1. Bix banttzan aj tjaxlenxa Jesús tuj cyaʼj, nchel til tzaʼnx cytenca xjal, bix ntikʼ teylax te juʼn t-xuʼjal bix tcʼwaʼl, nchaʼjal meltzʼaj cyja.

2. Bix nxiʼ cysipan naj tuj tnam, cwando naʼxtak tul konicyʼan, aj tpacbal que otak tzʼoc cyqueʼyin Jesús cʼoloj xjal. Bixque otak bant takʼan baʼnte cye, bixque tuj juntl kʼij tuʼn tcub tyecʼan tib juntl el cywitz nimtl xjal.

3. Icytzanjo, bix tujtzan akʼbil nnel naj tpocbal te acʼaj tiʼj Jesús; bix atzanjo xiʼ tsipan naj tib cyxol tnam, que nimxix wena, icytzanjo, otak chʼiy jun tajlal, i akʼnan cyakil konicyʼan tuʼn cyakil cycʼuʼj tuʼntzan cyten, tuj prim cyjaʼ ttzaj, tuj ligar jatuma tuʼn tcub tyecʼan tib Jesústl.

4. Tujtzanj kʼij cyjaʼ ttzajtl, cwando cychmon cyib xjal cyakil, lutzan luʼ, bantzan que Nefi bix termano, aj otak jaw itzʼj juntl el tuʼnkʼa cyxol cyimna, bix atzan tbi aj Timoteo, bix tzaʼnx tcʼwaʼl, atzan tbi Jonás, bix icyx Matoni, bix Matoníah, aj termano, bix Kumen, bix Kumenoni, bix Jeremías, bix Shemnón, bix Jonás, bix Sedecías, bix Isaías — bix atzan cybikej txnaʼkʼtzben Jesús otak chi jaw tsicʼoʼn — ncheʼx lakʼeʼ bix ncub cytxolban cyib cymij cyakil xjal.

5. Bix lutzan luʼ, nimxix xjal wena, bix cuʼbtzan cypaʼn cyib tuj cablaj cʼloj.

6. Bix ajke cab laj cub cyxnakʼtzaʼn ajke xjal cyakilxa; bix lutzan luʼ, bant tuʼn cycub ẍmejeʼ twitz txʼotxʼ bix tuʼn cynan Dios twitz Mambaj tuj tbi Jesús.

7. Bix ajke txnaʼkʼtzben ax inan Dios twitz Mambaj tuj tbi Jesús, bix banttzan que nchi jaw weʼ bix nchoc ten xnakʼtzal tyol Jesús cye tnam.

8. Bix despwestzan t-xiʼlen cytxʼolbankej ax yol atak txiʼ tkʼamaʼn Jesús (bix ntiʼ cub meltzʼutkej yol otak tkʼamanta Jesús), lutzan luʼ, nchi cub ẍmejeʼ juntl maj bix inan Dios twitz Mambaj tuj tbi Jesús.

9. Bix xiʼ kaʼnan aj masxix cyajbil, bix aj cyajbil atzanj tuʼn ttzaj kʼoʼn Xewbaj Sant.

10. Bix cwandatzan cybaj nan Dios tuj tuʼmal ajo, ncheʼx max ttziʼ aʼ, bix nchoc lapeʼ cyakil xjal cyiʼj.

11. Bix banttzan ncuʼx Nefi tuj aʼ, bix nbiyantzan.

12. Bix njatz tuj aʼ bix nkeʼ tuʼn tbiyan cyiʼjkej otak chi jaw tsicʼoʼn Jesús.

13. Bix banttzan que cybaj biyan cyakil, bix otak chi jatz tuj aʼ, nnul Xewbaj Sant cyibaj, bix inoj tuʼn Xewbaj Sant bix kʼakʼ.

14. Bix lutzan luʼ, nchocx mukʼan lonxa icytzan kʼakʼ etz tuj cyaʼj; bixkej tzaʼnx cytenca xjal o cyil bix o cyma ax toc tiʼjjo; bix nchetz ángel tuj cyaʼj, bix nchi tzaj kʼolbeʼn.

15. Bix banttzan que myentras nchi kʼin tiʼj cyikatz cye ángel, lutzan luʼ, nnul Jesús bix nnocx ten tuj cymij bix nnakʼnan cyiʼj.

16. Bix banttzan cye ntzaj yolan cyucʼ cyakil xjal, bix tzaj tmaʼn tuʼn cycub ẍmejeʼ juntl el twitz txʼotxʼ, bix ax xiʼ tmaʼn tuʼn cycub ẍmejeʼ ke txnaʼkʼtzben.

17. Bix banttzan taj cycub ẍmejeʼ cyakil twitz txʼotxʼ, nxiʼ tmaʼn cye txnaʼkʼtzben tuʼn cynan Dios.

18. Bix lutzan luʼ, nkeʼ tuʼn cynan Dios; bix nchi nan Dios twitz Jesús, bix cyma cye axix cyAjaw bix cyDiosx.

19. Bix banttzan nnel lakʼeʼ chʼin Jesús cyxol bix ncub mocʼeʼ twitz txʼotxʼ, bix xiʼ tmaʼn:

20. Tat, chjonta cxel nkʼoʼna teya tuʼnj ma tzaj tkʼoʼna Xewbaj Sant cyekej aj ma chi jaw nsicʼoʼna luʼ; bix tuʼntzan tlaj cyocslabil wiʼja ma chi jaw nsicʼoʼna cyxolke demástl twitz txʼotxʼ.

21. Tat, cxel nkaʼnna teya tuʼn ttzaj tkʼoʼna Xewbaj Sant cyekaj cyakil ma tzʼoc cyocslaʼn tiʼj cyyol.

22. Tat, maʼ tzaj tkʼoʼna Xewbaj Sant cye tuʼnj at cyocslaʼbil wiʼja, bix loʼn tuʼna que at cyocslabil wiʼja, tuʼnj ntbintaya que nchi nan Dios wiʼja; bix nchi naʼn Dios wiʼja tuʼnj intina cyucʼal.

23. Bix jaʼlatzan, Tat, cxel nkaʼnna teya cyiʼj, bix ax cyiʼj tzaʼnx cytencakaj oc cocax cyocslaʼn cyyol tuʼn cyocslan wiʼja tuʼntzan ntena cyucʼal icytzan teʼ, Tat, aya wucʼala, tuʼntzan koc te junx.

24. Bix banttzan que aj tbajlen nan Jesús Dios twitz Mambaj, npon lakʼeʼ cyiʼj txnaʼkʼtzben, bix lutzan luʼ, cucxtak cynan Dios twitzkʼa bix ntiʼ xiʼ cycoʼlan; bix ntiʼ el más yol cyuʼn, tuʼnj kʼamaʼntak oc ttzaj cye aj ti tkal tuʼn t-xiʼ cykaʼnan, bix nojnaka tucʼ tbanal cyakil.

25. Bix banttzan que nchi baj cyʼiwlaʼn tuʼn Jesús myentras nxiʼtak cykʼamaʼn cy-najl Dios te, bix aj twitz o kopan cyibaj, bix xiʼ ttxakoʼnke tuʼn spicyʼan tuj twitz; bix lutzan luʼ, nchi meltzʼaj pur sak icytzan witzbaj bix ax icyx t-xbalan Jesús; bix lutzan luʼ, aj cysakal o takʼ cyakil tsakal, icytzanjo, ntiʼwtla twitz txʼotxʼ aj cosa sak icytzan cysakal.

26. Bix nxiʼ tmaʼn Jesús cye: Cucx chi nana Dios; sinbargo, ntiʼ xiʼ cycoʼlan cynana Dios.

27. Bix nnel lakʼeʼ juntl el cyiʼj bix ncub mocʼeʼ twitz txʼotxʼ; bix nnan Dios te acʼaj twitz Mambaj, xiʼ tmaʼn:

28. Tat, chjonta cxel nkʼoʼna teya tuʼnj maʼ baj ttxʼajoʼna ajke ma chi jaw nsicʼoʼna nok tuʼn tlaj cyocslabil, bix cxel nkaʼnna teya cyibaj, bix ax icyx cyibajkej chocax ocslan te cyyol, tuʼntzan cytxʼajet wiʼja, tzaʼn aj ocslabil tiʼj cyyol, bix tzanxax nchi txʼajet wiʼja.

29. Tat, miʼn txiʼ nkaʼnna teya tiʼj txʼotxʼ, sino cyiʼjkej maʼ chi tzaj tkʼoʼna wecyʼ te twitz txʼotxʼ, nok tuʼn tlaj cyocslabil, tuʼntzan cytxʼajet wiʼja, tuʼntzan wocxa cyucʼal icytzan teʼ, Tat, aya wucʼala, tuʼntzan junx tuʼn koc, tuʼntzan at tzalajibil wiʼja cyucʼal.

30. Bix taj t-xiʼtzan tkʼamaʼn Jesús kej yol ajo, nnaʼjal meltzʼaj cyucʼ txnakʼtzben, bix lutzan luʼ, inan Dios tuʼn cyakil cycʼuʼj bix ntiʼ xiʼ cycoʼlan; bix te acʼaj nkopan juntl el twitz cyibaj; bix lutzan luʼ, sak ijoc, icytzan Jesús.

31. Bix bant nnel lakʼeʼ chʼintl juntl el cyiʼj, bix nnoc ten nal Dios twitz Mambaj;

32. Bix aj akʼbaj nlay bant tkʼaman tiʼj aj yol jatz tuʼn, aj tnan Dios, bix mi jun xjal jaʼca bant tuʼn tcuʼ ttzʼiban kej tyol tuj t-orasyon.

33. Bix tzaʼnx cytenca xjal o cybinta bix ncyma aj ax toc tiʼj; bix nchi jakettzan cyanma, bix nneltzan cynicyʼ tiʼj tuj cyanma ajke yol tuj t-orasyon.

34. Oʼcxtzan chʼin, que matijka bix cyeʼyaxka tyol tuj t-oasyon, que milay bant cytzʼibanjtz, mix jaʼca bant tuʼn t-xiʼ tmaʼn xinak.

35. Bix banttzan que taj tel baj twiʼ t-orasyon Jesús, nnaʼjal meltzʼaj cyucʼ txnakʼtzben, bix nxiʼ tmaʼn: Mi jtoja oʼ wila ocslabil matij cyxol tzaʼnx cytenca Judios; cyjaʼtzan jluʼ, milay ma txiʼ nyecʼana matij binchben nim tipamal, nok tuʼn tlaj ntiʼ cyocslabil.

36. Ax toc cxel nmaʼna cyeya que mijun cyekejo oʼ til cosas matij icytzankaj cyeya ma cyila, mix tuʼn cybinta ajke cosas matij icytzankaj cyeya ma cybintaya.