1. Bix banttzan que Alma, aj el ok cyiʼj tmajan rey Noé, o tzʼajtz tiʼj tanma tiʼj twitz til bix tnachal; bix nxiʼtzan tuj ewj cyxol tnam, nkeʼtzan tuʼn tcub tyecʼan ajke tyol Abinadí otak cheʼx tkʼamaʼn;

2. Icytzanjo, o kʼunj tiʼj aj attak ticyʼal, bix ax icyx tiʼj tuʼn cyjaw itzʼj ajke cyimna bix aj colbil cye tnam, que attak tbantal tuʼn tipamal, bix nicyʼca taʼw tuʼn tbaj tapaʼn bix tcamacy Cristo, bix aj tuʼn tjaw itzʼj juntl el, bix aj tuʼn tjax tuj cyaʼj.

3. Bix o xnakʼtzaʼn cyijke o cyajbeʼ tuʼn cybin tiʼj tyol. Bix o cub t-xnakʼtzaʼn tuj ewj cye tuʼn mi tpon tpocbal tuj twiʼ rey. Bix nimke ocx cyocslaʼn tyol.

4. Bix banttzan que jnicyʼcakej ocx cyocslaʼn, ncheʼxaxa tuj jun ligar Mormón tbi, que aj biybaj j-ajo otak tikʼ tiʼj rey, bix aj j-ajo nakaʼyantak taʼ tiʼj mojon te páis, bix at maj, bixmo at tyemp, nnoj cyuʼn nim txcup jawanka.

5. Bix attak tuj Mormón jun aʼ n-ítzʼj jatuma kit t-xiʼ Alma, que nakaʼyan tiʼj j-ajo at jun tal watal pur tal tzeʼke nuch tiʼj, atzan oc t-xiʼ tewan tib kʼijl, tuʼntzan njayonjtz tuʼn rey.

6. Bix banttzan que cyakilkaj aj ocx cyocslaʼn, txuctzan kit cyxiʼ tucʼal bil cyiʼj tyol.

7. Bix despwestzan tel nim kʼij, bant que otak chmet jun matij cyajlal xjal tuj watal te Mormón, te bil tyol Alma. Icytzanjo, cyakilkaj ocx cyocslaʼn tiʼj tyol ateʼtak junx te bilte. Bix cub tyecʼan bix o pacban tiʼj tuʼn tajtz tiʼj cyanma tiʼj tnachal, colbil bix ocslabil tiʼj Kajaw.

8. Bix banttzan que nxiʼ tmaʼn cye: Lutzanke aʼ te Mormón (tuʼntzanj icy ten tbijo); bix cyajbila tuʼn cyoctza cyxol tneʼl Dios bix tuʼn toc cybiya aj tnam te Dios, bix tuʼn cy-onna tuʼn t-xiʼ kʼit aj talal cyikatza tuʼn ten sasj bix jorat.

9. Icytzanjo, bix ka banan cytena tuʼn cy-okʼa cyucʼkaj nchi okʼ; icytzanjo, bix tuʼn cyoc xmoxat ajke il tiʼj xmoxbil cye, bix tuʼn cyoca stiwa tiʼj Dios tuj cyakil tyemp, bix cyiʼj cyakil cosas, bix tuj cyakil ligar nok jaʼx tumal ateʼya, asta oc tul camacy, tuʼntzan cycoleta tuʼn Dios bix tuʼntzan cyoca tajlal cyxolkej tnejal chi jawal itzʼj juntl el, tuʼntzan ten cyankʼbila te junmajx —

10. Cxel nmaʼna cyeya que ka a tajbil cyanmiyajo, ¿Atpala tuʼmal tuʼn mi cybiyana tuj tbi Kajaw, tetzan tuʼn t-xiʼ cymaʼna ax toc te que maʼ bant tiʼj cyuʼna tuʼcʼal tuʼn cyserviʼrana te bix tuʼn tocx cyxoʼna ajke tmandamyent, tuʼntzan ttzaj tkʼoʼn nim t-xew cyibaja?

11. Bix ajtzan t-xiʼ cybiʼn tnam ajke yol ajo, nnoc cypokʼan cykʼab tuʼn tzalajibil bix nchi jaw schʼin: Atzan tajbil kanmiyajo.

12. Tons banttzan que ntzaj kʼiʼn Helam tuʼn Alma, que ajo aj jun tnejal cyxol cyakil, bix ncheʼx bix nchi cuʼx tuj aʼ, bix njaw kʼajt: ¡Aya Kajaw, kʼantza t-xewa tibaj tmajana tuʼntzan tbant aj binchben luʼ tucʼ jun anma sak tiʼj wena!

13. Bix aj t-xiʼtzan baj tkʼamaʼn kej yol ajo, aj t-Xew Kajaw ul tibaj, bix nxiʼ tmaʼn: Helam, que aj tipamal Dios ponan at wucʼala, cbajal nbiyaʼna tetzan ax toc tiʼj aj maʼ bant tiʼj tuʼna tuʼn tserviʼrana te asta oc tcyima, seguntzanj t-xumlala te camacy; bix que aj t-Xew Kajaw tuʼn ttzaj tibaja; bix que tuʼn ttzaj kʼoʼn tankʼbila te junmajx tuʼn aj colbil te Cristo, que ajo o bant ten tuʼn atxax aj tcublen keʼ txʼotxʼ.

14. Bix tbajlenxatzan tkʼamaʼn Alma ajke yol ajo, cycabil Alma tucʼ Helam nchi cuʼcx mulkaʼaj tjakʼ aʼ; bix nchi jaw weʼ bix nchi jatz tuj aʼ tucʼ nim tchi-al, pwes inoj tucʼ Xewbaj.

15. Bix te acʼaj ntikʼ Alma juntl, ncuʼx tcaban el tuj aʼtl, bix nbaj tbiyaʼn icyx tzaʼnj tnejal, oʼcxtzan ntiʼ ajkʼa mulkaʼaj juntl el tjakʼ aʼ.

16. Bix cyjaʼtzan o biyan cyiʼj ajke ipon tuj tal watal te Mormón; bix aj tajlal japan te jun cab syent cyaj anma; icytzanjo, i biyan tuj aʼ te Mormón, bix i noj tucʼ tchjonta te Dios.

17. Bix octzan cybi aj Glesya te Dios, bixmo Glesya te Cristo, atxax tuj tyemp ajo asta jaʼla. Bix banttzan que cyakil aj nbiyanxa tuʼn tipamal Dios, nnocaxa tiʼj glesya.

18. Bix banttzan que Alma, attak tipamal Dios tucʼal, nchoc t-otxʼoʼnke sacerdotes; jun sacerdote tiʼj juʼnjun cincuent xjal oc t-otxʼoʼnkʼa, tuʼn cypacban bix tuʼn cyyecʼan cyiʼjke cosas te Dios.

19. Bix xiʼ tmaʼn tuʼn mi tcub cyxnakʼtzaʼn jun tiʼ tkal mas, oʼcx aj tekʼa aj otak cub t-xnakʼtzaʼnkʼa, bix aj otak tzaj cytxʼolbanke profetas sant tuʼn cytziʼ.

20. Icytzanjo, xiʼ tmaʼn tuʼn mi tcub cyyecʼan más, oʼcx aj tuʼn tajtz tiʼj cyanma tiʼj tnachal bix ocslabil tiʼj Kajaw, que otak colet tnam tuʼn.

21. Bix xiʼ tmaʼn tuʼn mi ten moybil cyxol, sino tuʼn t-xiʼ cykʼoʼn cywitz tuj tligaral tucʼ junx tnabil, tucʼ jun ocslabil bix jun biyabil, bix tuʼn ten cyanma junx bix tucʼ tchi-al tiʼj jun bix juntl.

22. Cyjaʼtzan xiʼ tmaʼn tuʼn cypacban. Bix cyjaʼtzan i oc te tcʼwaʼl Dios.

23. Bix xiʼ tmaʼn tuʼn ten cynabil tiʼj kʼij sábado bix tuʼn tcub cykʼon tuʼn toc sant cyuʼn; bix que cyakil kʼij tuʼn t-xiʼ cykʼoʼn chjonta te Kajaw cyDios.

24. Bix ax xi tmaʼn cye ajke sacerdotes, ajke otak choc t-otxʼoʼn, tuʼn cyakʼnan tuʼn cyex cykʼab tuʼn cyankʼin.

25. Bix jawtzan sicʼet jun kʼij tuj juʼn saman jatuma tuʼn toc cychmon cyib tuʼn tcub yecʼat cye tnam bix tuʼn cynan Dios twitz Kajaw cyDios, bix ax tuʼn toc cychmon cyib nok jteʼ elx tuʼn tbant cyuʼn.

26. Bix ajke Sacerdotes ntiʼ tuʼn toc keʼ cycʼuʼj cyiʼj tnam tuʼn cyankʼin; sin nok tuʼn cybinchben tuʼn tcyikʼ chjonta te Dios, tuʼntzan tcyikʼ cyipan tuj Xewbaj, bix attzan aj tuʼn tel cynicyʼ tiʼj Dios, tuʼntzan cyxnakʼtzan tucʼ tipamal Dios.

27. Bix txkantl, xiʼ tmaʼn Alma cye tnam te glesya tuʼn tcyakʼ cybaʼn, teylax te juʼn según aj ntcamba bixmo aj at; ka at nimxax, il tiʼj tuʼn takʼax nimxax; bixka niʼxa te at ax niʼxa tuʼn tel peyat te; bix alcyej ntiʼ te, iltzan tiʼj tuʼn t-xi kʼot te.

28. Bix cyjaʼtzan tuʼn tcyakʼ tiʼj cybaʼn, tiʼj cyex bix cyakil cybʼan cycʼuʼj bix tuʼn cyakil cy-ajbil tiʼj Dios, cyeke sacerdotes aj at nim til cye; icytzanjo, bix cyeke cyakil xjal tzʼliʼnc cyiʼj bix nim til xbalan bix nebebil cye.

29. Bix atzan jluʼ tkʼamanta cye, tuʼnj otak tzaj tmaʼn Dios te; bix i eʼx bet jikan tiʼj Dios, que i onan jun tiʼj juntl tuj xumlalbaj bix xewbaj, según aj il tiʼj cye bix aj cyajbil.

30. Bix banttzan que cyakil j-ajo bant ma tuj Mormón, icytzanjo, ttxlaj aʼ te Mormón, tuj watal nakaʼyan tiʼj aʼ te Mormón; icytzanjo, aj watal te Mormón, aj aʼ te Mormón, aj watal te Mormón. ¡Cyeʼyax eʼla tuj cywitzke aj ipon tuʼn tel cynicyʼ tiʼj colal cyiʼj; icytzanjo, bix cyeʼyaxkajo, tuʼnj chi bitzal tiʼj tchi-al tiʼj tchi-al te junmajx!

31. Bix i bantke cosas ajo nakaʼyan tiʼj mojon te país, tuʼntzan mi tpon tuj twiʼ rey.

32. Mas lutzan luʼ, banttzan que aj rey, el tnicyʼ tiʼj jun movimiento at cyxol tnam, nxiʼ tsamaʼnke tmajan cwental. Cyjaʼtzan jluʼ aj kʼij matak nnoc cychmon cyib tuʼn cybin tiʼj tyol Kajaw, nxiʼ kʼaʼcj cypocbal tucʼ rey.

33. Bix xiʼ tmaʼn rey que tuʼn Alma nchaw lipan tnam tiʼj rey; cyjaʼtzun xi tsaman ke tsoldad tuʼn cycub baj kʼuchat.

34. Bix bajtzan que Alma bixke tnam te Kajaw el cynicyʼ tiʼj que at tponal ejército te rey; cyjaʼtzan jluʼ, njaw cyiʼn tal cyja bix cyfamilya, ncheʼx tuj desyerto.

35. Bix attak cyajlal bala jun cuatro-cient tucʼ cincuent anma.