1. Bix banttzan que aj tbajlen yolan rey Benjamín cyucʼke tnam, xiʼ tsamaʼn cyxolke, tuʼntzan tel tnicyʼ tiʼj ka ax toc ocslaʼn cyuʼn aj tyol otak cheʼx tman.

2. Bix cyakilka i jaw schʼin tucʼ junx cywiʼ, cyjaʼw: icytzanjo, ocslaʼn kuʼna tzaʼnx cytenca yol maʼ chi tzaj tyoʼlana kecyʼ; bix icxtlju, loʼn kuʼna que ax toc tuʼnj aj t-xew Kajaw ponan maʼ bant tuʼn jun matij meltzʼubil kiʼja tuj kanmiya, ya ntiʼtl más kajbila tiʼj tuʼn tbant tnachal kuʼna, nok tuʼn tbant tbanal kuʼna.

3. Bix ax icyx kecyʼ kil kibxa, tuʼn aj xtalbil miban tyolanjtz te Dios bix aj ntzaj tyecʼan t-Xew kecyʼ, atke matij tiblal nkila tiʼj aj nikaʼ taʼ tuʼn tul; bixka ilwtla tiʼj, jaʼca bant tuʼn cyxiʼ kmaʼn jun tyempca cyiʼj cyakil cosas ajo.

4. Bix a ocslabiljo maʼ cub kkʼoʼna cyiʼj cosas maʼ tzaj tmaʼn krey, que ajo maʼ camban tiʼj nabil ajo, que tiʼjjo cyeʼyax toʼ tuj jun matij tzalajibil wena.

5. Bix kajbila tuʼn tbant tziybil tucʼ Kman Dios tuʼn kela twitz aj tajbil bix tuʼn cyocx kxoʼna ajke tmandamyent cyiʼj cyakil cosas ntzaj tkʼamaʼn kecyʼ, cyakil aj cytxaban kkʼija, tuʼn mi ttzaj kiʼna kibaja jun tnachal wena que miʼn baj, icytzanj maʼ baj tkʼamaʼn ángel, bix tuʼn mi tkikʼaya aj tkʼoj Dios.

6. Bix atzanjo o tajbeʼ rey Benjamín cyiʼj; cyjaʼtzan jluʼ, nxiʼ tmaʼntl cye: Maʼ tzaj cytxʼolbaʼna ajke yol wajbila; bix aj tziybil maʼ bant cyuʼna ajo jun tziybil ax toc wena.

7. Pwes jaʼlatzan, tuʼntzan tlaj aj tziybil maʼ bant cyuʼna, cocal cybiya te tcʼwaʼl Cristo, cʼwaʼlbaj xinak bix xuʼj tekʼa, tuʼnj lutzan luʼ, que jaʼla cʼwaʼlbajkiya xewbaj te; pwes maʼ cykʼamantiya que maʼ meltzʼaj cyanmiya tuʼn ocslabil tiʼj tbi; cyjaʼtzan jluʼ, maʼ chi itzʼja tiʼj bix maʼ choca te tcʼwaʼl xinak bix xuʼj.

8. Bix tujtzanj cybiya ajo oc chi coletala, bix mitiʼtl juntl cybiya al uʼnj jaʼca chi coleta. Ntiʼ juntl tbi maʼ txiʼ kʼot al iʼj tzul colbil; cyjaʼtzan jluʼ wajbila tuʼn cycʼama cyibaja aj tbi Cristo; cyakilkaya aj maʼ bant tziybil cyuʼna tucʼ Dios tuʼn tocx cyxoʼna ocxa tjapan baj twiʼ cyankʼbila.

9. Bix cbajeltzan, que alcyej ma bant tuʼn j-ajo, oc ctel ttxlaj Dios, tuʼn loʼn tuʼn aj tbi kʼiʼn; pwes kʼiʼn tbi Cristo tuʼn.

10. Bix cbanteltzan, que alcyej ntiʼ ma tcʼam tibaj aj tbi Cristo, oc cxel tiʼn juntl tiʼx tkal bibaj tibaj; cyjaʼtzan jluʼ, oc ctel tuj t-ẍnayj Dios.

11. Bix ax wajbila tuʼn t-xiʼ cycʼujlaʼna que atzan biybajjo aj maʼ txiʼ ntxʼolbaʼna que cxel nkʼoʼna, que ajo mi jtoj tuʼn tkʼuchj, sino que oʼcx tuʼn tcub kʼit tmij tley Dios; cyjaʼtzan jluʼ tenx cywenta tuʼn mi tcub cyiʼna tmij tley Dios; tuʼntzan mi tkʼuchj biybaj jluʼ tuj cyanmiya.

12. Cxel nmaʼna cyeya: Wajbila tuʼn t-xiʼ cycʼujlaʼna junmajx tuʼn t-xiʼ cytzʼibana aj biybaj j-ajo tuj cyanmiya tuʼntzan mi cytena tuj t-ẍnayj Dios, sino que cybinxa bix tzʼelx cynicyʼa tiʼj twiʼ al uʼnj chi txaquetala, bix aj biybaj al iʼj ctxocalkʼa.

13. Tuʼntzanj ¿tzaʼn tuʼn tel tnicyʼ jun xjal tiʼj patron aj naʼx takʼnan tucʼal, que ajo jun mi loʼn twitz tuʼn, que lekʼch taʼjo tiʼj t-ximbitz bix tnabil tanma?

14. Bix icxtlju, ¿ncʼamoʼne jun xjal jun aẍna te tbecin, bix nxiʼ tcuentan? Cxel nmaʼna cyeya que miʼn, mixpala tuʼn tkiy tuʼn twaʼn cyucʼke tneʼl, sino que oc cʼelax tlajoʼn tiʼjxa. Cxel nmaʼna icytzan chocala ka ntiʼ loʼn cyuʼna aj biybaj al iʼj chi txaquetala.

15. Cyjaʼtzan jluʼ, wajbila tuʼn tcub cywaban cyiba bix tuʼn mi cyyucẍa, bix tuʼntzan tbant nim binchben tbanal cyuʼna, tuʼntzan Cristo, aj Kajaw Dios Ponan, baʼn tuʼn cyoc etzana tuʼn que tekʼa aj akiya, baʼntzan tuʼn cyxiʼ kʼiʼna tuj cyaʼj, bix jaʼca chi cambana tiʼj colbil miʼn baj bix ankʼbil te junmajx tuʼn aj nim baʼn tuʼn, aj tipamal, xtis bix xtalbil te aj binchal cyeke cosas cyakil twitz txʼotxʼ bix tuj cyaʼj, que a Dios tibaj cyakil. Icytzan tenjo.