1. Bix banttzan que aj tbajlen tkʼamaʼn Jesús kej yol ajo, nxiʼ meltzʼaj cyucʼ txnaʼkʼtzben, tucʼ juʼn twitzela, bix nxiʼ tmaʼn cye: ¿Ti tkal cyajbila wiʼja aj ya otak chin aʼjala tucʼ Mambaj?

2. Bix nnaʼjaltzan cytzakʼweʼn cycyakil oʼcx oxa myaʼ icju: Kajbila aj cwando ya otak kankʼina tabkʼiyal jun xjal, bix otak baj bant akʼuntl, aj al iʼj ẍko ttxoca, tuʼn kxiʼya joratx tucʼala tuj tkʼukʼbila.

3. Bix nnajtztzan ttzakʼweʼnkʼa cye: Cyeʼyaxkaya tuʼnj maʼ cyajbeya j-ajo wiʼja, cyjaʼtzan jluʼ, aj oc cyoca setenta y dos abkʼi, oc chi xela wucʼila tuj nkʼukʼbila, bix wucʼaltzana ccanetal cyujlabila.

4. Bix t-xiʼtzan baj tkʼamaʼn cye, nxiʼ meltzʼaj cyucʼj oxl bix nxiʼ tmaʼn: ¿Ti tkal cyajbila tuʼn tbant wuʼna cyiʼja, aj ya otakxa chin naʼjala tucʼ Mambaj?

5. Bix nnoc ten cycʼuʼj bisl wena, tuʼnj ntiʼ cyipamal tuʼn t-xiʼ cykʼamaʼntak aj ti tkal cyajbil.

6. Bix nxiʼtzan tkʼamaʼnkʼa cye: Luluʼ, loʼn wuʼna aj cyximbitza. Otak cyajbeya ax aj tajbe Xwan wiʼja, aj nim wajbila tiʼj, alcyej aj oc te wucʼala tuj wakʼana aj naʼxtak njaw kʼoʼna twitz crus cyuʼn judíos.

7. Cyjaʼtzan jluʼ, más cyeʼyaxkaya, tuʼnj mi jtoj tuʼn t-xiʼ cynebeʼna camacy sino que chi ankʼila asta oc toc cyqueʼyina cyakilxa tbinchben Mambaj tucʼ cycʼwaʼlke xjal, bix maxa oc cyel twitz tzaʼnx cytenca aj tajbil Mambaj, oc wula tuj ntzalajibla tuʼn tipumal cyaʼj.

8. Bix mi jtoj tuʼn cyapantiya jun taʼw te camacy sino ocxa wula tuj ntzalajibla, oc chi meltzʼajel cyxumlala te cyimleʼn tuʼntzan toc cyxumlala miʼn cyim tuj jun tuʼmal nok jaw jaket tziʼ witz bix tuʼn cub meltzʼuʼn witz, tons octzan chi cyʼiwletala te tuj tkʼukʼbil nMana.

9. Bix icxtljun, miʼn cynantiya jun taʼw cwando nchi ankʼintaya tuʼn cychibjala, mix cʼixbil, sino nok tuʼntlaj twitz cyil twitz txʼotxʼ, bix cbantel cyakil wuʼna tuʼntzaj aj tiʼ tkal ẍcyajbeʼya wiʼja, tuʼnj maʼ cyajbeya tuʼn ttzaj cyiʼna ajke anma cye xjal, myentras atxca twitz txʼotxʼ.

10. Bix tuʼntzan tlajjo oc ctel cyucʼala tzaʼnx tenca tzalajibil, bix chi bel tutzʼeʼya tuj tkʼukʼbil nMana, icytzanjo, aj cytzalajibla ctel cyakil, icx tzaʼn te Mambaj otzaj tkʼoʼn tzalajibil cyakil wecyʼ, bix icyxtzan chocala icytzaʼn kina, bix icyx kina icytzan Mambají bix aj Mambaj bix kina junx koʼya.

11. Bix aj Xewbaj Sant ntmaʼn ax toc tiʼj Mambaj bix wiʼja, bix aj Mambaj ntzaj tkʼoʼn Xewbaj Sant cyeke cycʼwaʼl xjal tuʼn nlaja.

12. Bix banttzan que aj tbajxa tkʼamaʼn kej yol ajo, nnoc tmacoʼn Jesús tuʼn tal tkʼab ajke juʼn txnakʼtzben, per ntiʼkej ox aj at cycyajalten, bix n-najaltzan.

13. Bix lutzan luʼ, nchi jaket cyaʼj, bixkej ajo nchi jaw kʼiʼn tuj cyaʼj, bix cybinta bix cyil cosas aj milay bant tuʼn cyxiʼ kʼametl juntl el.

14. Bix ntiʼ kʼon tun cyyolan, bix ax ntiʼ xiʼ kʼoʼn cyipamal tuʼn t-xiʼ cytxʼolbaʼn ajke cosas o cyil bix aj cybinta.

15. Bix ntiʼ xiʼ cymaʼn ka teʼ tuj cyxumlal bixmo tiʼjxa cyxumlal, tuʼnj eʼla tuj cywitz que lonxa icytzan jun meltzʼubil cyiʼj, lonxa icytzan otak chi meltzʼaj cyxumlal aj chibaj oc te jun xumlalbaj miʼn cyim, tuʼntzan tcyil ajke cosas te Dios.

16. Per banttzan que nbant juntl el te acʼaj aj cyakʼan twitz txʼotxʼ cyakil, per ntiʼ xiʼ cymaʼn ajke cosas otak cyil bix cybinta, nok tuʼn tlaj aj mandamyent xiʼ kʼon cye tuj cyaʼj.

17. Mas iten-la tuj jun xumlalbaj te cyimleʼn bixmo miyaʼ te cyimleʼn, tujxa kʼij cybajlenx meltzʼaj, ntiʼ loʼn wuʼna.

18. Oʼcx loʼn wuʼna ictzan aj storya oʼ kʼonjtz, que ibet tuj país cyakil, binchal akʼuntl cyxol cyakil tnam, te glesya cyakilkaj nnocaxa cyocslaʼn tiʼj aj nxiʼ cypacbaʼn, bix nicyʼ punxkaj ibiyan, o cycʼam Xewbaj Sant.

19. Bix i-eʼxtzan pres cyuʼnkaj nyaʼ teʼc tiʼj glesya. Bix ajke pres ntiʼ itenke baʼn, tuʼnj kit tcub cymij tuj tmij.

20. Bix nchi cuʼxtzan makuʼn per xiʼ paxj txʼotxʼ cyuʼn tuʼn tyol Dios, que aj tuʼmal iclet cyiʼj t-xeʼpan txʼotxʼ nok tuʼn cyipamal, bix, cyjaʼtzan jluʼ, ntiʼ jatz cyjuchan t-xeʼ txʼotxʼ nim tuʼntzan cyten.

21. Bix ox el iocx kʼoʼn tuj jun jorna njucan kʼakʼtuj, bix ntiʼ baj jun tnachal tiʼj cyxumlal.

22. Bix caʼb el i ocx kʼoʼn tuj jun pic txcup chol xjal. Bix lutzan luʼ, ischan cyucʼke txcup jawnaka lonxa icytzan jun cʼwal nschan tucʼjun tal neʼl nchʼun, bix ntiʼ baj mijun tnachal tiʼj cyxumlal.

23. Bix banttzan icy ibetjo cyxol cyakil tnam te Nefi, bix o cypacbanta bangel te Cristo cyeke cyakil xjal tuj país, bix imeltzʼajtzan te Kajaw, bix ijoctzan tiʼj Glesya te Cristo, bix cyjaʼtzan cyaj cyʼiwlaʼn tiyijil jun cʼloj ankʼbil luʼ según ajke tyol Jesús.

24. Bix jala, akine Mormón, chinxi colana tuʼn nyolana tiʼj kej tuʼmal luʼ.

25. Luʼtzan luʼ, nokax banan ten tuʼn tcub ntzʼibana cybi kaj mi jtoj tuʼn cyneben tiʼj camacy, pero ntiʼ o tkiy Kajawí cyjaʼtzan jluʼ, ntiʼtzan cub ntzʼiban, tuʼnj eʼwanka twitz txʼotxʼ.

26. Per lutzan luʼ, ochi wila, bix oʼ chin cykʼolbenta.

27. Bix lutzan luʼ, chi canetal cyxolkej xjal miyaʼ teʼ tuj ja te Israel bix ajke xjal miyaʼ teʼ tuj ja te Israel min cytzkiʼn ke.

28. Ax oc chi tel cyxol ke Judíos, bix ajkejluʼ mi cytzkiʼn.

29. Bix octzan t-xiʼ tnaʼn Kajaw tiʼj baʼn tuj tnabil nim baʼn tuʼn, cbanteltzan cyakʼan cyxolke tzaʼnx cytenca cʼloj xjal cysipan cyib tuj Israel, bix cyxol cyakil nasyon, familyas, yolbil te bix tnam, bix cyxoltzan, cxel cyiʼn nim anma tucʼ Jesús, tuʼntzan cyel twitz aj cyajbil, bix ax tuʼntzan tlaj cyipamal tuʼn tcub tcʼuʼj Dios aj at cyucʼal.

30. Bix icxke icytzankaj ángel te Dios, bix ka ma chi xmejlun twitz Mambaj tuj tbi Jesús, jaʼca bant tuʼn tcub cyyecʼan cyib cywitz nok alcyex xjal aj baʼn yin cynaʼn.

31. Que aj tuʼmal oc chi bantel binchben cyeʼyax cyuʼn, aj naʼxtak tul aj matij kʼij, cwando cyakilka ax toc tuʼn cypon yecʼal cyib twitz Cristo aj tcubil xtis.

32. Icytzanjo, banwtla cyxolke xjal aj miyaʼ teʼ tuj ja te Israel oc cbantel jun matij bix cyeʼyax binchben cyuʼn, aj naʼxtak tul kʼij te jwisyo.

33. Bix nok ka at cyucʼala ajke tzaʼnx cytenca Tuʼjal ntyoʼla cyiʼj binchben cyeʼyax te Cristo, loʼnwla cyuʼna, según tyol Cristo, que oc chicʼelkej cosas axix toc.

34. Bix ¡Becyʼbil twitz aj mi ma txiʼ tbiʼn ajke tyol Jesús, bix cyyolkej aj oʼchi jaw tsicʼoʼnkʼa bix oʼ cheʼx tsamaʼn cyxolke! Tuʼnj ajke miʼn ma cynima ajke tyol Jesús mix cyyolkej aj oʼ cheʼx samaʼn, mix akʼa milay cycʼam, bix jluʼtzan, milay chi tcʼamkʼa tuj twiʼpan kʼij.

35. Mejor miwt i-itzʼj akajo. ¿Pwes nneʼla cynaʼna jaʼca maket t-xtis jun Dios aj otak tzʼoc icyʼleʼn, que oʼ baj betzʼan cyuʼn xjal, tuʼntzanj j-ajo tuʼn tul colbil?

36. Bix lutzan luʼ, cyiʼjtzanj aj xiʼ nmaʼna ajke ijaw tsicʼoʼn Kajaw - icytzanjo, ajke ox ijax kʼiʼn tuj cyaʼj - que ntiʼ loʼntak wuʼna ka otak chi txʼajet tiʼj cyxumlal te cyimleʼn tuʼn cyoc te jun xumlalbaj miʼn cyim.

37. Lutzan luʼ, aj tbajlenxa ntzʼibana, otxiʼ nkaʼnna te Kajaw, bix oʼ tzaj tyecʼan wecyʼ il tiʼj tuʼn tbanttak jun meltzʼubil tuj cyxumlal, nokt miʼn, iltla tiʼj tuʼn tcyikʼ camacy.

38. Cyjaʼtzan jluʼ, tuʼntzan mi txiʼ cynebeʼn camacy, obant jun meltzʼubil tuj cyxumlal tuʼntzan mi cynanta taʼ bix bis, sino nok cyiʼj cyil te twitz txʼotxʼ.

39. Perj meltzʼubil ajo micyʼx icytzanj cbantel tuj twiʼpan kʼij, per at jun meltzʼubil cyiʼj, tuʼntzan mi ten tipamal Satanás tuʼn toc laʼt cyiʼj, bix ma chi baj txʼajet cychibajal, tuʼntzan cyoc sant, tuʼntzan mi cyten tuj tipamal twitz txʼotxʼ.

40. Bix cucxtla ẍi tenju hasta taj ẍpon cann aj kʼijte jwisyo te Cristo, bix tujtzan kʼij ajo oc chi apal tiʼj jun meltzʼubil matij, bix chi cʼametaltzan tuj tkʼukʼbil Mambaj tuʼn mi jtojx tuʼn cyetz, sino tuʼn cyankʼin jumajx tuj cyaʼj tucʼ Dios.