1. Bix nwila, aya ncʼwaʼl, que at chʼintl tibaj ajo aj miyaʼ txulch tnabila tiʼj, bix min tzʼel tnicyʼa tiʼj, tiʼj xtis te Dios bix tiʼj tsentens aj il; tuʼnj nxiʼ t-xiʼmana tiʼj que miyaʼ tuʼmal tuʼn tsentensat jun aj il tuj najbil.

2. Lutzan luʼ, aya ncʼwaʼl, cxel ntxʼolbaʼna teya jluʼ. Despwes que cyex xoʼn ajke tnejal kman tiʼjxa jardín te Edén tuʼn Kajaw Dios, tuʼn t-awet txʼotxʼ aj otak cha tzyet — icytzanjo, nnetz tiʼn aj xinak, bix nxiʼ tkʼaʼcj tuj tjawatz kʼij te jardín Edén, querubines bix jun spada ncʼant, nmeltzʼajeʼ tuj cyakil plaj tuʼn tcʼuʼt aj tzeʼ te ankʼbil.

3. Nkoqueʼyintzan, que aj xjal otak pon icytzan Dios, el tnicyʼ tiʼj tbanal bix tnachal; bix tuʼntzan mi t-xiʼ tlicʼan tkʼab, bix tuʼntzan mi tikʼ aj tzeʼ te ankʼbil, bix tuʼn mi t-xiʼ tloʼn, bix tuʼn tankʼin te junmajx, ncub ttxʼolbaʼn kman Dios ajke querubines bix spada ncʼant tiʼjla, tuʼntzan mi tneben xjal tiʼj twitz.

4. Bix cyjaʼtzan nkil que xiʼ kʼoʼn jun tplas xjal tuʼn tzʼajtz tiʼj tanma; icytzanjo, jun tyemp te preba, jun tyemp tuʼn tajtz tiʼj tanimya bix tuʼn tserviʼran te Dios.

5. Tuʼnj luttzan luʼ, nokat te joratx o xiʼ tlicʼan tkʼab Adán, bix owt neben tiʼj tzeʼ te ankʼbil, owla ankʼin te junmajx, según aj tyol Dios, bix ntiʼwla tuʼn ten tuʼmal tiʼj tuʼn tajtz tiʼj tanma tiʼj tnachal; icytzanjo, bix ax nokwala gana tyol Dios, ax nokwala soc tzacj aj plan te Dios.

6. Mas lutzan luʼ, o xiʼ kʼoʼn te xjal tuʼn tcyim — tuʼntzan i el lakʼbaʼn tiʼj tzeʼ te ankʼbil, cyjaʼtzan at cyelal lakʼbaʼn twitz txʼotxʼ— tons xiʼ tnaʼn xjal tiʼj que tuj najbil taʼ junmajx; icytzanjo, oc xinak que otak cub tzʼak.

7. Bix nnoc tqueʼyina j-ajo que biʼx el xcʼaʼyan cye ajke tnejal kman tuʼn mi cyten ttxlaj Kajaw, tzanx tucʼ xumlalbaj bix tzaʼnx xewbaj; cyjaʼtzan i oc ke xjal baʼn tuʼn t-xiʼ cyiʼn cyeʼx cye aj cybancʼuʼj.

8. Mas lutzan luʼ, mitiʼ tuʼmal aj tuʼn tcolet xinak tiʼj camacy te xumlalbaj, que aj j-ajo ajo tuʼn tkʼuchan tiʼj plan te tzalajibil.

9. Tuʼntzan j-ajo, mi jtoj tuʼn tcyim anma, bix tuʼntzanj cycublen tzʼak otak tzul jun camacy te xewbaj, icytzanj jun te xumlalbaj, tibajtzanjo cyakilxake xjal — ko chiwlajo, i el lakʼbaʼn ttxlaj Kajaw — o oc il tiʼj tuʼn cycolet xjal tiʼj camacy te xewbaj.

10. Tuʼnj otaktzan choc te chibajalbaj, siʼske bix dyablaka, aj cytuʼmal jo, ma tzʼoc te jun tuʼmal tuʼn tbant cyten; ma meltzʼaj te jun tuʼmal tuʼn tbant cyten.

11. Bix miʼn cuʼx naj tiʼj tcʼuʼja, aya ncʼwal, que nokat miyaʼj tuʼn plan te colpibl (aj tuʼnwt tcyaj kʼot ttxlaj), ajwala cyanma tuʼn cyxiʼ tuj najbil oc cycyim, tuʼnj miyaʼ teʼ ttxlaj Kajaw.

12. Bix ntiʼ tuʼmal tuʼn cycolet xjal tuj tuʼmal ya tzʼaknajka, que cyuʼnx cyib otak bant cyuʼn tuʼn tlaj cychcyinabil;

13. Cyjaʼtzan jluʼ, según xtis, aj plan te colpibl milay bant ka ntiʼ tuʼn tzʼajtz tiʼj cyanma xjal tiʼj tnachal tuj tuʼmal e tuʼn tbant cyten, icytzanjo, aj tuʼmal te tuʼn tbant cyten; tuʼnj nokatwatzan miyaʼwt j-ajo, miwla ntiʼ tuʼmal tuʼn t-xi xtalbil tuʼn mi tkʼuchj xtis. Per aj xtis milaytak tuʼn tkʼuchj; ka icyjo, ma cyaj tkʼoʼn Dios tuʼn mi toctl te Dios.

14. Cyjaʼtzan nnoc kqueʼyin que cyakil xjal otak cub tzʼak bix taʼtak tuj tcwent xtis; icytzanjo, aj t-xtis Dios oc cycub sentensan tuʼn mi cyten ttxlaj te junmajx.

15. Bix mitiʼtak tuʼn tbant aj plan te xtalbil ka ntiʼ chojbil twitz il; cyjaʼtzan jluʼ, ax Dios nchojan tiʼj til mundo, tuʼntzan tbant aj plan te xtalbil, tuʼntzan tmaket aj tsentens xtis, tuʼntzan toc Dios jun Dios ax toc tbanal, bix xtalaltl.

16. Ax milay pon cyucʼ xjal aj tuʼn tzʼajtz tiʼj cyanma tiʼj tnachal ka ax ntiʼ jun castiwa te junmajx icytzan tej ankʼbil te anma, contra tiʼj plan te tzalajibil, ax te junmajxax lonxaj ankʼbil te anma.

17. Bix ¿tzaʼn tuʼn tajtz tiʼj tanma jun xjal, nokat ntiʼwt twitz il? ¿Tzaʼn tuʼn tbinchan twitz il, nokat ntiʼ ley? bix ¿Tzaʼn tuʼn ten ley, nokat ntiʼ castiwa?

18. Cyjaʼtzan cyaj kʼot jun castiwa, bix cyaj kʼot jun ley tbanilxix tuʼntzan ttzaj jun tbis tuj twiʼ xjal.

19. Nokatwatzan ntiʼ xiʼ kʼot jun ley, tej xjal aj cbiyal il tiʼj tuʼn tcyim, ¿Atpala tchi tiʼj tuʼn tcyim, ka ma biyon?

20. Bix nokatwatzan ntiʼ ley tiʼj twitz il, ntiwla tchi cyiʼj xjal tuʼn cybinchan twitz il.

21. Bix nokatwatzan ntiʼ ley, ¿Ti tkal tuʼn tbant tuʼn xtis, kama chi binchan xjal twitz il? ¿Bixmo aj xtalbil? Miwla tiʼ cyipamal tibaj xjal.

22. Mas otzan txiʼ kʼot jun ley, oʼ cyaj kʼot jun castiwa, bix oʼtzan txiʼ kʼot jun tuʼmal tuʼn tajtz tiʼj cyanma, que ajo ntkana xtalbil; tiʼj juntl tuʼmal, nxiʼ tdemandaʼran xtis aj xjal n-ankʼin bix nnakʼnantzan ley, bix atzan ley ncub kʼon te castiwa; nokatwatzan micyʼ tenjo, aj tbinchben xtis jaʼcwala cub kʼuchj, bix atzan te Dios jaʼcwala cyaj tkʼoʼn tuʼn mi toc Dios.

23. Mas nlay txiʼ tcolan Dios tuʼn mi toc te Dios bix xtalbil nkanan tiʼj aj nnajtz tiʼj tanma; bix aj xtalbil ntzaj tuʼn aj chojbil tiʼj twitz il; bix aj chojbil tiʼj twitz il nbant tuʼn aj itzʼjbil cye cyimna; bix aj tuʼn cyjaw itzʼj cyimna nbant tuʼn tuʼn cyaʼjal maktzʼaj xjal ttxlaj Dios; bix cyjaʼtzan nchi baj saksan, tuʼntzan cyoc tuj xtis según cybinchben, según aj ley bix xtis.

24. Lutzan luʼ, nbant tuʼn xtis cyakil tderech, bix ax icyx te xtalbil nkanan tiʼj aj te tecax; bix cyjaʼtzan, mijun jaʼca colet ka miyaʼ axax toc tuʼn tajtz tiʼj tanma.

25. ¿Baka jaʼca txiʼ tocslaʼna que jaʼca txiʼ ilkʼaʼn xtis tuʼn xtalbil? Cxel nmaʼna teya que miʼn; mi jun piẍ neʼ. Nokatwatzan icyjo, ilwala tiʼj tuʼn tcyaj tkʼoʼn Dios tuʼn mi toc Diostl.

26. Bix atzan tuʼmal nchi bant ajke matij bix te junmajx tnabil Diosjo, que atxax cyajna bant tiʼj aj tcub keʼ twitz mundo. Bix cyjaʼtzan nbant aj colbil cye xjal, bix ax icyx aj kʼuchbil cye bix najbil.

27. Cyjaʼtzan jluʼ, aya ncʼwaʼl, alcyej tajbil tuʼn ttzaj, baʼn tuʼn ttzaj nebel tiʼj aʼ te ankʼbil; bix alcyej ntiʼ tajbil, miyaʼ kʼakʼan tiʼj tuʼn ttzaj; pero tuj twipan kʼij oc cxel kʼot te según aj tbinchben.

28. Bix ka maʼ tajbeʼ tuʼn tbant tnachal tuʼn, bix naʼx tajtz tij tanma tiʼj tnachal cyuj te tkʼij, lutzan luʼ, oc ctikʼal tnachal, según aj saksbil te Dios.

29. Bix jaʼlatzan, aya ncʼwaʼl, wajbila tuʼn ttxuleʼya cyiʼj cosas luʼ, bix oʼcx tuʼn tjaw labta cyiʼj twitz tila, tuʼnj bis luʼ cxel kʼiʼna tuj tuʼn tajtz tiʼj tanmiya.

30. ¡Aya ncʼwaʼl, wajbila tuʼn mi tcub teʼwantla aj xtis te Dios! Miʼn tzʼoc tsibana chʼin neʼ tiʼjx tiba nok tuʼn cylaj twitz tila, bix eʼwan t-xtis Dios tuʼna. Kʼoʼncyaja, que aj t-xtis Dios, t-xtalbil bix aj tpasens tuʼn toc tipamal tiʼj tanmiya; bix kʼonx tiba tuʼn tcub becyʼbiliʼna asta lonxa icytzanj puj.

31. Lutzan luʼ, aya ncʼwaʼl, oʼ txaqueta tuʼn Dios tuʼn tpacbana tyol tej tnam luʼ. Txiʼya tuj tbeya, aya ncʼwaʼl, txʼolbanxa yol tuj ttxolal bix ax toc tuʼntzan cyxiʼ tiʼna anma tuj tuʼn tajtz tiʼj cyanma, tuʼntzan ten tipamal xtalbil cyibaj. Bix tuʼntzan ttzaj tkʼoʼn Dios teya icytzanj maʼ txiʼ nmaʼna teya. Icytzan tenjo.