Aj Uʼj Te Alma
Tycʼajil Alma

1. Banttzan que nkeʼ tuʼn t-xi tmaʼn Alma aj tyol Dios cye tnam, tnejal tuj txʼotxʼ te Zarahemla, bix despwestzan tuj cyakil paístl.

2. Bix akatzan tyol jluʼ según ajke tecax tyol, aj xiʼ tmaʼn cye tnam tej glesya attak tuj tnam Zarahemla, cyjaʼtzan ten cyjaʼw:

3. Akina, Alma, ma chin noc otxʼoʼna te sacerdote matij te glesya te Dios tuʼn nmana Alma, pwes at tipamal tuʼn Dios tuʼn cybantj cosas ajo tuʼn, lutzan, luʼ, xel nmaʼna cyeya que keʼ tuʼn tcub jun glesya tuj txʼotxʼ attak nakaʼyan tiʼj mojon te país te Nefi; icytzanjo, aj txʼotxʼ tzkiʼntak país te Mormón; icytzanjo, bix i baj tbiyaʼnke termano tuj aʼ te Mormón.

4. Bix lutzan luʼ, cxel nmaʼna que i el caloʼn tuj tkʼab rey Noé tuʼn aj txtalbil bix tipamal Dios.

5. Bix tbajlentzan j-ajo, lutzan luʼ, i eʼx kʼiʼn tuj jun tuʼmal cubna tuʼn cyoc te majan tuj desyerto cyuʼn lamanitas; icytzanjo, cxel nmaʼna que prestak teʼ, bix ya te acʼajtl i colet tiʼj moybil tuʼn tipamal tyol Kajaw; bix otzan i tzaj kʼiʼn tuj txʼotxʼ luʼ, bix atzan tzaluʼ keʼ tuʼn ten Glesya te Dios tuj cyakil paísl.

6. Bix jaʼlatzan, akiya wermaniya, akiya ajke teʼca tiʼj glesya luʼ, lutzan luʼ, cxel nkaʼnna cyeya: ¿Maʼ txiʼ cycʼujlaʼcjtla nim aj presbil te cymana? Icytzanjo, ¿Bix ma txiʼ cycʼujlaʼcjtla nim aj nabil te xtalbil te kman bix aj pasens te Dios cyiʼj? Bix ademástl, ¿Maʼ weʼ cyuʼna aj ximbitz maʼ t-xiʼlen tiʼj nabil te aj tcolbil cyiʼj anma tuʼn mi cyxiʼ tuj impyerno?

7. Lutzan luʼ, maʼ baj tmeltzʼuʼnkʼa ajke cyanma; icytzanjo; maʼ chocx tcʼasan tuʼj jun witzicyʼ matij, bix matzan chi jaw itzʼj te Dios. Lutzan luʼ, ateʼtak tuj tmij klolj; simbargo, aj spicyʼan tej yol te junmajx o spicyʼaman te cyanma; icytzanjo, cʼaloʼntakka cyuʼn sakbak te camacy bix ajke caden te impyerno, bix ayoʼntakka tuʼn jun kʼuchbil te junmajx.

8. Bix cxeltzan nkaʼnna cyeya jaʼla, akiya wermaniya: ¿Ma chi kʼuchj? Lutzan luʼ, cxel nmaʼna cyeya que miʼn; nitiʼ i cub kʼuchan.

9. Bix ax cxel nkaʼnna cyeya: ¿I baj kʼuchan ajke takʼal camacy, bix i baj kʼuchan ajke tcadenal impyerno aj cʼalonke tuʼn? Cxel nmaʼna cyeya que icyjo; icyaj tzakpiʼnka, bix aj cyanma i eʼx mal, bix i bitzan tucʼ tchi-al aj xtalbil. Bix cxel nmaʼna cyeya que chi coletal.

10. Bix cxeltzan nkaʼnna cyeya jaʼla: ¿Ti kuʼn chi coletal? Icytzanjo, ¿Al iʼj tuʼmal xi ayon tiʼj colbil? ¿Ti kuʼn xi colet tiʼj takʼal camacy, icytzanjo, bix tiʼj tcadenal impyernotl?

11. Lutzan luʼ, cxel nmaʼna cyeya. ¿Ntiʼ ocx tocslaʼn nmana Alma aj yol o tkʼama Abinadí jun tyempca? ¿Bix miyaʼpala jun profeta sant aj ten? ¿Mipala tiʼ o tyoʼla aj tyol Dios, bix i ocx tocslaʼn nmana Alma?

12. Bix segúntzan tocslabil, o tzaj jun matij meltzʼubil tuj tanma. Lutzan luʼ cxel nmaʼna cyeya que ajo ax toc.

13. Bix atzankʼa o pacban te yol te cymana, bix tuj cyanma o bant jun matij meltzʼubil; bix cub cybecyʼbiliʼn cywitz, bix xiʼ cykʼoʼn cycʼuʼj tiʼj Dios ax toc n-ankʼin. Bix lutzan luʼ, tbanal xjalke asta tjapan baj twiʼ; cyjaʼtzan jluʼ, i colet.

14. Bix jalatzan cxel nkanna cyeya, akeya wermaniye te glesya; ¿Mapa chi itzʼja tuj xewbaj tiʼj Dios? ¿Mapa cycʼama tex tilbilal Dios tiʼj cyex cywitza? ¿Ma pa tzʼicy cyuʼna aj meltzʼubil matij tiʼj cyanmiya?

15. ¿At ocslabil cyucʼala tiʼj colbil te aj binchal te cyeya? ¿Nxiʼ cyqueʼyiʼna tuj tyemp tzul tuʼnj tbakʼ witzbaj te ocslabil bix ncyila aj xumlalbaj te cyimleʼn que ma jaw weʼ tuj miyaʼ cyimleʼn, bix aj tuʼmalj kʼuchbil tuj miyaʼ te kʼuchbil, tuʼntzan t-xiʼ cyyecʼan cyiba twitz Dios, bix tuʼntzan cyoca tuj xtis según cybinchbena aj otak chi bant tuj ankʼibil lu?

16. Cxel nkaʼnna cyeya: ¿Jaʼca bant tuʼn t-xiʼ cyxiʼmana tuʼn t-xiʼ cybiʼna twiʼ Kajaw aj ctzajal tmaʼn tuj kʼij ajo: Cytzaja wiʼja akiya cyeʼyax, tuʼnj, lutzan luʼ, ajke cybinchbena twitz txʼotxʼ tuj tjikanil ma chi bant?

17. ¿Bix mo nxiʼ cynaʼna tiʼj que jaʼca cub cyslaʼjana twitz Kajaw tuj kʼij ajo, bix tuʼn t-xiʼ cymaʼna: Tat, aj kbinchbena twitz txʼotxʼ ax toc baʼnka; bix que octzan chi coletala?

18. Bixmo tuj jun tuʼmal juʼnxal, ¿Jaʼca bant tuʼn t-xiʼ cyxiʼmana twitz xtisbil te Dios tucʼ cyanmiya at nim cypaj bix tnachal, bix ncycʼujlantatzana cyakilkaj tnachal bant cyuʼna; icytzanjo, tucʼ jun tuʼmal elna cynicyʼa tiʼj cyakil tnachal cyuʼna; icytzanjo, tucʼ aj nabil te que otak tzʼel cyicʼana ajke tmandamyent Dios?

19. Cxel nkaʼnna cyeya: ¿Jaʼcapala tzʼoc cyqueʼyiʼna Dios tuj kʼij ajo tucʼ jun cyanmiya tbanal bix cykʼaba sak wena? ¿Jaʼca jaw cykʼoʼn cywitza twitz cyaʼj, que at tiblal Dios at tuj cywitza?

20. ¿Jaʼca txiʼ cyxiʼmana tiʼj tuʼn cycoleta — nxiʼ nkaʼnna cyeya — cwando ma chi cub tzʼaka tuj tcwent dyablo?

21. Cxel nmaʼna cyeya que tuj kʼij ajo loʼn cyuʼna que miʼn chi coleta; tuʼnj mijun jaʼca colet ka naʼx tjatz txʼajet cyiʼj t-xbalan asta tuʼn tcyaj cyiʼj sak wena; icytzanjo, aj cyxbalan ilx tiʼj tuʼn cycyaj sak wena tiʼj cyakil ẍwaʼj, bix tuʼn cytxʼajet tuʼn chicyʼ tej aj cykʼamanta kman que attak tulal colal cye tnam tiʼj twitz cyil.

22. Bix cxel nkaʼnantzana cyeya jaʼla, akiya wermaniya: ¿Tzaʼn jaʼca cynantiya nokat teʼya twitz tribunal te Dios, tucʼ cyxbalana ẍwaʼj tiʼj tuʼn chicyʼ bix tucʼ cyakil wikal aj tnachal? Lutzan luʼ, ¿Tiʼ ax toc ccyakʼal cyakilkaj cosas cyiʼja?

23. Lutzan luʼ, miʼnpala cykʼamanta que puro biyolkiya, bix que ax at cypaja cyiʼj cyakil tnachal nchibant?

24. Lutzan luʼ, akiya wermaniya. ¿nxiʼ cyxiʼmana tiʼj que chʼix mi icykaya tuʼn cypon tutzʼeʼya tuj tcubil Dios, tucʼ Abrahám, Isaac bix Jacob bix ax cyucʼ cyakilka profetas sant, que puro sak tiʼj cyxbalan bix ntiʼ ẍwaʼj cyiʼj, tbanalke bix sakke?

25. Cxel nmaʼna cyeya que miʼn; oʼcxtzala ka ma bant aj Binchalte slaʼj cyuʼna atxax aj ttzajlen keʼ twitz mundo, bixmo cxel cynaʼna tiʼj que ajo, mi txiʼ cyxiʼmana tiʼj que ajke xjal ajo at cycubil tuj cubil tuj cyaʼj; sino que chelax kʼot jwera, tuʼnj akajo tcʼwaʼl te cawbil treyno dyablo.

26. Bix jaʼlatzan, akiya wermaniya, ka maʼ tzʼel cynicyʼa tiʼj jun meltzʼubil tuj cyanmiya, ka maʼ cynantiya ajbil tiʼj tuʼn cybitzana tiʼj bitz te tchi-al aj ncolan, lutzan luʼ, wajbila tuʼn t-xiʼ nkaʼnna cyeya, ¿Jaʼca cynantiya j-ajo jaʼla?

27. ¿Maʼpala cub cywaban cyiba tuj tbanal twitz Dios tiʼj tuʼmal cyankʼibila? Ka ma pon tuʼmal tuʼn cycyima tuj rat j-ajo, ¿Jaʼcpala txiʼ cymaʼna cyilcyibxa tuj cyanmiya, que otak chi tena tuj nim becyʼbijibil? ¿Que aj cyxbalana otak txʼajet bix otak sakax tuj tchicyʼel Cristo, que tzul colal cye ttanma tiʼj twitz cyil?

28. Lutzan luʼ, ¿Otak chetza tiʼjxa nimsbil? Ka ntiʼ, cxel nmaʼna cyeya que miyaʼ ban cytena tuʼn cypon weʼya twitz Dios. Lutzan luʼ, ilx tiʼj tuʼn tbant naj cytena jaʼla; tuʼnj nakaʼ taʼ aj reyno te tuj cyaʼj, bix alcyej miyaʼ banan ten mitiʼ tankʼbil te junmajx.

29. Lutzan luʼ, ¿Atpala jun cyxola que naʼx tetz tuj xcyakbil? Cxel nmaʼna cyeya que aj ajo miyaʼ banan tenjo; bix wajbil joratx tuʼn t-bant tenjo, tuʼnj cyjaʼ ttzaj lakʼeʼ hor, bix ntiʼ loʼn tuʼn jtoj ban tul tyemp; tuʼnj j-xjal ajo at tpaj tiʼj.

30. Bix ax cxel nkaʼnna cyeya: ¿Atpala jun cyxola alcyej ntzen tiʼj termano, bixmo nnoc tkʼoʼn nim taʼw tiʼj?

31. ¡Becyʼbil twitzjo! Tuʼnj miyaʼ banan ten; bix aj tyemp nlekʼan tul lakʼeʼ aj tuʼn tajtz tiʼj tanma tiʼj tnachal, bixmo miʼn colet.

32. Icytzanjo, ¡becyʼbil cywitza cycyakila, akiya binchal tnachal! ¡Tzʼajtz tiʼj cyanmiya tiʼj tnachal, tzʼajtz tiʼj cyanmiya tiʼj tnachal, tuʼnj oʼ tzaj tkʼamaʼn Kajaw Dios!

33. Lutzan luʼ, ntxocankʼa cyiʼj cyakil xjal, pwes cyejo cyakil nxiʼ tlicʼanke tkʼabkʼa te xtalbil, bix chitzan: Tzʼajtz tiʼj cyanmiya tiʼj tnachal, bix chi cʼametaltzana wuʼna;

34. Icytzanjo, cytzaja wiʼja bix ajunkiya chi nebel tiʼj loʼj tej tzeʼ te ankʼbil; icytzanjo, chi waʼla bix chi cʼala tiʼj pan bix aʼ te ankʼbil.

35. Icytzanjo, cytzaja wiʼja bix cyiʼntza binchben tbanal, bix cyjaʼtzan miʼn chi jaw txʼemata bix miʼn cheʼx xoʼta tuj kʼakʼ.

36. Tuʼnj lutzan luʼ, aj tyemp nlekʼan tul lakʼeʼ jatuma cyakilkaj aj mi ma tzaj cyiʼn loʼj tbanal, bixmo alcyej mi ma bant tbinchben tbanal, at-x tuʼmal tuʼn tjaw schʼin bix tuʼn tbisan.

37. ¡Akiya binchal tnachal, maʼ chi noja tucʼ cyakil mitiʼ tajblanan twitz mundo, akiya ma cyajbeya tuʼn tel cynicyʼa tiʼj be jikan, bix simbargo, maʼ chel naja lonxa icytzan jun neʼl ntiʼ pastory cyiʼj, banwtla otak chi txaqueta tuʼn jun pastor, bix cucx ttxocan cyiʼja, per cycyʼiʼya txiʼ cybiʼna tyol!

38. Lutzan luʼ, cxel ntxʼolbaʼna cyeya que aj tbanal pastor ntxocan; icytzanjo, bix ntxocan tuj tex tbi, que ajo aj tbi Cristo; bix ka mi ma txiʼ cybiʼna aj tbanal pastor mix aj tbi al-iʼj nchi txaqueta, lutzan luʼ, miyaʼ akiya tneʼl.

39. Bix ka miyaʼ akiya tneʼl aj pastor tbanal, ¿Altzan cye cʼolojal neʼl teʼkiya? Lutzan luʼ, cxel nmaʼna cyeya que a dyablo aj cypastora, bix akiya tneʼl, bix ¿Alcye cbel ewan tej ajo? Lutzan luʼ, cxel nmaʼna que alcyej ma cub ewan te, ajo jun slaʼj bix tcʼwaʼl dyablo.

40. Tuʼnj cxel nmaʼna que cyakil aj tbanal tzajna tiʼj Dios; bix cyakil aj tnachal, tzajna tiʼj dyablo.

41. Cyjaʼtzan luʼ, alcyej xjal ma yecʼan tiʼj binchben tbanal, nxiʼ tbiʼn tyol aj tbanal pastor bix cyjaʼtzan t-xiʼ tiʼj; pero alcyej ma chi tzaj tiʼn binchben nach cmeltzʼajeljo te tcʼwaʼl dyablo, tuʼnj nxiʼ tbiʼn tyol bix lapchoʼc tiʼj.

42. Bix alcyej ma bant j-ajo tuʼn oc ctikʼal twiʼ tcʼuʼj tucʼal; cyjaʼtzan jluʼ, ctikʼal te twiʼ tcʼuʼj aj camacy, atzan cyiʼj cyakil cosas tbanal, tuʼnj cyimnajo tuj cyakil binchben tbanal.

43. Bix jaʼlatzan, akiya wermaniya, wajbila tuʼn ntzaj cybiʼna, tuʼnj nchin yolana tucʼ cyakil tipamal wanmiya; tuʼnj, lutzan luʼ, maʼ chin yolana claro bixmo según ajke tmandamyent Dios tuʼntzan mi cyel tzacja.

44. Tuʼnj maʼ chin txaqueta tuʼn nyolana tuj tuʼmal j-ajo, según aj sant ntkʼamanta Dios que at tiʼj Cristo Jesús; icytzanjo, at mandamyent wuʼcʼala tuʼn t-xiʼ nyecʼana tej tnam luʼ tiʼj aj cub cyyeʼcʼan kman tiʼj aj cyjaʼ ttzaj.

45. Mas miyaʼ oʼcx j-ajo. ¿Ocslaʼn cyuʼna, baka, ntiʼ loʼn wuʼna wuʼnx wibxa cyiʼj cosas j-ajo? Lutzan luʼ, cxel nmaʼna cyeya que loʼn wuʼna que ajke cosas ajo aj al-iʼj maʼ chin yolana ax tocjo. Bix ¿Tzaʼntzan nxiʼ cynaʼna tiʼj que segur tina tiʼj ajo?

46. Lutzan luʼ, cxel nmaʼna cyeya que tuʼnj aj t-Xew Sant te Dios maʼ tzaj tkʼoʼn wecyʼ tuʼn tel nnicyʼa tiʼj. Lutzan luʼ, oʼ chin apana wi-ij bix oʼ chin nana Dios cyuj nim kʼij tuʼntzan tel nnicyʼa cyiʼj cosas wuʼnx wibxa. Bix jaʼla loʼn wuʼna wil wibxa que ax tockejo; tuʼnj oʼ tzaj tyecʼan Kajaw Dios wecyʼ tuʼn te t-Xew Sant; bix atzan xewbaj te kʼamaltejo aj at wucʼala.

47. Bix ademástl, cxel nmaʼna cyeya que tuj ax tuʼmal oʼtzaj kʼamaʼn wecyʼ ajke yol ax toc xiʼ cyyoʼlan kman, según aj xewbaj kʼamalte te jun tyempca at wucʼala, que ajo ax tuʼn tyecʼbil t-Xew Diosjo.

48. Cxel nmaʼna cyeya que loʼn wuʼna wuʼnx wibxa, que nok nicyʼ punx cxel nmaʼna tiʼj tyemp cyjaʼ ttzaj ax tocjo; bix cxel nmaʼna que loʼn wuʼna que tzul Jesucristo; icytzanjo, aj Cʼwaʼlbaj tJunalx te Mambaj, nojna tucʼ nim tbanal, becyʼbijibil bix ax toc. Lutzan luʼ, atzankʼajo tzul kʼil twitz til mundo, icytzanjo, kʼil twitz cyilkaj cyakil at cyocslabil matij tiʼj tbi.

49. Bix jaʼlatzan cxel nmaʼna cyeya que atzan orden aj al-iʼj maʼ chin txaqueta; icytzanjo, tuʼn npacbana cyiʼj cyakil wermaniya bix cyakilkaj nchi ankʼin twitz txʼotxʼ; icytzanjo, tuʼn npacbana cye cyakil, bawtla tiwnakka, cuʼxanka, bawtla majanka, bixmo tzakpiʼnka; icytzanjo, cyeke tiwnak, cyeke miyaʼxax nuchka bix miyaʼxax tijxjalka bix cyekej ma nchi itzʼj jaʼla, tuʼn t-xiʼ ntxʼolbaʼna tuʼn tajtz tiʼj cyanma tiʼj tnachal bix tuʼn cyjaw itzʼj te acʼaj.

50. Icytzanjo, chitzan Xewbaj: Tzʼajtz tiʼj cyanmiya tiʼj tnachal cyakilkaya, teʼ ttxaʼnla txʼotxʼ, tuʼnj nlekʼan tul lakʼeʼ aj reyno te tuj cyaʼj; icytzanjo, aj tCʼwaʼl Dios tzul tuj ttzalajibil, fuerz, tmatijal tipamal, bix reyno. Icytzanjo, akiya wermaniya aj nim cʼujlaʼn wuʼna, cxel nmaʼna cyeya que chitzan Xewbaj cyjaʼw: Lutzan luʼ aj ttzalajibil rey te cyakil twitz txʼotxʼ; bix aj Rey te tuj cyaʼj ax joratx ccʼantel cyxol cyakil cycʼwaʼl xjal.

51. Bix ax ntzaj tmaʼntl Xewbaj wecyʼ, icytzanjo, ntzaj yolan wucʼala tucʼ cyakil tipamal cyjaʼw: Txiʼya bix kʼamanxa tej tnam luʼ: Tzʼajtz tiʼj cyanmiya, tuʼnj ka min bant cyuʼna, tuj mi jun tuʼmal jaʼca cyikʼa aj reyno tuj cyaʼj.

52. Bix ademástl, cxel nmaʼna que ntzaj ttxʼolbaʼn Xewbaj: Lutzan lu, aj siʼwbil cʼuxbil toc tiʼj tlocʼ tzeʼ; cyjaʼtzan jluʼ, cyakil tzeʼ aj mi ma takʼ twitz tbanal, oc cjawal txʼemat bix cocax kʼot tuj kʼakʼ; icytzanjo, jun kʼakʼ ntiʼ nbaj, jun kʼakʼ milay yupj. Lutzan luʼ, tenx tuj cynabila que oʼ tkʼamanta aj Sant.

53. Bix jaʼlatzan cxel nkaʼnna cyeya, akiya wermaniya: ¿Jaʼca tziʼx cyuʼna aj cyaʼw yol ajo? Icytzanjo, ¿Jaʼca tzʼel cyicʼana ajke yol ajo bix tuʼn tbaj cybetzʼana aj Sant te Israel? Icytzanjo, ¿Jaʼca cheʼx mala tuʼnj oc tjaw nim cyanmiya? ¿Jaʼca, cucx chajblal xbalan tbanal cyuʼna bix tuʼn tcub cykʼoʼn cyanmiya tuj mitiʼ tajblanan te twitz mundo, tiʼj cykʼinamabla?

54. Icyjo, ¿Cucx cocax cyocslaʼna que mas tbanal juʼn junkiya cywitz txkantl? Icyjo, ¿Cucx cxel cyiʼna tuʼn cyjaw cylajoʼna ajke cyermaniya ntiʼ nchi jaw nim bix nchi bet según aj orden sant te Dios, que tuʼntzanjo oʼ chocx tuj glesya que oʼ chi baj saksan tuʼn Xewbaj Sant bix ntzaj cyyecʼan binchben tbanal te tuʼn tajtz tiʼj cyanma —

55. Icytzanjo, ¿Cucx cbantel cyuʼna tuʼn t-xiʼ cykʼoʼn tzal cyiʼja te meba bix aj il tiʼj te, bix tuʼn tcub cyeʼwana aj cybaʼna cye?

56. Bix twiʼpantzan, cyakilkaya aj cucx tuʼn cytena tuj tnachal, cxel nmaʼna cyeya que akatzanjo chi jawal txʼemat bix chi xel kʼot tuj kʼakʼ oʼcxtzala ka joratx ma tzʼajtz tiʼj cyanma tiʼj tnachal.

57. Bix cyetzana cyakilkaya aj cyajbila tuʼn cyoc lapeʼya tiʼj tyol aj tbanal pastor, jaʼlatzan cxel nmaʼna cyeya: Cyetza cyxol aj nach bix part cycwentan oc cyiba, bix miʼn tzʼoc cymaʼcoʼna aj cycosa mitiʼ tajblanan; pwes lutzan luʼ, aj cybi oc cjawal kʼuchat, tuʼntzan mi toc tajlal aj cybike nach cyxolke cybi aj tbanal, tuʼntzan tel tyol Dios twitz, que chitzan cyjaʼw: Aj cybi nach, mi baj samet tucʼ cye ntanmiya;

58. Tuʼnj aj cybi tbanal cbelax tzʼibat tuj uʼj te ankʼbil; bix cxel nkʼoʼna jun cy-erens ntxlaja. Bix jaʼlatzan, akiya wermaniya, ¿Ti tkal ctzajal cymaʼna contra tiʼj j-ajo? Cxel nkʼamaʼna que ka ma chi yolana contra tiʼj ajo, ntiʼ ajbil tiʼjjo; tuʼnj il tiʼj tuʼn tel tyol Dios twitz.

59. Pwes ¿alcye jun pastor at cyxola que, at nim tneʼl, bix ntiʼ nnoc tcwentan tuʼn mi tul swat bix tuʼn mi cybaj tneʼl tuʼn? Bix lutzan luʼ ka at jun swat ma tzʼocx tmij tneʼl, miʼn tzʼex tlajoʼn tiʼjxa? Oc, bix twiʼpantzan, ka jaʼca cuʼb tbyon, cbantel tuʼn.

60. Bix jaʼlatzan cxel nmaʼna cyeya que aj tbanal pastor ntxocan cyiʼja; bix kaʼma txi cybina tyol, oc chi xel kʼiʼna tuʼn tuj cʼoloj tneʼl bix chocaltzana te tneʼl; bix ntzaj tmaʼn tuʼn mi tocx cycʼamoʼn mijun swat nach cyxola, tuʼntzan mi cykʼuchja.

61. Bix wecyʼtzan jaʼla, Alma, tuj tyol aj ma mandaʼran wiʼja, cxel n-ordenaʼrana tuʼn toc il tiʼj cyuʼna tuʼn cyqueʼyina tiʼj yol maʼ txiʼ nkʼamaʼna cyeya.

62. Nchin yolana cyeya tuj tbeyal mandamyent, akiya teʼc tiʼj glesya; bix nchin txocana cyiʼja akiya mitiʼ teʼc tiʼj glesya, cyjaʼw: Cytzaja bix chi biyana, tzʼajtz tiʼj cyanmiya tiʼj tnachal, tuʼntzan cynebena tiʼj twitz tzeʼ te ankʼbil.