1. Bix jaʼlatzan, aya ncʼwaʼl, at chʼin cxel nmaʼna teya tiʼj aj binchben te acʼaj maʼ ko yolan tiʼj; tuʼnj lutzan luʼ, atke juʼn oʼ baj cysabuʼn ajke Tuʼjal bix oʼ cheʼx naj cyuʼn tuʼn tlaj ajo. Bix nnel nnicyʼa tiʼj que miyaʼ txulch t-ximbila tiʼj sunt ajo; mas lutzan luʼ, cxel ntxʼolbaʼna teya.

2. Cxel nmaʼna teya, aya ncʼwaʼl que aj plan te binchben te acʼaj i tiʼjjo te t-xtisbil Dios, tuʼnj il tiʼj tuʼn cybaj saksat cosas tuj cyex cycubil bix cyligaral. Lutzan luʼ, il tiʼj bix tbanaljo, según aj tipamal, bix aj itzʼjbil te juntl maj te Cristo, tuʼn tbaj saksat juntl el cyanma xjal tuj cyxumlal, bix tiʼj ajo tuʼn tbaj saksat cyakil part tiʼj.

3. Bix il tiʼjjo te t-xtisbil Dios, tuʼn cyoc xjal tuj xtis según aj cybinchben; bix ax, a tbanal cybinchben ma cha bant tuj ankʼbil luʼ bix ax tbanal ajke t-ajbil tanma, tuʼntzan cybaj saksan tuj tbanal tuj twiʼpan kʼij.

4. Bixka nach tbinchben oʼ chi bant, oc chi bajal saksan tuj tnachal. Cyjaʼtzan jluʼ, cyakilka cosas oc chi bajal saksan tuj cyex cycubil; teylex te juʼnjun cosa tuj tex tiblal — aj cyimleʼn tuʼn tjaw weʼ te tuʼn mi tcyim; aj najbil tuʼn toc te tbanal — tuʼn tjaw itzʼj juntl maj te jun tzalajibil miʼn baj tuʼntzan tikʼ aj reyno te Dios, bixmo jun najbil miʼn baj tuʼntzan tikʼ aj reyno te dyablo; jun cosa tuj jun ploj bix juntl tuj juntl plajtl;

5. Oc cjawal itzʼj jun tuj tuʼmal, según aj t-ajbil tiʼj tchi-al, bixmo tiʼj tbanal, según aj t-ajbil tiʼj baʼn; bixmo juntl tiʼj tnachal, según aj t-ajbil tiʼj tnachal; tuʼnj tzanx ma tajbeʼ tuʼn tbant tnachal tuʼn cyakil kʼij, cyjaʼtzan ctikʼal chojbil te oc tul konicyʼan.

6. Bix cyjaʼtxtzanjo cbajel tuj juntl plaj. Ka maʼ tzʼajtz tiʼj tanma cyiʼj twitz til bixmo ma tzʼoc il tiʼj tuʼn tiʼj xtis asta cyuj twiʼpan tkʼij, ax icytzan ctikʼal chojbil te tuj xtis.

7. Akatzan aj tcolbil Kajaw; icytzanjo, akatzanjo chi coletal tiʼj aj junmajx tnachal konicyʼan miʼn baj; bix cyjaʼtzan ncub cywaban cyib bixmo nchi cub tzʼak; pwes lutzan luʼ, axke jwes cyiʼj cyilx cyib, ka tuʼn tbant tbanal, bixmo tuʼn tbant tnachal.

8. Bix aj tley Dios milayx chi kʼuchj; cyjaʼtzan jluʼ, maʼ cyaj bant tiʼj be tuʼntzan cyakil aj tajbil, baʼn tuʼn tbet tuj bix tuʼn tcolet.

9. Aya ncʼwaʼl, miʼn bant tuʼna juntl el, tuʼn mi tocx t-xoʼna Dios cyiʼj juʼn txacaj tuʼmal tiʼj doctrina luʼ que hasta jaʼlatzan ma canna tuʼn tbant tnachal tuʼna.

10. Miʼn txiʼ t-xiʼmana tiʼj, tunʼj ma yolat tiʼj binchben te acʼaj, que tuʼn tsaksata cyiʼj twitz tila tuʼn t-xiʼya tuj tchi-al. Lutzan luʼ, cxel nmaʼna teya que aj tnachal mi jtoja tzʼoc te tchi-al.

11. Bix cyakilkaj xjal teʼ tuj cyten te chibaj, teʼ tuj tcʼayal bix tuj takʼal tnachal; mitiʼ Dios cyucʼal tzaluʼ twitz mundo, bix maʼ chi binchan nach tiʼj Dios; cyjaʼtzan jluʼ, ateʼ tuj jun tuʼmal contra tiʼj aj tumal te tzalajibil.

12. Bix lutzan luʼ ¿Apa t-xiʼlen binchben te acʼaj, tuʼn tkʼit aj tuj tcubil bix tuʼn tcub kʼot tuj nya tligaral, bixmo tuʼn tcub kʼot tuj jun tuʼmal contra tiʼj tmoda?

13. Miʼn, ncʼwaʼl, micyʼ tenjo; sino que aj t-xiʼlen yol binchben te acʼaj atzan aj tuʼn taʼjal te acʼaj, aj tnachal tuj tnachal, bixmo chibajalbaj tuj chibajalbaj, bixmo dyablo tiʼj dyablo; tbanal tiʼj tbanal, jikn tiʼj jikn, tzʼiyan tiʼj tuj xtis tiʼj xtis tzʼiyan.

14. Cyjaʼtzan jluʼ, aya ncʼwaʼl, tzʼocx il tiʼj tuʼna tuʼn t-xtalana cyiʼj termaniya; tratana cyiʼj tuʼn xtis, xtisana tuj tligaral, bix bant tbanal tuʼn bix miʼn txiʼ tcoʼlana; bix ka ma tzʼela cywitz jcosas ajo, tons octzan ctikʼala tpremiya; icytzanjo aj xtalbil tzul kʼoʼn teya te acʼaj; oc tzul kʼoʼn juntl el xtis teya; oc tzul kʼoʼn juntl el teya bix te acʼaj aj jwisyo tbanal, bix octzan tzul kʼoʼn chojbil baʼn teya te acʼaj tuʼnj banala.

15. Tuʼnj aj tiʼ tkal quelal tiʼja, cajatz maktzʼaj juntl el tucʼala bix cbajal saksantl; cyjaʼtzan jluʼ, aj yol binchben te acʼaj nxiʼ kʼoʼn mas aj il tuj sentens, bix ntiʼ tiʼ tkal tbaʼn tuʼn.