1. Bix bajtzan que aj abkʼi noventa y uno otak tzʼel baj twiʼ, bix otakxa tzʼel kak syent abkʼi aj tetzlen Lehi tuj Jerusalén; bix atzan abkʼijo jwestak matij aj Laconeo bix wiʼxantak nimak te tnam.

2. Bix te Nefi, cʼwaʼlbaj te Helamán, otak tzʼetz tuj tnam te Zarahemla bix otak txiʼ tkʼoʼn te Nefi, aj tcʼwaʼl etzicybaj, ajke bronce sleʼw tbi bix cyakilkej cʼuxbil aj otak tzʼoc cwent cyiʼj, bix cyakilkaj cosas cyʼiwlaʼnke aj otak chi cʼuʼt atxax tetzlen Lehi tuj Jerusalén.

3. Tons nnetz nimak tnam tuj, bix mijun loʼn tuʼn jatuma otak txiʼ; bix Nefi aj tcʼwaʼl i oc tcwentan ajke storya tuj tcubil, icytzanjo, ajke storya tej tnam ajo.

4. Bix banttzan que aj tkeʼ abkʼi noventa y dos, lutzan luʼ, nkeʼ tzan tuʼn tel twitz que cyakil ajke otak chi kʼunj jun tyempca cyuʼnke profetas; nkeʼtzan tuʼn cyicyʼke techaklil bixke binchben nim cyipamal cyxol tnam.

5. Per juʼnke o keʼ tuʼn t-xi cymaʼn que otak tzicyʼ tyemp aj kʼamaʼn majtak tuʼn tel tyol Samuel aj lamanita twitz aj otak kʼunjtak jun tyemp.

6. Bix nkeʼtzan tuʼn cyxmocchan cyiʼj cyermano, bix nxiʼ cymaʼn cyjaʼw: Lutzan luʼ maʼ tzicyʼ tyempʼ bix naʼx cyel tyol Samuel twitz; que cyjaʼtzan tumal, nok gana cytzalajbila bix cyocslabila tiʼj ajo.

7. Bix cyjaʼtzan o cybincha nim chcyinbil tuj cyakil nimak tnam; bix ajke ocslaʼn cyuʼn i octen bisal, bix tzaj tchi que bala a jun tuʼmal miʼn chicyʼke aj otak chi kʼunj jun tyempca.

8. Per lutzan luʼ, cucx i ayon bix ntiʼ baj cycʼuʼj tiʼj aj oc tul kʼij ajo bix aj konicyʼan bix aj juntl kʼij, que lonxa icytzan jun kʼij aj ntiʼ konicyʼan tuj, tuʼntzan tel cynicyʼ tiʼj que aj cyocslabil nyaʼ nok ganatak.

9. Bix bajtzan que ajke nyaʼ ocslalke cyaj cykʼoʼn jun kʼij tuʼn tel cywiʼ cyakilkej ocslal cyiʼjke nabil bann, oʼcxcatzala ka ma tzicyʼ techaklil aj kʼamaʼn maj tuʼnj profeta Samuel.

10. Bix banttzan que aj Nefi, aj tcʼwaʼl Nefi, nnoc ten bisal wena aj toc tqueʼyin tnachal cyuʼnke xjal tuj ttanma.

11. Bix bantzan, nxiʼ bix ncub ẍmejeʼ bix mocʼl twitz txʼotxʼ bix nnoc ten nal Dios tuʼn cyakil tipamal tiʼj ttanma, icytzanjo, tzaʼnx cytencakej attak cycubil biyoʼn tuʼn tlaj cyocslabil tiʼj nabil te cyman cyajna bant.

12. Bix bant que cyakil junca kʼij nan Dios tuʼn cyakil tipamal bix lutzan luʼ, aj tyol Dios ul tucʼal, ntzaj tmaʼn cyjaʼw:

13. ¡Kʼiʼn jaw twiʼya bix tjaw tzalaja, bix lutzan luʼ, nlekʼan ttzaj lakʼeʼ tyemp; bix tuj konicyʼan jaʼla oc cxel kʼot techaklil, bix nchiʼj chin nula twitz txʼotxʼ tuʼn t-xiʼ nyecʼana cye xjal que ocx chin nel twitz tzaʼnx cytenca cosas oʼ cheʼx kʼamet tuʼn cytziʼke nprofetiya sant!

14. Lutzan luʼ, chin nul cyiʼj wecyʼ tuʼn tel twitz cyakilkej cosas aj oʼ chi nkʼamantiya te cye cycʼwaʼl xjal atxax ttzajlen keʼ twitz txʼotxʼ, bix tuʼntzan tel twitz aj tbancʼuʼj Mambaj tzancx te Cʼwaʼlbaj: te Mambaj nok tuʼn nlaja, bix te Cʼwaʼlbaj nok tuʼn tlaj nchibajala. Lutzan luʼ, nlekʼan ttzaj lakʼeʼ tyemp, bix tuj konicyʼan jaʼla xel kʼot techaklil.

15. Bix banttzan que ajke yol i tcʼam Nefi i el twitz, bix tzaʼnx i kʼunjtl; tuʼn lutzan luʼ, aj tex kʼij, ntiʼ klolj, bix nkeʼ tuʼn tjaw naj cynabil tnam tuʼnj ntiʼ oc klolj aj tul konicyʼan.

16. Bix nimkaj ntiʼ otak tzʼocx cyocslaʼn cyyolke profetas i cub tzʼak twitz txʼotxʼ, bix icyaj icytzan cyimnaka, tuʼnj el cynicyʼ tiʼj que otak kʼuchj aj banan tiʼj cyuʼn tuʼn cybiyon cyiʼjkaj ocslaʼn cyyol profetas cyuʼn; tuʼn otak yecʼat aj techaklil aj kʼunj jun tyempca.

17. Bix nkeʼtzan tuʼn tcub tuj cywitz que aj tCʼwaʼl Dios ya joratx tuʼn tultl; icytzanjo, tuj jun yol, tzaʼnx cytenc xjal twitz txʼotxʼ cyakil, asta mas tuj telax kʼij asta max tuj tjawatz kʼij, tzaʼnx tuj taʼ ttxlaj kʼij te jawna tzanx tuj ttxlaj kʼij te cubna, nim jaw naj cynabil que nchi cub tzʼak twitz txʼotxʼ;

18. Tuʼntzanj el cynicyʼ tiʼj que otak cyakʼ profetas aj ax toc cyiʼjke cosas cyuj nim abkʼi, bix aj techaklil otak tzʼel twitz, bix nkeʼtzan tuʼn ttzaj tchi cyiʼj nok tuʼn tlaj cynachal bix aj ntiʼ ocx cyocslaʼn.

19. Bix banttzan que ntiʼ klolj tuj cyakilj konicyʼan ajo, sino que o ten spicyʼan wena lonxa icytzan chilca kʼij. Bix banttzan que aj prim njaʼwal kʼij te acʼaj, ax aj tbe kʼin; bix el cynicyʼ tiʼj que a kʼijjo attak t-itzʼal Kajaw tuʼnj otak kʼonjtz techaklil.

20. Bix cyakilka cosas otak chi bant, icytzanjo, bix mitiʼ cyaj txʼakeʼ jun ni yol cyakilca, tzanxax cyyolke profetas.

21. Bix banttzan que ax o jaw canet jun acʼaj cheʼw, icyxax tzaʼn cyyol profetas.

22. Bix banttzan que biʼx keʼ tuʼn tsipat slaʼj yol cyxol tnam, tuʼn satanás, tuʼntzan tcyiwax cycʼuʼj tuʼn mi tocx cyocslaʼn cyiʼjkaj techlil bixke binchben nim cyipamal aj otak cyil; bix part tiʼj slaʼj yol bix aj sabubil, aj tnimal tnam ocx cyocslaʼn bix nmeltzʼajtzan cyanma tucʼ Kajaw.

23. Bix banttzan que aj Nefi bix nimke txkantl nchex cyxol tnam, nchoc ten biyal tuʼn tajtz tiʼj cyanma bix tuʼn tbant jun najsbil tiʼj twitz cyil. Bix cyjaʼtzan aj tnam nkeʼ juntl el te acʼaj tuʼn tneben tiʼj tzalajibil tuj nimak tnam.

24. Bix ntiʼ yol kʼunj oʼcxke jun jteʼ keʼ tuʼn cypacban, bix oc cynicʼan tuʼn cyyecʼan tiʼj icytzan ntmaʼn Tuʼjal, que nyaʼ il tiʼj tuʼn tqueʼyat aj tley Moisés; bix tujtzan ajo nchel tzacj tiʼj, nok tuʼnj ntiʼ otak tzʼel cynicyʼ cyiʼj Tuʼjal.

25. Per nbanttzan que ntiʼ tuʼn tel cykʼij tuʼn cymeltzʼaj, bix cub tuj cywitz tiʼj cypaj, tuʼnj xiʼ txʼolbet cye que naʼx tel baj ley twitz, bix que il tiʼj tuʼn tel twitz cyakilca; icytzanjo, pon cyucʼal aj yol que il tiʼj tuʼn tel twitz; que mi jun part tuʼn tex jolpaj ka naʼxtak tel twitz cyakil; cyjaʼtzan, que tujx abkʼi ajo xiʼ yecʼat cye aj cypaj, bix tzaj cykʼamaʼn cypalt.

26. Cyjaʼtzan el baj twiʼj abkʼi noventa y dos, que tzaj tiʼnke acʼaj tchi-al te tnam nok tuʼn tlaj techklil otak chi yecʼat, icytzan cyyol profetas sant.

27. Bix banttzan que aj abkʼi noventa y tres ax tuj tchi-al japan baj, per miʼntzan cyekaj nach te Gadiantón nchankʼintak tjakʼ chicʼul nok i labt tiʼj nimak tnam; tuʼnj cyiwtak cyligar eʼwantak jatuma oc t-xiʼ cyewan cyib, que ntiʼx i cub cyuʼn tnam; cyjaʼtzan, bant nim biyenj cyuʼn bix matijke biʼyan bant cyuʼn cyxol tnam.

28. Bix banttzan que tuj abkʼi 94 nkeʼ tuʼn cychmet nim tuʼnj nimke nefitas nach i ok bix cycalon cyib cyxol; bix tuʼn ajo o takʼ nim bix cyiʼj nefitas aj ax i cyajten tuj país.

29. Bix ajo ax o takʼ nim bis cyiʼj lamanitas; tuʼnj lutzan luʼ, attak nim cycʼwaʼl, que otak chʼiy bix chmet cyuj abkʼi asta cyoc tuj matij cyabkʼiyal, xiʼ cykʼon cyib tiʼj yol cyeyax bix slaʼj cyeke juʼn zoramitas, asta toc cyjunan cyib tiʼj cʼoloj te Gadiantón.

30. Bix cyjaʼtzan ax bis i ten lamanitas, bix ajtz cyipamal, tiʼj cyocslabil bix cyxtis, nok tuʼn tlaj tnachal cyeke acʼaj xjal.