1. Bix banttzan que cychmontak cyib nim nefitas tiʼjla templo attak tuj nimak tnam te Abundancia; bix nchi labantak cyxolx cyib, bix nxiʼ cyyecʼan jun te juntl aj matij bix cyeʼyaxtak meltzʼubil otak bant.

2. Bix nchi yolantak tiʼj Jesucristo, aj al-iʼj otak kʼonjtz techaklil tiʼj tcamacy.

3. Bix cyjaʼtzan baj que matak nchi yolan, jun tucʼ juntl, tej t-xiʼ cybiʼn jun wibaj tkʼajt lonxa icytzanj tuj cyaʼj etz kʼajt; bix nchoc ten queʼyil te tuj cyakil part, tuʼnj ntíʼ el cynicyʼ tiʼj aj kʼunj, bix nyaʼ jun wibaj nach mix jun gana; miyaʼ oʼcxjo, bix jun wibaj cheba, o canan tuj cymijkej i bin tiʼj, que aj tuʼmal ntiwt jun piẍ cyxumlal min tzaj luʼlan; icytzanjo, i ocx tuj cyanma, bix cʼant cyanma.

4. Bix banttzan que ncybinta juntl el wibaj te acʼaj, bix ntiʼ el cynicyʼ tiʼj.

5. Bix tujxa toxan el cybinta aj wibaj, bix ncubtzan cykʼoʼn cynaʼn tiʼj tuʼn cybinta; bix axax taʼ cywitz tligaral aj otak kʼajt; bix chebaxax xiʼ cyqueʼyin tuj cyaʼj, jatuma otak tzaj kʼajt.

6. Bix lutzan luʼ, tuj toxan el, el cynicyʼ tiʼj aj wibaj cybinta; bix tzajtkʼamaʼn cye:

7. Lutzan luʼ aj nCʼwaʼla nim wajbila tiʼj, al iʼj nnoc keʼ ncʼuʼja, aliʼj njaw nimsat nbicyʼa: akʼajo cybinxa.

8. Bix banttzan aj tiʼ tkal el cynicyʼ tiʼj, nxiʼ cyqueʼyin tuj cyaʼj juntl el; bix lutzan luʼ, o cyil jun xinak tetz tuj cyaʼj, bix toctak jun tẍjoʼw sak; nnetz tuj cyaʼj bix ncub ten cyxol. Bix tzaʼnx cytenca xjal cyakil atak taʼ cywitz tiʼj, bix mijuntak tajbe tuʼn tjaket ttziʼ, mix jun tiʼj juntl, tuʼn t-xiʼ cykaʼnan ti t-xiʼlen j-ajo, atzan cye xiʼ cyxiʼman tiʼj bala jun ángel otak cub tyecʼan tib cywitz.

9. Bix nbanttzan que nchel tjajan tkʼab, bix nxiʼ yokpaj cyxol tnam cyjaʼw:

10. Lutzan luʼ, a kina Jesucristo, aliʼj i kʼamanke profetas ax toc tiʼj tuʼn wula twitz txʼotxʼ.

11. Bix lutzan luʼ, a kina spicyʼan bix ankʼbil te twitz txʼotxʼ; bix oʼ chin cʼana tuj copa tzaj tkʼoʼn Mambaj wecyʼ, bix oʼ jaw nnimsana Mambaj, tuʼnj at txiʼyal wiʼna wiʼbaja il te aj twitz txʼotxʼ, que oʼ chin nela twitz aj tbancʼuʼj Mambaj cyiʼj cyakil cosas atxax ttzaj keʼ.

12. Bix banttzan tajtzan tjatz tmaʼn Jesús kej yol ajo, tzaʼnx cytencake xjal i cub tzʼak twitz txʼotxʼ; tons chukʼtzan tpon tiʼj cycʼuʼj que otak kʼunj cyxol que cbel tyecʼan tib Cristo cywitz, tjawlenxa tuj cyaʼj.

13. Bix banttzan que ntzaj yolan Kajaw cyucʼal, cyjaʼw:

14. Chi weʼctza bix cytzaja wiʼja, tuʼntzan tocx cykʼoʼn tal cykʼaba tuj nxuʼca, bix tuʼn toc cymacoʼna aj cyocxlen clavo cyuj nkʼaba bix nkana, tuʼntzan tel cynicyʼa tiʼj que a kina aj Dios te Israel, bix aj Dios te cyakil twitz txʼotxʼ, bix ma chin cyima tuʼn tlaj cyil xjal te twitz txʼotxʼ.

15. Bix banttzan que nchoc lakʼeʼ tzaʼnx cytenca xjal; bix nnoʼcx cykʼoʼn tal cykʼab tuj tocyʼ t-xuʼc, bix oc cymacoʼn tocxlen clavo tuj tkʼab bix tuj tkan; bix cyjaʼtzan oc cyuʼn, juʼn tuʼn juʼn, asta cycyaki i pon baj; bix cyil tuʼn tbakʼ cywitz bix oc cymacoʼn tuʼn cykʼab, bix el cynicyʼ tiʼj tuʼn cyakil tsegurl, aj axix toclen tiʼj aj al-iʼj cub cytzʼiban profetas que attak tulul.

16. Bix tajtzan cyakilka otak choc lakeʼ bix otak tzʼoc cyqueʼyin cyuʼnx cyib, nchi jaw schʼin cyjaʼw:

17. ¡Kotzalaj! ¡Tiʼj tbi Kman Dios maʼxix t-txilen! bix nchi cub tzʼak twitz tkan Jesús, bix nchoc ten ocsalte te.

18. Bix nbanttzan que ntzaj ttxacoʼn Nefi, bix tocxtak cyxol xjal, bix xiʼ tkʼamaʼn tuʼn ttzaj lakʼeʼ.

19. Bix njawtzan weʼ Nefi, bix nnoc lakʼeʼ, bix ncub ẍmejeʼ twitz Kajaw, bix el ttzʼuban cyiʼj tkan.

20. Bix nxi tmaʼn Kajaw te tuʼn tjaw weʼ; njawtzan weʼ bix njaw weʼ twitz.

21. Bix xiʼtzan tmaʼn Kajaw te: nxi nkʼoʼn tipamala tuʼn tbiyana cyiʼj tnam luʼ otakxa chin jax juntl ela tuj cyaʼj.

22. Bix icxjuntl, nchi tzaj ttxacoʼn Kajaw txkantl, bix ax tuʼmal xiʼ tmaʼn, bix xiʼ tkʼon cyipamal tuʼn cybiyan. Bix xiʼ tmaʼn cye: Atzan tuʼmal chi biyala; bix ntiʼ tuʼn ten xcyakbil cyxola:

23. Ax toc xel nmaʼna cyeya que atzan tuʼmal tuʼn cybiyana cyiʼjkaj cajs tiʼj tanmi tiʼj twitz til nok tuʼn tlaj cyyola, bix tajbil biyan tuj nbicyʼa: Lutzan luʼ, chi xel bix chi belax tuj aʼ, bix tuj nbicyʼa cbiyal cyuʼna.

24. Bix lukatzanj yol luʼ aj cjawatz cykʼamaʼna, ctzajal cytxacoʼna juʼn tiʼj tbi:

25. Oʼtak tzaj kʼoʼn tipamal te Jesucristo wecyʼ, nchinbiyana teya tuj tbi te Mambaj, bix te Cʼwaʼlbaj, bixte Xewbaj Sant. Icytzan tenjo.

26. Tons cbelx cymulkʼiʼna tjakʼxa aʼ, bix chi jawatzantl tuj aʼ.

27. Bix atzan tuʼmal chi biyala tuj nbicyʼa, tuʼnj lutzan luʼ, aj ax toc cxel nmaʼna que aj Mambaj, Cʼwalbaj, bix Xewbaj Sant oʼcx junxka. Bix a kina tiʼj Mambaj, bix Mambaj wiʼja, bix Mambaj bix kina oʼcx junx koʼya.

28. Bix segúntzan tucʼ aj oʼ txiʼ nkʼamaʼna, cyjaʼtzan chi biyala bix ntiʼ tuʼn ten xcyakbil cyxola, icxtzanj oʼ ten bix hasta jaʼla; bix ntiʼ aj tuʼn miʼn chi tena tuj tumlxix tiʼj juʼn t-xiʼlen nxnaʼkʼtzbila, icytzanj t-tenxix asta jaʼla.

29. Tuʼnj ax toc, bix ax toc aj nxiʼ nmaʼna alcyej aj at xcyakbil tuj t-xew miyaʼ wecyʼ ajo, sino te dyablajo aj tajwil tzaʼnx cytenca tnachal, bix nnoc labt tiʼj cyanma xjal, tuʼn cyxcyakan juʼn tiʼj juntl tucʼ kʼoj.

30. Lutzan luʼ, nyaʼ nxnakʼtzabila tuʼn tlabt tiʼj cyanma xjal tucʼ kʼoj, jun tiʼj juntl; sino que awa nxnakʼtzbil jluʼ: Que ajke cosas ajo tuʼn tbaʼj naj.

31. Lutzan luʼ, ax toc, ax toc xel nmaʼna que cbel nyecʼan nxnaʼkʼtzbila cyeya.

32. Bix atzan nxnakʼtzbila jluʼ, bix atzan xnakʼtzbil aj oʼ tzaj tkʼoʼn Mambaj wecyʼ; bix xel nkʼamaʼna ax toc tiʼj Mambaj, bix Mambaj ntkʼamanta ax toc wiʼja, bix aj Xewbaj Sant ntkʼamanta tiʼj Mambaj bix wiʼja; bix stiwa kina tiʼj que a Mambaj wiʼxan cye xjal cyakil, tuj cyakil ligar, tuʼn tajs tiʼj cyanma tiʼj tnachal bix tuʼn cyocslaʼn wiʼja.

33. Bix alcyej ma tzʼocx tocslaʼn wiʼja, bix aj cbiyal, oc ccoletal; bix atzankajo chi etzal tcubil Dios.

34. Bix alcyej mi ma tzʼocx tocslaʼn wiʼja, bix mi ma biyán, oc cbel tuj sentens.

35. Ax toc, bix ax toc cxel nmaʼna cyeya que atzan nxnakʼtzbila jluʼ, bix tiʼj ajo cxel nkʼamaʼna ax toc tiʼj Mambaj; bix alcyej ma tzʼocx tocslaʼn wiʼja, ax ocslaʼn tuʼn tiʼj Mambaj; bix tetzan xel tmaʼn Mambaj aj ax toc wiʼja, tuʼnj oc cxel laʼcj tuʼn kʼakʼ bix tucʼ Xewbaj Sant.

36. Bix cyjaʼtzan ctakʼal Mambaj axtoc wiʼja, bix aj Xewbaj Sant ctakʼal ax toc tiʼj Mambaj bix wiʼja, tuntzanj aj Mambaj, bix wecyʼ, bix aj Xewbaj Sant junx ktena.

37. Bix ax cxel nmaʼna cyeya tuʼn tajs tiʼj cyanma bix tuʼn cyoca icytzan jun cʼwal nuch, bix tuʼn cybiyana tuj nbicyʼa, bixmo mi jun tuʼmal jaʼca cycʼamona cosas luʼ.

38. Bix juntl el cxel nmaʼna cyeya que ocx tuʼn tajs tiʼj cyanmya, bix chi biyala tuj nbicyʼa, bix tuʼn cyoca icytzan jun cʼwal tal nuch, bixmo mi junx tuʼmal jaʼca cyetzaya tucʼbil Dios.

39. Ax toc, bix ax toc cxel nmaʼna que atzan nxnakʼtzbila jluʼ; alcyekaj ma jaw cybinchan najbil tibaj jluʼ, tibaj nxaka; aj ttzi infierno miʼn camban cyiʼj.

40. Bix alcyekaj ma tzaj cytxʼolbaʼn mástl mu chʼin tiʼj, bix ma weʼ cyuʼn te nakʼtzbila, alcyekaj tzajna tiʼj tnachal, bix miyaʼ cycubke tibaj nxaka, sino que tuj txatzʼaʼn ma jaw cybinchan najbil bix aj ttziʼ infierno ẍekl chi tel tuʼn cycʼamet, oc tjaw chʼiy aʼ bix oc cybaj chitoʼn tuʼn cykʼikʼ.

41. Cyjaʼtzan, cyxiʼya tuj tnam luʼ, bix cytxʼolbanxa max ttxaʼnla txʼotxʼ ajke yol maʼ cheʼx nkʼamaʼna.