1 Ere chiney e yibi buch u lan e bin aningeg i ragag nge dalip duw ko fare lung ko fapi tapuf-oloboch, ma dariy e maleʼeg thin u fithikʼ fapi gidiiʼ ku Nephi ma kemus ni buchʼuw e ufʼuf ni bay u lan e fare galasia, niʼir e kʼaring buchʼuw e wagagaey nga fithikʼ fapi gidiiʼ, ni bogi gagyeg ni tal u lan e bin aningeg i ragag nge dalip e duw.

2 Ma arame dariy e maleʼeg thin u fithikʼ fapi gidiiʼ u lan e bin aningeg i ragag nge aningeg e duw; ma ku aram i tay ni dariy e maleʼeg thin u lan e bin aningeg i ragag nge lal e duw.

3 Me yibi buch u lan e bin aningeg i ragag nge nelʼ e duw, arragon, ni yoʼor e maleʼeg thin nge wagagaey; ni ireram e nʼen ni rinʼ me yoʼor e piʼin nra chuw gaed ko fare binaw nu Zarahemla, nga ranoed iyaen ko binaw nib kan nga leluʼoch ni ngar tafnayed.

4 Mar milekag gaed ni rib palog e gin ni ranoed riy, ni arame rabaed ra taw gaed nga bangi raen nib gaaʼ nge lulʼ nib yoʼor.

5 Arragon, ma arame ra waer gaed lan gubin yang e binaw, nga lan e yungin baʼaray ni dawor ni paer riy min chuw riy ma dakuriy e gakʼiy riy, ni bachan e pi milekag ni yoʼor ni ur pired ko sommʼon u dakean fare nam.

6 Ere chiney e dariy bang ko fare nam ni ke paer ni dariy banʼen u dakean ma kemus ni yigoʼ gakʼiy e dariy; ni bachan e rib almarin e mogothgoth ntay ngakʼ fapi gidiiʼ ni ur pired ko fare nam, ere ke aw ni dakuriy banʼen riy.

7 Ma bachan e kemus ni buchʼuw e gakʼiy ni bay u dakean fare nam, ere, fapi gidiiʼ ni ranoed ngar pired ngaram e ra salap gaed ko muruwel ko simen; ere ra toeyed e naʼun ni simen, niʼir e ur pired riy.

8 Me yibi buch ni ra yoʼor gaed ngar garar gaed, ma ranoed ko binaw ni bay nga yimuch iyaen ko fare binaw nib kan nga leluʼoch, mar garar gaed ngar tabab gaed i suguy dakean e fayleng ni poloʼ, ko day u yimuch nge madaʼ ko day u leluʼoch, nge day u ngael nge madaʼ ko day u ngek.

9 Ma fapi gidiiʼ ni ur moyed u lan fare binaw nga leluʼoch e ur pired u lan e tent, ngo lan e naʼun nib simen, mar paged gubin mit e gakʼiy ni bay u dakean fare nam nge tugul, ni nge yog ni taw nga bingyalʼ ma bay e gakʼiy ni ngar toeyed e naʼun roraed riy, arragon, nge binaw roraed, nge pi temple roraed, nge tafen e moʼolung roraed, nge galasia roraed, nge gubin mite naʼun roraed.

10 Me yibi buch u napʼan ni kari lich e gakʼiy u lan fare nam ni bay nga leluʼoch, mar piiʼed e gakʼiy nge yaen u barkow ngaram.

11 Ere aray rogon nra paged fapi gidiiʼ ni bay u lan fare nam u leluʼoch ni nge yog ni ngar toeyed e naʼun nib yoʼor u lan binaw, ko gakʼiy nge simen.

12 Me yibi buch ni immoy boech ko fapi gidiiʼ ku Ammon nib yoʼor, ni yaed ba rachaʼen i Lamanites, ni kuranoed nga lan e re nam ney.

13 Ere chiney e immoy bogi chep nib yoʼor nni chaʼariy ni morngaʼagen e pinʼen niʼ i rinʼ e pi gidiiʼ ney, ni rib tamilang mab yoʼor, ni morngaʼagraed.

14 Machane musap gaed, ba yoʼor yang riy ni morngaʼagen e pinʼen ni irinʼ e pi gidiiʼ ney, arragon, ni babyoren fapi Lamanites nge fapi Nephites, nge mael roraed, nge togopluw roraed, nge wagagaey ni ur tayed, nge machib roraed, nge pi prophecy roraed, nge pi fek chugum ni ur tayed u barkow nge pi dumow barkow roraed, nge pi dumow temple roraed, nge morngaʼagen tafen e pi moʼolung nge pi galasia roraed, nge pi ngongol roraed nib matʼaw, nge pi ngongol roraed nib kireb, nge pi mathang pogofan ni ur tayed, nge pi moroʼroʼ ni ur tayed, nge matgael roraed, nge gubin mite ngongolen e pi fananikan nge pi galong, e dabiyog ni ngan uneg nga lan e guruy ney e muruwel.

15 Machane musap gaed, boʼor bogi babyor nge chep nib yoʼor ni gubin mit, niʼir e ki i chaʼariy fapi Nephites nib felʼ rogon.

16 Ma kan thapeg iyib nga butʼ u rebo mfen ngo reb u paʼ fapi Nephites, iyib nge madaʼ ko ngiyalʼ ni kar awgaed nga fithikʼ e denen ma yibe thang e fan roraed, matgael ngoraed, ma yibe tuluf raed, ma yibe lʼoelʼoegraed, min liiʼraed, ma yaed be garar u dakean e fayleng, mar maʼathuk gaed nga fithikʼ fapi Lamanites nge yaeni madaʼ ko ngiyalʼ ni dakunir piningraed ni Nephites, ni bachan e kar kireb gaed, ma kar malboch gaed, ma yaed be galngach, arragon, ni bachan e kar manged Lamanites.

17 Ere chiney e nggu sul bayay ko birog e chep; ere, nʼen ni kug weliy morngaʼagen e kebuch u tomuren e pi togopluw, nge pi wagaey gapas, nge pi mael, nge pi wagagaey, u fithikʼ fapi gidiiʼ ku Nephites.

18 Me mus e bin aningeg i ragag nge nelʼ e duw ko fare lung ko fapi tapuf-oloboch.

19 Me yibi buch ni kubay e togopluw nib almarin u lan fare nam, arragon, u lan e bin aningeg i ragag nge medilip e duw, ngo lan e bin aningeg i ragag nge meruk e duw.

20 Machane Helaman e paer ko fare gilʼ e tapuf-oloboch u yalen e justice mab taʼareb laniyaenʼ nga dakean e gidiiʼ; arragon, i gay rogon ni nge koel falan fapi gamʼing nge pi puf-oloboch, nge fapi motochiyel ku Got; me rinʼ e tin nib matʼaw u pʼoewchen Got ni gubin e ngiyalʼ; me leak e pi woʼen e chitamangin, ma arame yog ni felʼ rogon u lan fare binaw.

21 Me yibi buch ni yibi fakay lʼagruw i pagael. Me tunguy fithingan e bin ilal ni fare ngachol rokʼ Nephi, ma bin bitir, ni fare ngachol rokʼ Lehi. Mar ilal gow nga fithikʼ e tirokʼ Somoel.

22 Me yibi buch ni fapi mael nge togopluw e arame tabolngin ni nge awe gapas riy, u lan ba dodow nib achichig, u fithikʼ fapi gidiiʼ ko Nephites, nib chugur nga tungun e bin aningeg i ragag nge meruk e duw ko fare lung ko fapi tapuf-oloboch nga daken e gidiiʼ ku Nephi.

23 Me yibi buch u lan e bin aningeg i ragag nge mereb duw ko fare lung ko fapi tapuf-oloboch, ma kub ʼulʼul e gapas nga lan fare binaw, ma kemus ni pi ulung nib miith morngaʼagen ni Gadianton ni fare moroʼroʼ e sunmiy ko yungin nib gaaʼ ni yibe paer riy ko fare nam, niʼir e ngiyalʼ innʼem e denang e piʼin nib gaaʼ ko am; ere dan liiʼraed nge math oewchraed u dakean fare nam.

24 Me yibi buch ni ku lan e re duw nem me gel e felʼ rogon ko monʼog u lan fare galasia, ma arame yaeni ni aw bukun e biyuʼ e piʼin nra cheag gaed ko fare galasia min tawfe nagraed u dakean e kalngaenʼ.

25 Ere ri gel e monʼog ko fare galasia, me yoʼor e pi tawaʼath ni mapʼ nga dakean fapi gidiiʼ, ni arame mus ko fapi tolang ko priest nge pi sensey me gin oewchraed nge thumʼ ngaruʼ.

26 Me yibi buch ni fare muruwel rokʼ Somoel e monʼog u dakean e tawfe nge taʼarebaenʼ ntay ko gidiiʼ nib yoʼor, nga lan fare galasia ku Got, arragon, ni yu ragag e yibuʼ.

27 Ere kad guyed ni fare Somoel e ma runguy gubin e piʼin ni ma, pining fithingan nib thothup, u fithikʼ e yulʼyulʼ.

28 Arragon, kad guyed ni fare garog nu tharmiy e bmab ngakʼ gubin e gidiiʼ, ngakʼ e piʼin nra michaenʼraed nga fithingan Yesus Kristus, niʼir e fachaʼ ni Fak Got.

29 Arragon, kad guyed ni piʼin ni baʼadag ni nge chichiʼiy ir ko fare thin ku Got, nib fos mab gel, niʼir e ra wereg gubin fapi sasaliyeb nge wup nge sabaenbaen ko fare moʼoniyanʼ, me powiʼiy e piʼin gidiiʼ rokʼ Kristus u lan ba kanawoʼ nib wuʼinʼin mab achichig radan ngar thʼibed nga barbaʼ fare loew ko gechigaenʼ ni kan tay ni nge fulʼ e pi tadenen—

30 Me thapeg e yaʼel roraed nga barbaʼ, arragon, yaʼel roraed ni dab kur mʼaed, nga baʼani matʼaw i paʼ Got u lan fare gilʼilungun nu tharmiy, ni ngar pired nga butʼ ni yaed Abraham, nge Isaac, nge Jacob, nge gubin e pi chitamangdaed nib thothup, ma dab kur chuw gaed riy.

31 Ere lan e re duw ney e ʼulʼul e falfalaenʼ riy u lan fare binaw nu Zarahemla, nge gubin e pi binaw nib liyeg, ni gubin lan e pi binaw ni tafen fapi Nephites.

32 Me yibi buch ni awe gapas me yib e falfalaenʼ nib gel u lan e gin ni magaey ko bin aningeg i ragag nge mereb e duw; arragon, ma ku aram rogon ni immoy e gapas nge falfalaenʼ nib ʼulʼul u lan e bin wugem e duw ko fare lung ko fapi tapuf-oloboch.

33 Ngu lan e bin wugem nge taʼareb e duw ko fare lung ko fapi tapuf-oloboch e ki immoy nib awe gapas, ma kemus ni ufʼuf e tabab ni nge yib nga lan fare galasia—gathi nga lan fare galasia ku Got, ya nga lan gumʼirchaʼen fapi gidiiʼ ni yaed be yoeg ni yaed bamang ko fare galasia ku Got—

34 Mar nʼufed yaed ngalang nga fithikʼ e ufʼuf, nge yaeni madaʼ ko ngiyalʼ ni kar gafgow niged boʼor i walagraed. Chiney e biney e ba ngongol ku moʼoniyanʼ, niʼir e kʼaring e gafgow ko thibthib ni almarin ngakʼ e tin baʼaray e gidiiʼ nib sobutʼaenʼraed, ma ranoed u fithikʼ e gafgow ni kirbaenʼ.

35 Yug aram rogon machane ra baley niged e abich roraed mar meybil gaed ni gubin e ngiyalʼ, mar monʼog ra monʼog gaed u fithikʼ e sobutʼaenʼ roraed, mar miyuluy ra miyuluy gaed nga fithikʼ e mich rokʼ Kristus, nge madaʼ ko ngiyalʼ ni ke sug e yaʼel roraed ko falfalaenʼ nge gapasaenʼ, arragon, nge yaeni madaʼ ko ngiyalʼ ni ke folont make machalbog gumʼirchaʼraed, nib machalbog ni yib ni bachan e kar og niged gumʼirchaʼraed ngakʼ Got.

36 Me yibi buch ni bin wugem nge lʼagruw e duw e ki mʼaey u fithikʼ e gapas, ma kemus ni fare ufʼuf ni gel e kari rich nga lan gumʼirchaʼen fapi gidiiʼ; ni bachan e falaʼab ni ke gel nge felʼ rogon roraed u lan fare nam; ma be gaaʼ nga dakeanraed u rebo rran ngo reb.

37 Me yibi buch nu lan e bin wugem nge dalip e duw ko fare lung ko fapi tapuf-oloboch, e yimʼ Helaman riy, ma arame bin thʼabi ilal e pagael ni fak ni Nephi e yinʼ luwan ko lung. Me yibi buch ni paer ko fare gilʼ e tapuf-oloboch u yalen e justice nge yulʼyulʼ; arragon, ri koel falan e pi motochiyel rokʼ Got, me leak e pi woʼen e chitamangin.