiʼj tuʼn cybinchan twitz il, lutzan luʼ, nxi cykʼon cyib tuʼn cybaj betzʼan bix tuʼn cybaj biyoʼn tuʼn cyajkʼoj bix ntiʼ njaw cyyecʼan cyspada cyiʼj; bix j-ajo tuʼnj aj cyocslabil tiʼj Cristo.

10. Bix tuʼntzanj aj cycyiwal, aj oc ten cyocslabil tiʼj aj nnoc cyocslaʼn, tuʼnj cywaban cyib aj oc cytzaj kʼanaʼlan, lutzan luʼ, chitzajal cyʼiwlaʼn tuʼn Kajaw bix nxiʼ kʼoʼn nim cyankʼbil banwtla at cynachal.

11. Icytzanjo, banwtla ma chi cub tzʼak tuj miyaʼ ocslaʼn cyuʼn, oc cxel kʼoʼn Kajaw nimtl cyankʼbil asta oc tpon tyemp aj oʼ tzaj kʼamaʼn tpocbal ke cyuʼn kman, bix tzaʼnx tuʼn profeta Zenos bix nim txkantl profetas, tiʼj aj saksbil cye kermanos lamanitas, juntl el te acʼaj tuʼn tel cynicyʼ tiʼj ax toc.

12. Icytzanjo, que aj ttziybil Kajaw cyucʼ ajke lamanitas nchi chʼiytl cyuj twiʼpan kʼij; bix lutzan luʼ banwtla nim cybis cocal ten cyiʼj bix ademástl ncheʼx xoʼn tuj jun plaj bix juntl plaj tiʼjxa txʼotxʼ, bix tuʼn cyjaw lajoʼn, bix tuʼn cycaʼban bix cysipan, minti cylugar tuʼn cyajlan, tzul t-xtalbil Kajaw cyibaj.

13. Bix j-ajo según aj jun tyemp kʼunj que chul kʼit twitzj ax toc, que atzan twitz Colaljo bix aj matij bix ax toc pastor, bix chocaltzan tajlal cyxol tneʼl.

14. Cyjaʼtzan jluʼ cxel ntxʼolbaʼna cyeya que más baʼn te cye cywitz, ka mi ma tzʼajtz tiʼj cyanma tiʼj tnachal twitz te cyeya, ka min matzʼajtz tiʼj cyanmiya.

15. Tuʼnj lutzan luʼ, nokat cyewt xiʼ yecʼat ajke matij binchben oʼ txiʼ yecʼat cyeya, cyjaʼtzan, cyekaj aj maʼ chi cub tzʼak tuj mitiʼ ocslabil nok tuʼn costumbres te cyman, baʼn tuʼn toc cyqueʼyina cyiʼjx cyiba que milayxwal bix mi jtoj tuʼn cycub tzʼak juntl elka tuj mitiʼ ocslabil.

16. Cyjaʼtzan jluʼ, chitzan Kajaw: miʼn chi cub baj nkʼuchana cyakil, sino que cbantel wuʼna tuʼn cyajtz maktzʼaj wiʼja oc tpon or tuj nwitza, chitzan Kajaw.

17. Bix lutzan luʼ, cyjaʼtzan ntzaj tkʼaman Kajaw tiʼj tnam nefita: Ka mi ma tzʼoc il tiʼj cyuʼn tuʼn tajtz tiʼj cyanmiya tiʼj tnachal tuʼntel twitz aj tban cʼuʼja, ocx cbajal nkʼuchana junmajx tuʼn aj min oc cyocslan, chitzan Kajaw; miyaʼtzan ajke nim bix matij binchben oʼ bant wuʼna cyxol; bix n-ankʼin Kajaw, que chelal jcosas ajo twitz, chitzankʼa.