Aj Uʼj Te Helaman

1. Bix banttzan que tuj abkʼi 86 cucx iten nefitas tuj tnachal, icytzanjo, tuj matij tnachal, myentras cye lamanitas oc il tiʼj cyuʼn tuʼn cyten baʼn bix tuʼn t-xiʼ cycʼuʼn ajke mandamyent te Dios según aj ley te Moisés.

2. Bix banttzan que tujx abkʼijo pon tuj pais te Zarahemla jun xjal Samuel tbi, jun lamanita keʼ tuʼn tpacban cye tnam. Bix banttzan que o pacban tiʼj tuʼn tajtz tiʼj cyanma tiʼj tnachal tuj nim kʼij; bix o etz lajoʼn, bix tatak tuj tuʼmal tuʼn tajtz kʼoʼn tuj tex txʼotxʼa.

3. Mas lutzan luʼ, aj tyol Kajaw xiʼ kʼamaʼnte tuʼn taʼjal maktzʼaj bix tuʼn t-xiʼ tkʼamaʼn cye tnam cyakil ajke cosas tuʼn cylet tuj tanma.

4. Bix banttzan que mitiʼ ocx tzakpiʼn tuj tnam; cyjaʼtzan jluʼ, nxiʼ bix njax twiʼ ja, bix nxiʼ tlicʼan tkʼab bix njawtzan twiʼ juncʼana wena nxiʼ tkʼamaʼn jun tyempca aj cyakil cuʼx kʼoʼn tiʼj tanma tuʼn Kajaw.

5. Bix nxiʼ tmaʼn cye: Lutzan luʼ, akina, Samuel, jun lamanita, cxel ntxʼolbaʼna ajke yol ncuʼx tkʼoʼn Kajaw tiʼj wanmiya; bix lutzan luʼ, tuʼnkʼa maʼ tzaj tkʼamaʼnkʼa wecyʼ tuʼn t-xiʼ nmaʼna cyeya que aj spada te xtis at tibaj tnam luʼ; bix miʼ tzicyʼ 400 abkʼi tuʼn tcub tzʼak cyibaj.

6. Icytzanjo, n-ayon jun matij kʼuchbil cyibaj, bix ax toc tzul cyibaj, bix mi jun jaʼca colan cyiʼj mas oʼcx aj tuʼn tajtz tiʼj cyanma tiʼj tnachal bix aj cyocslabil tiʼj Kajaw Jesucristo, que ax toc tzul tzaluʼ twitz mundo, bix oc cbajal tapaʼn nim cosas bix cymel tuʼn tlaj ttanma.

7. Bix lutzan luʼ, jun ángel te Kajaw maʼ tzaj kʼaman te wecyʼ, bix ma tzaj tkʼoʼn ke acʼaj tchi-al te wanmiya, bix lutzan luʼ, maʼ chin tzaj samaʼna kʼamal tpocbal cyeya, tuʼntzan tcyikʼa ajke tpocbal tbanal; per lutzan luʼ, ntiʼ ma cyajbeya tuʼn ncʼameta.

8. Cyjaʼtzanjluʼ, cyjaʼtzan ten tuʼn Kajaw: Tuʼn tlaj aj tcyiwal cyanma tnam nefita, oʼcxtzala ka ma tzʼajtz tiʼj cyanma, oc quelatz wiʼn nyola cyxol, bix quelal nlakʼbaʼn nXewa cyiʼj, bix miʼn npasensiya tuj nim tyemp, bix cajal nmaktzʼuʼna cyanma cyermana contra cyiʼj.

9. Bix miʼn tzicyʼ 400 abkʼi tuʼn cycaban wuʼna: icytzanjo, oc chin nula lol cye tucʼ spada, wi-ij bix txʼuʼj yabil.

10. Icytzanjo, oc chin xela lol cye tucʼ cyakil nkʼoja, bix atke juʼnjun tuj tcyajan cʼoloj ankʼbil, ajke cyajkʼoja, que oc chi ankʼil tuʼn cyqueʼyin tiʼj kʼuchbil cyeya junmajx; bix segurxix j-ajo oc cbantel oʼcxtzala ka ma tzʼajtz tiʼj cyanma, chitzan Kajaw; bix aj tcyajan cʼolaj ankʼbil akatzanjo chi binchal tiʼj kʼuchbil cyeya.

11. Pero ka ma tzʼajtz tiʼj cyanmiya bix ma chajtz maktzʼaja tiʼj Kajaw aj cyDiosa, oc quelal wiʼn nkʼoja, chitzan Kajaw; icytzanjo, chitzan Kajaw: Cyeʼyaxkaj ma tzʼajtz tiʼj cyanma bix ma chajtz maktzʼaj wucʼala; pero ¡becyʼbil cywitz ajke ntiʼ ma tzʼajtz tiʼj cyanma!

12. ¡Icytzanjo, becyʼbil twitz j-aj matij tnam te Zarahemla, tuʼnj lutzan luʼ, nok tuʼn cylaj tbanal xjal maʼ colet! ¡Icytzanjo, becyʼbil twitzj matij tnam ajo, tuʼnj nwila, chitzan Kajaw, que ateʼ nimke, atke aj nim xjal tujx, oc cbel cycyiwsan cyanma wiʼja, chitzan Kajaw!

13. Per cyeʼyaxkaj cajatz tiʼj cyanma tuʼnj chin colala cyiʼj. Pwes lutzan luʼ, nokat miyaʼ cyuʼnj tbanal xjal ateʼ tuʼj matij tnam ajo, maʼwla tzajxa nkʼakʼa tuj cyaʼj tuʼn cynaj.

14. Mas lutzan luʼ, nok tuʼnj nchi-al cyiʼjka tbanal xjal maʼ chi colet. Per lutzan luʼ, nlekʼan tul lakʼeʼ tyemp, chitzan Kajaw, tuʼn tetz cylajoʼna ajke tbanal cyxola, tons miyaʼtzan lekʼch taʼ tuʼn cykʼuchata. ¡Icytzanjo, becyʼbil twitzj matij tnam ajo tuʼn tlaj aj tzʼil bix tnachal at tuj!

15. ¡Icytzanjo, bix becyʼbil twitz aj tnam Gedeón, tiʼj biʼyon bix tnachal at tuj!

16. ¡Icytzanjo, becyʼbil cywitz ajke tnam nakaʼ teʼ bix tzyuʼn cyuʼn nefitas, tuʼn tlaj aj twitz il bix aj tnachal at cyuj!

17. Bix lutzan luʼ, cbel tzʼak jun cyʼiwbil tuj tnachal tibaj país, chitzan Kajaw te ke Ejército, tuʼn tlaj aj tnam at tuj; icytzanjo, nok tuʼn tlajke t-tzʼil bix tnachal.

18. Bix cbajeltzan, chitzan Kajaw te ke Ejército, icytzanjo, aj matij bix ax toc kDios, que cyakilkaj ma txiʼ cyeʼwan cykʼinamabl tzaluʼ twitz txʼotxʼ, milayx tuʼn tcanet juntl el tuʼn, nok tuʼnj cyʼiwbil nach tibaj país, oʼcxtzala ka ax toc tbanal aj ma txiʼ eʼwante, bix ma bant tuʼn, tuʼn tlaj tnabil Kajaw.

19. Tuʼnj, chitzan Kajaw, wajbila tuʼn t-xi cyeʼwan cykʼinamabla te tuj wecyʼ nabil; bix becyʼbil cywitz alcyekaj ntiʼ ma tzaj cykʼoʼn te tuj wecyʼ nabil; tuʼnj mijun nxiʼ eʼwan te tkʼinamabl wiʼja mas oʼcxkaj teʼ tuj xtis; bix alcyej mi ma txiʼ teʼwan tkʼinamabl wiʼja, becyʼbil twitzjo junx tucʼ tkʼinamabl; bix mijun cnajsal tiʼj tuʼn tlaj tnachal país.

20. Bix cpol kʼij tuʼn t-xiʼ cyeʼwan cykʼinamabl, tuʼnj maʼ cub cykʼoʼn cyanma tiʼj kʼinamabil; bix tuʼntzan taʼ cyanma tiʼj cykʼinamabl, oc cxel weʼwana oc cy-ok cyiʼj cyajkʼoj; bix tuʼntzan mi ma txiʼ cyeʼwan te tuj wecyʼ nnabila, becyʼbil cywitzjo bix tucʼax cykʼinamabl; bix tuj kʼij ajo oc chi cabanel, chitzan Kajaw.

21. Lutzan luʼ, cybinx nyola, akiya xjal tuj matij tnam luʼ; icytzanjo, cybinxa tyol Kajaw; tuʼnj lutzan luʼ, maʼ choca nach tuʼn nok tuʼn tlaj cykʼinamabla, bix ax nach cykʼinamabl atl tuʼnj ma cub cykʼoʼn cycʼuʼja tiʼj, bix ntiʼ nchi tzalaja tiʼj tyol aj saj kʼon te ajo cyeya.

22. Ntiʼ npon tiʼj cycʼuʼja aj Kajaw cyDiosa cyiʼj cosas aj oʼ chi tzaj cyʼiwlaʼna tiʼj, sino que oʼcx nchi ximana tiʼj cykʼinamabla, bix mitzan tiʼ tuʼn t-xiʼ cykʼoʼna chjonta te Kajaw Dios cyiʼj cosas; icytzanjo, ntiʼ taj cyanmiya tiʼj Kajaw, sino que cyakil cycʼuʼja maʼ chi jaw nima bix maʼ txiʼ cykʼon cyiba tiʼj nim ntiʼ tajblanan, kʼoj, tloʼch, tzacaj, yasbil, biyon bix nicyʼca wik tnachal.

23. Cyjaʼtzan tuʼmal maʼ cabanj país luʼ tuʼn Kajaw Dios bix ax maʼ cyaj cyʼiwlaʼn tuj tnachal aj cykʼinambila, bix j-ajo nok tuʼn tlaj cynachala.

24. Icytzanjo, becyʼbil twitzj tnam ajoʼ tuʼnj maʼ pon tyemp aj tuʼn tel cyicʼana ajke profetas bix nchi jaw tzena cyiʼj, bix nchi baj cyxoʼna tuʼn xak, bix ncub cybiyoʼna bix nbant tiʼchakx tkal tnachal cyuʼna cyiʼj, lonxa icytzan kit tbant cyuʼn aj ojtxa xjal.

25. Bix jaʼlatzan, aj nchi yolana, nxiʼ cymaʼna: Nokat ma ko ankʼina tuj cykʼij kmana, miwla tiʼ ẍi cub kbiyoʼna ajke profetas: miwla bix ẍibaj kxoʼna xak miwla ẍex kxoʼna tiʼjxa.

26. Lutzan luʼ, mas pyorkaya cywitz; tuʼnj n-ankʼin Kajaw, ka ma jaw canet jun profeta cyxola txʼolbal te tyol Kajaw que ntak ax toc tiʼj twitz cyila bix cynachala, nchi jaw kʼojla tucʼal, bix nnetz cylajoʼna tiʼjxa bix nnoc il tiʼj cyuʼna tuʼn tkʼuchj tuj cyakil tuʼmal; icytzanjo, nxiʼ cymaʼna que tzacaj profeta j-ajo, que aj iljo bix te dyablajo, tuʼnj ntkʼamanta ax toc tiʼj cynachala.

27. Per lutzan luʼ, ka ma cana jun xjal cyucʼala bix ma txiʼ tkʼamaʼn: Bant jluʼ cyuʼna, bix ntiʼ tnachal; bant nok alcyex cyuʼntla, bix miʼn chi cyima; icytzanjo, bix ka ma tkʼamanta cyeya cyjaʼw: Chi beta tuj nimsbil te tbancʼuʼj cyanmiya; icytzanjo, cyxiʼya tuj nimsbil te tbakʼ cywitza, bix bant cyuʼna nok nicyʼpunx tajbil cyanmiya — atwat jun xjal sul cyucʼala bix ma yolan tuj tuʼmal j-ajo, oc ccʼametal cyuʼna bix cxel cymaʼna que ajo jun tbanal profeta.

28. Icytzanjo, oc cjawal cynimsana bix cxel cykʼoʼn cybaʼna te; oc cxel cykʼoʼna aj cy-oroya bix cyplataya, bix cocal cymukʼana tucʼ xbalan nim twiʼ; tuʼnj nyolan tiʼj yol cyeʼyax bix ntkʼamanta que cyakil baʼn, mitiʼ tnachal cnetal cyuʼna.

29. ¡Akiya te cʼoloj ankʼbil nach bix ploj; tnam ntiʼ tsentido bix cyiw tbinchben! ¿Jnicyʼpun tyemp nxiʼ cynaʼna tiʼj que cbel tapaʼn Kajaw? ¿Icytzanjo, jtoj ban tcyaj cykʼoʼna aj be ntiʼ tuʼmal bix tuj moẍ? ¿Jtoj baʼn cyajbeʼya mas aj klolj twitz aj spicyʼan?

30. Icytzanjo, lutzan luʼ, aj tkʼoj Kajaw maʼ cʼant cyiʼja; lutzan luʼ, maʼ baj tcyʼiwlaʼn país tuj tnachal tuʼn tlaj cynachala.

31. Bix lutzan luʼ, nlekʼan ttzaj lakʼe or tuʼn tcyaj cyʼiwlaʼn tuj nach aj cykʼinamabila, bix oc chi bel naj, que miʼn bant tuʼn t-xiʼ cycʼuʼna; bix tuj kʼij te cymebayila milayx tzyet cyuʼna.

32. Bix tuj aj or te cymebayila, cxel cyschʼiʼna te Kajaw; bix nok gana chi schʼila, tuʼnj ya atl cyibaja aj bix bix kʼuchbil ax toc milay baj; tons octzan chi jawal okʼa bix chi jawal schʼina, chitzan Kajaw te Ejércitos; tons tujtzan oc tjaw nim cybisa bix cxel cymaʼna:

33. ¡Ay, nokat oʼ tzʼajtz tiʼj wanmiya, bix mixt i cub nbiʼyona ke profeta bix i baj nxoni xak cyiʼj bix miwt i ex nlajoʼna! Icytzanjo, tuj kʼij ajo cxel cymaʼna: ¡Ay, nokat pon kcʼuʼj tiʼj Kajaw kDios tuj aj kʼij ttzaj tkʼoʼn kkʼinamabl, miwla ma chi meltzʼaj nok tuʼn cycub naj, miwla ma tzʼel kʼiʼnke; tuʼnj lutzan luʼ, aj kkʼinamabl maʼ tzʼel ok kiʼj!

34. ¡Lutzan luʼ, kkʼoʼn cyaj tzaluʼ ajke macbil, bix ya nchiʼj tzʼinanka; lutzan luʼ, maʼ chel xcʼaʼyan spada ke tuj kʼij aj o jayon tiʼj tuʼn toc kʼoj!

35. Icytzanjo, maʼ cheʼx keʼwan kkʼinamabl, bix maʼ chi tzokpaj nok tuʼn tlaj cyʼiwbil nach tibaj país.

36. ¡Ay, nokat o tzʼajtz tiʼj kanma tuj kʼij aj tul tyol Kajaw kucʼal! Tuʼnj lutzan luʼ, maʼ cub tzʼak jun cyʼiwbil nach twitz txʼotxʼ, bix cyakilke cosas maʼ chi cub naj, bix milay chi tzyet kuʼn.

37. Lutzan luʼ, ateʼke demonio ktxlajla; icytzanjo, txolch teʼc kiʼj ajke ángel tej aj ma bant tuʼn tuʼn cykʼuchj kanma. Lutzan luʼ, matijke tnachal kuʼn. Aya Tat, ¿Mipalay tzʼel tlakʼbaʼn tkʼoja, kiʼja? Bix cyjaʼtzanjo cxel cymaʼna cyuj kʼij ajo.

38. Mas lutzan luʼ, aj kʼij te preba cyiʼja ma tzicyʼjo; ma cyaj cykʼoʼna tuj twiʼpan kʼij tuʼn cycoleta bix ya maʼ kokax, bix aj kʼuchbil cyeya ya segur taʼ; icytzanjo, tuʼnj ma tzʼoc cynajsaʼn cykʼija tiʼj aj milay cyikʼa, bix ma chi jayona tiʼj tuʼmal tuʼn tbant tnachal, que ajo contra tiʼj xtis at tuj matij bix te Junmajx Wiʼxanil.

39. ¡Akiya xjal tuj país luʼ, nokat jaʼca txiʼ cybiʼna aj nyola! Bix jaʼcatzan chin kanna tiʼj tuʼn tel lakʼeʼ aj tkʼoj Kajaw, tuʼntzan tzʼajtz tiʼj cyanmiya tiʼj tnachal bix tuʼntzan cycoleta.