1. Bix nbanttzan que nchex bix nkeʼ tuʼn cypacban tiʼj tyol Dios cyxol tnam, bix nchocxtzan tuj cyja te nabil Dios; icytzanjo, bix ax i pacban tiʼj tyol cyuj clab.

2. Bix banttzan que tbantlen nim akʼuntl cyxol, o keʼ tuʼn cyjaw meba jawna; lutzan luʼ, akajo i ex xoʼn cyiʼjxa ja te nabil Dios tuʼntzanj sbuʼy cyxbalan.

3. Cyjaʼtzan jluʼ, ntiʼtzan kit cyocx cʼamoʼn tuj ja te nabil Dios tuʼnj kit t-xi xiʼman que ẍwaʼj cyiʼj; cyjaʼtzan jluʼ, attak il tiʼj cye; icytzanjo, aj te cye cyermano lonxa icytzan tzʼiska; que mebakajo cyiʼj cosas te twitz mundo, bix ax icyxkajo tiʼj cyanma.

4. Bix myentras ncub tyecʼan bix nyolan Alma cye tnam tiʼj witz Onida, i ul nimke xjal, axkaj al iʼj maʼ koyolan, que mebakajo tuj cyanma tuʼn tlaj cymebayil cyiʼj cosas te twitz mundo.

5. Bix nchi pontzan tiʼj Alma; bix aj jun nim t-xiʼlen cyxol, nxiʼ tmaʼn te Alma: Lutzam luʼ, ¿Ti tkal nbaj cyi jluʼ ajke wermaniya? pwes icʼanke cyuʼn cyakil xjal tuʼntlaj cymebayil; icytzanjo, bix más cyuʼnke ksacerdotes, tuʼnj maʼ ketz xoʼna tiʼjxa kja te nabil Dios, que tuʼn nim akʼuntl oʼ chi bant ja kuʼna cyuʼn kecax kkʼaba; bix maʼtzan kel icʼana tuʼn tlaj kmebayila; bix mitiʼ jun ligar jatuma tuʼn knana Dios. Lutzan luʼ, ¿Ti cbantel kuʼna?

6. Bix ajtzan t-xiʼ tbiʼn Alma ajo, nnaʼjal meltzʼaj tucʼal bix nnoc queʼyiʼn tucʼmatij tzalajibil; tuʼnj oc queʼyn que aj taʼw otak becyʼbilix cywitz tuʼn, bix banan cyten tuʼn cybin tiʼj tyol Dios.

7. Cyjaʼtzan jluʼ, ntiʼ txkantl yol xiʼ tmaʼn cye juntl tnimal xjal; sino que nxiʼ tlicʼanke tkʼab, bix nxiʼ meltzʼaj cyucʼkaj aj i til, cyucʼkaj aj ax toc ajtz tiʼj cyanma tiʼj tnachal, bix nxiʼ tmaʼn:

8. Nxiʼ queʼyiʼna que mebakaya tuj cyanmiya; bix katzan icyjo, cyeʼyaxkaya.

9. Lutzan luʼ, aj cyermaniye oʼ tzaj tmaʼn: ¿Ti cbantel kuʼn? tuʼnj maʼ ketz lajoʼn cyuj ja te nabil Dios que aj tuʼmal milay ko nana Dios.

10. Lutzan luʼ, cxel nmaʼna cyeya: ¿Ocslaʼn cyuʼna que milay chi nana Dios mas oʼcx tuj cyjaya te nabil Dios?

11. Bix cxel nkaʼnantla cyeya: Nxiʼ cynaʼna tiʼj que miyaʼ il tiʼj tuʼn cynana Dios banwtla jun elx tuj saman?

12. Akina chin xel kʼaman te cyeya que baʼn aj maʼ chetz xoʼna tiʼjxa cyjaya te nabil Dios, tuʼntzan cyoca becyʼbil cywitza bix tuʼn tbant cyuʼna aj yol nim baʼn tuʼn; tuʼnj il tiʼj tuʼn tbant cyuʼna, tuʼn tel cynicyʼa tiʼj bix tuʼn ten cycwenta tiʼj; pwes tuʼn tlaj aj maʼ chetz lajoʼna ya que aj cyermaniya maʼ chel icʼana cyuʼn tuʼn tlaj aj nim cymebayila, tuʼntzanjo aj ma chi pona tuj becyʼbijibil, pwes tuʼnj il tiʼj aj ma chi pona tuj becyʼbijibil.

13. Bix tuʼntzanj maʼ cyila que il tiʼj ma choca becyʼbil, cyeʼyaxkaya; tuʼnj cwando il tiʼj tuʼn toc jun xjal becyʼbil, atmaj ntjoy aj tuʼn tajtz tiʼj tanma; bix axtzan toc, alcyej ma tzʼajtz tiʼj tanma oc cletal xtalbil tuʼn, bix alcyej ma canet xtalbil tuʼn bix ma cub twaban tib tuj tbanal asta oc tjapan baj twiʼ, oc ccoletaljo.

14. Bix cyjaʼtzun ma txiʼ nmane cyeya, que tuʼntzanj aj il tiʼj ma cha pona tuj becyʼbijibil, tzaj xtalbil cyibaja, ¿Nyala tzʼocx tiʼj cywiʼya ctzajel nimxix xtalbil cyibaj ajka jax toc becyʼbil cywitz tuʼn tyol Dios?

15. Icytzanjo, alcyej aj ax toc becyʼbil twitz bix ma tzʼajtz tiʼj tanma tiʼj tnachal, bix ma cub twaban tib tuj tbanal asta oc tjapan baj twiʼ, oc ctzajal cyʼiwlaʼn; oc, oc chitzajal cyʼiwlaʼn más cywitzkaj ilxax tiʼj tuʼn cyoc becyʼbil cywitz tuʼn tlaj cymebayil.

16. Cyjaʼtzan jluʼ, cyeyaxka ajke ma cub cybecyʼbilin cywitz bix miyaʼ il tiʼj tuʼn cyoc te becyʼbil; bixmo chiwlaj tuj juntl tuʼmal, cyeʼyax aj nnocx tocslaʼn tyol Dios, bix nbiyan mintiʼ tcyiwal tanma; icytzanjo, que miyaʼ kʼakʼanxax ma tzʼoc tiʼj tuʼn tel tnicyʼ tiʼj, mix tuʼn puerz bant tuʼn aj naʼxtak tocx tocslaʼn.

17. Icytzanjo, at nimca nchi kʼaman tiʼj cyjaʼw: Ka ma tzaj tyecʼana jun techaklil ke tuj cyaʼj, seguratzan quelal knicyʼ tiʼj; tons cocaxtzan kocslaʼn.

18. Per cxel nkaʼnna cyeya: ¿Ocslabil aj ajo? Lutzan luʼ, cxel nmaʼna cyeya que miʼn; tuʼnj ka baʼn tuʼn jun xinak jun cosa, miyaʼ il tiʼj tuʼn tocx tocslaʼn tiʼj, tuʼnj loʼn tuʼn.

19. Luegotzan, ¿Nyaʼpala junmajx nach xjal que loʼn tuʼn aj tban cʼuʼj Dios bix ntiʼ nnel twitz, aj oʼcx ocslaʼn tuʼn bix oʼcx at tuʼmal tuʼn tocx tocslaʼn, bix ma cub tzʼak tuj tuʼn tcub tiʼn tmij tmandamyent Dios?

20. Bix jaʼlatzan, tiʼj sunt ajo tuʼn cyjusgaʼrana. Lutzan luʼ, cxel nmaʼna que icytzanjo tiʼj jun part bix tzaʼnx juntl; bix cyakil xjal oc ctikʼal segúnke tbinchben.

21. Bix icytzanjx xiʼ nmaʼna tiʼj ocslabil: Que aj ocslabil miyaʼ aj tuʼn tel knicyʼ cyiʼj cosas wena: que aj tuʼmal ka at cyocslabila, at cyuʼmala cyiʼj cosas aj ntiʼ kʼinchalka, bix que ax tocke.

22. Bix lutzan luʼ, octzan cxel nmaʼna cyeya jaʼla: Wajbila tuʼn t-xiʼ cycʼujlacja que at t-xtalbil Dios cyiʼj cyakilkej ocslaʼn cyuʼn tiʼj tbi; cyjaʼtzan jluʼ, tuj tnejal ligar, tajbilkʼa tuʼn tocx cyocslaʼna, tiʼj tyol.

23. Bix ntzaj tkʼamaʼn tyolkʼa cye xinak cyuʼnke ángel; icytzanjo, miyaʼ oʼcx cye xinak sinoque ax icyx cye xuʼjjo. Bix miyaʼ oʼcx ajo cyakilxa; nim el nchi tzaj kʼoʼn yol cyeke cʼwal que nchel tzacj cyiʼj aj nim baʼn cyuʼn bix aj nbaj caʼwan.

24. Cyjaʼtzan jluʼ, akiya wermaniya aj nim cʼujlaʼn wuʼna, ya que otak tzaj cykaʼnna wecyʼ aj ti tkal tuʼn tbant cyuʼnna, tuʼnj ma cheʼx kʼoʼna tuj bis bix maʼ chel icʼana — bix wajbila tuʼn t-xiʼ cyxiʼmana tiʼj que chinxtisala cyiʼja oʼcx según aj ax toc;

25. Tuʼnj ncyʼiʼya txiʼ nmaʼna que cyakilkaya kʼakʼan ẍoca tiʼj tuʼn cyoca becyʼbil cywitza; tuʼnj ax toc ocslaʼn wuʼna que atke juʼnjun cyxola que mawtla choc becyʼbil cywitz tuj nok tzaʼnx tuʼmal.

26. Pwes icytzanj xiʼ nmaʼna tiʼj ocslabil, que miyaʼ tuʼn tel knicyʼ tiʼj wena, cyjaʼtzan cyiʼj nyolajo. Milay bant cyuʼna, aj tnejal, tuʼnxax tel cynicyʼa tiʼj wena tiʼj aj ka ax toc bixka miʼn, bix tzanx ax miyaʼ ocslabil aj tuʼn tel nicyʼ tiʼj wena.

27. Mas lutzan luʼ, ka ma chi jaw cyʼisja bix ma jaw cynimsan cyuʼmala tuʼn tcub tuj preba ajke nyola, bix ma chi xnakʼtzan chʼina tiʼj ocslabil, icytzanjo, bawtla miyaʼ oʼcx nok jun ajbil tuʼn tocx cyocslaʼna, cykʼoʼn cyaja aj ajbil ajo tuʼn takʼnan cyibaja, asta oc tocx cyocslaʼna que at tcubil chʼin ni nyola cyucʼala.

28. Kcomparaʼran oc, pwes, aj yol tucʼ jun iyaj. Ka ma tzaj cykʼoʼna ligar tuj cyanmiya tuʼn t-awet jun iyaj, bixka ax axax toc tbanal jun iyaj, bix miʼ tzʼex cykʼoʼna tiʼjx tuʼn aj cynachala, icʼan cyuʼna aj t-Xew Kman, lutzan luʼ, ckebal tuʼn t-itzʼj tzi cyxuʼca; oc cynantiya oc tchʼiy, oc ckebal tuʼn t-xiʼ cymaʼna cyil cyibxa. Aj iyaj luʼ ilxax tiʼj tbanaljo, bixmo tbanal aj yol ajo, tuʼnj nkeʼ tuʼn tchʼiy wanmiya bix tuʼn tspicyʼaman tiʼj nximbitza; icytzanjo, nkeʼ tuʼn toc cyeʼyax te wecyʼ.

29. Lutzan luʼ ¿milaypala chʼiy cyocslabila tuʼnjo? Cxel nmaʼna cyeya que jaʼca; sinbargo, naʼx tocxax jun ximbitz tbanal tuʼn tel knicyʼ tiʼj cabalx wena.

30. Mas lutzan luʼ, tuj tuʼmal myentras nchʼiy iyaj, nnel pokʼl bix nkeʼ tuʼn tchʼiy, tons octzan cxel cytxʼolbaʼna que baʼn iyaj; pwes lutzan luʼ, nxiʼ mal bix ntzaj juntl el t-xul bix nkeʼ tuʼn tchʼiy.

31. ¿Segur teʼyatz, tons, que atzanjo jun iyaj tbanal? Cxel nmaʼna cyeya que icyjo; tuʼnj cyakil iyaj ntak tbaʼn según aj clase te.

32. Cyjaʼtzan jluʼ, ka ma chʼiy jun iyaj, a jun iyajjo tbanal; pero ka ntiʼ ma chʼiy, lutzan luʼ que miyaʼ baʼn; cyjaʼtzan jluʼ, oc quelax xoʼt.

33. Bix lutzan luʼ, tuʼnj maʼ nebet tuʼn t-awet aj iyaj, bix tuʼntzanj nxiʼ mal, npokʼl bix nkeʼ tuʼn tchʼiy, loʼn cyuʼna ilx tiʼj tbanaljo.

34. Bix luzan luʼ ¿Ax toc tbanal wena aj loʼn cyuʼna? Ax toc, tbanal wena aj loʼn cyuʼna cyiʼj cosas ajo, bix aj cyocslabila ntiʼtl tuʼn takʼnan; bix tuʼntzanj loʼn cyuʼna wena; tuʼn miyaʼ lajon cyuʼna que nxiʼ mal cyanmiya tuʼn yol, bix ax loʼn cyuʼna que maʼ pokʼl, que nkeʼ tuʼn tspicyʼamax cyximbitza bix aj cynabila nkeʼ tuʼn tchʼiy.

35. Luegotzan, ¿Mipatzal nyaʼ ax toc tiʼj ajo? Cxel nmaʼna que ax toc, tuʼnj spicyʼanjo; bixla cyej spicyʼan, tbanaljo, tuʼnj jaʼca tzʼel cynicyʼa tiʼj; cyjaʼtzan jluʼ ilx tiʼj tuʼn tel cynicyʼa tiʼj que baʼnjo; bix lutzan luʼ, ¿Ax toc tbanal wena aj loʼn cyuʼna despwés que otak tzʼel cycʼaniyiʼna aj spicyʼan?

36. Lutzan luʼ, cxel nmaʼna cyeya que miʼn; bix miʼn cyaj cykʼoʼna cytxlaja aj cyocslabila, nok tuʼnj oʼcx ma bant cyuʼna aj cyocslabila tuʼn t-awet iyaj, tuʼntzan tbant preba tuʼn tel nicyʼ tiʼj ka baʼn iyaj.

37. Bix lutzan luʼ, tuj tuʼmal myentras nchʼiy tzeʼ, cxel cymaʼna: k-abonayiʼn baj tucʼ nim cheba tuʼntzan t-xiʼ tlocʼ, tuʼn tchʼiy bix tuʼntzan ttzaj tkʼoʼn twitz ke. Bix lutzan luʼ, ka ma cub cyawaʼna tucʼ nim cheba, oc cxel tlocʼ, cchʼiyal bix ctakʼal twitz.

38. Katzan mi ma tzʼoc cycwentana tzeʼ, bix ka mi ma tzʼoc cykʼoʼna tiʼj cycʼuʼja tuʼn t-abonarit, lutzan luʼ, miʼn txiʼ tlocʼ; bix octzan tpon taʼ kʼij tiʼj bix ma tzʼeʼy tuʼn, oc ctzkiljal tuʼnj ntiʼ tlocʼ, bix octzan cjawatz tbakoʼna bix quelax t-xoʼna.

39. Bix ajo miyaʼ tuʼnj nach iyaj, mix tuʼn miyaʼ te ajbil twitz; sino que tuʼnj miyaʼ tbanal cytxʼotxʼaya bix ntiʼ ẍcykiya tuʼn toc cy-abonárina tzeʼ; cyjaʼtzan jluʼ, milayx cycambiya twitz.

40. Cyjaʼxtzan jluʼtl, ka mi ma cuʼx cyawaʼna yol, bix nxiʼ queʼyiʼna tuʼn tbakʼ cywitza te ocslabil, tiʼj twitz, mi jtoj tuʼn tcyikʼa twitz tzeʼ te ankʼbil.

41. Per katzan ma cuʼx cyawaʼnaj yol, bix myentras nchʼiy tzeʼ ma tzʼoc cy-abonaʼrina tuʼn cyocslabila, tuʼn cyakil cycʼuʼja bix cypasensa, bix xoʼn cycʼuʼja tiʼj que ctakʼal twitz, oc cxel tlocʼ; bix lutzan luʼ, ajo jun tzeʼ cpokʼjel te ankʼbil te junmajx.

42. Bix tuʼntzan tlaj aj cyakil cycʼuʼja, cyocslabila bix cypasensa tuʼn tcub cyawaʼnaj yol, tuʼntzan t-xiʼ tlocʼ cyucʼala, lutzan luʼ que yajxatzan oc cjawal cysicʼoʼna twitz, que ajo ax cyeʼyaxxax bix más chiʼ twitz cyakilj tchi-al bix mas sak twitz cyakilj sak, icytzanjo, bix chi nebela tiʼj loʼj ajo asta oc cycyaja txubtxaj, bix mitiʼ tuʼn t-el mix tuʼn ttxket tiʼj cycʼuʼja.

43. Tons, akaya wermaniya; oc ccyikʼala premio te ocslabil, tuʼn cyakil cʼuʼjabaj, pasens bix tuʼntzan t-ayet que tzul tkʼoʼn twitz tzeʼ.