1. Bix banttzan que nxiʼ tmaʼn Jesús cyeke txnakʼtzben tuʼn t-xiʼ cyiʼn pan bix bin.

2. Bix elcatzan nxiʼ kʼiʼcj, nxiʼ tmaʼn cye xjal cyakil tuʼn cycub tutzʼe.

3. Tajtzan cypon txnaʼktzben tucʼ pan bix bin, njaw tiʼn pan, ncub tiʼn tmij bix nbaj tcyʼiwlaʼn; bix nxiʼ tkʼoʼn cye txnaʼktzʼben bix xiʼ tmaʼn tuʼn cywaʼn.

4. Bix cybajtzan waʼn bix cynanta que otak chi kʼajen, xiʼ tkʼamaʼn cye tuʼn t-xiʼ cykʼoʼn cye cyakil xjal.

5. Bix cybajtzan waʼn xjal cyakil bix cynanta que otak chi kʼajen, nxiʼ tmaʼn cye txnaʼkʼtzben: Lutzan luʼ, aj jun cyeʼ oc cbajal cyʼiwlat; bix cxel nkʼoʼna tipamal tuʼn tcub tiʼn tmij pan, bix tuʼn tbaj tcyʼiwlaʼn bix tuʼn t-xi kʼot cyekej tuj nglesya, cyeke tzaʼnx cytenca aj cocʼx cyocslaʼn bix chi biyal tuj nbicyʼa.

6. Bix il tiʼj ccyilabala oc tbant jluʼ, icytzanj wecyʼ maʼ bant, icytzanj maʼ cub wiʼna tmij pan, bix maʼ baj ncyʼiwlaʼna bix ma txiʼ nkʼoʼna cyeya.

7. Bix cbantel ajo cyuʼna tuj nabil te nxumlala aj maʼ txiʼ nyecʼana cyeya. Bix atzan jun tuʼmal ax toc que cucx cycʼujlana wiʼja. Bix ka cucx cycʼujlana wiʼja, oc ctel nXewa cyucʼala.

8. Bix banttzan que aj tbajlentzan tkʼamaʼn kej yol ajo, nxiʼ tmaʼn cye txnakʼtzben tuʼn txiʼ cyiʼn bin bix tuʼn cycʼan tiʼj, bix ax tuʼn t-xiʼ cykʼoʼn cyeke tzaʼnx cytenca xjal tuʼn t-xiʼ cycʼaʼn.

9. Bix banttzan que icy oc cyuʼnjo, bix i cʼan, bix i noj; bix nxiʼ cykʼoʼn cyeke xjal cyakilxa, bix akajo i cʼan, bix i noj.

10. Bix banttzan cyuʼn txnaʼkʼtzben j-ajo, nxiʼ tmaʼn Jesús cye: Cyeʼyaxkaya tuʼnj maʼ bant cyuʼna; tuʼnj atzanjo nchel nmandamyenta twitz bix ntakʼ aj ax toc twitz Mambaj que cuʼyan cyuʼna tuʼn tbant aj nxiʼ nmaʼna cyeya.

11. Bix cucx cbantel j-ajo cyuʼna cyiʼjkaj nnaʼjtz ti cyanma tiʼj tnachal bix ajke chi biyal tuj nbicyʼa; bix cbantel cyuʼna te nabil te nchicyʼela aj oʼ tzʼel bekan cyiʼja, tuʼn tzan t-xi cymaʼna ax toc te Mambaj que cucx chi cʼujlala wiʼja. Bix ka cucx machi cʼujlana wiʼja, oc ctel nXewa cyucʼala.

12. Bix chi xel nmandarana tuʼn cybantj cosas ajo cyuʼna. Bix ka maxax chi bant aj-cosas cyuʼna, cyeʼyaxkaya tuʼnj a binchaʼnkaya tibaj nxaka.

13. Per cyakilkaj cyxola ma bant yinjo cyuʼn, miyaʼ binchaʼnkajo tibaj nxaka, sino a taʼ cykʼukal tuj txatzʼaʼn; bix octzan ttzaj jbal, bix oc cytzaj kʼakab, bix oc t-xumanke cykʼikʼ, bix ma tzʼoc cyiʼj, chi bel tzʼak, bix ajtzan ttziʼ infierno ya bann ten tuʼn cycʼamet.

14. Cyjaʼtzan ten, cyeʼyaxkaya, ka ma txiʼ cycʼuʼnke nmandamyenta aj oʼ tzaj tsamaʼn Mambaj kina, tuʼn cyxiʼ nkʼoʼna cyeya.

15. Aj ax toc, ax toc cxel nmaʼna cyeya que il tiʼj tuʼn cycwentan cyiba bix tuʼnxax cynana Dios, pyorsanka kʼiʼn dyablo cyuʼna, bix chi xel kʼiʼna pres tuʼn.

16. Bix maʼ chin nana Dios cyxola, cyjaʼtzan chi nala Dios tuj nglesya, cyxolke ntanmiya aj nnajs tiʼj cyanma tiʼj tnachal bix nchi biyan tuj nbicyʼa. Lutzan luʼ, a kina spicyʼan; maʼ txiʼ nkʼoʼna te yecʼbil cyeya.

17. Bix bajtzan que tbajlenxix tmaʼn Jesus ke tyol cye txnakʼztben, nmeltzʼ juntl el cyibaj ke xjal bix tma:

18. Ax toc, ax toc cxel nmaʼna cyeya que ilx tiʼj tuʼn cycwentana bix tuʼnxax cynana Dios, pyorsanka nchi cub tzʼaka tuj tcwent dyablo; tuʼnj tajbil Satanás tuʼn cyoc etzana te partiyil icytzan trigo.

19. Cyjaʼtzan ten, ilxax tiʼj tuʼn cynana Dios twitz Mambaj tuj nbicyʼa;

20. Bix octzan t-xiʼ cykaʼnna te Mambaj tuj nbicyʼa, ocslaʼn cyuʼna tuʼn ttzaj cyiʼna, ka tuj xtis aj cyajbila, oc cxel kʼot cyeya.

21. Chi nana Dios twitz Mambaj tucʼax cyfamilya, cucʼx puraxax tuj nbicyʼa, tuʼntzan cycyʼiwlet cyxuʼjala bix cycʼwaʼla.

22. Bix lutzan luʼ, cocʼx cocal cychmon cyiba; bix mi jun aj miʼnwt cycʼama tuʼn ten cyucʼala oc toc cychmon cyiba, tnejal xel cykʼoʼna tuʼmal cye tuʼn cyul lakʼeʼ cyiʼja, bix miʼn aj miʼnwt cycʼama;

23. Sino que oc chinala Dios cyiʼj, bix miʼn chex cyicʼana; bix katzan ma chul cocʼxix cyucʼala, xel cykaʼnna te Mambaj cyiʼj tuj nbiya.

24. Cyjaʼtzan jluʼ, cykʼoʼn jaw cyspicyʼana twitz cyaʼj tuʼntzan tkopan twitz txʼotxʼ. Lutzan luʼ, a kina spicyʼan aj tuʼn tjaw cykʼoʼna twitz cyaʼj: atzan aj oc cyqueʼyina bant wuʼna. Luʼtzan luʼ, ma chin noc cyqueʼyina xiʼ nnana Dios twitz Mambaj, bix tzaʼnx cytencaya stiwakaya tiʼj.

25. Bix ma cyila aj xiʼ nmaʼna que mi jun keya tuʼn tel lakʼeʼ, sino que tuʼn cytzaja wiʼja, tuʼntzan toc cymacona bix tuʼn toc cyqueʼyina; bix cyjaʼtzan cteʼla cyuʼna twitz txʼotxʼ; bix alcyej ma cub tiʼn tmij nmandamyenta, nxiʼ tkʼon tib tuj tmoybil dyablo.

26. Bix banttzan que taj tbaj tkʼamaʼn Jesús kej yol ajo, nnaʼjal meltzʼaj twitz cyucʼ txnakʼtzben aj otak chi jaw tsicʼoʼn, bix nxiʼ tmaʼn cye:

27. Lutzan luʼ, aj ax toc, ax toc cxel nmaʼna cyeya que cxel nkʼoʼna juntl mandamyent cyeya, octzan t-xiʼ baj nkʼamaʼnajo cuʼyantzan tuʼn wicyʼa bix tuʼn waja tucʼ nMana tuʼn cyel txkantl mandamyent twitz aj oʼ chi tzaj tkʼoʼn wecyʼ.

28. Bix lutzan luʼ atzan mandayent aj cxel nkʼoʼna cyeya: miʼn cycʼama mijun aj loʼn cyuʼna tuʼn tmojan tiʼj nchibajala bix nchicyʼela ka miyaʼ ax toc tbanal, oc tjaw cyiʼna twitz cyiʼj.

29. Tuʼnj alcyekaj ma chex waʼn te nchibajala bix ma cheʼx cʼan te nchicyʼela myaʼ tbanal ke, bix nchi waʼn bix nchi cʼan tiʼj jun sentesn te cyanma; cyjaʼtzan jluʼ, ka loʼn cyuʼna jun xjal miyaʼ ax toc baʼn tuʼn twaʼn bix tuʼn tcʼan tiʼj nchibajala bix nchicyʼela, miʼn tzʼoc cytzakpiʼna.

30. Oʼcxtzan, miʼ tzʼel cylajoʼna cyxola, sino que oc chi akʼnala tiʼj bix chi nala Dios twitz Mambaj tiʼj tuj nbicyʼa; bix ka ma tzʼajtz tiʼj tanma bix ma biyan tuj nbicyʼa, tons oc cocal cycʼamoʼna, bix cxel cykʼoʼna nchibajala bix nchicyʼela te.

31. Per ka mi ma tzʼajtz tiʼj tanma tiʼj tnachal, miʼn tzʼoc tajlal cyxolkej tuj ntanmiya, tuʼntzan mi cycub tkʼuchan, tuʼnj lutzan luʼ, loʼnwa cywitz nneʼl, bix ajlaʼnka.

32. Oʼcxtzan chʼin, miʼn tzʼex cylajoʼna tuj ja jatuma nchi chmeta mix tuj ligar jatuma nchi nana Dios, tuʼnj ilx tiʼj tuʼn cyakʼnana cyiʼj; pwes ntiʼ loʼn cyuʼna ka jaca chi maktzʼaj, bixmo ka ma tzʼajs tiʼj cyanma tiʼj tnachal, bix chultzan wucʼala tuʼn tcyakil cycʼuʼj, bix chi kʼanateltzan wuʼna; bix akaya tuʼmal tuʼn t-xiʼ kʼit colbil cyiʼj.

33. Cyjaʼtzan jluʼ, cyxoʼn ocxa kej yol maʼ cheʼx nkʼoʼna cyeya tuʼn tbant, tuʼntzan mi cycub tzʼaka tuj jwisyo; ¡tuʼnj becyʼbil twitz aj cxel tuj jwisyo tuʼn Mambaj!

34. Bix cxeltzan nkʼoʼn aj mandamyent luʼ cyeya nok tuʼnj aj xcyakbil at cyxola. Bix cyeʼyaxkaya ka ntiʼ ma ten xcyakbil cyxola.

35. Bix jaʼla matzan chinxa tucʼ Mambaj, tuʼnj baʼn tuʼn nxiʼya tucʼal nok tuʼn ntzalajbila cyiʼja, bix aj ncʼuʼja njatz cyiʼja.

36. Bix banttzan taj tbaj yolan Jesús nnoc tmacoʼn tuʼn tkʼab ajke txnakʼtzben otak chi jaw tsicʼoʼn, juʼn toc tmacoʼn, asta cyoc tmacoʼn cyakilka, bix nxiʼyaxa tmaʼn tyol taj nnocaxa tmacoʼn juʼn.

37. Bix ntiʼ cybinta xjal cyakilxa ajke yol xiʼ tkʼamaʼn, cyjaʼtzan jluʼ, ntiʼ xiʼ cymaʼn ax toc tiʼj-jo; per atzanke txnaʼkʼtzben cyma ax toc tiʼj que tzaj kʼon cyipamal tuʼn t-xiʼ cykʼoʼn Xewbaj Sant. Bix yajxatzan cxel nyecʼana cyeya que axix toclen tiʼj-jo.

38. Bix banttzan que aj tbajlen tmacoʼn Jesús cyakilke, npon chʼin muj bix juc tcub cyibaj xjal cyakilxa, que ya ntiʼ cyilt Jesús.

39. Bix myentras jucl muj cyibaj, njaw tʼicypaj tuj bix njax tuj cyaʼj. Bix ajke t-xnakʼtzben o cyma ax toc tiʼj que jax tuj cyaʼj te acʼaj.