1. Bix banttzan que nxiʼ tmaʼn cye xjal cyakil bix cye txnaʼkʼtzben tuʼn t-xiʼ cycoʼlan cynan Dios; bix xiʼ tmaʼn cye tuʼn mi t-xi cycoʼlan cynan Dios tujxa cyanma.

2. Bix xiʼtzan tkʼamaʼn cye tuʼn cyjaw weʼ. Bix nchi jawtzan weʼ, nchi cyaj weʼ.

3. Bix banttzan ncub tiʼn tmij pan te acʼaj, nbaj tcyʼiwlaʼn bix nxiʼ tkʼoʼn cye txnaʼkʼtzben tuʼn cywaʼn.

4. Bix cybajtzan waʼn, nxiʼ tkʼamaʼn cye tuʼn tcub cyiʼn tmij pan, bix tuʼn t-xiʼ cykʼoʼn cye xjal cyakilxa.

5. Bix t-xiʼtzan baj cykʼoʼn cye xjal cyakil, ax xiʼ tkʼoʼn bin cye tuʼntzan t-xiʼ cycʼaʼn, bix xiʼ tkʼamaʼn cye tuʼn t-xiʼ cykʼoʼn cye xjal cyakil.

6. Bix mixke txnaʼkʼtzben mixke xjal cyakil otak tzaj cyiʼn pan mix bin;

7. Per ax toclen xiʼ tkʼoʼn cywa pan bix cycʼaʼ bin.

8. Bix nxiʼ tmaʼn cye: Alcyej ma waʼn tiʼj pan luʼ, ma waʼn tiʼj nxumlala te tanma; bix alcyej ma cʼan tiʼj bin luʼ, ma cʼan nchicyʼela te tanma; aj tanma mi jtoj tuʼn tnanta wiʼij mix txketan, mas cyeʼyax oc tnanta.

9. Bix cwandatzan cyakilke xjal otak chi waʼn bix chi cʼan, lutzan luʼ, inoj tucʼ Xewbaj; bix nchi jawtzan schʼin tuʼn junx cywiʼ bix itzalaj tiʼj Jesús, aj nnoʼc cyqueʼyan bix ncybiʼn.

10. Bix banttzan taj cyakilka otak chi jaw tzalaj tiʼj Jesús, nxi tmaʼn cye: Luluʼ, jaʼla maʼtzan chin nela twitz mandamyent aj oʼ tzaj tkʼoʼn nMana te tnam luʼ, que a ttxʼaban tiʼj ja te Israel.

11. Oc cpol tiʼj cycʼuʼja que oʼ chin yolana bix oʼ txiʼ nmaʼna que oc telke tyol Isaías twitz — lutzan luʼ, tzʼibanke bix at cywitza bix il tiʼj tuʼn cyxnakʼtzana tiʼj-

12. Ax toc, ax toc cxel nmaʼna cyeya que octzan cyel twitz, tons octzan chi bantel aj oʼ bant tiʼj tuʼn Mambaj tucʼ tnam, aya ja te Israel.

13. Atzankaj ttxʼaban, que oc ctel sipan twitz txʼotxʼ cyakil, oc cjawal chmet max tuj tjawatz kʼij bix telax kʼij, bix tuj txlaj kʼij te cubna bix txlaj kʼij te jawna; bix octzan cpol tuʼn tel cynicyʼ tiʼj cyAjaw Dios aj oʼ colan cyiʼj.

14. Bix Mambaj oʼ chin tzaj samaʼn tuʼn, tuʼn t-xiʼ nkʼoʼna aj tnam luʼ te cy-erensa.

15. Bix cxel nmaʼna cyeya que ka ntiʼ ma tzʼajtz tiʼj cyanma tiʼj tnachal ajke xjal miyaʼ teʼ tuj ja te Israel, despwés tiʼj cyʼiwbil otak cycʼam, despwés aj otak baj cysipan ntanma,

16. Tons akaya, cye akaya chʼintl ttxʼaban tiʼj ja te Jacob, chi xela cyxol; bix chi tela cyxolkaj aj nimke; bix akaya icytzan jun balan tuj cymijke alemaj tjakʼ cʼul, bix icytzan tal balan cyxol jun cʼloj neʼl, que ajo, kama tzʼocx tuj tmij, cbajal tbetzʼan bix cbajal tluẍan, bix mijun jaʼca colan cyiʼj.

17. Aj tkʼaba cjawal tyecʼana cyiʼj tajkʼoja, bix tzaʼnx cytenca tajkʼoja oc chi jawal tzʼak.

18. Bix octzan chi jawal nsicʼoʼnke ntanmya icytzan xjal nnoc tcʼamoʼn tcosech tuj tyemp tkʼijal.

19. Tuʼnj cbantel wuʼna tuj ntanma, aj al ucʼal at oʼ bant tiʼj tuʼn Mambaj, icytzanjo, aj tcacha cbantel wuʼna puro cʼuxbil ttxʼotxʼal, bixke tpas tkʼaba puro ẍkʼan cʼuxbil ttxʼotxʼal. Bix chi bajal tkʼuchana nim tnam; bix cxel nkʼoʼna cyʼiwbil te Kman cyiʼj cykʼinamabl, bixke cyban te Kman tuj cyakil twitz txʼotxʼ. Bix lutzan luʼ, akina binchal tiʼj.

20. Bix cbajeltzan jluʼ, chitzan Mambaj, que tuj kʼij ajo aj spada te nxtisbila oc partiyil cyibaj; oʼcxtzla ka min ma tzʼajtz tiʼj cyanma tiʼj tnachal, chitzan Mambaj, oc cbel tzʼak cyibaj, oc, cyibaj cyakil nasyon cyekaj nyaʼ teʼ tuj ja te Israel.

21. Bix cbanteltzan que cyjel bant wuʼna te ntanma, aya ja te Israel.

22. Bix lutzan luʼ, cbel nkʼoʼna tnam luʼ tuj, twitz txʼotxʼ luʼ, tuʼntzan wela twitz aj bant tiʼj wuʼna tucʼ Jacob, aj cymana; bix atzan jun Acʼaj Jerusalénjo. Bix aj tipamal cyaʼj oc ctel tuj tnam ajo; icytzanjo, ax kina chin tel cyxola.

23. Bix lutzan luʼ, akina aj oyolan Moisés tiʼj, cyjaʼw: Aj Kajaw Dios oc cjawl weʼ jun profeta tuʼn, cyxolke cyermaniye, icyx queʼyin tzaʼn kina; akʼajo il tiʼj tuʼn t-xiʼ cybiʼna cyiʼj cyakil cosas aj chi cyjel tkʼoʼn. Bix cbanteltzan alcyej anma miʼn txiʼ tbiʼnj profeta ajo, oc quelax lajet cyxol tnam.

24. Ax toclen cxel nmaʼna cyeya que ajke cyakil profetas, icytzanjo, atxax tiʼj Samuel bix ajke lapchoʼc tiʼj, nicyʼpun aj oʼ baj cykʼamaʼn, oʼ cymanta ax toc wiʼja.

25. Bix lutzan luʼ, akaya cycʼwaʼl ke profetas; bix akaya tuj ja te Israel; bix akaya aj alucʼal bant tiʼj tuʼn Mambaj cyucʼke ojtxa xjala, aj t-xiʼ tmaʼn te Abrahán: Cyiʼj aj chelal itzʼj tiʼja chi cyjel cyʼiwlet tzaʼnx cytenca familyas te twitz txʼotxʼ.

26. Tuʼnj oʼ chin jaw weʼya tuʼn Mambaj tuʼn wula cyxola tnejal, bix maʼ chin tzaj tsamaʼn cyʼiwlal cyeya, tuʼn tel lakʼeʼke juʼnkaya tiʼj cynachala; bix j-ajo, nok tuʼnj akeya cʼwaʼlbaj tej bant tiʼj.

27. Bix octzan chibajel cyʼiwleta, tons quelaltzan Mambaj twitz aj yol bant tiʼj tuʼn tucʼ Abrahán, aj t-xiʼ tmaʼn cyjaʼw: Cyiʼjkaj chelal itzʼj tiʼja chi cyjel cyʼiwlet tzaʼnx cytenca familyas twitz txʼotxʼ, asta oc t-xiʼ Xewbaj Sant cyibaj ajke xjal miyaʼ teʼ tuj ja te Israel nok tuʼn kina; bix aj cyʼiwbil ajo cye xjal miyaʼ teʼ tuj ja te Israel mas cyipamal cywitz tzaʼnx cytencatl, cyjaʼtzan tten chi xel sipan te ntanma, aya ja te Israel.

28. Bix chocal te sentens tej tnam tuj país ajo. Oʼcxtzan chiʼn, ka otak cyikʼ cyakilxa nbangelya, ma loʼch cyanma wiʼja, chajal nmakʼtzʼuna ajke twitz cyil cyibajxke cywiʼ, chitzan Mambaj.

29. Bix cpoltzan tiʼj ncʼuʼja aj oʼbant tiʼj wuʼna tucʼ ntanma; bix oʼ bant tiʼj wuʼna cyucʼal tuʼn cyxiʼ wiʼna nwitzelaya bix tuj tyemp bann tiʼj, bix juntl el tuʼn t-xiʼ nkʼoʼn te cye aj nimak tnam te cyman, que a aj tnam te Jersalén, aj txʼotxʼ tziʼyan cye te junmajx, chitzan Mambaj.

30. Bix cbantel que cpol kʼij tuʼn t-xiʼ pacbet cyakilxa nbangelya cye;

31. Bix cocax cyocslaʼn wiʼja, que a kina Jesucristo, aj tCʼwaʼl Dios; bix cxel cykaʼnan te Mambaj tuj nbicyʼa.

32. Tons cjawal cywiʼkej cycwental, bix chi bitzal junx: tuʼnj ccyilabal witzbaj tiʼj witzbaj.

33. Tons chocal tchmoʼn juntl el Mambaj, bix cxel tkʼoʼn te erens cye aj tnam te Jerusalén.

34. Tons octzan chi schʼil tuʼn tchi-al: ¡Chi bitzana jun, akeya ligar colin teʼc tiʼj Jerusalén; tuʼnj ma cub cycʼuʼj tnam tuʼn Mambaj, ma clet Jerusalén tuʼn!

35. Oʼ tzʼel ttzʼlincyan tiʼj tkʼab Mambaj cywitz cyakil nasyones; bix cywitz cyakil ttxaʼmla txʼotxʼ oc ccyilabal colbil te Mambaj; bix aj Mambaj bix kina junx koʼya.

36. Tons cbantel aj tzʼiban maj: ¡Weʼctza, weʼctza juntl ela, bix xbalam oc tiba tuʼn tipamal, aya Sión; xbalaman oc t-xbalana ajke t-xbalana cyeʼyaxke, aya Jerusalén, aj tnam sant; tuʼnj mi jtoj tuʼn cyul juntl el ajke miyaʼ sak cyiʼj bix ajke ẍwoʼj cyiʼj.

37. ¡Chitoʼn el puj tiʼja; weʼctza, bix kʼim ttutzʼbila, aya Jerusalén; tzakpiʼn el tiba cyiʼj cʼalbil teya tiʼj tkula, aya pres tmeʼjal Sión!

38. Tuʼnj icytzan ntkʼamaʼnta Kajaw: Oʼtxiʼ cycʼayan cyiba bix ntiʼ chojbil cyeya bix miyaʼ tuʼn pwak chi cletala.

39. Ax toc, ax toc cxel nkʼamaʼna que aj ntanma quelal cynicyʼ tiʼj nbicyʼa, oc, tuj kʼij ajo cʼelal cynicyʼ tiʼj que a kina aj nchin yolan.

40. Tons cxeltzan cymaʼn: ¡Nim cyeʼyaxke kambaj tibaj chicʼul aj kʼiʼn tbanal pocbal tuʼn; aj ntkʼamanta tchi-al; aj kʼiʼn pocbal tbanal tuʼn; aj nkʼaman tiʼj colbil; aj nkʼamanjs tiʼ Sión: Aj tDiosa ncawin!

41. Tons oc cbintel aj schʼibil: ¡Tel cypartiyin cyiba, tel cypartiyin cyiba, cyetza atzo, miʼn tzʼoc cymacoʼna aj tnachal; cyetza tuj tmij ajo; cyoca sak wena, akaya aj kʼin cyuʼna aj tbas Kajaw!

42. Tuʼnj miʼn chetza nok eʼla cyim bix miʼn chetz oka; tuʼnj cbel nej Kajaw cywitza, bix aj Dios te Israel lepchax cxel cyiʼja cwental te cyeya.

43. Lutzan luʼ, aj nmajana cakʼnal tucʼ aj yol nim baʼn tuʼn; oc ctikʼal nim tchi-al bix tbanal, bix matijxix jun tlugar matij.

44. Icytzankaj nim i laban tiʼja — aj junmajx nach queʼyin tiblal más que nok alxcyex xjal, bix aj txumlal más cywitzkej cycʼwaʼl xjal -

45. Cyjaʼtzan cbajal xcotat cyiʼj nim masyon; ajke rey cmaketal cytziʼ twitzkʼa; tuʼnj oc ccyilabal aj naʼxtak tkʼunjs cye, bix cxel cykʼoʼn cycʼuʼj tiʼj aj naʼxtak cybi.

46. Ax toclen, ax toclen cxel nmaʼna que cyakilkaj cosas ajo oc chi bantel, icyxax tzaʼn maʼ tzaj tkʼamaʼn Mambaj wecy. Tons celaltzan twitz aj oʼ bant tiʼj tuʼn Mambaj tucʼ tnam; tons octzan chi tel juntl el nxjala tuj Jerusalén, bix atzan tnamjo cxel te cy-erens.