1 Ere chiney, gimed pi walageg nib tʼuf rog, e musap gaed, gube yoeg ngomed ni faʼanra dab mu kalgaed ngaenʼmed ma pi naʼun romed e bayi paer ni dakuriy beeʼ riy.

2 Arragon, faʼanra dab mu kalgaed ngaenʼmed, ma pi ppin romed e arame ra yib tapgin ni ngar yoer gaed u lan e re rran ni baʼaram ni bay ur machathowol gaed; ya bay manamged ni ngam miil gaed ma dariy e gin ni ngan miil ngay; arragon, ma rib gel e gafgow ngakʼ e piʼin ni bay e bitir u yin, ya yaed ba tomal ni dabiyog ni ngar miil gaed; ere, yira yitʼ raed nga butʼ min pagraed ni ngar mʼaed.

3 Arragon, rib gel e gafgow ngakʼ e pi gidiiʼ ney ni kanoeg ni yaed fapi gidiiʼ ku Nephi, ma kemus ni faʼan yaedra kalngaenʼ, u napʼan ni bay ruguyed gubin e pi pow ney nge maʼangʼang ni bay ni dag ngoraed; ya musap gaed, kuʼur moyed ni kan melʼeg raed ni bogi gidiiʼ rokʼ Somoel; arragon, fapi gidiiʼ ku Nephi e ki i tʼufeg raed, ma ki i fonow nagraed; arragon, u lan e pi rran ko pi denen roraed ni ki i fonow nagraed ni bachan e yaed ba tʼuf rokʼ.

4 Machane musap gaed pi walageg, fapi Lamanites niki i dabuyraed ni bachan e pi ngongol roraed ni i paer nib kireb, ni bachane kireb ko fare yalen ko pi chitamangraed. Machane musap gaed, ke yog woʼen e thap ngoraed u dakean e machib ko fapi Nephites; ere arayfan ni fare Somoel e ke nʼuw nag napʼan e pi rran roraed.

5 Ma gubaʼadag ni ngam guyed ni bagaʼ ni oren i yaed e bay u gilʼ e muruwel roraed, ma yaed be yaen nib gonop u pʼoewchen Got, ma yaed be guy rogon ni ngar fol gaed ko pi motochiyel rokʼ nge pi gamʼing rokʼ nge pi gonop rokʼ u rogon fare motochiyel ku Moses.

6 Arragon, gube yoeg ngomed, nib gaaʼ ni oren i yaed e be rinʼ e biney, ma yaed be athamgil ni darur chachalban gaed u fithikʼ e lʼagaenʼ ni gomanga yog nra feked e tin kubay i walagraed iyaen ko fare tamilang u morngaʼagen e tin riyulʼ; ere bayoʼor e piʼin ni yaed be un ko ulung roraed ni gubin e rran.

7 Ere musap gaed, gimed ma gimed manang, ya kam guyed, ni oren i yaed e ba naʼab ko tin riyulʼ, nge pi ngongol ni kireb nge fananikan ko pi yalen rokʼ e pi chitamangraed, ni kani wawliyraed ni nge michaenʼraed ko pi chep nib thothup, arragon, fapi prophecy ko fapi profet nib thothup, ni kan yoloey, niʼir e wawliyraed nge michaenʼraed ngakʼ Somoel, nge kalngaenʼ, nib mich nge kalngaenʼ ni be thilyeg gumirchaʼaraed—

8 Ere, gubin e piʼin ni ke yibi madaʼ ko giney, e gimed ma gimed manang ni yaed ba dugil mab miyuluy e mich roraed, niʼir e renʼen ni puf rograed riy.

9 Ma kagmed manang ni kar kʼeyaged e pi talin e mael roraed, ma yaed be tamdag ngay ni ngar suloed ngar feked ya yaedra denen: arragon, rayog ni ngam guyed ni yaed be tamdag ni ngar denen gaed—ya musap, yaedra paged yaed nga nitʼ raed nga butʼ me liiʼraed e pi toʼogor roraed, ma dabra puged e sayden roraed ngalang ni ngar togopluw gaed ngoraed, ni fan e biney e bachan e mich roraed ngakʼ Kristus.

10 Ma chiney, bachan e miyuluy roraed u napʼan ni be michaenʼraed ko renʼen ni be michaenʼraed ngay, ya bachan e miyuluy roraed u napʼan ni immoy bingyalʼ ni tamilang laniyaenʼraed, musap gaed, fare Somoel e bayi tawaʼath nagraed nge nʼuw nag napʼan e paer roraed, ni yug aram rogon e denen roraed—

11 Arragon, ni mus ni faʼan yaedra palog ko mich ma fare Somoel e ra nʼuw nag napʼan e pi rran roraed, nge yaeni madaʼ ko fare ngiyalʼ innʼem ni ke weliy e pi chitamangdaed morngaʼagen, ma ku aram rogon ko fare profet i Zenos, nge ku boech e profet nib yoʼor, nra weliyed morngaʼagen fare sulyarmen ni ra tay fa piʼin walagdaed, ni fapi Lamanites, bayay ko fare naʼab ko tin riyulʼ—

12 Arragon, gube yoeg ngomed, ni fapi michmich rokʼ fare Somoel e ratay ni nge piiʼ ngakʼ pi walagdaed, ni fapi Lamanites; u lan e pi yungiyalʼ i nʼen baʼaram ni tomur; ma yug aram rogon nib yoʼor e pi gafgow ni yaedra pirʼeg, nge yug aram rogon ni bay un tuluf raed iyaen aray nge yaen aram u dakean e fayleng, ma yibe gayraed ni ngan gul nagraed, ma bay ni toeyraed mayaed be garar u dakean e nam, ma dariy e gin ngar miil gaed ngay, ma fare Somoel e ra wurengaenʼ ngoraed.

13 Ere ireray rogon fare prophecy, ni yira sulwegraed bayay ko bin riyulʼ e naʼab, niʼir fare naʼab ko Tabiyul roraed, nge fachaʼ ni ma gafaliy raed nib gaaʼ mab riyulʼ, min uneg raed nga fithikʼ e saaf rokʼ.

14 Ere gube yoeg ngomed, ni ku yaed ba yalʼuw boech ngomed ma kemus ni faʼan gimed ra kalngaenʼ.

15 Ya musap gaed, fapi muruwel nib gaaʼ ni kan dag ngomed e kan dag ngoraed, arragon, ngoraed e piʼin ni kar malog gaed ko tin riyulʼ ni bachan fapi yalen ko pi chitamangraed, ere rayog ni ngam guyed romed ni dab kur malog gaed bayay nga orel ko mich.

16 Ere, gaʼar fare Somoel: Dabgu gatheyraed, machane bay gguy rogon u lan e fare rran ko fare gonop rog ni ngar suloed bayay ngog, ni yoeg fare Somoel.

17 Ere chiney e musap gaed, i non fare Somoel, ni morngaʼagen fapi gidiiʼ ko Nephites ni gaʼar: Faʼanra dabra kalgaed ngaenʼraed, mar gayed rogon ngar rinʼed fiti laninʼug, ma gura gatheayraed, ni yoeg fare Somoel, ni bachan e mich roraed ni dariy ni yug aram rogon nib yoʼor e muruwel nib gel ni kug rinʼ u fithik raed; ma woed nib fos Somoel e aram rogon e pinnʼey ni bay paer, ni yoeg fare Somoel.