1. Aya ncʼwaʼl, at chʼintl tuʼn t-xiʼ nmaʼna teya, part tiʼj maʼ txiʼ nmaʼna te termaniya; tunj lutzan luʼ, ¿Naʼx toc tqueʼyiʼna que baʼn tnabil termaniya, aj tbanal bix tchi-al tiʼj tuʼn cyxiʼ tcʼuʼn ajke tmandamyent Dios? Lutzan luʼ, ¿Minaʼxpa tzaj tkʼoʼn jun yecʼbil teya?

2. Tuʼnj teʼ ntiʼyin soc nyola tuj twiʼya, cyxolke zoramitas, icytzanj xbant tuʼn termaniya. Atzanjo at contra tiʼja wuʼna: Ma jaw nima tuʼn tipamala bix aj nim baʼn tuʼna.

3. Bix miya cyakiljo, aya ncʼwale. Ma bant tuʼna ajo tzaj nbisa tuʼn. Tuʼntzanj cyaj tcolina akʼuntl te bangelyo bix xiʼya ma tuj pais te Sirón, jatuma taʼ ttxan cytxʼotxʼal lamanitas, tucʼal aj xuj Isabel bant nach tuʼn tucʼ xinak.

4. Icytzanjo, ma cub tuj cywitz nim anma tuʼn; per miyaʼ tuʼmal te tuʼn ttzaj tmakana, aya ncʼwaʼl. Owt tzyet akʼuntl tuj ministerio tuʼna aj otak txiʼ kʼoʼn teya.

5. ¿Mipa loʼn tuʼna, aya ncʼwaʼl, que ajke cosas ajo nachkajo tuj twitz Kajaw; icytzanjo, más nachkajo cywitz cyakil il, oʼcxcatzala ka ma takʼ chicyʼ sak wena bixmo tuʼn tcub teʼwan aj Xewbaj Sant?

6. Tuʼnj lutzan luʼ, ka ma cub teʼwana aj Xewbaj Sant, despwes que otak ankʼin tucʼala, bix loʼn tuʼna que maʼ cub teʼwana, lutzan luʼ, a jun iljo milay canan najsbil tiʼj; icytzanjo, bix alcyej ma biyan tiʼj spicyʼan bix tiʼj nabil tiʼj Dios, miyaʼ fácil tuʼn tikʼ najsbil; icytzanjo, aya ncʼwaʼl, cxel nmaʼna teya que miyaʼ fácil tuʼn tikʼ najsbil.

7. Aya ncʼwaʼl, nokat miyaʼwt aya at matij tpaj tiʼj tnachal. Miwla lay cucx nyolana tiʼj nachala tuʼn mi tcyʼixba tanmiya, nokat miyaʼ teya tbaʼna.

8. Mas lutzan luʼ, milay cub teʼwana ke nachal twitz Dios, oʼcxtzala ka ma tzʼajtz tiʼj tanmiya tiʼj, oc chi jawal weʼ kʼol ax toc contra tiʼja tuj twiʼpan kʼij.

9. Aya ncʼwaʼl, wajbila tuʼn tajtz tiʼj tanmiya tiʼj tnachal bix tuʼn cycyaj tcoʼlana twitz tila, bix miʼn txiʼ tkʼon tiba tʼun t-xiʼya tuj tnachal tej tajbil t-xumlala aj ntil tbakʼ twitza, sino tuʼn tcub ttzinan tiba cyiʼj cosas ajo; tuʼnj ka min ma bant ajo tuʼna, tuj mi jun tuʼmal jaʼca tikʼa aj reyno te Dios. ¡Bix miʼn naj-jo tiʼj tcʼuʼja; ximanx tiʼj bix waban cub tiba cyiʼj cosas ajo!

10. Bix cxel nmaʼna teya tuʼn tnakʼeta tuʼn t-xiʼ tkaʼnna cye termaniya etzicybaj cyiʼj takʼana; tuʼnj lutzan luʼ cuʼxana, bix il tiʼj cyonbil termaniya tiʼja. ¡Bix xoʼn ocxa cyconsej!

11. Miʼn txiʼ tkʼon tiba tiʼj chcyinbil bix aj ntiʼ tajblanan; miʼn tcʼama tuʼn t-xiʼ kʼiʼn tanmiya tuʼn dyablo juntl el cyiʼj tnachal cyucʼ ajke xuʼj nok oʼcx taʼ cynaʼn tiʼj tuʼn tbant tnachal cyuʼn cyucʼ xinak. Lutzan luʼ, aya ncʼwaʼl, baka neʼ tnachal ma bant tuʼna cyiʼj zoramitas; tuʼntzanj aj soc cyqueʼyin tmodiya, ntiʼ ẍcykiy tuʼn tocx cyocslaʼn nyola.

12. Bix aj t-xew Kajaw ntzaj tkʼamaʼn wecyʼ: Kʼamanxa cye tcʼwaʼla tuʼn tbant tbanal cyuʼn, nyaʼca yaj tzʼel tzacj cyanma nim xjal cyuʼn asta oc cykʼuchj. Cyjaʼtzan jluʼ, aya ncʼwaʼl, cxel nmaʼna teya, tuʼn tchi Dios, tuʼn tcub ttzinan tiba cyiʼj tnachal;

13. Tuʼn taʼjala tucʼ Kajaw tucʼ cyakil tipamala bix fuerz tnabila; miʼn tzʼoc ttzacsan mas cyanma txkantl xjala tuʼn tbant tnachal cyuʼn, más jluʼ chi maktzʼuʼn ajtza bix kʼamanxa twitz tila cye bix binchanxa cyjaʼ tiʼj aj tnachal o bant tuʼna.

14. Miʼn txiʼ tjayoʼna aj kʼinamabil bix ajke ntiʼ cyajblanan twitz mundo luʼ, tuʼnj lutzan luʼ, milay cheʼx tiʼna tucʼala.

15. Bix jaʼlatzan, aya ncʼwaʼl, wajbila tuʼn t-xiʼ nmaʼna chʼin teya tiʼj tuʼn tul Cristo. Lutzan luʼ, cxel nmaʼna teya que ax toc akʼa aj tzul kʼuchal twitz il te mundo; icytzanjo, tzulkʼa txʼolbal pocbal aj tbanil te colbil te cye tnam.

16. Atzan akʼuntljo aj al iʼj o txaqueta: tuʼn t-xiʼ kʼamet aj pocbal at tchi-al tej tnam luʼ tuʼntzan tbant ten cyanma; bixmo kochiwlajo, que tzul colbil cyiʼj tuʼntzan tbant ten cyanme cycʼwaʼl, tuʼntzan cybin cyiʼj yol tuj tyemp oc tul.

17. Bix jaʼlatzan cbel ntxulbaʼn jorat tnabila tiʼj ajo. Lutzan luʼ, njaw labana tiʼj aj ti kuʼn il tiʼj tuʼn tel knicyʼ cyiʼj cosas ajo te jun tyempca. Lutzan luʼ ¿Mipala yaʼ cyeʼyax aj anma ajo te Dios jaʼla, lonxa icytzanj maxa tuj tyemp oc tul?

18. ¿Mipala yaʼ il tiʼj tuʼn t-xiʼ kʼamet tpocbal tiʼj plan te colbil tej tnam luʼ tzanx cye tcʼwaʼl?

19. ¿Mipala yaʼ fácil tiʼj tuʼn ttzaj tsamaʼn Kajaw t-angel jaʼla txʼolbal te ajke pocbal at tchi-al bix tzanx cye kcʼwaʼl, bixmo lonxa icytzanj despwes tiʼj tyemp tullenxa?