1. Pwes baʼntzan, attak tuj ley te Mosíah que cyakilkaj aj tuʼn cyoc te jwes, bixmo ajkaj oc cyoc otxʼoʼn te jwes, tuʼn tcyikʼ twiʼ cycʼuʼj según aj tyemp tuʼn cyjusgaʼran cyibajke aj oc cyxiʼ kʼiʼn cywitz tuʼn cyjusgaʼrat.

2. Bixka aj jun xinak ikal cʼas tucʼ juntl, bix ntiʼ tuʼn tkiy tuʼn tchojan tiʼj cʼas, kittzan t-xiʼ kʼot tpocbal te jwes; bix nnakʼnantzan tuj te tipamal bix ncheʼx tsamaʼn oficiales tuʼn cyxiʼ kʼil te cʼasol tuʼn tpon twitz, tuʼntzan toc tuj xtis según aj ley bix aj otak kʼunj contra tiʼj, bix cyjaʼtzan ya iltak taʼ tiʼj tuʼn taj tchjoʼn aj cʼasbeʼnan tuʼn, bixmo kit xoʼt cyxol xjal tuʼnj alekʼjo.

3. Bix kittzan tikʼ jwes chojbil te tiʼj según ttyemp: jun senine te oro tuj jun kʼij, bixmo jun senum te plata que ax tbalor icytzan jun senine te oro; bix atzanjo según aj ley otak txiʼ kʼot.

4. Bix atzan cybi tiʼx wikal cypwak te oro bix plata, según tbalor, atzan tbijo oc toc cykʼoʼnke nefitas, tuʼnj miyaʼ junxtak chi ajlan icytzanke judíos aj nchi ankʼintak tuj Jerusalén; bix miyaʼ cymalbiljo icytzan cye, sino que otak tzacj cye tuʼmal tuʼn cyajlan bix tuʼn cymalon, según aj cyban cʼuʼj tnam tuj juʼn puk ankʼbil, asta tuj gobierno cye jweses aj cyaj bant tuʼn rey Mosíah.

5. Lutzan lu, aj tuʼmal tuʼn cykʼin tajlal: jun senine te oro, jun seón te oro, jun shum te oro bix jun limna te oro:

6. Jun senum te plata, jun amnor te plata, jun ezrom te plata bix jun ontí te plata:

7. Jun senum te plata ax tbalor icytzan jun senine te oro, bix aj jun bixmo juntl ax tbalor icytzan jun maʼl cebada bixmo juntl wik awal xtul twitz.

8. Bix aj tbalor jun seón te oro ajo juntl el más tbalor twitz jun senine.

9. Bix aj tbalor jun shum te oro ajo juntl él más tbalor twitz jun seón.

10. Bix jun limna de oro ajo ax tbalor icytzankaj cyakilxa.

11. Bix aj tbalor jun amnor te plata atzan tbalor caʼba senumes tiʼj.

12. Bix jun ezrom te plata tbalor cyaja senumes.

13. Bix jun ontí ax tbalor icytzan cyakilxa.

14. Bix atzan luʼ tbalor cypwak nuchkejo:

15. Jun shiblón atzanjo jun mij tiʼj jun senum; cyjaʼtzan jluʼ, jun shiblón atzan tbalor mij maʼlx cebada;

16. Bix jun shiblum atzan jun mijjo tiʼj jun shiblón;

17. Bix jun léah atzan jun mijjo tiʼj jun shiblum;

18. Atzanjo, aj tuʼmal tuʼn cytantyaʼranjo.

19. Bix jun antión te oro atzan tbalor oxa shiblones.

20. Jaʼlatzan, aj tuʼmal junx atzan tuʼn tajblanan te cye cyjunalx, pwers kittzan cychjet según cyakʼan; cyjaʼtzan jluʼ, kit tbant tnachal cyuʼn bix nicyʼca ttzacaj cyxol tnam tuʼntzan ten nim cyakʼuntl bix tuʼntzan ten más cypwaktl, según aj kanbil oc tpon kʼaʼcj cywitz; cyjaʼtzan jluʼ, kit t-xiʼ cykʼoʼn tuʼn cyjaw kʼojl tnam tiʼj Alma bix Amulek.

21. Bix aj Zeezrom nkeʼ tuʼn tel tkaʼnan te Amulek, cyjaʼw: ¿Cajatz ttzakʼweʼna ajke juʼn nkanbila wajbila tzʼel nkaʼnna teya? Bix aj Zeezrom ajo tmajan dyablo tuʼntzan tkʼuchat aj tbanal; que chitzan te Amulek: ¿Cajatz ttzakʼweʼna ajke kanbil cxel nkaʼnna teya?

22. Bix nxiʼtzan tmaʼn Amulek te: Oc, oc ka ax tuʼmal tucʼ t-Xew Kajaw aj at wucʼala; tuʼnj mitiʼ ti tkal tuʼn t-xiʼ nmaʼna ka contra tiʼj t-Xew Kajaw. Bix nxiʼtzan tmaʼn Zeezrom te: luke luʼ kak ontíes te plata; cxel nkʼoʼna teya ka ma cub teʼwana que at jun Xjal Más Matij.

23. Bix nxiʼtzan ttzakʼweʼn Amulek: ¡Aya tcʼwaʼl infierno! ¿Ti kuʼn nchin noc tyoʼna? ¿Ntiʼ loʼn tuʼna que ajke tbanal eteʼ tuj xtis nlay cha cub tuj moybil?

24. ¿Ocslaʼn tuʼna que ntiʼ Dios? Cxel nmaʼna que miʼn. Loʼn tuʼna que at jun Dios, per at más tcʼuʼja tiʼj tpwaka que twitzkʼa.

25. Bix maʼ chin cub tslaʼjana twitz Dios. Ma tzaj tmaʼna wecyʼ: Lutzan luʼ, cxel nkʼoʼna teya ajke kak ontíes que matij tbalorjo, cwando tuj tanmiya attak tnabila tuʼn mi ttzaj tkʼona; bix oʼcx tajbila tuʼn tcub weʼwana aj ax toc Dios nankʼin bix cyjaʼtzan at tuʼmal tuʼn ncub tkʼuchana. Más lutzan luʼ que tuʼnj aj matij tnachal j-ajo ctikʼal chojbil teya.

26. Bix nxiʼtzan tmaʼn Zeezrom te: ¿Chitzan teʼ que at jun Dios ax toc bix n-ankʼin?

27. Bix nnaʼjal ttzakʼweʼn Amulek: At, at jun Dios ax toc n-ankʼin.

28. Bix nxiʼ tkaʼnan Zeezromtl: ¿At más Dios twitz aj junx?

29. Bix nnaʼjal ttzakʼweʼnkʼa: Miʼn.

30. Tons nxiʼ tmaʼn Zeezrom te: ¿Tzaʼn ten loʼn tuʼna ajke cosas ajo?

31. Bix nxiʼ ttzakʼweʼnkʼa: Jun angel tzaj kʼaman te wecyʼ.

32. Bix nxiʼ tkaʼnan Zeezrom juntl el: ¿Alcyej aj tzul? ¿Ajo aj tCʼwaʼl Dios?

33. Bix nnaʼjal ttzakʼweʼnkʼa: Atzanjo.

34. Bix nxiʼ tkaʼnan juntl el Zeezrom: Oc ccolal cyiʼj tnam eteʼc tuj twitz cyil? Bix nnaʼjal ttzakʼweʼn Amulek, cyjaʼw: Cxel nmaʼna teya que miʼn, tuʼnj milay cub teʼwan tyol.

35. Tons nxiʼ tmaʼn Zeezrom cye tnam; Tzʼocx il tiʼj cyuʼna cyiʼj cosas ajo; tuʼnj maʼ tkʼamanta que ntiʼ mas oʼcx junx Dios; bixque, maʼ tkʼamanta que tzul tCʼwaʼl Dios, bix miʼn colan cyiʼj tnam; lonxa icytzan at tipamal tuʼn tmandaʼran tibaj Dios.

36. Bix nxiʼ tkʼamaʼntl Amulek te te acʼaj: Lutzan luʼ, maʼ slaʼjana; pwes maʼ tkʼamantiya que lonxa icytzan at mas wipamala tuʼn nmandaʼrana tibaj Dios, tuʼnj xiʼ nmaʼna que miʼn colan tiʼj tnam tiʼj twitz cyil.

37. Bix cxel nkʼamaʼna juntl el teya que milay chi colet eteʼc tiʼj twitz cyil; bix milay cub weʼwana tyol, pwes oʼ tzaj tmaʼnkʼa que mijun ẍwaʼj tuʼn tikʼ aj reyno tuj cyaʼj; cyjaʼtzan jluʼ, ¿tzaʼn tuʼn cycoleta ka mi ma cyikʼa reyno tuj cyaʼj? Que aj tuʼmal milayx chi coleta katzn eteʼcya tiʼj twitz cyila.

38. Tons nxiʼ tkaʼnantl Zeezrom te: ¿A aj tCʼwaʼl Dios aj ax toc Mambaj te Junmajx?

39. Bix nxiʼ tmaʼn Amulek te: Atzanjo, axtzan Mambajjo te Junmajx te tuj cyaʼj bix te twitz txʼotxʼ, bix cyiʼj cyakil cosas at cyuj; akʼa aj t-tzajlen keʼ bix aj twiʼpan, akʼa aj tnejal bix twiʼpan;

40. Bix tzul twitz mundo tuʼn cycolet tnam; bix ctikʼal tibaj nicyʼca twitz il cyekaj ma tzʼocx cyocslaʼn tiʼj tbi; bix akatzanjo ctel cyankʼbil te junmajx, bix mi jun juntl tuʼn tcanan tiʼj colbil.

41. Cyjaʼtzan jluʼ, ajke nach cucx chi tel lonxa icytzan ntiʼ otak tzul colbil, oʼcxtzala ka libre ma chi cyaj tiʼj takʼal camacy; pwes lutzan luʼ, tzul kʼij aj jatuma cyakilka chi jawal weʼ tiʼj camacy bix chi pol ten twitz Dios tuʼntzan cyoc tuj xtis según aj cybinchben.

42. At pwes jun camacy que a tbi aj camacy te xumlalbaj; bix aj camacy te Cristo atzanjo ccoʼpal tiʼj takʼal camacy te xumlalbaj tuʼntzan cyjaw weʼ cycyakil tiʼj j-ajo.

43. Bix aj xewbaj bix xumlalbaj oc cocal cyjunan juntl el cyib tuj ax toc tuʼmal; aj myembros bixke aj najamnaka cocal cyqueʼyin cyibtl te acʼaj tuj ax cyuʼmal, lonxax icytzanj toʼ jaʼla; bix ko xel kʼiʼnxa twitz Dios; bix cocal queʼyiʼn lonxa icytzanj nnoc queʼyn jaʼla, bix ctel jun nabil itzʼjx tuʼn tel knicyʼ tiʼj cyakil kpaj.

44. Aj binchben te acʼaj tzul cyibaj cyakil, banwtla tijxjalka bixmo cuʼxanka, majanke bixmo tzakpiʼnke, xinakke bixmo xuʼjke, nachke bixmo tbanalke; bix miʼn txiʼ naj mi jun ttzmal cywiʼ, sino que cyakil cajatz te acʼaj tuj ax cyligar, bixmo tuj t-xumlal, alcyej at jaʼla; bix chi xeltzan yecʼal cyib twitz tribunal te Cristo aj Cʼwaʼlbaj, bix Dios aj Mambaj, bix Xewbaj Sant, que akajo jun Dios te junmajx, tuʼntzan cyoc tuj xtis según cybinchben, nokx ka baʼn bixmo nach.

45. Lutzan luʼ, maʼ chin yolana teya tiʼj aj camacy te xumlalbaj, bix ax icyxjo tiʼj tuʼn tjaw itzʼ juntl el xumlalbaj. Cxel nmaʼna teya que aj xumlalbaj te cyimleʼn luʼ oc cjawal weʼ juntl el te xumlalbaj te junmajx, bixmo aj tuʼmal, tiʼj camacy, icytzanjo, tiʼj tnejal camacyʼ te ankʼbil, tuʼntzan mi jtojx tuʼn cyim; aj cyxew cocal tjunan cyib tucʼ cyxumlal tuʼntzan mi cyel lakʼeʼ mi jtoj juntl el, bix aj junbil ajo cocal te xewbaj bix miʼn cyim, tuʼntzan mi tkʼuchj juntl el.

46. Bix cwandatzan tbaj tkʼamaʼn Amulek kej yol ajo, nkeʼ tuʼn tnaj cynabil juntl el aj tnam, bix nkeʼ tuʼn tjaw luʼlan Zeezrom. Bix cyjaʼtzan pon baj twiʼ tyol Amulek, bix oʼcxcatzanjo aj oʼ cub ntzʼibana.