1. Bix banttzan que nimke i eʼx bin te tyol Samuel aj lamanita, xiʼ tkʼamaʼn tpocbal max twiʼ ja tej tnam. Bix jteʼkaj i eʼx bin te tyol ncheʼx jayolte Nefi; bix aj tcanettzan cyuʼn, nxiʼ cykʼamaʼn twitz cyil te bix ntiʼ cub cyeʼwan, bix o cyajbe tuʼn cybiyan tuj tumal Kajaw.

2. Per alcyekaj aj ntiʼ ocx cyocslaʼn tyol Samuel i jaw kʼojl tucʼalkʼa; bix nxiʼ cyxoʼn xak tiʼjkʼa, bix nimke xiʼ cyxoʼn flechas tiʼjkʼa myentras tjaxkʼa twiʼ ja; mas aj t-Xew Kajaw attak tucʼalkʼa, bix ntiʼ o caban tuʼn cyxak mix tuʼn cyflech.

3. Bix toctzan cyqueʼyiʼn que mitiʼtak tuʼn tcaban cyuʼn, ateʼtl nim txkantl ocx cyocslaʼn tiʼjke tyol, que tuʼntzanjo i eʼx jayol te Nefi tuʼntzan cybiyan.

4. Tuʼnj lutzan luʼ, nbiyantak Nefi, nyolantak cyiʼj yol jun tyempca bix npacbantak, bix ntxʼolbantak tiʼj tuʼn tajtz tiʼj cyanma tnam tiʼj tnachal, nyecʼantak cyiʼj techaklil, bix nbanttak bincheben nim tipamal tuʼn cyxol tnam, tuʼntzan tel cynicyʼ tiʼj que te joratx tzul Cristo,

5. Nkʼamantak cyiʼj cosas que tuj niʼxa tyemp chicyʼel, tuʼntzan tel cynicyʼ bix tuʼn tpon tiʼj cycʼuʼj, tuj kʼij oc cybant, que otak txiʼ kʼamet jun tyemp tpocbal, tuʼntzan tocx cyocslaʼn; cyjatzan jluʼ, cyakilkaj aj xiʼ cyocslaʼn tyol Samuel i eʼx lol te Nefi tuʼn cybiyan; pwes kit cyul ya tajtzlenxa tiʼj cyanma tiʼj tnachal bix xiʼ cykʼamaʼn twitz cyil.

6. Per más nimke ntiʼ ocx cyocslaʼn tiʼjke tyol Samuel; cyjaʼtzan jluʼ, aj t-xiʼ cyqueʼyiʼn que ntiʼtak tuʼn tcaban cyuʼn tuʼn xak mix flechas, nxiʼ cyschʼiʼn te cycapitán: Cytzyuntza bix cycʼaloʼn baja aj xjal ajo, tuʼnj etzan tuʼn demonio; tuʼntzanj tipamal dyablo at tucʼal, milay caban cyuʼn kxak mix kflech; cyjaʼtzan jluʼ, cytzyuntza bix cycʼaloma bix cybiyoʼn cuba.

7. Myentras ntamantak tuʼn cyxiʼ tibajkʼa, lutzan luʼ, tzaj t-xoʼn tib max twiʼ ja bix n-oktan tuʼn t-xiʼ tuj tex ttxʼotxʼa, icytzanjo, asta tcanan tuj tex tpaís, jatuma keʼ tuʼn tpacban bix tuʼn tkʼaman yol jun tyempca txol tex tnam.

8. Bix lutzan luʼ, mi jtoja o binjtz juntl el tpocbal cyxol nefitas; bix atzan tuʼmal taʼtak tnamjo.

9. Bix cyjaʼtzan el baj twiʼ abkʼi 86 cygobierno jwes tibaj tnam te Nefi.

10. Bix ax icyxtzan el baj twiʼ abkʼi 87 aj cygobierno jwes, bix teʼtak tnimal tnam tuj nimsbil bix tnachal, bix cabtzan neʼ cucx cy-ankʼin tuj ttxolal twitz Dios.

11. Bix axtzan tuʼmaljo aj bant tuj abkʼi 88 tuj gobierno cye jwes.

12. Bix tuj abkʼi 89 tuj gobierno cye jwes niʼxa ke sunt i meltzʼaj tuj tnam, oʼcxtzala ka keʼ tuʼn cytenx xjal tuj tnachal, bix tuʼn cybant txkantl bix txkantl cosas contra cyiʼj tmandamyent Dios.

13. Per banttzan que tuj abikʼ 90 tuj cygobierno jwes, o i tzaj yecʼanke matij techaklil te tnam; bix nkeʼtzan tuʼn tel cyyol profetas twitz.

14. Bix cub cyyecʼan cyib ángel cywitz xjal, cywitz xjal nim baʼn cyuʼn, bix tzaj kʼamaʼn cye ka tpacbal tbanal te matij tchi-al; que aj tuʼmal, nkeʼ tuj abkʼi ajo tuʼn cyel tuʼjal twitz.

15. Bix atzan cye tnam nkeʼ tuʼn tcyiwax cyanma, tzanx cyxol nefitas bix tzanx cyxol lamanitas, oʼcxtzan miʼn ajke puro ocslalka, bix nkeʼ tuʼn ten cyocslabil tiʼj cyex cyipamal bix tiʼj cyex nim baʼn cyuʼn, nxiʼ cymaʼn cyjaw:

16. Ajke juʼnjun cosas, cyxol nimke, owla i naʼn tiʼj; mas lutzan luʼ, loʼn kuʼna que cyakilkaj cosas matij bix cyeʼyaxka aj oʼ chi yolj milay bant.

17. Bix nkeʼ tuʼn toc cysiban cyiʼj cyibx bix tuʼn ten xcyakbil cyxolx, xiʼ cymaʼn cyjaʼw:

18. Mi tiʼ tuʼmal tuʼn tul jun xjal te jun Cristo; ka icyjo, bix ka tCʼwaʼl Dios, aj Mambaj tuj cyaʼj bix twitz txʼotxʼ, icytzan oʼ kʼuʼnj, ¿Tzaʼn ten miʼn tzaj tyecʼan tib ke icytzanj cyeke tuj Jerusalén?

19. Icytzanjo, ¿Tzaʼntzan ten miʼn tzaj yecʼan tuj país luʼ, icytzanj tuj país Jerusalén?

20. Mas lutzan luʼ, loʼn kuʼna que nok jun aj il costumbre ntzaj kʼoʼn ke cyuʼn kman tuʼntzan tocx kocslaʼn tiʼj jun cosa matij bix cyeʼyax aj cbajel, per miyaʼ kxol, sino que tuj jun país lekʼch, jun país aj ntiʼ loʼn kuʼn; cyjaʼtzan jluʼ jaʼca bant tuʼn kten cyuʼn tuj moybil bixmo tuj klolj, tuʼnj milay kil cyuʼn cywitzela tbakʼ kwitz ka ax axxax toc.

21. Bix atzan cye, listke tucʼ cychcyinabil bix tipamal dyablo, oc cbantel jun matij misterio que milay tzʼel knicyʼ tiʼj, que tuʼntzanjo ko tzyetal tuʼntzan koc te majan cyiʼj cyyol bix ax te cye, tuʼnj toʼ cyjakʼ tuʼn tcub cyyecʼan yol ke; bix cyja, tzan ko tel cyuʼn tuj klolj cyakil kʼij ka ma tzʼoc kʼon kib cyiʼj.

22. Bix nimke txkantl cosas nok gana bix txʼuʼjbil aj xiʼ cyxiʼman tuj cyanma; bix otak chi jaw labt tuʼnj npayartak Satanás tuʼn tbant tnachal cyuʼn; icytzanjo, maʼ takʼ tchiylal bix tnachal tuj cyakil país, tuʼntzan tcyiwax cyanma xjal contra tiʼj tbanal bix contra tiʼj aj cyjaʼ ttzaj.

23. Bix tiʼjxatzanj ajke techaklil nchi banttak cyxol tnamte Kajaw, bix ajke nim binchben nim tipamal nchi bant, o ten tipamal Satanás cyibaj cyanma tnam tuj cyakil país.

24. Cyja, tzan japan baj twiʼ abkʼi 90 aj cygobierno jwes tibaj tnam te Nefi.

25. Cyjaʼtzan japan baj twiʼ uʼj te Helamán, según ajke storya te Helamán bixke tcʼwaʼl.