1. Bix nchi bettzanke txnaʼkʼtzben Jesús ncheʼx paseaʼl bix nchi pacbantzan cyiʼjke cosas otak cybinta bix otak cyil, bix nchi biyantzan tuj tbi Jesús, banttzan que nnoc cychmon cyib, bix nnoctzan cychmon cyib tuj jun matij tipamal orasyon bix tuʼn t-apet weʼyj.

2. Bix ncub tyecʼan tib Jesús cywitz juntl el te acʼaj, tuʼnj kit t-xiʼ cykaʼnan te Mambaj tuj tbi; bix nnultzan Jesús bix ncub ten tuj cymij, bix nxiʼ tmaʼn cye: ¿Ti tkal cyajbila aj tuʼn t-xi nkʼoʼna?

3. Bix nxiʼtzan cymaʼn te: Tat, kajbila tuʼn ttzaj tmaʼna kecyʼ aj tbi glesya tuʼn toc kuʼna tej glesya luʼ; tuʼnj atke tiʼ tkal tuj tnam luʼ aj ax toclen cyiʼj yol luʼ.

4. Bix nnaʼjaltzan ttzakʼwen Kajaw: Ax toc cxel nmaʼna cyeya: ¿Ti kuʼn nbaj cyxcyʼakan cyib tnam bix nchi xmucchan tuʼn tlaj j-ajo?

5. ¿Minaʼx tjaw cyschʼiʼna ajke tuʼjal ntyoʼla il tiʼj tuʼn cycʼama cyibaja aj tbi Cristo, a nbicyʼa? Porque tuʼnj bibaj ajo oc chi txaquetala tuj twiʼpan kʼij;

6. Bix alcyej ma tcʼam tibaj aj nbicyʼa, bix ax tbanaljo asta oc tel baj twiʼ, atzanjo oc cletal tuj twiʼpan kʼij.

7. Cyjaʼtzan jluʼ, nok nicyʼpunx ma bant cyuʼna, bantx cyuʼna tuj nbicyʼa; bix cxel cykaʼnna te Mambaj tuj nbiya, tuʼn ttzaj tcyʼiwlan glesya tuʼn nlaja.

8. ¿Bix tzaʼntzan nglesya ka ntiʼ ma tikʼ nbicyʼa? Porque ka jun glesya kʼiʼn tbi Moisés tuʼn, tons tglesya Moisésjo; bix ka ma tzʼoc tbi te jun alxcyex, tons tete xjal tglesyajo; pero ka kʼiʼn nbicyʼa tuʼn, tons wecyʼa nglesyajo, ka binchan tkʼukal tibaj nbangelya.

9. Ax toc, ax toc cxel nmaʼna que tcub cykʼukal tibaj nbangelya. Cyjaʼtzan jluʼ, aj tiʼ tkal ctzajal cytxacoʼna, cytxacontza tuj nbiya; icytzan tenj ka ma tzaj cykaʼnna te Mambaj te baʼn te glesya, oc chi tzajal biʼna tuʼn Mambaj, ka ma bant cyuʼna tuj nbiya;

10. Bix ka a binchan glesya tibaj nbangelya, tons twitzela Mambaj ctzajal tyecʼan tecax tbinchben tibaj.

11. Pero ka miyaʼ binchan tibaj nbangelya, sinoʼ tuj cybinchben xjal, bixmo tuj tbinchben dyablo, ax toc cxel nmaʼna que oc chi tzalajil tiʼj cybinchben tuj jun tyempx, bix cyjaʼtzan ttzaj tuʼn tjapan baj twiʼ, bix octzan chi jawal txʼemat bix chi xel kʼot tuj kʼakʼ, que tujjo ntiʼ tuʼn tmaktzʼaj.

12. Aj cyakʼanben cucx cxel cyiʼn, nokna tuʼnj cybinchben aj chi bajal kʼuchat; cycʼujlanxtzan ajke cosas maʼ txiʼ nmaʼna.

13. Lutzan luʼ, oʼ txiʼ nkʼoʼn nbangelya cyeya, bix atzan nbangelya aj oʼ txiʼ nkʼoʼna maʼ chin nula twitz txʼotxʼ tuʼn wela twitz aj tajbl nMana, tuʼnj akʼa tzaj saman te wecyʼ.

14. Bix a nMana ma tzaj saman te wecyʼ tuʼn njawa twitz crus. Bix ocxatzan njawa twitz crus, jaʼca tzaj wiʼna wuʼnx wiba wiʼjxa ajke cyakilka xjal, bix ax icyxtzan we lonxa injaw kʼina cyʼun xjal, ax icyx cye, tuʼn cyjaw tuʼn Mambaj, tuʼntzan cyul nwitza bix tuʼntzan cyoc tuj xtis según aj cybinchben, banwtlaka baʼn bixmo nach;

15. Noktzan tuʼnj tuʼmal ajo injawa twitz crus; bix txkantltzan, según aj tipamal Mambaj, chi tzajal wiʼna cyakilka xjal wiʼja tuʼntzan cyoc tuj xtis tzaʼnx aj cybinchben.

16. Bix cbanteltzan que alcyej cʼajs tiʼj tanma tiʼj tnachal bix ma biyan tuj nbiya, content cocal; bixka ma ten tbanal ocxa tjapan baj twiʼ, lutzan luʼ, ctel te tbanal wuʼna twitz nMana tuj aj kʼij oc wula xtisal tiʼj ke teʼ twitz txʼotxʼ.

17. Bix alcyej miyaʼ tbanal ma ten asta oc tjapan baj twiʼ atzanjo cjawal txʼemat bix cocatz tuj kʼakʼ, jatuma mi jtoj tuʼn tmaktzʼaj juntl el, nok tuʼn tlaj xtis te Mambaj.

18. Bix atzan yoljo oʼtzaj tkʼoʼnkʼa cyeke cycʼwaʼl xjal; bix atzan tuʼmaljo tuʼn cyel tyol twitz aj ke yol oʼ cheʼx tkʼamaʼn; bix ntiʼ nnicʼan, sino que nnel twitz ke tyol cyakil.

19. Bix mi jun nach jaʼca tzʼocx tuj tkʼuʼkʼbl; cyjaʼtzan jluʼ, mijun nnocx tuj tcubil, sino oʼcx aj maʼ ttxʼaj t-xbala tuj nchicyʼela, según tocslabil, aj tuʼn tajs tiʼj tcʼuʼj cyiʼj twitz til cyakil bix aj tbanal asta oc tjapan baj twiʼ.

20. Bix atzan mandamyent jluʼ: Cyiʼn ajs tiʼj cyanma tiʼj tnachal, tzaʼnx cytencaya, ttxaʼnla txʼotxʼ, bix cytzaja wiʼja bix chi biyana tuj nbicyʼa, tuʼntzan cysakixa tuʼn Xewbaj Sant, tuʼntzanj tuj twiʼpan kʼij ateʼkaya nwitza, bix puro sak cyiʼja wena tiʼj cyakil tnachal.

21. Ax toc, ax toc cxel nmaʼna cyeya que atzan nbangelyajo; bix loʼn cyuʼna ajke cosas tuʼn tbant cyuʼna tuj nglesya; ajkaj binchben soc cyqueʼyina xbant wuʼna, axka chi bantel cyuʼna, tuʼntzanj ajke nicyʼca soc cyqueʼyina xbant wuʼna, ax axkajo chi bantel cyuʼna.

22. Que aj tuʼmal jluʼ ka ma chi bant cosas ajo cyuʼna, cyeʼyaxkaya, tuʼnj oc chi jawala twitz cyaʼj tuj twiʼpan kʼij.

23. Cytzʼiban cuba ajke cosas ma cyila bix ma cybiya, per oʼcxtzan chʼin miʼntzan cub cytzʼibana ajke xjan.

24. Cytzʼiban cuba ajke tbinchben tnam luʼ, aj binchben chibantel yajxatl, icytzanj oʼ cub tzʼibat tiʼj aj oʼ tzicyʼ.

25. Pwes lutzan luʼ, cyuʼnkej uʼj aj oʼchi cub tzʼibat, bix ajke chi bel tzʼibat, chocal tnam luʼ tuj xtis; porque noktzan cyuʼnjo cxel kʼamet cye xjal aj tbinchben tuj ewj taʼtak.

26. Lutzan luʼ, tzaʼnx cytencake cosas oʼ chi cub tzʼibat tuʼn Mambaj; cyjaʼtzan jluʼ, oc cocal twitz txʼotxʼ tuj xtis segun kej uʼj tzʼiban maj.

27. Bix tzʼelx cynicyʼa tiʼj akaya chocal te cyjwes tiʼj tnam luʼ, según aj jwisyo cxel nkʼoʼna, aj baʼnx chʼin. Cyjaʼtzan jluʼ, ¿Ti tkal xjal il tiʼj tuʼn cyoca? Ax cxel nmaʼna cyeya, ilx tiʼj tuʼn cyoca icytzan kina.

28. Bix jaʼlatzan ma chin aʼjala tucʼ Mambaj. Bix tiʼj ax toc cxel nmaʼna, nokx nicyʼpun cosas cxel cykaʼnna te mambaj tuj nbiya, chi cxel kʼot cyeya.

29. Cyjaʼtzun, cykananxa, bix oc cycʼama; chi kʼajta, bix cocax jaket cywitza; tuʼntzanj alcyej ma tkana, nul kʼonte; bix alcye ma kʼajt, nnoc jaket twitz.

30. Bix lutzan luʼ, aj ntzalajibla matijjo, bix asta nim, nok tuʼn cylaja, bix icx tiyijil ankʼbil luʼ; icytzanjo, bix ax te Mambaj nkeʼ tcʼuʼj bix icyxka tzaʼnx cytenca ángeles sant, nok tuʼn cylaja bix kej nchi ankʼin jaʼla; tuʼnj mijun jluʼ oc quelal tzacj.

31. Lutzan luʼ, wajbila tuʼn tel cynicyʼa tiʼj, tuʼnj a nchin yolanwa tiʼj tiyijil ankʼbil aj n-ankʼin jaʼla. Bix mijuntzajo quelal naj; bix cabalx aj ntzalajibla cyuʼn.

32. Lutzan luʼ, ntzaj taʼw wiʼja tuʼn tlaj tcyajin tiyijil ix tucʼx jluʼ, tuʼnj chi xeʼl tuj moybil tuʼn, icxtzan atzanjo cʼwaʼlbaj tuj najan; tuʼnj chin xeʼl cʼayana tuʼn ẍkʼan pwak bix sak pwak bix ti cyakil ajo cocal noj puʼt tiʼj bix cpoʼcʼx tel, ix ke lekʼ najnake ix alkʼalke. Ix tujtzan kʼij ajo chin pola lolta cye; nmaktzʼetzn cyakʼanben tibajx cywiʼ.

33. Bix banttzan aj t-xiʼlen baj tkʼamaʼn Jesús kej yol ajo, nxiʼ tmaʼn cye txnaʼkʼtzben: Cyocxa tuj tlamel ja neʼ ttziʼ tuʼnj neʼ twitz tlamel ja, bix neʼ tuj be aj nxiʼ tuj ankʼbil, bix niʼxaka ncanet cyuʼn; per maʼ twitz tlamel ja, bix maʼ tuj be aj nxiʼ tuj camacy, bix nimka nnajblan cyuʼn, asta oc tpon konicyʼan jatuma mi-al nnakʼnantl.