1. Bix ax toc, ax toc cxel nmaʼna cyeya que ateʼ txkantl nneʼla miyaʼ teʼ twitz tnam te tzaluʼ, mix tuj txʼotxʼ te Jerusalén, mix tuj jun part te tnam nakaʼyan jatuma oʼ chin tena tuʼn tbant wakʼana.

2. Tuʼnj alcyekaj nchin yolana cyiʼj akaj aj naʼx cybinta nwiʼya; tuj mijun tyemp naʼx txiʼ nyecʼan wiba cye.

3. Per oʼ wikʼa mandamyent te Mambaj tuʼn nxiʼya cyucʼal, tuʼntzan cybinta nwiʼya bix tuʼntzan cyoc tajlal cyxol nneʼla, tuʼntzan ten jun cʼolojx neʼl bix junx pastor; cyjaʼtzan jluʼ, chin xela yecʼal wiba cyucʼal.

4. Bix chocal nkʼakʼana tiʼj tuʼn tcuʼb cytzʼibana yol luʼ oʼcxa wicyʼa, tuʼntzan cyxiʼ cʼuʼt bix tuʼntzan t-xiʼ yecʼat cye xjal miyaʼ teʼ tuj ja te Israel-noka atzan ntanmiya tuj Jerusalén, alcyekaj oʼ chin cyil bix oʼ chi ten wucʼala tuj akʼuntl, miʼn cykanna te Mambaj tuj nbicyʼa tuʼn ttzaj tkʼoʼn cye aj tuʼn tel cynicyʼ cyiʼja bix cyiʼj txkantl cʼoloj xjal tuʼn Xewbaj Sant, que cyiʼj ntiʼ loʼn cyuʼn—tuʼntzan aj cyxol tzaʼnx cytenca xjal miyaʼ teʼ tuj ja te Israel, baʼn tuʼn tcyikʼ bixmo tuʼn tel cynicyʼ wiʼja, aj Colal cyiʼj, ajke cycʼwaʼl cyja cytzajtl tuj ntanmiya te Jerusalén, oc cxel sipat twitz txʼotxʼ cyakilxa nok tuʼn tlaj ntiʼ cyocslabil.

5. Tons chocal nchmoʼna ajke cyaja part te twitz txʼotxʼ; tons tuʼntzan wela twitz aj bant tiʼj tuʼn Mambaj tucʼ cyakilxa tnam te Israel.

6. Bix cyeʼyaxkaj xjal miyaʼ teʼ tuj ja te Israel nok tuʼn tlaj cyocslabil wiʼja, per tuʼn Xewbaj Sant, que nkʼama ax toc wiʼja bix tiʼj Mambaj.

7. Bix lutzan luʼ que tuʼn tlaj cyocslabil wiʼja, chitzan Mambaj, bix nok tuʼn tlaj aj ntiʼ ocslaʼn cyuʼna, akeye ja te Israel, aj ax toc cpol cyucʼal ajke xjal miyaʼ teʼ tuj ja te Israel tuj twiʼpan kʼij luʼ, tuʼntzan t-xiʼ yecʼat cye nicyʼca cyakil cosas.

8. Per ¡becyʼbil cywitzkej xjal miyaʼ teʼ tuj ja te Israel ntiʼ cyocslabil! chitzan Mambaj — pwes banwtla otak chul tuj cyakil nimak tnam te tzaluʼ, bix otak txiʼ cysipan ntanmiya que aj ajo te Israel; bix otak txiʼ cyiʼn cyxol aj ntanmiya que aj ajo te Israel, bix otak baj cybetzʼan tuʼn cykan;

9. Bix tuʼn tuʼmal xtalbil te Mambaj cyiʼjke xjal miyaʼ teʼ tuj ja te Israel bix icytzankaj tjwisya Mambaj cyiʼj ntanmiya, que a jajo te Israel, ax toc, ax toc cxel nmaʼna cyeya que cwando wuʼnxa otak tzʼoc wicyʼleʼna que ajke ntanmiya que a jajo te Israel oc chi cyʼixbajel, oc chi bisal bix chi cymel, bix chelax xoʼt cyxolke, bix chocal kʼojleʼn, bix cyxoljo oc chocal xmocchaʼn bix chel icʼan.

10. Aj al iʼj ntkʼamanta Mambaj tuʼn t-xiʼ nmaʼna cyeya: aj kʼij chi binchal twitz il tiʼj nbangelya ajke xjal miyaʼ teʼ tuj ja te Israel, bixka nok gana ma chi ten nok tuʼn tlaj njaw nim cyanma, cyibaj tzaʼnx cytenca nimak tnam bix cyakil kaj tnam te twitz txʼotxʼ, bix nojna chi tel tucʼ cyakil slaʼj bix tnachal, bix tucʼ cyakil xmeletzʼ, tuʼn tcub cybiyoʼn cyucʼal, bix tuʼn tajblan nyola te tuʼn tcanet pwak cyuʼn, bix tuʼn tbant il cyuʼn tucʼ aj miyaʼ cymoj bix nicyʼaj aj junmax tnachal; Bix ka chi bant cyakilajo cyun, bix ma tzʼel cyicʼan nbangelya cyakil, lutzan luʼ, chitzan Mambaj, celal nxcʼaʼyana cyakilxa nbangelya cyxol.

11. Tons cxel ncʼujlaʼcja aj bant tiʼj wuʼna tucʼ ntanmiya, aya ja te Israel, bix cxeltzan wina nbangelya cye.

12. Bix cxel nyecʼana teya, aya ja te Israel, que ajke xjal miyaʼ teʼ tuj ja te Israel ntiʼ cyipamal cyibaja; tnejal cxel ncʼujlaʼcja aj bant tiʼj wuʼna cyucʼala, ja te Israel, bix icytzan chi pol cann tiʼj tuʼn tel cynicyʼa tiʼj nbangelya cyakil.

13. Pero ka cyajbilkej xjal miyaʼ teʼ tuj ja te Israel tuʼn tajtz tiʼj cyanma tiʼj tnachal bix tuʼn cyajtz meltzʼaj wiʼja, chitzan Mambaj, lutzan luʼ, oc chocal tajlal cyxolkej tuj ntanmiya, aya ja te Israel.

14. Bix miʼn ntzakpintaya aj ntanmiya, que a jajo te Israel, tuʼn cycub tzʼak cyibaj bix tuʼn tbaj cybetzʼan tjakʼ cykan, chitzan Mambaj.

15. Per ka mi ma chajtz meltzʼaj wiʼja bix ntiʼ ma txiʼ cybiʼn nwiʼya, octzan cbel tuj nwitza, oc, cbel tuj nwitza que aj ntanmiya, aya ja te Israel, tuʼn tex tuj cymijal; bix tuʼn tbaj cybetzʼan, bix icytzan chocal icytzanj atzʼan otak tzʼel baj tcʼocʼjal, tons ya mitiʼtltzan tajblan nok oʼcx tuʼn t-xiʼ xoʼt bit tuʼn tbaj xblucʼat tjakʼ kanbaj cye ntanmiya, aya ja te Israel.

16. Ax toc, ax toc cxel nmaʼna cyeya que oʼ tzaj tkʼoʼn Mambaj aj jluʼ wecyʼ: Que tuʼn t-xiʼ nkʼoʼn aj tnam luʼ cye xjal luʼ te erens.

17. Tons cheltzan twitz ajke tyol profeta Isaías, que chitzan cyjaʼw:

18. Ajke tcwental cjawal cywiʼ wena; cycyakilka junx chi bitzal, tuʼntzanj cqueʼyilabil tbakʼ witzbaj tiʼj tbakʼ witzbaj cwando oc tbant tuʼn Kman tuʼn tul juntl el Sión.

19. ¡Chi schʼina tuj tchi-al! ¡Chi bitzana junx cyakil, akiya ligar bis teʼ tuj Jerusalén! tuʼnj maʼ tzʼoc t-xmoxan Kajaw aj ttanma, ma colet aj Jerusalén tuʼn.

20. Oʼ tzʼel ttzʼlincyan Kajaw aj tkʼab sant cywitz cyakil nasyon, bix tzaʼnx cytenca ttxaʼnla txʼotxʼ chi queʼyil tiʼj colbil tuʼn Dios.