1. Bix banttzan que aj tbajlen yolan Abinadí, nxiʼ tkʼamaʼn rey cye sacerdotes tuʼn t-xiʼ cyiʼn bix tuʼn tel cyiʼn tankʼbil.

2. Per attak cyxol jun Alma tbi, ax elna let tiʼj Nefi. Bix cuʼxantak, bix ocx tocslaʼn ajke yol xiʼ tkʼamaʼn Abinadí, tuʼnj loʼntak tuʼn aj tnachal otak txiʼ ttxʼolbaʼn Abinadí, cyiʼj; cyjaʼtzan jluʼ, nkeʼ tuʼn tyolan tucʼ rey tiʼj tuʼn mi tjaw kʼoj tucʼ Abinadí, sino que tuʼn t-xi ttzakpiʼn tucʼ cheba.

3. Pero njaw kʼojl mastl rey wena, bix nxiʼ tmaʼn tuʼn tex lajon Alma cyxol, bix i eʼx tsamaʼn tmajan tiʼj tuʼn tcub biyoʼn.

4. Atzan te nnel ok cyiʼj, bix nxiʼ tewan tib, mitiʼ canet cyuʼn. Ix atzanj t-xiʼ tewan tib nim kʼij, ncub ttzʼiban cyakilkaj yol otak baj tkʼamaʼn Abinadí.

5. Bix banttzan que nxiʼ tsamaʼn rey ajke tguarda tuʼn cyxiʼ txole, tiʼjla Abinadí bix tzyettzan cyuʼn; bix cub cycʼaloʼn bix ocx cykʼoʼn txe tzeʼ.

6. Bix telxatzan ox kʼij, otaktzan tcʼam ocsabil cye sacerdotes, xiʼ tmaʼn rey tuʼn ttzaj kʼiʼn juntl el twitz.

7. Bix nxiʼ tmaʼn te: Abinadí, at nim tila kuʼcʼla, bix ilx tiʼj tuʼn tcyima.

8. Tuʼnj oʼ tkʼamantiya que ax Dios tzul cyxol cycʼwaʼl xjal; bix tuʼntzanj j-ajo cʼelal twiʼya oʼcxtzala ka ma tzʼajs tanmiya tiʼj tyola tuʼnj o txiʼ tsʼamaʼna tnachal wiʼja bix ntanmiya.

9. Tons nxiʼ ttzakʼweʼn Abinadí: Cxel nmaʼna teya que milay tzʼajtz wanmya tiʼj nyola oʼ txiʼ nmaʼna teya tiʼj tnam luʼ, tuʼnj ax toclenjo; bix tuʼntzan tel tnicyʼa tiʼj que ax toclen, maʼ nkiya tuʼn ncub tzʼaka tuj cykʼaba.

10. Icytzanjo, bix chin apala asta oc ncyima, pero nlay tzʼajs wanmya tiʼj nyola; bix atzanjo jun stiwa myaʼ baʼn cyiʼja. Bix ka ma chin cub cybiyoʼna ccbel chicyʼel mintiʼ tnachal bix j-ajo ax cyjel te stiwa myaʼ baʼn cyiʼja tuj twiʼpan kʼij.

11. Bix aj rey Noé cyjaʼtak t-xi ttzakpiʼn, tuʼnj tzaj tchi tyol tiʼj; icytzanjo, tzaj tchi tiʼj aj t-xtis Dios tuʼn tcub tzʼak tibaj.

12. Nok atzan cye sacerdotes nxiʼ cykʼamaʼn cyyol myaʼbaʼn tiʼj Abinadí, Bix nkeʼ tuʼn tbant nicʼaj yol tiʼj, cyjaʼw: Maʼ txiʼ tkʼamaʼn tnachal te rey. Cyjaʼtzan ten jluʼ, nnoj rey tucʼ nim tkʼoj tiʼj, bix nxiʼ tkʼoʼn tuʼn tcub biyoʼn.

13. Bix banttzan que nxiʼ kʼiʼn bix nbaj cʼaloʼn; bix nbaj patan t-xumlal tuʼn tkan kʼakʼ, icytzanjo, asta taj tcyim.

14. Bix tajtzan tkeʼ tuʼn ttzʼeʼy tuʼn tkʼakʼal kʼaʼjo, nxiʼ tmaʼn cyeʼ cyjaʼw:

15. Lutzan luʼ, tzanxax maʼ bant cybinchbena wiʼja icyjo, ax icyxtzan cbajel tiʼj cycʼwaʼla nimka chi apal taʼw camacy tuj kʼakʼ; bix j-ajo tuʼn aj cyocslabil tiʼj colbil te Kajaw aj cyDios.

16. Bix cbantel que akiya chi apalte cyakilka wik yabil, nok tuʼn tlaj nim cyila.

17. Icytzanjo, bix oc chocal biyoʼna cyuj cyakil part; bix chelatz lajoʼna bix chi xel sipana tuj part, lonxa icytzan jun cʼoloj wacẍ junmajx nachka lajoʼnka cyuʼn txcup.

18. Bix tuj kʼij ajo, oc chi bela, bix oc chi bel tzʼaka tuj cykʼab cyajkʼoja; tons octzan chi apala, lonxa icytzan wecy, nchin apana, aj taʼw camacy tuʼn kʼakʼ.

19. Cyjaʼtzan nbant mojtzbil tuʼn Dios cyibajke nchi kʼuchan tiʼj ttanma. ¡Aya Dios, kʼinxa wanmiya!

20. Bix tajstzan tbaj tkʼamaʼn Abinadí kej yol ajo, ncub tzʼak, otak taʼpanta camacy tuʼn kʼakʼ; icytzanjo, ocyim tuʼnj ntiʼ cub teʼwanke tmandamyent Dios, bix cyaj t-otxʼoʼn aj ax toc tuʼn tcamacy.