1. Bix tajtzan tbaj tyoʼlan rey Benjamín ajke yol otak chi tzaj kʼamaʼn te tuʼn angel te Kajaw, bajtzan que nxiʼ tqueʼyn cyligaral xjal, bix lutzan luʼ otak chi cub tzʼak twitz txʼotxʼ tuʼnj otak choc etzan tuʼn tipamal Kajaw.

2. Bix otak tzaj becyʼbilinx cycʼuʼj cyiʼj cyil cyibx, tuj tuʼmal cychibajal, bix niʼcʼx tiʼj tpuʼjal txʼotxʼ. Bix cyakilka junx i jaw schʼin cyjaʼw: ¡Ay, tenx txtalbila kiʼja, bix i tel aj tchicyʼel Cristo te chojbil, tuʼntzan tkikʼ najsbil cyiʼj twitz kila bix tuʼn cytxʼajet kanmiya; tuʼn ocslaʼn kuʼn Jesucristo, aj tCʼwaʼl Dios, aj oʼ bant cyaʼj tuʼn, txʼotxʼ bix cyakilkaj cosas; que tzul cyxol cycʼwaʼl xjal!

3. Bix banttzan que tbajlenxa kʼamaʼn kej yol ajo, aj t-Xew Kajaw tzaj cyibaj cyakil, bix i noj tuʼn tzalajibil, tuʼnj otak cyikʼ najsbil tiʼj twitz cyil, bix ya txulch cynabil tuʼn tlaj aj cyocslabil matij tiʼj Jesucristo que tzultak, según ajke yol otak kʼunjs tuʼn rey Benjamín.

4. Bix aj rey Benjamín njaket juntl el ttziʼ nnoc tentl yolal, nxiʼ tmaʼn cyjaʼw: Ke wamiwaya bix wermaniya, familya bix tnam cyakil, wajbila tuʼn ttzaj cykʼoʼn juntl el cynabila, tuʼn t-xiʼ cybiʼna bix tuʼn tel cynicyʼa cyiʼj cabtl ni nyola atx wajbila tuʼn t-xiʼ nmaʼna.

5. Tuʼnj lutzan luʼ, ka aj tnabil Dios maʼ jaw itzʼj cyucʼala que aj ximbitz tiʼj mitiʼ ti tkal koʼ bix aj kuʼmal ntiʼ til bix tzʼaknaj—

6. Cxel nmaʼna que ka maʼ cycʼama aj tnabil Dios baʼn, bix tiʼj tipamal matij, bix aj nim baʼn tuʼn, pasens cuxiʼ cyiʼj cycʼwaʼl xjal; bix ax icyx aj chojbil aj oʼ bant ten atxax tcublenkeʼ twitz txʼotxʼ, tuʼntzan tcanan tiʼj colbil aj at tocslabil tiʼj Kajaw bix tbanal tuʼn cyxiʼ cʼuʼtke tmandamyent, bix cucx tbanal tuj ocslabil asta oc tel baj twiʼ tankʼbil, waja tuʼn t-xi nmaʼna que aj ankʼbil te xumlalbaj —

7. Cxel nmaʼna que atzan xjal aj ctikʼal colbil, bix chojbil aj banan ten atxax aj tcub keʼ twitz txʼotxʼ cye cyakil xjal aj oʼ chi ankʼin atxax aj tcublen tzʼak Adán, bixmo aj at jaʼla, bixmo aj jtojx tuʼn ten asta oc ticyʼ twitz txʼotx.

8. Bix atzan tuʼmal aj tzaʼn tuʼn tul colbil. Bix mitiʼ juntl colbil part tiʼj jluʼ aj oʼ yolj; mix txkantl tuʼmal aj tzaʼn tuʼn cycolet xjal, sino que oʼcx aj maʼ cheʼx nmaʼna.

9. Cyocslaʼn ocxa Dios; Cyocslaʼn ocxa tiʼj que at, bix i bant cyakil cosas tuʼn tzanxax tuj cyaʼj bix tzanxax twitz txʼotxʼ; cyocslʼan ocxa que at cyakil baʼn tuʼn bix cyakil tipamal, tzanx tuj cyaʼj bix tzanx twitz txʼotxʼ; cyocslaʼn ocxa que ajke xjal milay tzʼel cynicyʼ cyiʼjke cyakil cosas aj baʼn tuʼn Kajaw.

10. Bix icxju, cocax cyocslaʼna que ilx tiʼj tuʼn tajs cyanma tiʼj twitz cyila bix tuʼn tcyaj cycoʼlana, bix tuʼn tcub cybecyʼbiliʼn cywitza twitz Dios, tuʼn t-xiʼ cykaʼnna tuʼn cyakil cycʼuʼja tuʼn cytzaj najsaʼna tuʼn; bix ka ma tzʼocx cyocslaʼna cyakilkaj cosas ajo, il tiʼj tuʼn cybant cyuʼna.

11. Bix juntl el cxel nmaʼna cyeya, ax aj xiʼ nmaʼna tnejal, icy taj otak chi canna tiʼj tuʼn tel cynicyʼa tiʼj tnabil Dios tuj tchi-al, bixmo otak tzʼel cynicyʼa tiʼj t-xtalbil, bix otak txiʼ cynebeʼna tchi-al bix otak cycʼama najsbil tiʼj twitz cyila, que ntkʼoʼn jun matij tchi-al tuj cyanmiya, cyjaʼtzan wajbila que baʼnwt tuʼn t-xiʼ cycujlaʼcja bix tuʼn ten tuj cyximbitza aj tmatijal Dios, bix aj miyaʼ tbanal akeʼya twitz Dios, bix aj t-xtalbil bix tpasens cyiʼja miyaʼ baʼn xjal akeʼya bix cbel cybecyʼbiliʼn cywitza tuʼn aj más t-xe ban becyʼbil, oc txiʼ lakʼeʼ tiʼj tbi Kajaw cyakil kʼij, bix tuʼn cytena tuj ocslabil tiʼj cyjaʼ ttzaj, aj o kʼunj tuʼn ttziʼ angel.

12. Bix lutzan luʼ, cxel nmaʼna que kama bant tuʼna j-ajo, ocx ctel t-chi-al tucʼala, oc chocal cyqueʼyiʼna nojnakaya tuʼn tchi-al Dios bix ocxax ctel najsbil tiʼj twitz cyila; bix oc cchʼiyal cynabila tiʼj tzalajibil aj aluʼnj ẍi tzaj kʼona tuʼn, bix cynabila tiʼj aj ax toc tuj xtis taʼ bix baʼn.

13. Bix ntiʼ cyajbila tiʼj tuʼn toc cykʼona tnachal tiʼj jun bix juntl, sino nok tuʼn cyankʼina tuj tzalajibil bix tuʼn t-xiʼ kʼot te juʼn según alcyej te.

14. Mix tuʼn cykiya tuʼn cybet cycʼwaʼla n-el cycʼuʼj bixmo tzʼliʼnc cyij, bix mix tuʼn tcub cyiʼn tmij tley Dios, mix tuʼn tbant tnachal bix mix tuʼn cykʼojla tiʼj jun bix juntl bixmo tuʼn cyajben te dyablo, que a xnakʼtzaljo tiʼj twitz il, bixmo aj xewbaj nach al iʼj maʼ chi yolan kman, atzan aj ajkʼoj tiʼj cyakilca xtis.

15. Bix cbel cyxnakʼtzaʼna tuʼn cybet tuj be ax toc baʼn bix tbanal; cbel cyxnakʼtzaʼna tuʼn toc cycʼujlan cyib bix tuʼn cy-onan jun tiʼj juntl.

16. Bix txkantl, axkiya chi onal cyiʼj ajke at il tiʼj cye; cxel cykʼoʼna cybaʼna cye aj at il tiʼj cye; bix miʼn cykiya aj moʼl ctzajal kaʼnan cyeya tuʼn nokgana, bix miʼn tzʼex cykʼoʼna tiʼjxa, bixmo tuʼn tex cykoʼna tuʼn tcyim.

17. Bala cxel tmaʼna: Oʼ tzaj tiʼn xinak tibaj aj mebayil; cyjaʼtzan jluʼ oc cweʼbil nkʼaba bix miʼn txiʼ nkʼoʼn nsicʼa te, mix tuʼn t-xiʼ nkʼona tuʼn tmojan tiʼj aj nsicʼa tuʼntzan mi tcyim, tuʼnj ax toc aj tsentens.

18. Bix ¡aya xinak! cxel nkʼamaʼna teya que alcyej ma bant tuʼn j-ajo, il tiʼj tuʼn tajs tanma tiʼj tnachal; banwtla min tzʼajtz tiʼj tanma aj otak bant tuʼn, oc cnajal te junmajx bix mitiʼ tocax tuj tkʼuʼbil Dios.

19. Pwes lutzan luʼ ¿miyaʼ kcyakil koʼ moʼl? ¿Mipala yaʼ kʼukl kcʼuʼj tiʼj junx xjal, icyjo, tiʼj Dios, tiʼj cyakil kkʼinimabl at; tiʼj ksicʼ bix kxbalan; tiʼj pwak nim twiʼ, plata bix nicyʼca wikal kkʼinamabil at?

20. Bix lutzan luʼ, biʼx jaʼla ma cytxoca tuj tbi, tuʼn cymejluna twitz tiʼj najsbil te twitz cyila, ¿Maʼpala tkiy aj xiʼ cykaʼnna nok gana? Ntiʼ, maʼ tzaj tkʼoʼn t-xew cyibaja, bix ma bant tuʼn tchi-al bix ma maket cytziʼya tuʼn milay tbant cykʼamana tiʼj que matijxax jun cytzalajibila wena.

21. Bix jaʼlatzan, ka Dios, oʼ chi tzaj kʼoʼna tuʼn bix al iʼj kʼukl cycʼuʼja tiʼj cyankʼibila bix tiʼj cyakilca aj at cyeya bix cyxiʼlena, oc ctzajal tkʼoʼn nok nicyʼpunx cosa ax toc aj cxel cykaʼnna te tuʼn cyakil ocslabil, bix ocslaʼn cyuʼna tzul kʼoʼn, ¡Ay tzaʼn xix tuʼn t-xiʼ cysipana te jun bix juntl cybaʼna!

22. Bix ka ma tzʼoc tuj xtis cyuʼna aj xjal ctzajal kanan te cysicʼa tuʼntzan mi tnaj, bix ma cuʼb cysentensana, saber nicypun aj cysentensa tuʼnj otak cub cyxcʼaʼyan cysicʼa, que miyaʼ cyeyajo sino te Dios, al ej ax ten cyankʼbila; bix tuʼntzan cyakilxajo, ka mi jun kanbil tuʼn tbant cyuʼna, mix tuʼn cyjaw jolpaja tiʼj tnachal otak bant cyuʼna.

23. Cxel nmaʼna cyeya: ¡Becybil twitzj xinak ajo, tuʼnj aj tsicʼ cnajaljo tucʼax ajun! Bix cxel nmaʼna kej cosas ajo cyekej kʼinan aj teʼ cyuj cosas twitz txʼotxʼ tzluʼ.

24. Bix txkantl, cxel nmaʼna cyekej meba, akiya ntiʼ cyeʼ pero at te tuʼn ticyʼ juntl kʼij, aka ncheʼx nkʼamaʼna ajka ntiʼ nxiʼ cykʼoʼna cye moʼl tuʼnj ntiʼ cyeʼ; wajbila tuʼn t-xi cykʼamaʼna tuj cyanmiya: miʼn txiʼnkʼoʼna tuʼnj ntiʼ wecyʼ, nokattzaʼn at jaʼctla txiʼ nkʼoʼna.

25. Ka ma txiʼ cykʼamaʼna j-ajo tuj cyanmiya, oc chi cyjela ntiʼ cypaja; tuj juntl tuʼmal, sentensankiya; bix aj cysentensa ax toc, pwes cyajbila tiʼj aj ntiʼ otak cycʼama.

26. Bix jaʼlatzan, aj ncʼujlabla cyiʼj cosas maʼ cheʼx nkʼamaʼna cyeya, bixmo, aj ncʼuʼja tiʼj tuʼn tenx aj najsbil tiʼj twitz cyila tuj juʼn kʼij, tuʼntzan cybeta tuj mijun tnachal twitz Dios, wajbila tiʼj cynebebila tuʼn t-xiʼ cykʼoʼna te meba, teylax te juʼn según aj tiʼ tkal at, icyxtzanj tuʼn tcʼachat aj n-el tcʼuʼj, tuʼn toc kʼot t-xbalan aj tzʼliʼnc tiʼj, tuʼn t-xiʼ lolta aj jun yaʼb, tuʼn toc il tiʼj tuʼn tbant, tzanxax tuj xewbaj bix tuj xumlal te chibajal, ax aj il tiʼj te.

27. Bix cyqueʼyinxa tiʼj tuʼn cybant cyakilkaj cosas ajo cyuʼna tuj tbanal bix tuj tuʼmal; tuʼnj miyaʼ kiyoʼn tuʼn tkelan jun mas twitz tipamal aj jaʼca bant. Bix txkantl, il tiʼj t-ten tcwenta tiʼj, tuʼntzan tcamban tiʼj tcotza; cyjaʼtzan jluʼ, cyakilka cosas ilx tiʼj tuʼn cybant tuj tuʼmal.

28. Bix wajbila tuʼn t-xiʼ cycʼujlaʼcja que alcyej jun cyxola ma kanan tmajan tucʼ tbecin, tuʼn taʼjal tkʼoʼntl ax tzaʼn aj otak cyaj ttziʼyan; pwes yatzan jun tuʼmal nach, cbantel twitz il cyuʼna, bix bala cbantel twitz il tuʼn cybecina.

29. Bix twiʼpantzan, milay bant tuʼn t-xiʼ nmaʼna cyeya cyakilkaj cosas al iʼj jaʼca bant tuʼn tbant twitz il cyuʼna; tuʼnj at nim tuʼmal, nimke que milay chi baj wajlaʼna.

30. Per jluʼ jaʼca txiʼ nmaʼna, que ka mi tzʼoc cycwenta cyiba, aj cyximbitza, cyyola bix cybinchbena, bix ka mi ma cub cykʼoʼn cynabila cyiʼj tmandamyent Dios bix mi ma chi tena tbanal tuj ocslabil tiʼj otak cybiya tiʼj aj tuʼn tul Kajaw, banwtla maxa oc tel baj twiʼ cyankʼbila, oc chi najalxa. Bix jaʼlatzan ¡aya xinak! cʼujlanxa tuʼntzan mi tnaja.